Winston, u kë hakisi i fii konda da u unfa i bi ta suku Gadu tjika.

Mi mama ku mi tata kiija mi a wan kamian ka u bi ta kiija mbeti a di foto Queensland a Ösutualia. Dee sëmbë u mi an bi nango a keiki. U di u bi ta libi a wan boiti kamian, mbei ma bi ta miti hia sëmbë. Di mi bi abi 12 jaa, hën mi bigi suku Gadu baka. Mi bi begi ën, hën mi hakisi ën faa heepi mi u mi ko sabi soni fëën. Bakaten mi bi foloisi kumutu a di kamian ka u bi ta libi, hën mi feni wooko a di foto de kai Adelaide a wan woto pisiwata u di köndë. Di mi bi abi 21 jaa, hën mi miti Pam. Mi bi dë a fakansi a di foto de kai Sydney. Pam bi konda soni u wan keiki de kai British-Israel da mi. A di keiki aki, de ta lei sëmbë taa dee sëmbë u Ingisiköndë da bakamii u dee lö u dee Isaëli sëmbë dee bi paaja go libi a peipei köndë. Dee sëmbë u di keiki taki taa dee lö dë da dee teni lö u di bausë könuköndë di bi go a katibo a di jaa 740 Bifö Keesitu. Di mi toona go baka a di foto Adelaide, hën mi taki u di soni aki ku wan sëmbë di mi ku ën bi ta wooko a di wan kamian. A bi bigi lei soni u Bëibel ku dee Jehovah Kotoigi. Mi ku ën fan wantu juu longi. U bi taki möön gaanfa u soni di dee Kotoigi ta biibi. Baka di dë, hën mi ko fusutan taa Gadu bi piki di begi di mi bi begi ën, di mi bi möön njönku. Mi bi ko ta lei soni u di Gadu di mbei mi, söseei u di Könuköndë fëën! Mi bi feni wan ’gaan waiti djamati sitonu’.​—Mat. 13:45, 46.

Pam, wë iseei bi bigi suku di djamati sitonu dë di i bi njönku. Unfa i bi du feni ën?

Dee sëmbë u mi bi nango a keiki. De kiija mi a di foto de kai Coffs Harbour, di dë a New South Wales. Mi mama, mi tata ku dee avo u mi bi ta biibi dee soni di di keiki de kai British-Israel bi ta  lei sëmbë. Mi bi abi wan piki baaa ku wan gaan sisa. Mi mama sisa bi abi tu mujëë mii, nöö mi tio bi abi dii womi mii ku wan mujëë mii. De bi lei u taa Gadu ta möön luku dee bakamii u dee sëmbë u Ingisiköndë. Ma bi ta kaba biibi dee soni dë, nöö mi bi ta si taa ma bi sabi soni u Gadu tjika. Di mi bi abi 14 jaa, hën mi bi go a sömëni keiki. Wantu u dee keiki ka mi bi go da di Anglikan keiki, di Baptist keiki, ku di Seventh-day Adventist keiki. Ma tökuseei de an bi heepi mi u mi ko sabi soni u Gadu.

Bakaten, hën dee sëmbë u mi foloisi go libi a di foto Sydney ka mi bi miti Winston, di bi dë a fakansi. Kumafa a bi taki djunsu dë, nöö di taki di u bi taki soni u Gadu, hën bi dëën taanga faa bigi lei soni ku dee Kotoigi. Baka di dë, a bi ta sikifi sömëni Bëibel tëkisi buta a dee biifi dee a bi ta manda da mi! Ma musu ganjan i e. Bigibigi di soni bi ta toobi mi, nöö hati u mi bi ta boonu tu. Ma pikipiki mi bi ko si taa tuutuu soni di nama ku Gadu a bi ta sikifi da mi.

A di jaa 1962, hën mi foloisi go libi a di foto Adelaide u mi sa go dë möön zuntu ku Winston. A bi seeka soni da mi sö taa mi bi sa libi a wan womi ku hën mujëë pisi, di bi dë Kotoigi. Dee sëmbë dë da Thomas ku Janice Sloman. De bi ta du di sëndëlengiwooko a di köndë de kai Papua New Guinea. De bi libi bunu ku mi seei. Mi bi abi 18 jaa nöö, nöö de bi heepi mi u mi ko sabi möön soni u Jehovah. Sö miseei bi bigi ko ta lei soni u di Wöutu u Gadu. An tei longi seei, hën mi bi ko dë seiki taa mi feni di tuutuu biibi. Baka di mi ku Winston tööu, hën u bigi dini Jehovah fajafaja. Soni bi miti u, ma di dini di u bi ta dini Jehovah makandi bi heepi u fuu möön tei di djamati sitonu di u bi feni u bigi.

