A tjali taa di mi bi abi 13 jaa sö, hën ma bi ta mbei möiti sö möön, u mi ku Jehovah bi sa dë mati go dou. A bi ta djei kuma dee mii dee mi ku de bi nango a di wan siköö bi sa ta du hiniwan soni di de kë, nöö miseei bi kë abi di lö libi dë tu. Mi bi ta si kuma mi mama ku mi tata bi ta buta hia wëti da mi poi. Söseei mi bi ta si kuma dee wëti u Bëibel bi ta tapa mi, u mi du soni kumafa mi bi kë. Di soni dë bi mbei mi bi ko ta si kuma a dë wan taanga soni u dini Gadu. Mi bi sabi taa Jehovah dë tuutuu, ma ma bi ta fii taa mi ku ën bi dë mati.

Mi bi ta peleiki jeti, ma ma bi ta peleiki wan bëtë. Ma bi ta seeka miseei ufö mi bi go peleiki, nöö di soni dë bi mbei a bi ta taanga da mi u peleiki da sëmbë. A bi mbei tu taa ma bi abi na wan sëmbë u mi ta lei soni u Bëibel, nöö ma bi ta kë go peleiki da sëmbë a de pisi. Hii dee soni aki bi mbei taa ma bi ko ta lobi di peleikiwooko möön. Mi bi bia ko ta hakisi miseei taa: ’Unfa wan sëmbë sa ta peleiki hiniwan wiki ku hiniwan liba nango nöömö sö?’

 Di mi bi abi 17 jaa, hën ma bi kë dë a mi mama ku mi tata leiki möön. Fëën mbei mi bi paki dee lai u mi te mi kaba, hën mi foloisi go a di köndë de kai Ösutualia. A bi hati mi mama ku mi tata seei di mi bi ta foloisi. De bi ta booko de hedi ku mi. Ma de bi ta pakisei taa mi bi o dini Jehovah go dou kumafa mi bi guwenti.

Di mi bi dë a Ösutualia soni bi ko möön hogi seei. Mi bi bigi ta misi komakandi. Mi bi ko dë mati ku woto njönkuwan di bi nango a komakandi tu, nöö bakaten de bi nango a baja wosu, nöö de bi ta bebe tu. Te mi ta toona mëni fa soni bi dë da mi a di ten dë, nöö mi ta ko si taa mi bi dë a di tuutuu lei, ma mi bi dë a di goonliba tu. Ma na wan u dee tu kamian dë bi ta mbei mi ta dë waiwai.

Söwan tu jaa baka di dë, mi bi miti wan sisa di bi mbei mi buta pakisei a di fa di libi u mi bi ko dë. Ma di sisa aki an bi sabi taa sö a bi heepi mi. A di ten dë, mi ku feifi sisa bi ta libi a di wan wosu. Nöö u bi kai di keling-gaanwomi ku hën mujëë Tamara, u de ko dë a u pisi wan wiki longi. Te hën manu bi nango ta du soni da di kemeente, nöö u ku ën bi ta da woto ta lafu. Mi bi lobi di soni dë seei. A bi ta fii da sëmbë, nöö an bi ta taanga u go fan ku ën. A bi ta foondo mi seei taa mi bi sa ta da woto ku wan sëmbë di taanga a di biibi sö.

Tamara bi lobi sëmbë seei. Di lobi di a bi lobi di tuutuu lei ku di peleikiwooko, bi ta hai sëmbë. A bi ta dë waiwai u di a bi ta dini Jehovah ka a bi sa dini ën dou, ma mma bi ta dë waiwai, u di ma bi ta buta hii mi pakisei a di dini u Jehovah. Di dë di a bi ta dë waiwai bi heepi mi seei. Di fasi fa a bi ta du soni bi mbei mi buta pakisei a wan fanöudu soni di di Bëibel ta lei u. Di soni dë da di taki di a ta taki taa u musu ta dini Jehovah „ku piizii”, söseei taa u musu ta „bai ta piizii”.​—Ps. 100:2.

