Te sö wan soni pasa, nöö te di womi toona tööu ku wan woto sëmbë, nöö di kemeente musu si di fosu tööu fëën kuma wan soni di booko, nöö di njunjun sëmbë di hën ku ën tööu a lanti, hën de musu tei kuma di mujëë fëën. Boo luku andi Jesosi bi taki u te wan sëmbë booko tööu ku te wan sëmbë toona tööu baka, fuu fusutan di soni aki.

Jesosi bi taki a Mateosi 19:9 andi da di wan kodo soni di sa mbei wan sëmbë booko tööu. A bi taki taa: „Nöö mii taki da unu seei gbelin taa ee wan sëmbë i abi wan mujëë fii nöö i tuwëën ma na manu a tei a i wosu nöö hën i toona go tei wan oto mujëë, nöö Gadu wëti hën wë i booko dë e.” Dee soni dee Jesosi bi taki ta lei u taa di wan kodo soni di sa mbei taa wan sëmbë booko tööu, hën da te di manu fëën nasö di mujëë fëën waka dëën. A ta lei u tu taa ee wan womi booko tööu, hii fa hën mujëë an waka dëën, nöö a tööu ku wan woto mujëë, nöö a pasa Gadu wëti. a

Dee soni dee Jesosi taki, kë taki taa te wan womi waka da hën mujëë, söseei te a booko tööu ku hën mujëë, nöö di Bëibel ta dëën pasi faa tööu baka u? Wë aan fu dë sö. Te wan womi waka da hën mujëë, nöö hën mujëë hën musu luku ee a o da hën manu paadon nasö ee an o dëën paadon. Ee di mujëë taki taa an kë di womi möön, nöö de sa booko di tööu, nöö hii de tuu sa tööu baka.

Ma a sa pasa taa di mujëë an kë booko di tööu, nöö a sa piki di manu fëën taa a dë kabakaba u dëën paadon. Ma unfa a dë ee di womi an kë taa di mujëë musu dëën paadon, hën a booko di tööu hii fa di mujëë an kë? Wë u di di mujëë dë kabakaba u da hën manu paadon u de sa go dou ku di tööu libi u de, mbei di Bëibel an ta da di womi pasi faa tööu baka. Ee a tööu ku wan woto sëmbë, hii fa di Bëibel an ta dëën pasi faa tööu baka, nöö hën da a waka da hën mujëë baka. Nöö dee gaanwomi u di kemeente o abi u hoi wan kuutu komite wan pasi möön u taki u di hogi di a du.​—1 Kol. 5:1, 2; 6:9, 10.

Te di Bëibel an ta da wan womi pasi faa tööu baka, nöö unfa di kemeente musu si di fosu tööu fëën ku di njunjun wan? Kumafa di Bëibel ta lei u, nöö a dë sö tuu taa di fosu tööu an booko u? A dë sö taa di mujëë sa luku jeti ee a o da di manu fëën paadon, nasö ee a o tuwëën u? A dë sö taa di kemeente musu si di njunjun tööu fëën kuma wan soni di an ta kai ku di Bëibel ö?

A di ten di pasa, di kemeente bi ta si di njunjun tööu u di sëmbë di waka, kuma wan soni di an ta kai ku di Bëibel, u di di sëmbë di an bi waka bi dë a libi jeti, an go du fanafiti soni a di së u manu ku mujëë, söseei an bi tööu baka. Ma Jesosi an bi taki soni u di sëmbë di an bi waka da di wotowan, di a bi taki soni u booko tööu ku tööu baka. Ma a bi taki taa wan womi di booko tööu ku hën mujëë, hii fa di Bëibel an ta dëën pasi u booko di tööu, ta waka da hën mujëë ee a go tööu ku wan woto sëmbë. Jesosi bi taki taa di booko di di sëmbë booko  di tööu, ku di tööu di a tööu baka, ta lei taa a pasa Gadu wëti. Te di soni aki pasa, nöö a ta lei taa di fosu tööu u di sëmbë booko.

Te wan womi booko di tööu fëën ku hën mujëë, nöö a tööu baka, nöö an o dë fanöudu möön u di fosu mujëë dëën paadon nasö tuwëën. Nöö fëën mbei an dë fanöudu u di mujëë booko hën hedi ku di soni dë möön. Boiti di dë, di kemeente an o luku taa te di sëmbë di an waka da di wotowan ko dëdë, nasö te a tööu baka, nasö te a libi fanafiti fasi a di së u manu ku mujëë soni, ufö de o tei taa di njunjun tööu ta konda. b

A di woto di u taki fëën, nöö di womi hën waka, nöö di soni dë hën mbei de booko di tööu. Ma unfa a dë ee na waka di womi waka da di mujëë fëën, ma tökuseei a booko di tööu hën a go tööu ku wan woto sëmbë? Nasö unfa a dë ee di womi an waka da di mujëë fëën ufö de booko di tööu, ma a libi fanafiti a di së u manu ku mujëë soni baka di de booko di tööu, hën a tööu baka, hii fa di mujëë fëën bi dë kabakaba u dëën paadon? A hii dee tu woto aki di booko di di womi booko di tööu ku di tööu di a tööu baka, hii fa di Bëibel an ta dëën pasi faa tööu, ta mbei taa di fosu tööu fëën booko. Di njunjun tööu fëën an föutu a lanti. Di Wachttoren u 15 u ëlufumu-liba u di jaa 1979, ta taki a bladsëidë 32 taa „nöunöu a abi wan njunjun tööu libi. Fëën mbei an sa booko di njunjun tööu fëën, nöö a go libi baka ku di fosu mujëë fëën. Di fosu tööu fëën booko, u di a booko di tööu, a waka da hën mujëë, söseei u di a toona tööu baka”.

Di fasi fa u ta si di woto aki nöunöu, an kë taki taa Keesitu sëmbë an ta si di tööu libi kuma wan santa soni möön, nasö taa di waka di wan sëmbë ta waka da wan wotowan an dë sö wan gaan zöndu. Te wan womi booko tööu ku hën mujëë, hii fa di Bëibel an ta dëën pasi u du di soni dë, söseei te a go tööu ku wan woto sëmbë, hii fa Bëibel an ta dëën pasi u du di soni dë, nöö dee gaanwomi o hoi wan kuutu komite ku ën, u di a waka da di fosu mujëë fëën. (Ee di sëmbë di a tööu ku ën dë wan Keesitu sëmbë, nöö dee gaanwomi o hoi wan kuutu komite ku ën tu, u di a dë taa a tei sëmbë manu.) Hii fa de an musu si di njunjun tööu fëën kuma waka a ta waka da hën fosu mujëë u di a tööu ku wan woto sëmbë, tökuseei di womi an o sa feni apaiti gaandi a di kemeente sömëni jaa longi. Söseei an o sa feni dee gaandi aki solanga sëmbë hati ta boonu ku ën jeti u di soni di a bi du, söseei ee de ta fii jeti taa de an sa lesipeki ën u di soni di a bi du. Ufö sö wan baaa feni gaandi, nöö dee gaanwomi o luku tu unfa soni nango ku di fosu mujëë di a bi abi, söseei de o luku unfa soni nango ku dee mii dee hën ku di mujëë pai.​—Mal. 2:14-16.

U ta si taa a dë wan köni soni u Keesitu sëmbë si di tööu libi kumafa Jehovah ta si ën, te u luku di fasi fa soni ta waka da sëmbë di booko tööu, hën de tööu ku wan woto sëmbë, hii fa di Bëibel an ta da de pasi u du di soni dë.​—Peleik. 5:4, 5; Heb. 13:4.