Winston, u kë hakisi i fii konda da u unfa soni bi waka a dee fosu jaa dee un bi bigi dini Jehovah.

Wë kölö sö baka di mi ku Pam tööu, hën Jehovah bigi da u apaiti wooko a di dini di u bi ta dini ën (1 Kol. 16:9). Di soni di u bi musu du u dini Jehovah fajafaja, hën da u bi musu du di kowoonu pioniliwooko. Baaa Jack Porter ku hën mujëë Roselyn bi da u taanga fuu du di wooko dë. Di baaa dë hën bi dë di keling-gaanwomi di bi ko luku di piki kemeente ka u bi dë. (Nöunöu mi ku ën ta wooko makandi a di Bëikantoo Komite u Ösutualasia.) Mi ku Pam bi du di pioniliwooko feifi jaa longi. Di mi bi abi 29 jaa, hën de hakisi mi ku Pam fuu du di keling-wooko a wanlö paati u di ze de kai Pacific. Bakaten, di bëikantoo u Fidji hën bi ko ta luku di wooko a dee paati dë. Dee paati dë da Amëëkan Samoa, Samoa, Kilibati, Nauru, Niue, Tokelau, Tonga, Tuvalu, ku Vanuatu.

A di ten dë, dee sëmbë di bi ta libi a dee paati di an bi zuntu ku ka sëmbë ta libi, an bi ta futoou dee Jehovah Kotoigi. Fëën mbei u bi musu ta köni (Mat. 10:16). Sëmbë an bi hia a dee kemeente a di ten dë, nöö dee baaa ku dee sisa an bi ta abi kamian da u fuu duumi. Fëën mbei u bi ta hakisi dee sëmbë u dee kamian dë ee de bi o sa hoi u a de pisi. Dee sëmbë bi ta libi bunu ku u seei.

Winston, i da wan sëmbë di lobi di puu di sëmbë ta puu buku ku woto soni ko a peipei töngö. Unfa a du ko taa i lobi ën sö?

Di u bi bigi ku di wooko fuu a di paati de kai Tonga, nöö wantu talakitaati ku wanlö piki buku nöö bi dë a di Tongatöngö. Te u bi dë a di peleikiwooko, nöö u bi ta lei sëmbë soni ku di buku „Di tuutuu lei di ta tja sëmbë go a teego libi”, a Ingisitöngö. Di mi ku wanlö baaa bi dë a wan gaanwomi siköö fö wiki longi, hën dii baaa di an bi ta kaba ta fusutan di Ingisitöngö bi dë kabakaba u puu di buku dë ko a Tongatöngö. Pam bi sikifi dee soni da u ku masini, hën u manda di buku go a di bëikantoo fu Amëëkanköndë u de doloki ën. U bi du hii di wooko dë a aiti wiki dendu. Hii fa dee baaa an bi kaba puu di buku ko sö bunu a di töngö, tökuseei a bi heepi gaan hia sëmbë di bi ta fan di Tongatöngö u de ko sabi soni u di tuutuu lei. Mi ku Pam an ta puu buku ko a woto töngö, ma di heepi di u bi heepi ku di wooko dë, bi mbei u ko lobi soni fëën seei.

 Pam, i sa konda da u unfa di libi a dee peipei paati dë bi tooka ku di libi a Ösutualia u?

A bi tooka seei o! A so u dee kamian ka u i nango, i bi ta abi gaan hia maku, söseei so kamian bi ta kendi gaanfa seei. Dökuföutu seei bi dë a di köndë, u bi ta suwaki, nöö so juu wa bi ta abi soni u njan tjika. Ma te ndeti bi ta ko, nöö a bi ta suti da u seei te u bi dë a di wosu fuu ta luku di ze. Dee sëmbë u Samoa ta kai dee lö wosu dë fale. Dee wosu dë dë kuma gangansa, nöö uwii de buta a de liba. So juu di libawojo bi ta tuwë limbo so gaanfa taa u bi ta si dee kökönötö pau a ndeti, nöö u bi ta si di libawojo te u bi ta luku di ze. U bi ta pakisei fundu u soni te u bi ta si dee soni aki, nöö u bi ta begi Jehovah tu. Di soni dë bi ta heepi u fuu ta pakisei bunu soni te di libi bi ta taanga da u.

