1. Andi Jehovah ta si a dee sëmbë fëën?

JEHOVAH GADU „ta wai ku dee sëmbë fëën” (Ps. 149:4). Di soni aki ta da u piizii seei! Jehovah ta si dee bunu fasi dee u abi. A ta si taa u sa ko ta du soni a wan möön bunu fasi, söseei a ta heepi u fuu ku ën sa ko dë mati. Ee u ta du dee soni dee a ta piki u, nöö u ku ën o dë mati u nöömö!​—Joh. 6:44.

2. Faandi mbei a ta taanga da so sëmbë u de biibi taa Jehovah lobi de?

² So sëmbë sa ta taki taa: ’Mi sabi taa Jehovah lobi dee sëmbë fëën. Ma unfa mi sa dë seiki taa Jehovah lobi mi apaiti?’ Andi sa mbei wan sëmbë ta hakisi hënseei di soni dë? Sömëni soni bi miti wan sisa de kai Oksana, * di a bi möön njönku. A bi taki taa: „Mi bi ta wai seei di mi bi dopu, söseei di mi bi bigi du di pioniliwooko. Ma 15 jaa baka di dë, hën mi bi bigi ta mëni dee hogi soni dee bi miti mi, di mi bi dë piki mii. Di soni dë bi mbei taa mi bi ko ta si kuma ma bunu a Jehovah wojo möön, söseei taa ma bunu tjika faa lobi mi möön.” Sömëni soni bi miti wan sisa de kai Yua tu di a bi dë piki mii. Di sisa aki ta du di pioniliwooko, nöö a bi taki taa: „Mi bi buta mi libi a Jehovah maun, u di mi bi kë faa ta wai ku mi. Ma mi bi ta biibi taa an bi o sa lobi mi nöiti.”

3. Andi woo luku a di woto aki?

³ Dee tu sisa dee u taki soni u de djunsu dë lobi Jehovah tuutuu, nöö iseei lobi ën tu. Ma kandë ja kaba dë seiki ee a lobi i tuutuu. Faandi mbei i musu ko dë seiki taa a lobi tuutuu? Andi sa heepi i te i ta si kuma Jehovah an lobi i? Boo piki dee hakisi aki.

4. Faandi mbei hogi sa miti u te wa ta kaba biibi taa Jehovah lobi u?

⁴ Lobi da wan soni di ta da sëmbë taanga u du soni. Ee u dë seiki taa Jehovah lobi u, söseei taa a ta heepi u, nöö di soni dë o da u taanga fuu dini ën ku hii u hati, aluwasi di libi ta taanga da u. Ma ee wa kaba ta biibi taa Jehovah ta booko hën hedi ku u, nöö ’wa o abi kaakiti tjika’ (Nöng. 24:10). Nöö te u bigi si kuma Gadu an lobi u, nöö wa o sa hoi dou te Saatan ta pooba u.​—Ef. 6:16.

5. Andi bi pasa ku so sëmbë, u di de an bi ta kaba biibi taa Jehovah lobi de?

⁵ So u dee baaa ku dee sisa fuu bi bigi ko ta si kuma Jehovah an lobi de, söseei taa an ta booko hën hedi ku de. Nöö di soni dë bi mbei taa de an bi abi wan taanga biibi möön. Wan gaanwomi de kai James, bi taki taa: „Mi ta wooko a Bëtëli. Mi dë a wan kemeente ka de ta fan wan woto töngö, nöö mi lobi te mi ta peleiki da sëmbë a di töngö dë. Ma tökuseei ma bi dë seiki ee Jehovah bi ta wai ku dee soni dee mi bi ta du dëën. A wan ten, mi bi bia ko ta hakisi miseei ee Jehovah bi ta haika dee begi u mi.” Eva da wan sisa di ta du di hii-ten diniwooko tu, nöö a bi taki taa: „Mi bi ko si taa hogi sa miti u ee u ta si kuma Jehovah an lobi u. Biga di soni dë sa mbei i ko ta dini ën wan woto fasi. A sa mbei taa ja ko ta fii u du soni da Jehovah möön, söseei a sa mbei taa ja ko ta dë waiwai möön a di dini di i ta dini Jehovah.” Michael da wan gaanwomi di ta du di kowoonu pioniliwooko, nöö a bi taki taa: „Ee ja ta biibi taa Jehovah ta booko hën hedi ku i, nöö di soni dë o mbei taa pikipiki ju ku ën an o ko dë mati möön.”

