1-2. Unfa u sa ta waka a Jesosi baka? Konda wan woto.

BOO taa i ku wanlö sëmbë ta pasa a wan kamian ka hogi sa miti unu, nöö wan sëmbë ta tja unu. Te a ta waka, nöö i ta si dee futu maaka fëën ka a waka. Te wan pisi, wan ta si di sëmbë di ta tja unu möön, ma ja ta fëëë, u di i ku dee woto sëmbë dee sai dë, ta si dee futu maaka u di sëmbë, fuun sa waka ka a waka.

² U sa taki taa u dee tuutuu Keesitu sëmbë, ta waka pasa a sö wan hogi kamian tu. Hën da di hogi goonliba ka u ta libi aki. U wai taa Jehovah da u wan bunu sëmbë di sa tja u, hën da di Womi Mii fëën de kai Jesosi Keesitu di u sa ta waka nëën baka (1 Pet. 2:21). Wan buku di ta taki soni u Bëibel, ta taki taa Petuisi bi tei Jesosi maaka ku wan sëmbë di ta tja sëmbë go lei kamian. Leti kumafa i sa si futu maaka u wan sëmbë di ta tja sëmbë go lei kamian, sö nöö u sa si futu maaka u Jesosi tu, di ta heepi u fuu sa waka nëën baka. Wë boo luku dii hakisi di nama ku di waka di u musu ta waka a Jesosi baka. Andi a kë taki u waka a Jesosi baka? Faandi mbei u musu ta waka a Jesosi baka? Nöö unfa u sa ta waka a Jesosi baka?

3. Andi a kë taki u waka a wan sëmbë baka?

³ Andi a kë taki u waka a wan sëmbë baka? Te di Bëibel ta kai di wöutu „waka” nasö „futu”, nöö so juu a ta nama ku di fasi fa wan sëmbë ta tja hënseei (Ken. 6:9; Nöng. 4:26). U sa taki taa di fasi fa wan sëmbë ta tja hënseei, dë kuma dee futu maaka di wan sëmbë ta disa a baka, te a ta waka. Fëën mbei u sa  taki taa te u ta waka a wan sëmbë baka, hën da u ta djeesi ën a di fasi fa a ta libi.

4. Andi a kë taki u waka a Jesosi baka?

⁴ Andi a kë taki u waka a Jesosi baka? Wë a kë taki taa u musu djeesi ën a di fasi fa a bi ta libi. A di tëkisi u di woto aki, apösutu Petuisi bi taki gbelingbelin u di fasi fa Jesosi bi hoi dou, hii fa fuka bi ta miti ën. Nöö u sa djeesi ën a di lö fasi aki. Ma sömëni woto fasi dë jeti fa u sa djeesi Jesosi (1 Pet. 2:18-25). Ma ee fuu taki ën seei, nöö u sa djeesi Jesosi a hii soni di a bi taki, söseei a hii soni di a bi du.

5. Wan sëmbë sa ta waka a Jesosi baka, hii fa a dë wan zöndu libisëmbë u?

⁵ U sa ta waka a Jesosi baka tuutuu, hii fa u da zöndu libisëmbë u? Wë aai. Petuisi bi piki u taa u musu mbei hii möiti fuu „waka a [Jesosi] baka”. Ma di soni dë an kë taki taa woo sa du ën söndö fuu mbei föutu. Ee u ta mbei hii möiti fuu waka a Jesosi baka, hii fa u da zöndu libisëmbë, nöö a o dë taa u ta du di soni di apösutu Johanisi bi taki. A bi taki taa: „Ta waka kumafa Keesitu bi ta waka”.​—1 Joh. 2:6.

6-7. Faandi mbei u sa taki taa te u ta waka a Jesosi baka, nöö u ku Jehovah ta ko dë möön gaan mati?

⁶ Te u ta waka a Jesosi baka, nöö u ku Jehovah ta ko dë möön gaan mati. Faandi mbei u sa taki sö? Wë di fosu soni mbei u sa taki sö, hën da Jesosi da di möön bunu sëmbë di u sa djeesi ee u kë taa libi fuu musu ta kai ku Gadu (Joh. 8:29). Ee u ta waka a Jesosi baka, nöö woo sa ta du soni di ta kai ku Jehovah. Wë u sa dë seiki taa Jehovah o ko dë gaan mati u hiniwan sëmbë di ta mbei möiti fëën ku ën dë mati.​—Jak. 4:8.

