1. Andi hiniwan u dee dinima u Gadu kë ko sabi, nöö faandi mbei de kë ko sabi di soni dë? (Luku di peentje u di kafiti.)

JESOSI KEESITU bi piki dee bakama fëën taa de musu ’go a hii nasiön sëmbë, nöö de mbei de ko dë bakama fëën’ (Mat. 28:19). Hii dee dinima u Gadu kë ko sabi unfa de sa du di wooko di Jesosi manda de u de du (2 Tim. 4:5). Di wooko aki bunu möön hiniwan woto wooko di wan sëmbë bi o sa du. Nöö wa musu biabia u du di wooko aki. Ma a sa ta taanga da so fuu, fuu feni ten u du di wooko aki kumafa u bi o këën.

2. Andi sa mbei a ta taanga da u fuu du di diniwooko fuu finifini?

² Woto fanöudu soni dë tu di ta tei di ten fuu ku di kaakiti fuu. Kandë u ta wooko sömëni juu longi fuu sa feni möni tjika fuu sölugu useei ku dee sëmbë fuu wosudendu. Kandë u abi woto faantiwöutu a di wosudendu fuu, kandë u dë ku suwaki, kandë u ta fii bookosaka, nasö kandë u lo’ u fii pen u di u ta ko gaandi. Unfa u sa ta du di diniwooko fuu finifini hii fa dee fuka aki ta miti u?

3. Andi u ta ko fusutan te u luku di soni di Jesosi bi taki a Mateosi 13:23?

³ Ee di fasi fa soni ta waka a di libi fuu, ta mbei a ta taanga da u fuu feni ten fuu sa ta du di diniwooko fuu, nöö wa musu lasi hati. Jesosi bi sabi taa na hii u tuu bi o sa paaja di bunu buka u di Könuköndë a di wan seei fasi, u di na hii u tuu bi o abi ten ku kaakiti tjika fuu sa du ën kumafa u bi o këën. (Lesi Mateosi 13:23.) Jehovah ta tei hii dee soni dee u ta du a di dini fëën u bigi, solanga u ta du hii soni di u sa du (Heb. 6:10-12). Ma kandë u ta si taa u sa du möön soni a di dini fëën. A di woto aki woo luku unfa u sa buta di diniwooko fuu a di fosu kamian a u libi, woo luku unfa u sa köni u soni an puu u pakisei a di diniwooko fuu, woo luku unfa u sa mbei möiti fuu ko ta peleiki möön bunu,  söseei woo luku unfa u sa ko ta lei sëmbë soni möön bunu. Ma andi a kë taki u du di diniwooko fuu finifini?

4. Andi a kë taki u du di diniwooko fuu finifini?

⁴ Ee fuu taki ën, nöö di du di u musu ta du di diniwooko fuu finifini, kë taki taa u musu mbei möiti fuu sa ta peleiki, ta lei sëmbë soni u Bëibel ka u sa du ën dou. Ma na mbei nöö u musu ta mbei möiti fuu ta peleiki möön hia, ma u musu ta öndösuku useei luku fuu ko sabi faandi mbei u ta peleiki tu. Jehovah ta luku faandi mbei u ta dini ën tu. U di u lobi Jehovah, söseei u di o lobi wotowan, mbei u ta mbei hii möiti fuu sa ta du di diniwooko fuu kuma Keesitu sëmbë. * (Maik. 12:30, 31; Kol. 3:23). U ta dini Gadu ku hii u hati te u ta tei di kaakiti fuu u du hii soni di u sa du a di dini di u ta dini ën. Te u ko fusutan taa di peleiki di u sa peleiki da wan gaandi du u feni, nöö woo ta mbei hii möiti fuu paaja di bunu buka da sëmbë.

5-6. Konda wan woto di ta lei u unfa wan sëmbë sa mbei di peleiki di a ta peleiki ko dë di möön fanöudu soni nëën libi, hii fa a abi hia soni ta du.

⁵ Pakisei wan njönku kijoo di lo’ u pëë gitali. Solanga a feni di okasi, a ta pëë gitali. Ma u di a musu wooko faa sa sölugu hënseei, mbei a ta bigi du wan wooko ka a ta wooko munde u te feeda, a wan wënkë. Hii fa a ta du di wooko dë seei, tökuseei a möön lo’ di gitali u pëë. A kë ko sa’ u pëë di gitali möön bunu faa sa ko dë wan bumbuu pëëgitalima. Fëën mbei a ta tei hiniwan okasi di a feni, faa ta pëë di gitali pikisö seei.