Mi bi kë ta dë waiwai kuma Tamara. Ma u mi bi ko ta dë waiwai sö, nöö mi bi musu tooka sömëni soni a mi libi. A bi tei ten, ma te u kaba fëën mi bi bigi ta tooka soni pikipiki. Mi bi bigi ta seeka miseei ufö mi go a di peleikiwooko, nöö so juu mi bi ta du di heepi pioniliwooko. Di soni aki bi heepi mi u ma ta fëëë sö möön te mi bi dë a di peleikiwooko. U di mi bi ko ta möön wooko ku di Bëibel te mi bi dë a di peleikiwooko, mbei di  peleikiwooko bi ko ta suti da mi seei. An bi tei longi möön, hën mi bi bigi ta du di heepi pioniliwooko hiniwan liba.

Mi bi bigi ko ta dë mati ku woto baaa ku sisa, gaanwan ku pikiwan tuu, di bi ta du hii soni di de bi sa a di dini u Jehovah, söseei di bi ta dë waiwai. Di bunu fasi fa de bi ta du soni, bi heepi mi u mi pakisei luku, andi bi dë di möön fanöudu soni a mi libi, hën mi bigi ta lesi di Bëibel hiniwan daka. Möönmöön mi bi ko ta lobi di peleikiwooko. Hën te u kaba fëën, hën mi bigi du di kowoonu pioniliwooko. Baka sömëni jaa longi, hën mi bi ko ta fii bunu baka. Söseei mi bi ta fii taa mi bi dë waiwai a di kemeente.

Wan jaa baka di dë, hën mi miti Alex. A bi dë wan baaa di bi abi bunu fasi, di bi ta du soni ku wan limbohati, söseei di bi lobi Jehovah ku di peleikiwooko. A bi dë wan dinai, nöö a bi ta du di pioniliwooko sikisi jaa longi kaa. Alex bi ta dini Jehovah a Malaawi wan pisiten, u di möön peleikima bi dë fanöudu ala. Di a bi dë ala, nöö a bi ta nama ku baaa ku sisa di bi dë sëndëlengi. Nöö de bi ta dëën taanga faa buta di Könuköndë a di fosu kamian nëën libi.

A di jaa 2003, hën mi ku Alex tööu. Nöö sensi di ten dë, hën u ta du di hii-ten diniwooko go dou. U bi lei sömëni bunu soni, nöö Jehovah bi mbei u feni gaan bunu seei.

A di jaa 2009, hën dee baaa hakisi u fuu go du di sëndëlengiwooko a di köndë de kai Oost-Timor. A dë wan piki köndë a di pisiwata u Indonesia. Di dee baaa bi hakisi u fuu go ala, nöö a bi bigi da u seei, söseei u bi ta fëëë pikisö. Ma tökuseei u bi ta wai. Feifi liba baka di dë, hën u dou a di mamafoto u di köndë, di de ta kai Dili.

Di fa soni bi dë da u ala, bi tooka gaanfa ku di fasi fa soni bi dë da u fosu. U bi musu ko guwenti wan woto fasi u du soni ku wan woto töngö. U bi musu ta njan soni di wa bi guwenti, söseei u bi musu ta libi a wan hii woto fasi. Te u bi ta peleiki, nöö u bi ta miti sëmbë di bi pooti seei. U bi ta  miti sëmbë di an bi go a siköö wan bëtë, nasö di an bi pena go seei. Söseei u bi ta miti sëmbë di wotowan bi ta du ku de tu. U bi ta si sömëni sëmbë tu di bi kisi makei, söseei di bi ta dë fëëëfëëë, u di feti bi feti a di köndë, söseei u di sëmbë ta du peipei hogi. *

