A DI ten di Paulosu bi dë a libi, sipi an bi dë apaiti di bi ta tja sëmbë go a kamian. Te sëmbë bi kë go a kamian ku sipi, nöö de bi musu hakisi woto sëmbë ee de sabi wan sipi di ta tja lai, di bi o go a di kamian ka de kë go, söseei di bi o kë tja sëmbë (Tjab. 21:2, 3). Ee a bi o ko dë taa di sipi an bi o go langalanga ka di sëmbë bi kë go, u di kandë a bi o tapa a peipei kamian, nöö di sëmbë bi musu suku wan woto sipi di bi o sa tjëën go zuntu ku ka a bi kë go.​—Tjab. 27:1-6.

A wanlö apaiti pisiten u di jaa nöö sipi bi ta pasa, nöö wan sipi an bi nango a di wan seei kamian hii juu. Dee sëmbë dee bi ta tja sipi bi sa taki taa de an o tja sipi di daka dë u di di wei an bi bunu, ma so juu na di soni dë nöö bi ta mbei de an tja di sipi di daka dë möön. Di fasi fa soni bi waka a di daka seei, bi sa mbei de biibi taa hogi bi o sa miti de ee de waka di daka dë. So u de bi ta biibi taa te de bi si wan baaka fou buwa ko ta bai a di sipi, nasö te de bi si wan sipi a lampeesi bookobooko, nöö a bi dë wan maaka di ta lei taa wan soni sa du de ee de waka di daka dë. Te di ventu an bi ta böö taanga poi, nöö dee sëmbë dee bi ta tja sipi bi nango a kamian ku sipi. Te wan sëmbë bi feni wan sipi di bi kë tjëën, nöö a bi nango ku dee lai fëën a di kamian ka dee sipi ta ko tjökö, nöö a ta wakiti u te a jei de bai wan bai di ta lei taa di sipi o go, nöö a nango subi.

Wan womi di ta öndösuku soni fu awooten de kai Lionel Casson, bi taki taa: „A di foto Loomë, an bi ta taanga sö u sëmbë feni sipi u tja de go a kamian. A sö wan fasi an bi ta dë u de suku sipi deseei. Sëmbë bi sa go tei dee sipi aki a wan kamian di dë a di së u di lio de kai Tiber. A di foto Ostia wan gaan kamian bi dë ka sëmbë bi mbei wanlö kantoo buta. Dee sëmbë u dee peipei köndë ka dee sipi bi ta kumutu ta ko a Loomë, de bi ta abi dee kantoo dë. Dee sëmbë dee bi ta tja sipi kumutu a Gaan Faansiköndë bi abi wan kantoo, dee sëmbë dee bi ta tja sipi kumutu a di köndë Tunisia bi abi wan, nöö sömëni woto köndë sëmbë dee bi ta tja sipi ko tjökö a Loomë, bi abi tu. Te wan sëmbë bi ta suku sipi faa go a kamian, nöö a bi musu luku un sipi o go a di kamian ka a kë go.”

Te sëmbë bi ta waka ku sipi a di lö fasi aki, nöö de an bi ta lasi hia ten sö. Ma di soni aki bi ta tja booko hedi ko so juu. Sömëni pasi dee sipi dee bi ta tja Paulosu, bi ta singi, di a bi nango du di sëndëlengiwooko fëën.​—2 Kol. 11:25.