Ee na Gadu hën ta mbei u ta tja fuka, nöö ambë ta mbei gaan hangi, pena libi, feti, ku taku siki dë a goonliba sö? Ambë ta mbei gaan hogi ta pasa di ta ko booko di kamian ka u ta libi? Di Wöutu u Gadu, Bëibel, ta taki u dii soni di ta mbei libisëmbë ta tja fuka:

1. Sëmbë ta pakisei deseei nöö, de abi langawojo, nöö de ta buuse wotowan. Di Bëibel ta taki taa: „Sensi di libisëmbë bigi basi wotowan, an tja bunu ko da de” (Peleikima 8:9). Sëmbë lo’ u tja fuka u di woto sëmbë ta du ku de. Dee sëmbë dee ta libi hogi ku wotowan ta pakisei deseei nöö, de abi langawojo, söseei de abi takuhati.

2. Soni ta miti u a wan ten di wa bi mëni. Sëmbë ta tja fuka, u di „soni ta miti hiniwan fuu a wan juu di wa bi mëni” (Peleikima 9:11). Di soni aki ta pasa u di sëmbë ta dë a wan kamian a wan pisiten ka wan hogi o pasa, nasö u di sëmbë an ta booko de hedi ku wotowan, nasö u di sëmbë mbei wan föutu di tja wan hogi ko.

3. Di takuhati tiima u di goonliba. Di Bëibel ta lei u gbelingbelin andi da di soni di ta möön mbei libisëmbë ta tja fuka. A ta taki taa: „Hii . . . di goonliba aki tuu dë a didibi basu” (1 Johanisi 5:19). Di „didibi” aki, hën nöö de ta kai Saatan Didibi. A dë wan jeje di abi makiti seei. Fosufosu a bi dë wan bumbuu ëngëli u Gadu, ma „di soni de kai tuu, an dë nëën hati seei” (Johanisi 8:44). Woto ëngëli bi go nama ku Saatan tu, hën deseei hopo fia ku Gadu sö taa de bi sa du andi deseei kë. A sö wan fasi de ko toon taku jeje (Kenesesi 6:1-5). Sensi di Saatan ku dee taku jeje fëën hopo fia ku Gadu, hën de ta mbei sëmbë ta du hogihati soni a goonliba aki te kisi tide. De ta du di soni dë a di ten aki gaanfa seei. Nöunöu Didibi dë ku taanga hatiboonu, nöö a ta „ganjan sëmbë a hii di goonliba”. Fëën mbei de bai helu da di goonliba’ (Akoalimbo 12:9, 12). Awa, Saatan da wan takuhati tiima. A ta suti dëën te sëmbë ta tja fuka. Na Gadu hën ta mbei sëmbë ta tja fuka, ma Saatan wë.

BUTA PAKISEI A DI SONI AKI: Wan takuhati sëmbë nöö bi o sa ta mbei sëmbë ta tja fuka sö. Ma di Bëibel ta taki taa: „Masa Gadu, hën hatiböö da lobi” (1 Johanisi 4:8). Te u luku dee fasi dee Gadu abi, nöö u sa taki taa: „Na tuu seei taa Gadu ta du hogi e! Di Sëmbë di a’ hii makiti an sa du soni a wan hogi fasi wan daka!”​—Jöpu 34:10.

Ma kandë i ta hakisi iseei: ’Un longi di Gadu di abi hii makiti ta da Saatan pasi faa tii jeti?’ U ta fusutan taa Gadu buuse hogidu, söseei taa a ta hati ën te u ta tja fuka. Boiti di dë, di Wöutu fëën ta piki u taa: „Be i tuwë hii dee fuka fii tuu da Gadu . . . biga a a’ toobi ku i” (1 Petuisi 5:7). Gadu lobi u, söseei a abi makiti u puu hii fuka ku hogilibi a goonliba. Di soni dë woo luku a di woto di ta ko. a