6. Andi u musu du te u bigi ta si kuma Gadu an lobi u?

⁶ Dee woto aki ta lei u un hogi soni sa pasa ku di biibi fuu ee u ta si kuma Jehovah an lobi u. Ma nöö andi u musu du ee u bigi ko ta si kuma Jehovah an lobi u? Wë wantewante dë u musu mbei möiti fu wa pakisei di soni dë möön! Begi Jehovah faa heepi i fu ja pakisei di soni dë möön, ma be a da i ’di kötöhati fëën di o tjubi i hati ku i fusutan’ (Ps. 139:23; Fil. 4:6, 7). Boiti di dë, hoi a pakisei taa na i wanwan ta fii sö. Woto baaa ku sisa dë, di ta fii sö tu. Dinima u Jehovah u di ten di pasa seei bi ta fii sö tu. Boo luku andi u sa lei na apösutu Paulosu.

7. Un bookohedi Paulosu bi abi?

⁷ I ta fii so juu taa i abi hia faantiwöutu poi ö, söseei taa ja sa ta du hii dee soni dee i musu du ö? Wë ee sö i ta fii, nöö joo fusutan unfa soni bi dë da Paulosu. An bi ta booko hën hedi ku wan kodo kemeente nöö, ma a bi ta booko hën hedi ku hii dee kemeente (2 Kol. 11:23-28). I ta dë ku suwaki, nöö di soni dë ta mbei taa ja sa ta dë waiwai ö? Wë Paulosu bi abi wan soni nëën sinkii di bi ta ’tjökö ën leti kuma maka’. Wë a kan taa di soni dë bi nama ku di gösöntu fëën, nöö a bi kë u de puu ën dëën (2 Kol. 12:7-10). I ta fii bookosaka u di i abi suwakifasi ö? Wë sö nöö dee suwakifasi u Paulosu bi ta mbei a ta fii so juu tu. A bi taki taa a bi dë a ’fuka basu’, u di hii juu a bi musu ta mbei taanga möiti faa sa du bunu soni.​—Lom. 7:21-24.

8. Andi bi heepi Paulosu faa hoi dou, hii fa a bi abi bookohedi?

⁸ Hii fa Paulosu bi abi sömëni bookohedi, tökuseei a bi dini Jehovah go dou. Andi bi dëën taanga faa bi sa du di soni dë? Wë hii fa a bi ta si gbelingbelin taa a bi abi suwakifasi, tökuseei a bi ta biibi a di lusupaima ku hii hën hati. A bi ta biibi di soni di Jesosi bi paamusi u, di a bi taki taa ’ee wan sëmbë i ta biibi ën nöö i abi di libi u teego kaa’ (Joh. 3:16; Lom. 6:23). A dë gbelingbelin u si taa Paulosu da wan u dee sëmbë di bi ta biibi a di lusupaima. A bi dë seiki taa ee wan sëmbë bia libi, nöö Jehovah ta dë kabakaba u dëën paadon, aluwasi ee a bi du gaan zöndu.​—Ps. 86:5.

9. Andi u ta lei a di soni di Paulosu bi taki, di sikifi a Galasia 2:20?

⁹ Paulosu bi ta biibi tu taa Jehovah lobi ën gaanfa, u di a bi sabi taa Gadu bi manda Jesosi ko dëdë da hënseei tu. (Lesi Galasia 2:20.) Dee soni dee sikifi a kaba pisi u di tëkisi ta da u kötöhati. Paulosu bi taki taa: „Di mii u Masa Gadu . . . bi lobi mi tee a tei mi dëdë dëdë da mi.” Paulosu an bi ta si kuma a hogi sö tee taa Gadu an bi sa lobi ën. An bi ta pakisei taa: ’Mi ta fusutan faandi mbei Jehovah o sa lobi dee baaa ku dee sisa u mi. Ma mi an o sa lobi mi.’ Paulosu bi piki dee Keesitu sëmbë u Loomë taa: „Na bumbuu sëmbë a manda [Masa Jesosi] Keesitu ko dëdë da e, ma u dee takulibima aki wë” (Lom. 5:8). Na wan soni sa tapa Gadu fu an lobi u!

10. Andi u ta lei a Loomë 8:38, 39?

¹⁰ Lesi Loomë 8:38, 39. Paulosu bi sabi unfa di lobi u Gadu taanga tjika. A bi taki taa ’na wan kodo soni seei abi di kaakiti u sa paati u ku di lobi di Gadu lobi u’. Paulosu bi sabi unfa Jehovah bi ta hoi pasensi da dee Isaëli sëmbë tjika. A bi sabi tu unfa Jehovah bi lei  taa a abi tjalihati fëën tjika. Wë ee u musu toona taki kölö sö andi Paulosu bi taki, nöö u sa taki taa di soni aki a bi taki: ’Ee Jehovah manda di Mii fëën ko dëdë da mi, nöö soni dë di musu ta mbei mi ta si kuma an lobi mi ö?’​—Lom. 8:32.