⁷ Di u tu soni, hën da Jesosi bi djeesi hën Tata a hii soni. Fëën mbei Jesosi bi sa taki taa: „Di sëmbë di si mi, nöö mi Tata a si naandë  kaa” (Joh. 14:9). Te u ta djeesi Jesosi a dee bunu fasi dee a abi, söseei a di fasi fa a bi ta libi ku wotowan, nöö u ta djeesi Jehovah tu. Jesosi bi lei taa a bi abi tjalihati da wan womi di bi abi kököbë, a bi ta fii da wan mujëë di bi dë ku suwaki, söseei a bi ta abi tjalihati u dee sëmbë dee bi ta dë ku fuka (Maik. 1:40, 41; 5:25-34; Joh. 11:33-35). Möön u ta mbei möiti fuu djeesi Jehovah a dee fasi dee a abi, möön u ku ën o ta ko dë möön gaan mati.

8. Faandi mbei u sa taki taa te u ta waka a Jesosi baka, nöö woo sa „wini” di goonliba?

⁸ Te u ta waka a Jesosi baka, nöö di hogi goonliba aki an o sa puu u pakisei a di dini di u ta dini Jehovah. Di lasiti ndeti di Jesosi bi dë a goonliba aki, a bi taki taa: „Mi wini hii soni a di goonliba aki kaa” (Joh. 16:33). Di soni aki bi ta lei taa Jesosi an bi da pasi, u dee sëmbë u di goonliba aki tooka di fasi fa a ta si soni, ku di fasi fa a ta du soni. Jesosi bi ko a goonliba aki u lei taa Jehovah hën abi di leti u tii hii soni. Nöö nöiti a bi da pasi u sëmbë puu hën pakisei a di soni dë. Unfa a dë ku i? Sömëni soni dë a di goonliba aki, di sa puu u pakisei a di dini di u ta dini Jehovah. Ma ee u ta djeesi Jesosi u di u ta buta pakisei a di dini di u musu ta dini Jehovah, nöö useei o sa „wini” di goonliba.​—1 Joh. 5:5.

9. Andi u musu du fuu sa feni di libi u teego?

⁹ Te u ta waka a Jesosi baka, nöö woo sa libi u teego. Di wan njönku kijoo di bi gudu bi hakisi Jesosi andi a musu du faa sa libi u teego, hën Jesosi bi piki ën taa: „Ko [dë] bakama u mi ta waka a mi baka” (Mat. 19:16-21). Jesosi bi piki wanlö Dju sëmbë di an bi kë biibi taa hën da Keesitu, taa: ’Fa dee sikapu u mi sai dë, de ta waka a mi baka, nöö mi ta da de di libi u teego’ (Joh. 10:24-29). Nikodemusi bi dë wan sëmbë u di Kuutuwosu u dee Dju, di bi kë ko sabi möön soni u dee soni di Jesosi bi ta lei sëmbë. Jesosi bi piki di womi aki taa dee sëmbë dee ta „biibi ën”, o „feni di libi u teego” (Joh. 3:16). U ta lei taa u ta biibi Jesosi, te u ta djeesi ën a di fasi fa a bi ta libi. Ee u ta du di soni aki, nöö woo sa feni di libi u teego.​—Mat. 7:14.

10. Andi u musu du fuu sa „ko sabi” Jehovah ku di Womi Mii fëën möön bunu? (Johanisi 17:3)

¹⁰ U musu ko sabi Jesosi bumbuu fuu sa waka nëën baka. (Lesi Johanisi 17:3). Ee i kë „ko sabi” Jesosi bumbuu, nöö i musu ta lei soni fëën nöömö. U musu „ko sabi” unfa a ta pakisei, söseei u musu ko sabi dee fasi dee a abi. Aluwasi u dë a di tuutuu lei sömëni jaa longi kaa, tökuseei u musu ta mbei hii möiti fuu ko sabi Jehovah ku di Womi Mii fëën möön bunu.

11. Andi ku andi sikifi a dee fö buku dee ta taki soni u di libi u Jesosi?

¹¹ U di Jehovah lobi u, mbei a mbei sëmbë sikifi dee fö buku dee ta taki soni u di libi u  Jesosi, fuu sa ko sabi soni u di libi u di Womi Mii fëën. Dee fö buku aki ta taki soni u di libi ku di diniwooko u Jesosi. De ta konda da u andi Jesosi bi ta taki, de ta konda da u andi a bi ta du, söseei de ta mbei u ko sabi unfa a bi ta fii so juu. Dee fö buku aki ta heepi u fuu „mëni” fa Jesosi bi ta libi (Heb. 12:3). Te u ta öndösuku soni a dee buku aki, nöö de ta heepi u fuu ko sabi Jesosi möön bunu, nöö di soni dë ta heepi u fuu sa waka nëën baka.

