Kölö sö ufö Jesosi dëdë, hën a bi taki di soni di Dafiti bi taki a Psalöm 22:1. Faandi mbei a bi taki di soni dë?

Wan u dee lasiti soni di Jesosi taki ufö a dëdë, da di soni di sikifi a Mateosi 27:46. A bi taa: „Gadu e, di Gadu u mi, andi mbei i bia baka disa mi sö?” Di Jesosi taki di soni dë, nöö a bi mbei di soni di Dafiti taki a Psalöm 22:1, pasa tuutuu (Maik. 15:34). An bi o fiti u taki taa Jesosi bi taki di soni aki u di a bi lasi hati, nasö u di biibi fëën bi ko suwaki. Jesosi bi fusutan faandi mbei a bi musu ko dëdë da u, nöö a bi dë kabakaba u du di soni aki (Mat. 16:21; 20:28). A bi sabi tu taa te di juu bi dou faa dëdë, nöö Jehovah an bi o tjubi ën (Jöpu 1:10). Jehovah an bi tjubi Jesosi fu an dëdë, sö taa Jesosi bi sa lei taa a ta hoi hënseei a Jehovah, aluwasi de bi o kii ën a wan hogihati fasi seei.​—Maik. 14:35, 36.

Wë nöö faandi mbei Jesosi bi taki di soni di sikifi a di Psalöm dë? Wa kaba sabi faandi mbei a bi taki di soni dë, ma woo taki u wantu soni di bi sa mbei a taki ën. *

A kan taa di Jesosi bi taki di soni aki, nöö a bi kë lei taa Jehovah an bi o tjubi ën fu an dëdë. Jesosi bi musu dëdë paka paima söndö u Jehovah heepi ën. A bi ko dë wan libisëmbë, nöö a bi musu „tei di dëdë fu hii sëmbë dëdë da u”.​—Heb. 2:9.

A kan taa di Jesosi bi taki di soni dë, nöö a bi kë u sëmbë buta pakisei a hii di psalöm dë. A di ten dë, a bi ta pasa taa dee Dju bi ta hoi sömëni u dee psalöm a hedi. Te de bi jei wan vers u  wan psalöm, nöö wantewante dë de bi o sa pakisei hii di psalöm dë. Ee di soni dë Jesosi bi kë du, nöö a bi o heepi dee bakama fëën dee bi dë Dju, u de mëni dee tjabukama woto dee bi sikifi a di psalöm dë, di ta taki soni di nama ku di dëdë fëën (Ps. 22:7, 8, 15, 16, 18, 24). Boiti di dë, dee lasiti vers u di psalöm ta gafa Jehovah, söseei de ta lei taa a dë könu ta tii liba ala ku goonliba aki.​—Ps. 22:27-31.

A kan taa di Jesosi bi taki di soni aki, nöö a bi kë lei taa an bi du na wan hogi. Ufö de kii Jesosi, nöö dee kuutuma u di kuutuwosu u dee Dju, bi feni taa a kosi Gadu (Mat. 26:65, 66). Hesihesi dee kuutuma dë bi ko makandi, hën de hoi di kuutu a gaan ndeti. Nöö de an bi du soni kumafa di wëti bi ta taki (Mat. 26:59; Maik. 14:56-59). Di Jesosi bi hakisi Gadu ee faandi mbei a bi go disëën, nöö a kan taa a bi kë lei taa an bi du na wan soni, u de kii ën a sö wan takuhati fasi.

A kan taa di Jesosi bi taki di soni dë, nöö a bi kë u sëmbë hoi a pakisei taa, hii fa Jehovah bi da pasi u Dafiti tja sitaafu, tökuseei di soni dë an kë taki taa Jehovah an bi feni ën u bunu möön. Wë di soni di Dafiti bi taki an bi ta lei taa biibi fëën bi ko suwaki. Baka di a bi taki di soni dë, hën a bi toona taki taa a ta biibi taa Jehovah bi o sa tjubi dee sëmbë fëën, söseei taa a o mbei de feni bunu (Ps. 22:23, 24, 27). Wë Jesosi da „di Bakamii u Könu Dafiti”, nöö hii fa a bi tja sitaafu a wan posu, di soni dë an kë taki taa Jehovah an bi lobi ën möön.​—Mat. 21:9.

Di Jesosi bi taki di soni di sikifi a di psalöm aki, nöö a kan taa a bi ta tjali gaanfa seei, u di Jehovah an bi o tjubi ën a di pisiten dë, sö taa a bi sa lei taa a bi ta hoi hënseei nëën. Bigibigi Jehovah an bi abi a pakisei taa di Womi Mii fëën bi musu tja sitaafu, nöö a dëdë. Ma di soni dë bi ko dë fanöudu, baka di Adam ku Eva pasa Gadu buka. Jesosi an bi du na wan hogi. Ma a bi musu tja sitaafu u te a dëdë, faa bi sa lei taa dee soni dee Saatan bi taki di a bi hopo fia ku Gadu, an dë sö tuutuu. Boiti di dë, a bi musu dëdë sö taa libisëmbë ku Gadu bi sa toona ko bunu baka (Maik. 8:31; 1 Pet. 2:21-24). Ma u di soni aki bi sa pasa, nöö Jehovah an bi musu tjubi Jesosi möön u wan pisiten. A bi o dë di fosu pasi di Jehovah an bi o tjubi Jesosi.

A kan taa di Jesosi bi taki di soni di sikifi a di psalöm dë, nöö a bi kë heepi dee bakama fëën u de fusutan faandi mbei Jehovah bi da pasi taa a bi musu dëdë a di lö fasi dë. * Jesosi bi sabi taa di peka di de bi o pekëën kii a wan posu, bi o toobi sömëni sëmbë (1 Kol. 1:23). Ee dee bakama fëën bi buta pakisei a di soni di mbei taa a bi musu dëdë, nöö di soni dë bi o heepi de u de an si ën kuma wan hogiduma (Gal. 3:13, 14).

Wa kaba sabi faandi mbei Jesosi bi taki di soni aki, ma a bi fusutan taa di soni dë bi ta miti ën, u di sö Jehovah bi kë u soni pasa. Kölö sö baka di Jesosi bi taki di soni di sikifi a Psalöm 22:1, hën a bi toona taki taa: „A kaba!” (Joh. 19:30; Luk. 22:37). Awa, di tjubi di Jehovah an bi tjubi Jesosi u wan pisiten, bi mbei a bi sa du hii dee soni dee a bi mandëën ko du a goonliba aki. Di soni dë bi dëën pasi tu faa bi sa mbei dee soni dee „dë sikifisikifi a dee buku u Mosesi ku dee tjabukama, ku di [buku Psalöm], pasa tuutuu”.​—Luk. 24:44.