⁶ Sö nöö a dë tu taa kandë ja ta feni ten tjika fii ta du di peleikiwooko kumafa i bi o kë du ën. Ma tökuseei di wooko dë i lobi. I ta mbei möiti fii ko sa’ u peleiki möön bunu, fii sa dou sëmbë hati ku di bunu buka. Ma u di i abi sömëni soni ta du, mbei i sa ta hakisi iseei ee unfa joo du mbei di peleiki di i ta peleiki ko dë di möön fanöudu soni a i libi.

7-8. Unfa u sa djeesi Jesosi a di fasi fa a bi ta du di diniwooko fëën?

⁷ Jesosi da wan sëmbë di u sa djeesi a di fasi fa a bi ta du di diniwooko fëën. Jesosi bi ta  si di konda di a bi musu ta konda soni u di Könuköndë u Gadu da sëmbë kuma di möön fanöudu soni nëën libi (Joh. 4:34, 35). A bi ta waka höndöhöndö kilomëti longi faa bi sa go peleiki da sëmbë. Hii juu a bi ta suku wan fasi faa bi sa go peleiki da sëmbë a de pisi, nasö a woto kamian. Jesosi bi ta buta di peleiki di a bi musu ta peleiki a di fosu kamian nëën libi.

⁸ U sa djeesi Keesitu, te u ta suku hiniwan okasi di u feni fuu sa paaja di bunu buka da sëmbë aluwasi ka de dë. U dë kabakaba fuu disa so soni fuu sa du di peleikiwooko (Maik. 6:31-34; 1 Pet. 2:21). So sëmbë a di kemeente ta du di apaiti pioniliwooko, so u de ta du di kowoonu pioniliwooko, nasö de ta du di heepi pioniliwooko. Wotowan ta lei wan woto töngö, nasö de ta foloisi go libi a wan kamian ka möön hia peleikima dë fanöudu. Ma tökuseei u sa taki taa dee woto peleikima, de ta du gaansë u di wooko di ta du a hii së u goonliba, hii fa de an sa du di pioniliwooko. Jehovah an ta hakisi u fuu du andi wa sa du. A kë u hii u tuu musu ta wai ku di paaja di u ta paaja „di gaan waiti buka u di Gadu di dë u gafa nöömö”.​—1 Tim. 1:11; Deto. 30:11.

9. (a) Unfa Paulosu bi ta buta di peleikiwooko a di fosu kamian nëën libi, hii fa a bi musu wooko u sölugu hënseei? (b) Andi Tjabukama 28:16, 30, 31 ta lei u u di fasi fa Paulosu bi ta du di diniwooko fëën?

⁹ Apösutu Paulosu seei u sa ta djeesi a di fasi fa a bi ta buta di diniwooko fëën a di fosu kamian nëën libi. Di a bi dë a Kolenti a di u tu pasi di a bi go du di sëndëlengiwooko fëën, hën möni fëën bi ko ta kaba. Fëën mbei a bi bigi mbei tenti. Ma na di mbei di Paulosu bi ta mbei tenti hën bi dë di möön fanöudu soni dëën. A bi ta du di wooko aki, faa bi sa ta paaja di bunu buka da dee sëmbë a Kolenti ’söndö u tei möni a de’ (2 Kol. 11:7). Hii fa Paulosu bi musu ta wooko faa sa sölugu hënseei, tökuseei a bi ta si di diniwooko fëën kuma di möön fanöudu soni nëën libi. Fëën mbei a bi ta peleiki hiniwan Saba daka. Ma di soni bi ko tooka, nöö a bi ta du „di wooko u Masa Gadu ku telu. A [bi] ta fan ku dee Dju sëmbë nöömö taa Masa Jesosi hën da di Paamusi Könu [di] de bi ta luku” (Tjab. 18:3-5; 2 Kol. 11:9). Di siköutu bi kisi Paulosu söötö buta a Paulosu pisi a Loomë tu jaa longi, hën a bi ta peleiki da dee sëmbë dee bi ta ko luku ën, söseei a bi ta manda biifi da sëmbë. (Lesi Tjabukama 28:16, 30, 31.) Paulosu an bi kë u na wan soni puu hën pakisei a di diniwooko fëën. A bi taki taa: „Masa Gadu buta u a di wooko aki . . . , nöö hën mbei wa ta lasi hati” (2 Kol. 4:1). Aluwasi ee u musu ta wooko fuu sölugu useei, tökuseei u sa mbei di Könuköndë wooko ko dë di möön fanöudu soni a u libi, leti kumafa Paulosu bi du ën.