12. Unfa u sa feni wini tuutuu u dee fö buku dee ta taki soni u di libi u Jesosi?

¹² Ee u kë feni wini tuutuu u dee fö buku dee ta taki soni u di libi u Jesosi, nöö na lesi wanwan nöö u musu ta lesi de. Ma u musu ta tei ten u öndösuku de finifini, söseei u musu ta pakisei fundu u de. (Luku Josua 1:8.) Boo luku tu soni di sa heepi u fuu ta pakisei fundu u dee soni dee sikifi a dee buku aki, söseei boo luku unfa u sa ta du dee soni dee u ta lesi a dee buku aki.

13. Unfa u sa ko sabi unfa soni bi sa dë, te u ta lesi dee fö buku dee ta taki soni u di libi u Jesosi?

¹³ Di fosu soni. Pakisei unfa soni bi sa dë. Te i ta lesi dee fö buku dee ta taki soni u di libi u Jesosi, nöö du kuma iseei bi sai dë ta si, ta jei, nasö ta fii unfa soni bi ta pasa. Wan soni di sa heepi i fii du di soni aki, hën da te i ta öndösuku soni a dee buku di di ölganisaasi u Jehovah ta da u. I sa luku dee woto vers u di kapitë di i ta lesi. Suku u ko sabi möön soni u dee sëmbë ku dee kamian di di woto ta taki soni u de. So juu tu buku di ta taki soni u di libi u Jesosi, ta taki u dee seei soni. Te a dë sö, nöö i sa tei wan u de maaka ku di wotowan. So juu a sa pasa taa wan u dee sikifima u dee buku aki, sikifi wan soni di di wotowan an sikifi.

14-15. Andi sa heepi u fuu du dee soni dee u ta lesi a dee fö buku dee ta taki soni u di libi u Jesosi?

¹⁴ Di u tu soni. Du dee soni dee i ta lesi (Joh. 13:17). Baka te i öndösuku soni a wan u dee buku aki, nöö i musu hakisi iseei dee soni aki: ’Wan soni dë a di woto aki di miseei sa ta du ö?  Unfa mi sa heepi wotowan ku di soni di mi ta lesi aki?’ Pakisei wan sëmbë, nöö luku na un ten a fiti, fii sa konda di woto di i lesi dëën.

¹⁵ Boo luku wan woto ka u sa wooko ku dee tu soni dee u taki u de aki. Woo taki u wan pooti mujëë di manu fëën bi dëdë, di Jesosi bi si a di Wosu u Gadu.

16. Konda unfa soni bi sa dë a di woto di sikifi a Maikusi 12:41.

¹⁶ Pakisei unfa soni bi sa dë. (Lesi Maikusi 12:41.) Pakisei unfa soni bi waka. A bi dë 11 Nisan u di jaa 33 baka Keesitu. An bi o dou wiki möön, nöö de bi o kii Jesosi. Di daka dë, sömëni juu longi Jesosi bi dë ta lei sëmbë soni a di Wosu u Gadu. Dee hedima u keiki bi ta suku fasi u du ku Jesosi. So u de bi ta hakisi ën ee ambë dëën makiti faa sa du foombo soni. Wotowan bi ta suku u tai ën ku fan (Maik. 11:27-33; 12:13-34). Baka di dë Jesosi waka go a wan woto kamian u di Wosu u Gadu. A kan taa a bi dë a di kamian de bi ta kai di Djai u dee mujëë. Ka Jesosi bi sai dë, a bi sa si dee möni këdë. A dë sindosindo, nöö a ta luku fa dee sëmbë ta tja möni ko buta a dee möni këdë. A ta si fa dee guduma ta buta hia möni. A kan taa Jesosi sindo zuntu ku dee möni këdë, nöö a ta jei fa dee kpëngëlë möni ta kai go a dee möni këdë.

17. Andi di pooti mujëë, di Maikusi 12:42 ta taki soni fëën, bi du?

¹⁷ Lesi Maikusi 12:42. Baka wan pisiten, hën Jesosi si wan mujëë. Di mujëë dë bi dë wan pooti mujëë, di „manu fëën bi dëdë” (Luk. 21:2). Di libi ta taanga da di mujëë aki gaanfa seei. A ta taanga dëën faa feni dee soni dee a abi fanöudu faa sa libi go dou. Ma tökuseei di mujëë aki nango a wan u dee möni këdë, nöö a ta buta tu köpö sënsi. Dee möni aki piki sö tee taa ja ta pena jei seei taa de kai go a di möni këdë. Jesosi sabi un mëni möni di mujëë aki buta. A di ten ala, ja bi sa bai soni wan bëtë ku di möni dë. Di möön bukopu fou di de bi ta sei a di ten dë seei ja bi sa bai ku di möni dë.