11. Faandi mbei Paulosu bi sa dë seiki taa Gadu lobi ën, hii fa a bi du gaan zöndu kuma dee sikifi a 1 Timoteo 1:12-15?

¹¹ Lesi 1 Timoteo 1:12-15. A bi sa pasa taa Paulosu an bi ta fii bunu seei, te a bi ta pakisei dee soni dee a bi du ufö a toon Keesitu sëmbë. Fëën mbei a bi taki taa a bi dë ’di möön gaan takulibima’! Ufö Paulosu ko a di tuutuu lei, nöö a bi nango a dee peipei foto nango ta du ku dee Keesitu sëmbë. A bi ta buta so u de a dunguwosu, söseei a bi ta dë ku sëmbë a wan së, te de bi buta taa de bi o kii dee Keesitu sëmbë (Tjab. 26:10, 11). A bi musu u ta hati Paulosu seei te a bi miti wan njönku Keesitu sëmbë, di a bi da pasi taa de bi sa kii dee gaan sëmbë fëën. A bi hati Paulosu taa a bi mbei dee gaan föutu aki. Ma a bi sabi taa an bi sa tooka dee soni dë möön. A bi tei ën u bigi taa Keesitu bi ko dëdë dëën, nöö fëën mbei a bi sikifi taa: „Fu di Gadu abi gaan bunuhati, hën mbei i si mi ko dë di sëmbë di i si mi dë tide aki” (1 Kol. 15:3, 10). Andi di soni aki ta lei u? Wë a ta lei taa i sa biibi taa Jesosi dëdë da i, nöö a sö wan fasi i ku Jehovah sa ko dë gaan mati (Tjab. 3:19). Di möön fanöudu soni da Gadu, hën da dee soni dee u ta du nöunöu ku dee soni dee woo du a di ten di ta ko. Na dee soni dee u bi du a di ten di pasa, aluwasi ee i bi dë wan Jehovah Kotoigi nasö ee ja bi dë wan.​—Jes. 1:18.

12. Unfa dee soni dee sikifi a 1 Johanisi 3:19, 20 sa heepi u ee u ta si kuma wa bunu tjika, nasö taa sëmbë an o sa lobi u?

¹² Te i ta pakisei di dëdë di Jesosi ko dëdë paka u dee zöndu fii da i, nöö kandë i ta si kuma ja bunu tjika faa bi sa du di soni dë da i.  Faandi mbei i sa fii sö? U di u dë zöndu libisëmbë, mbei di hati fuu sa ganjan u. A sa mbei u ta si kuma wa bunu tjika, nasö taa sëmbë an o sa lobi u. (Lesi 1 Johanisi 3:19, 20.) Te u ta fii sö, nöö a bunu fuu hoi a pakisei taa „Gadu hei möön libisëmbë hati”. Aluwasi ee u ta si kuma Jehovah an lobi u, söseei taa an o da u paadon, tökuseei u musu hoi a pakisei taa a lobi u tuutuu, söseei taa a o da u paadon. A dë wan fanöudu soni seei fuu ko ta biibi taa Jehovah lobi u. Fuu sa du di soni dë, nöö u musu ta lei soni a di Wöutu fëën hii juu. U musu ta begi ën hii juu, söseei u musu ta nama ku dee sëmbë dee ta dini ën. Faandi mbei a dë fanöudu sö fuu du dee soni aki?

13. Unfa di lei di u ta lei soni a di Wöutu u Gadu sa heepi u? (Luku di pisi „ Di fasi fa di Wöutu u Gadu ta heepi de”.)

¹³ Te i ta lei soni a di Wöutu u Gadu hiniwan daka, nöö joo ko sabi Jehovah möön bunu, ku dee bunu fasi dee a abi. Joo ko si unfa a lobi i tjika. Te i ta kai pakisei a dee soni dee i ta lesi a di Wöutu u Gadu hiniwan daka, nöö di soni dë sa heepi i fii sa si soni a wan bunu fasi (2 Tim. 3:16). Wan gaanwomi de kai Kevin, di bi ta fii taa an bunu tjika, bi taki taa: „Di lesi di mi bi ta lesi Psalöm 103, ta pakisei fundu fëën, bi heepi mi u mi ko ta si miseei kumafa Jehovah ta si mi tuutuu.” Sisa Eva, di u bi taki soni fëën a fesi kaa, bi taki taa: „A kaba u di daka, mi bi ta tei ten u ta pakisei, u mi ko si unfa Jehovah ta si soni tuutuu. Di soni dë bi ta da mi kötöhati, nöö a bi ta heepi mi u di biibi u mi ko möön taanga.”