10-11. Unfa u sa du di diniwooko fuu, hii fa u ta dë ku suwaki?

¹⁰ Aluwasi wa sa nango ta peleiki a sëmbë pisi kumafa u bi o kë du ën, u di u ko gaandi kaa, nasö u di u ko ta suwaki, tökuseei u sa du di peleikiwooko a wan woto fasi. Dee fesiten Keesitu sëmbë bi nango peleiki da sëmbë aluwasi ka de dë. De bi ta konda soni u di tuutuu lei da wotowan a hiniwan okasi di de bi feni. De bi ta peleiki a sëmbë pisi, a kamian ka hia sëmbë ta waka pasa, söseei de bi ta peleiki da hiniwan sëmbë di de bi miti a woto kamian. U sa taki taa de bi ta peleiki a hiniwan kamian ka de bi sa miti sëmbë (Tjab. 17:17; 20:20). Ee kandë wa sa waka go a longi kamian, nöö u sa sindo a wan kamian ka hia sëmbë ta waka pasa, sö taa u sa peleiki da de. Nasö u sa ta peleiki a woto kamian, u sa sikifi biifi, nasö u sa bëli sëmbë u peleiki da de. Sömëni peleikima di an sa nango ta peleiki a sëmbë pisi, u di de ko gaandi nasö u di de ko ta suwaki, sa ta piizii u du di peleikiwooko a woto fasi tu.

¹¹ Aluwasi ee i dë ku suwaki, tökuseei i sa du di diniwooko fii. Boo toona luku di woto u apösutu Paulosu. A bi taki taa: „Mi sa du hii soni, u di di sëmbë di ta heepi mi ta da mi kaakiti”  (Fil. 4:13, NW). Paulosu bi abi di kaakiti aki fanöudu di a bi ko dë ku suwaki di a bi go du di sëndëlengi wooko fëën. A bi piki dee baaa ku dee sisa u Galasia taa: „Di soni mbei mi bi ko fika ku unu ala. Mi bi suwaki e, [nöö hën wë un bi hoi mi. Nöö fa un bi hoi mi dë,] nöö naandë a waka mbei mi konda di Buka u Masa Jesosi fosu toon da unu” (Gal. 4:13). Wë sö nöö a sa kan taa u di i ko dë ku suwaki mbei i sa ta peleiki da dee data, dee sösutu, nasö da dee sëmbë dee ta ko sölugu i a wosu. Sömëni u dee sëmbë aki ta dë a wooko te dee peleikima nango a de pisi u peleiki da de.

12. Andi a kë taki taa wojo fuu musu „dë kuma wan lampu faja”?

¹² Jesosi bi taki taa: „Di wojo fii di dë a i sinkii dë, nöö a dë kuma wan lampu faja fii sa si soni limbolimbo. Nöö te i ta si soni sö kaa, nöö hii libi fii o dë gbegedee limbolimbo” (Mat. 6:22). Andi Jesosi bi kë taki ku di soni aki? Wë a bi kë taki taa u musu seti di libi fuu a wan fasi di o mbei taa wa ta booko u hedi ku te a hia soni, ma pakisei fuu musu dë a wan soni nöö, nöö wa musu mbei soni puu u pakisei a di soni dë. Jesosi bi lei u ku di fasi fa a bi ta libi taa a bi ta buta hii hën pakisei a di diniwooko fëën. A bi lei dee bakama fëën taa de musu ta buta hii de pakisei a di dini di de ta dini Jehovah, söseei taa de musu ta buta pakisei a di Könuköndë fëën. U ta djeesi Jesosi te u ta mbei di peleikiwooko ko dë di möön fanöudu soni da u, nasö te u ta ’biinga fuu ta dë a di Tii u Masa Gadu dendu ta libi kumafa a kë’.​—Mat. 6:33.

13. Andi sa heepi u fuu buta hii u pakisei a di diniwooko fuu kuma Keesitu sëmbë?

¹³ Wan soni di u sa du u lei taa u ta buta hii u pakisei a di diniwooko fuu, da te wa ta lasi di  ten fuu a soni di an dë fanöudu. Di soni aki o da u pasi fuu sa ta heepi wotowan u de ko sabi Jehovah, söseei woo sa heepi de u de ko lobi ën. * Kandë u sa seti di wooko juu fuu a sö wan fasi taa u sa nango möön hia pasi a di peleikiwooko a di wiki dendu. Nasö kandë wa musu ta du soni u mbei piizii sö hia möön kumafa u bi naa.