U bi ko lobi dee mii u dee köndë dë seei, u di de bi lo’ u mbei u lafu. De bi ta kë sabi soni fuu, möönmöön u di u bi dë bakaa di kumutu a woto köndë ko a de. Di u bi go a di paati de kai Niue, hën wan piki womi mii kisi Winston panjan a maun, hën a piki ën taa: „Mi lobi dee puuma fii sinkii e.” An bi si sëmbë maun ku puuma sö wan daka, nöö an bi sabi andi a bi musu taki u de tu!

A bi ta hati u seei te u bi ta si fa dee sëmbë bi pooti, ku te u bi ta si fa di libi bi ta taanga da de. De bi ta libi a wan waiti kamian, ma de an bi abi bumbuu data heepi, söseei de bi ta pena u wata u bebe. Ma an bi ta djei kuma di soni dë bi ta toobi dee baaa ku dee sisa. Di libi dë de bi guwenti kaa. De bi ta wai taa dee famii u de bi ta libi a de bandja, söseei de bi ta wai taa de bi abi wan kamian ka de bi sa ta dini Jehovah. Di fasi fa de bi ta libi bi heepi u fuu bi ta möön booko u hedi ku dee möön fanöudu soni, söseei fu wa suku gaangaan soni a di libi.

Wë Pam, so juu i bi musu go kisi wata iseei, söseei i bi musu ta boi soni a wan fasi di ja bi guwenti. Andi bi heepi i?

Mi ta tei ën u bigi seei taa mi tata bi lei mi so soni. A bi lei mi unfa mi sa mbei faja a döö u boi soni, söseei unfa mi bi musu libi ee ma bi abi hia soni. Wan pasi di u bi go a Kilibati, nöö u bi musu libi a wan piki wosu. A bi dë wan uwii wosu. Di wosu goon bi dë ku wanlö waitiwaiti soni de kai koraal, söseei de bi mbei di wosu sinkii ku kpama. Te mi bi musu boi soni, nöö mi bi ta diki wan baaku a goon, nöö mi bi ta buta kökönötö kokoo go nëën u mbei faja. Te mi bi musu kisi wata, nöö mi bi nango ku dee woto mujëë u di köndë a wan wata baaku fuu ba wata. Wan pau de bi ta tei u hai di wata tja ko a liba. Di pau dë bi sa langa söwan tu mëti, nöö de bi tai wan tatai nëën buka. A bi dë kuma huku pau sö. Ma na huku njanjan de bi buta nëën buka, ma wan beenki. Hiniwan u dee mujëë bi ta tuwë di beenki go a di wata, nöö di beenki bi ta kai ku bandja, nöö di wata bi nango nëën dendu, nöö de hopo tja ko a liba. Mi bi ta si kuma an bi taanga u kisi di wata, u tefa di juu dou u miseei kisi tu. Mi bi tuwë di beenki go sömëni pasi a di baaku dendu, ma di beenki bi ta fika a liba wata! De bi ta kii mi ku lafu. Hën wë wan u dee mujëë ko heepi mi. Hii juu dee sëmbë u di köndë bi ta heepi wotowan.

Un bi lobi di wooko fuunu a dee paati dë seei. Un bi o sa konda wantu woto dee un lobi da u ö?

Winston: A bi tei ten fuu bi ko sabi so u dee guwenti u dee sëmbë. Te dee baaa ku dee sisa bi kai u fuu ko njan ku de, nöö de bi ta da u hii di njanjan di de bi abi. Ma fosu, wa bi sabi taa wa bi musu tei hii di njanjan. Hën mbei u bi ta njan hii di njanjan tuu! Ma di u bi ko sabi, nöö u bi ta disa da de. Hii fa u bi ta mbei dee lö föutu dë, tökuseei dee baaa ku dee sisa an bi ta booko de hedi ku dee soni dë. Dee baaa ku dee sisa bi ta wai seei te u bi nango a di kemeente fuu du di keling-wooko. U nöö bi da dee Kotoigi di de bi ta miti a di ten dë.