Di peleikiwooko bi suti ala seei! Mi bi miti wan mujëë mii de kai Maria, * di bi abi 13 jaa. A bi ta dë tjaliii sö. Hën mama bi dëdë wantu jaa kaa. Nöö an bi ta si hën tata hesihesi. Maria an bi saandi a bi kë du nëën libi, leti kumafa a dë da miii di abi di lö jaa dë. Mi ta mëni jeti taa wan daka, a bi ta këë ta konda da mi unfa a bi ta fii. Ma ma bi fusutan andi a bi ta taki, u di ma bi ta fusutan di töngö sö bunu jeti. Mi bi begi Jehovah hakisi ën faa heepi mi u mi bi sa dëën kötöhati. Hën mi bigi lesi wantu Bëibel tëkisi dëën di bi sa dëën kötöhati. Baka wantu jaa, mi bi si fa di tuutuu lei bi heepi Maria faa ko dë woto fasi. A bi ko ta möön dë waiwai, söseei a bi ko ta bisi soni woto fasi. A bi ko dopu, nöö hënseei bi ko abi sëmbë di a bi ta lei soni u Bëibel. Nöunöu dee sëmbë dee ta dini Jehovah ko dë kuma wan gaan famii dëën, nöö a ta fii taa de lobi ën.

Jehovah ta mbei di peleikiwooko nango a fesi a Oost-Timor. Hii fa gaansë u dee peleikima dopu a dee teni jaa dee pasa, tökuseei sömëni u de ta du di pioniliwooko, de dë dinai, nasö gaanwomi. Wotowan ta wooko a kantoo ka de ta puu buku ko a so u dee töngö di de ta fan a di köndë u de. Mi ta wai seei te mi ta jei fa de ta kanda a komakandi, te mi ta si fa de ta dë lafulafu, söseei te mi ta si fa de nango a fesi a di biibi.

Di fa di libi bi dë da u a Oost-Timor, bi tooka gaanfa seei ku di fa di libi bi dë da u a Ösutualia. Ma ma si kuma mi bi o sa abi wan möön bunu libi. So juu u bi ta sindo a wan piki besi dendu, di bi fuu ku sëmbë. Nöö i bi ta abi dëëdëë fisi ku hipihipi guluntu a di besi tu. So juu te u bi go lei wan sëmbë soni u Bëibel, nöö u bi ta dë a wan piki wosu di bi ta kendi. Boiti di dë, di wosu goon bi ta dë sundjusundju, nöö ganian bi ta kule ta pasa a di kamian. Ma hii fa soni bi ta taanga so juu, mi bi ta taki a miseei taa: ’Di libi aki hën ta da mi piizii!’

Te mi toona pakisei fa soni bi dë, nöö mi ta tei ën u bigi seei taa mi mama ku mi tata bi mbei hii möiti u de lei mi soni u Jehovah. Mi ta tei ën u bigi tu taa de bi ta heepi mi, hii fa wan pisiten ma bi ta mbei möiti sö möön u mi dini Jehovah. Di fasi fa libi u mi bi waka, ta lei taa di soni di sikifi a Nöngö 22:6 dë sö tuu. Mi mama ku mi tata tuu ta wai ku mi ku Alex. De ta wai taa mi ku ën ta dini Jehovah. Sensi di jaa 2016, hën u ta du di keling-wooko a di pisiwata di di bëikantoo u Ösutualasia ta luku.

A sa taanga u biibi taa a wan pisiten ma bi lobi di peleikiwooko. Nöunöu mi ko lobi di peleikiwooko! Mi ko si taa aluwasi unfa soni dë da u a di libi, tökuseei u sa ta dë waiwai te u ta dini Gadu ku hii u hati. Te mi luku ën te mi kaba, nöö mi ta si taa dee 18 jaa dee mi dini Jehovah makandi ku Alex, bi dë di möön piizii ten di mi bi abi a mi libi. Nöunöu mi ko fusutan taa di soni di Dafiti bi piki Jehovah dë sö tuutuu. A bi taa: „Hii dee sëmbë dee ta ko suku tjubi a i, o ta dë waiwai. Hii juu de o ta bai ta piizii. . . . Nöö dee sëmbë dee lobi di në fii o ta wai gaanfa seei.”​—Ps. 5:11.