14. Andi wan baaa ku hën mujëë bi du sö taa de bi sa du möön soni a di diniwooko?

¹⁴ Luku andi wan gaanwomi de kai Elias, ku hën mujëë bi du. Elias bi taki taa: „Wa bi sa bigi du di pioniliwooko wantewante, ma u bi sa mbei möiti fuu nango möön gaanfa a di peleikiwooko. Fëën mbei pikipiki u bi bigi ko ta peleiki möön gaanfa. Wa bi ta bai hia soni sö möön. Söseei u bi ko si taa u bi ta tei hia ten poi u mbei piizii, nöö fëën mbei wa bi ko ta du ën sö gaanfa möön. U bi hakisi dee basi fuu tu u de sa tooka dee juu dee u bi ta wooko, sö taa u bi sa feni möön ten fuu sa nango a di peleikiwooko. Di soni aki bi mbei u bi sa nango ta peleiki a sapate, fuu lei möön hia sëmbë soni u Bëibel, söseei a bi mbei u bi sa ta du di peleikiwooko a mindi wiki tu pasi a wan liba. U bi ta piizii seei taa u bi sa du di soni aki!

15-16. Te u luku di soni di sikifi a 1 Timoteo 4:13, 15, nöö unfa u sa ko sa’ u du di peleikiwooko möön bunu? (Söseei luku di pisi „ Soni di sa heepi i fii ta du di diniwooko fii finifini”.)

¹⁵ Wan woto soni di sa heepi u fuu du di diniwooko fuu finifini, da te u ta mbei möiti fuu du di peleikiwooko a wan möön bunu fasi. Sëmbë di ta du so wooko musu nango ta lei soni u di wooko u de hii juu, u de sa ko sa’ u du di wooko u de möön bunu. Sö a dë tu ku dee Könuköndë  peleikima. U musu ta mbei möiti go dou fuu sa ko sabi unfa u musu du di peleikiwooko a wan möön bunu fasi.​—Nöng. 1:5; lesi 1 Timoteo 4:13, 15.

¹⁶ Andi u musu du fuu sa du di peleikiwooko möön bunu? Wë di soni di u sa du, hën da u sa ta buta pakisei a dee soni di de ta lei u a Di libi ku di diniwooko fuu komakandi, di u ta hoi a mindi wiki. Di komakandi aki ta heepi u fuu ko sa’ u peleiki möön bunu. Te di fesima u di komakandi ta heepi dee baaa ku dee sisa di bi hoi wan taki u de ko fusutan unfa de sa du soni möön bunu, nöö u sa lei soni di sa heepi u te u ta du di peleikiwooko. Nöö u sa wooko ku dee soni aki te u miti wan sëmbë a di peleikiwooko. U sa hakisi di baaa di ta tei fesi a di peleikiwooko kulupu fuu faa heepi u nasö u sa wooko makandi ku ën. Nasö u sa wooko ku wan woto baaa nasö wan sisa di sa’ u peleiki bunu, nasö di ta du di pioniliwooko. Boiti di dë, u sa wooko ku wan keling-gaanwomi tu. Te u ko sa’ u wooko ku hiniwan buku di u ta tei u peleiki, nöö woo ko möön lobi di peleikiwooko, söseei woo ta kë möön lei sëmbë soni u Bëibel.

17. Andi o pasa te i ta du di diniwooko fii finifini?

¹⁷ Wan gaandi seei wë u feni fa Jehovah ko da u pasi fuu ’ku ën sa wooko makandi’! (1 Kol. 3:9) Te i ’ko sa’ u wegi soni te i kaba luku ee undi da di möön bunu wan fii tei’, söseei te i ta buta hii i pakisei a di diniwooko fii kuma Keesitu sëmbë, nöö joo sa „dini Jehovah ku piizii” (Fil. 1:10; Ps. 100:2). U di i da wan u dee dinima u Gadu, mbei i sa dë seiki taa Gadu o da i di kaakiti di i abi fanöudu fii sa du di diniwooko fii, aluwasi un fuka i abi (2 Kol. 4:1, 7; 6:4). Aluwasi ee di fasi fa soni ta waka a di libi fii ta da i pasi fii ta peleiki hia, nasö fii ta peleiki pikisö nöö, tökuseei joo sa ta „dë waiwai” ee i ta du di peleikiwooko ku hii i hati (Gal. 6:4). Te i ta du di diniwooko fii finifini, nöö i ta lei taa i lobi Jehovah, söseei taa i lobi woto sëmbë tu. „Te i ta libi sö kaa nöö joo puu iseei a hogi basu, i ku dee oto sëmbë dee ta haika i dë tuu.”​—1 Tim. 4:16.