Di du di u bi nango ta du di keling-wooko bi tja gaan bunu ko. Sömëni u dee sëmbë u di pisiwata dë bi ta mëni taa hopo dee baaa ku dee sisa fuu bi hopo wan keiki u de. Fëën mbei di de bi si taa wan baaa ku hën mujëë bi kumutu te  a wan longi kamian ko luku dee baaa ku dee sisa u di pisiwata dë, hën a bi bigi da de te na soni.

Pam: Wë mi ta mëni di u bi dë a Kilibati, nöö wantu baaa ku sisa nöö bi dë a di kemeente. Baaa Itinikai Matera wanwan bi dë gaanwomi u di kemeente, nöö a bi ta mbei möiti u heepi u hii juu. Wan daka a bi ko luku u ku wan manda ku wan kodo obo a dendu, hën a taa: „Un luku aki.” A di ten dë, wa bi ta feni ganian obo njan. U bi tei ën u bigi seei.

Pam, baka wantu jaa, i bi ko dë ku bëë, ma di mii bi ko dëdë a i bëë. Andi bi heepi i fii pasa dee taanga ten dë?

Mi bi ko dë ku bëë a di jaa 1973 di mi ku Winston bi dë a South Pacific. U bi toona go a Ösutualia baka, nöö baka söwan fö liba hën di mii ko dëdë a mi bëë. A bi hati Winston seei. Baka wan pisiten, an bi ta hati mi sö möön, ma ma bi kaba kisi miseei u tefa u feni di Waktitoren u 15 u piki-deewei-liba u 2009. A bi sikifi a di pisi „Aksi fu leisiman” taa: „Efu wan beibi dede na ini en mama bere, dan a kan kisi wan opobaka?” Di woto dë bi mbei u ko fusutan taa Jehovah hën o taki andi musu pasa, söseei taa hii juu a ta du soni a wan leti fasi. A o puu dee pen dee u ta fii a di hogi goonliba aki, u di a manda di womi mii fëën ko „faa poi dee wooko u di didibi” (1 Johanisi 3:8). Söseei di woto bi heepi u fuu tei ën u bigi taa u dee sëmbë u Jehovah abi wan ’gaan djamati sitonu’! Wa bi o dë na wan hojo soni ee Gadu an bi paamusi u di Könuköndë fëën.

U bi toona bigi di hii-ten diniwooko, baka di mi bi lasi di bëë. U bi dë wantu liba a di Bëtëli u Ösutualia, hën baka di dë u bi go dou ku di keling-wooko. A di jaa 1981 di u bi dë söwan fö jaa a South Wales ku Sydney, hën de kai u tja go a di Bëtëli u Ösutualia, nöö naandë u dë jeti.

Winston, di libi di i bi libi a dee paati bi heepi i fii wooko a di Bëikantoo Komite u Ösutualasia möön bunu ö?

Aai, a sömëni fasi seei. De bi hakisi di bëikantoo u Ösutulia u de luku dee paati fu Amëëkan Samoa ku Samoa. Baka di dë, di bëikantoo u New Zealand ku di u Ösutualia bi ko toon di bëikantoo u Ösutualasia. Nöunöu di bëikantoo u Ösutualasia hën ta luku dee pisiwata u Amëëkan Samoa ku Samoa, hën ta luku dee paati de kai Cook, New Zealand, Niue, Timor-Leste, Tokelau, ku Tonga, nöö mi bi go luku gaansë u dee paati dë kuma baaa di di bëikantoo manda go. Di wooko di mi bi wooko makandi ku dee baaa ku dee sisa a dee paati, ta heepi mi seei u wooko makandi ku de, fa mi dë nöunöu a di bëikantoo aki.

Di soni di mi ku Pam ko si, hën da na gaan sëmbë wanwan ta suku Gadu. Njönkuwan seei kë di gaan waiti ’djamati sitonu’, aluwasi ee dee famii u de an këën (2 Kön. 5:2, 3; 2 Klon. 34:1-3). Fuu taki ën kumafa a dë, Jehovah da wan lobihati Gadu di kë taa hii sëmbë, njönkuwan ku gaanwan tuu musu feni libi.

Di mi ku Pam bi bigi suku Gadu söwan 50 jaa pasa, nöö wa bi sabi andi u bi o feni. Dee tuutuu soni dee u ko sabi u di Könuköndë dë kuma wan gaan dii djamati sitonu! U kë mbei hii möiti fuu sa hoi di gaan dii djamati sitonu aki gingin!