14. Unfa begi sa heepi u?

¹⁴ Ko abi di guwenti u ta begi hii juu (1 Tes. 5:17). Ee i kë fii ku wan sëmbë ko dë gaan mati, nöö i musu ta fan ku ën, söseei i musu ta konda dëën unfa i ta fii. Di seei soni aki i musu du tu fii ku Jehovah sa ko dë gaan mati. Te u ta begi Jehovah, ta piki ën unfa u ta fii, andi u ta pakisei, ku dee soni dee ta da u bookohedi, nöö a sö wan fasi u ta lei ën taa u ta futoou ën, söseei taa u ta biibi taa a lobi u (Ps. 94:17-19; 1 Joh. 5:14, 15). Sisa Yua, di u bi taki soni fëën a fesi, taki taa: „Te mi ta begi, nöö na dee soni dee pasa a di daka nöö mi ta konda da Jehovah. Mi ta piki ën unfa mi ta pakisei, ku unfa mi ta fii tuutuu. Pikipiki mi bi ko ta si Jehovah kuma wan Tata di lobi dee mii fëën tuutuu, ma na kuma wan hedima u wan masikapei.”​—Luku di pisi „ I bi lesi ën kaa u?”

15. Unfa Jehovah ta lei taa a ta booko hën hedi ku hiniwan fuu apaiti?

¹⁵ Nama ku sëmbë di lobi Jehovah tuutuu. De dë kuma kado di Jehovah da i (Jak. 1:17). Di Tata fuu di dë a liba ala ta lei taa a ta booko hën hedi ku hiniwan fuu apaiti, u di a da u  baaa ku sisa di ta lei hii juu taa de lobi u (Nöng. 17:17). A di biifi di Paulosu bi sikifi da dee Keesitu sëmbë u Kolosën, a bi taki taa so Keesitu sëmbë bi heepi ën. ’De bi ta dëën degihati seei’ (Kol. 4:10, 11). Jesosi Keesitu seei bi abi heepi fanöudu. A bi ta tei ën u bigi te dee mati fëën bi ta heepi ën, aluwasi ee ëngëli nasö libisëmbë.​—Luk. 22:28, 43.

16. Unfa dee mati fuu dee lobi Jehovah tuutuu sa heepi u fuu ku Jehovah ko dë möön gaan mati?

¹⁶ I ta feni heepi tuutuu a dee mati dee Jehovah da i ö? Te u ta konda dee bookohedi fuu da wan mati fuu di lobi Jehovah tuutuu, nëën da u suwaki a di biibi. Ma di soni dë da wan soni di o sa heepi u. Baaa James, di u bi taki soni fëën a fesi kaa, bi taki taa: „Mi bi feni heepi seei, u di mi dë mati ku sëmbë di lobi Jehovah tuutuu. Te dee pakisei u mi bi ta möön mi, nöö dee mati aki bi ta haika mi ku pasensi, söseei de bi ta piki mi taa de lobi mi. Te de ta du sö, nöö mi ta ko si taa Jehovah lobi mi, söseei taa a ta booko hën hedi ku mi.” A dë fanöudu fuu ko dë gaan mati ku dee baaa ku dee sisa fuu!

17-18. Ambë u musu biibi, nöö faandi mbei u musu biibi ën?

¹⁷ Saatan kë fuu disa dee bumbuu soni dee u ta du. A kë fuu biibi taa Jehovah an lobi u, söseei taa wa bumbuu tjika u Jehovah da u di teego libi. Ma leti kumafa u si a di woto aki, nöö di soni aki na wan tuu soni.

¹⁸ Jehovah lobi i. I dë kuma wan gaan gudu nëën wojo. Ee i ta piki hën buka, nöö a o ta lobi i nöömö, leti kumafa a lobi Jesosi (Joh. 15:10). Fëën mbei wa musu biibi Saatan nasö di hati fuu, te a ta kuutu u taa wa bumbuu tjika u Jehovah lobi u. Ma u musu biibi Jehovah, u di a ta si dee bumbuu soni dee hiniwan fuu sa du. I sa dë seiki taa Jehovah „ta wai ku dee sëmbë fëën”, te kisi ju seei tu!