18. Andi Jesosi bi taki u di möni di di pooti mujëë bi buta a di möni këdë te u luku Maikusi 12:43, 44?

¹⁸ Lesi Maikusi 12:43, 44. Di soni di di pooti mujëë bi du, bi bigi da Jesosi seei. Jesosi ta kai dee bakama fëën u de ko nëën. Nöö a ta mbei de buta pakisei a di pooti mujëë aki. Jesosi ta taki taa: „Un si di pooti mujëë dë nö? Hën tuwë di möön gaan hia möni möön hii de tuu.” A taki tu taa: „Fa i si dee guduma ta tja möni u de ta ko ta tuwë dë, nöö wan pikiwan nöö de ta tuwë u dee gaan hia wan de abi. Ma nöö di mujëë naandë, di soni a abi faa tei heepi ën seei, hën i si a tei tuwë tuu dë kaa.” Di buta di di mujëë buta hii di möni di a bi abi, bi ta lei taa a bi abi di futoou taa Jehovah o sölugu ën.​—Ps. 26:3.

19. Andi u sa lei u dee soni di Jesosi bi taki u di pooti mujëë?

¹⁹ Du dee soni dee i lei. Hakisi iseei dee soni aki: Andi mi sa lei a di soni di Jesosi bi taki u di pooti mujëë di manu fëën bi dëdë? Pakisei unfa soni bi sa dë da di mujëë aki. An dë u taki taa di mujëë aki bi o kë da Jehovah möön hia möni. Ma tökuseei a bi da hii soni di a bi sa da. Nöö Jesosi bi sabi taa Jehovah bi tei ën u bigi taa di mujëë aki bi da hii soni di a bi sa da. U sa lei wan fanöudu soni a di woto aki. Hën da Jehovah ta wai te u ta dini ën ku hii u hati (Mat. 22:37; Kol. 3:23). Jehovah ta wai te a ta si taa u ta du hii soni di u sa du dëën. Jehovah ta wai te u ta wooko ku di ten ku di kaakiti fuu, fuu nango a di peleikiwooko, söseei fuu nango a dee komakandi.

20. Konda unfa i sa wooko ku dee soni dee i bi lei a di woto u di pooti mujëë.

²⁰ Unfa i sa wooko ku di soni di i bi lei a di  woto u di pooti mujëë? Pakisei wan sëmbë di i bi o sa da taanga te i bi o piki ën taa Jehovah ta wai ku di möiti di a ta mbei u dini ën. I sabi wan sisa di ko gaandi kaa, di ta fii bookosaka, u di an sa ta peleiki möön kumafa a bi naa u? I sabi wan baaa di abi wan siki di data an sa kula, di ta fii bookosaka u di an sa nango a hii dee komakandi möön u? I sa heepi dee lö sëmbë aki u di joo konda soni da de di sa da de taanga (Ef. 4:29). Konda da de andi i bi lei u di pooti mujëë di manu fëën bi dëdë. Dee soni dee joo konda da de, sa mbei de dë seiki taa Jehovah ta wai ku de, te de ta du hii soni di de sa du dëën (Nöng. 15:23; 1 Tes. 5:11). Te i ta gafa wotowan, u di de ta du hii soni di de sa du da Jehovah, aluwasi de ta si kuma de an ta du wan apaiti soni dëën, hën da i ta mbei hii möiti fii waka a Jesosi baka.

21. Andi i dë kabakaba u du?

²¹ U ta wai seei taa u abi dee fö buku dee ta taki soni u di libi u Jesosi, u di de ta heepi u fuu ko sabi soni u di libi u Jesosi finifini! A sö wan fasi u sa ta djeesi ën, söseei u sa ta mbei hii möiti fuu sa waka nëën baka. A bi o bunu fii tei ten fii ko sabi soni u dee fö buku dee ta taki soni u di libi u Jesosi, te i ta lei soni u Bëibel, nasö te i ta hoi di Wosudendu Dini fii. U musu hoi a pakisei taa ee u kë feni wini te woo lei soni a dee buku aki, nöö u musu mbei möiti u ko sabi unfa soni bi sa dë, söseei u musu du dee soni dee u lei a dee buku aki. Boiti di djeesi di u ta djeesi Jesosi a dee soni dee a bi ta du, u musu ta haika dee soni dee a bi taki tu. A di woto di ta ko, woo luku andi u sa lei a dee lasiti soni di Jesosi bi taki di a bi dë a goonliba aki.