Te wan sëmbë ta soi, nöö a ta paamusi taa a o du wan soni tuutuu, nöö möön gaanfa a ta tei Gadu në soi. Wan sëmbë sa du di soni aki ku buka, nasö a sa sikifi ën buta a pampia.

So sëmbë sa pakisei taa an bunu u soi, u di Jesosi bi taki taa: „Wan musu soi möönsö e . . . Wë biga te i taki aai, a musu tan aai e. Te i taa nönö, a musu tan nönö. Ma ee i musu soi ufö de o tei taa tuu, nöö a go a di së u hogi kaa” (Mat. 5:33-37). Jesosi bi sabi taa di Wëti u Mosesi bi taki taa dee Isaëli sëmbë bi musu soi da so soni, söseei taa dinima u Gadu bi soi (Ken. 14:22, 23; Ëki. 22:10, 11). A bi sabi tu taa Jehovah seei bi ta soi tu (Heb. 6:13-17). Fëën mbei u sa taki taa Jesosi an bi kë taki taa nöiti u musu soi. Ma a bi kë taki taa wa musu soi da pikipiki soni di an dë fanöudu. Hii juu u musu ta du andi u paamusi u du, u di di soni dë Jehovah kë fuu du.

Wë nöö andi i musu du ee de piki i fii soi da wan soni? Wë i musu dë seiki taa joo sa du di soni di joo soi da. Ee ja dë seiki, nöö a möön bunu fu ja soi. Di Wöutu u Gadu ta piki u taa: „A möön bunu ja soi taa joo du wan soni, möön leki fii soi taa joo du ën, ma ja du ën” (Peleik. 5:5). Boiti di dë, i musu suku mama wëti u Bëibel di ta taki u di soni di de kë fii soi fëën, nöö i taki andi joo du ee di háti fii ta da i pasi fii du ën. Andi da so u dee mama wëti u Bëibel dë?

So soni di sëmbë ta soi da an föutu a Gadu wojo. Dee Jehovah Kotoigi ta soi te de ta tööu. A Gadu ku woto sëmbë fesi di womi ku di mujëë di ta tööu ta soi taa de o lobi deseei, taa de o ta lesipeki deseei, söseei taa de o ta du dee soni aki „solanga de dë a libi”. (Kandë woto sëmbë an o taki dee seei wöutu dë te de ta tööu, ma tökuseei a o dë taa soi de ta soi a Gadu fesi.) Baka te de soi, nöö de ta taki taa dee tu sëmbë dë toon manu ku mujëë, nöö de musu dë sö hii de libi longi (Ken. 2:24; 1 Kol. 7:39). Di soni di womi ku mujëë ta soi da deseei te de ta tööu, da wan bunu soni, nöö a ta kai ku Gadu tu.

So soni di sëmbë ta soi ta föutu a Gadu wojo. Wan tuutuu Keesitu sëmbë an o soi taa a o feti da di köndë fëën, nasö taa a o bia baka da Gadu. Di soni dë an o kai ku di soni di Gadu piki u. Keesitu sëmbë an musu dë ku di goonliba aki a wan së. Fëën mbei de an nango a feti.​—Joh. 15:19; Jes. 2:4; Jak. 1:27.

So juu Keesitu sëmbë musu luku ee háti u de ta da de pasi u de soi. So juu a ta dë  fanöudu fuu pakisei di soni di Jesosi bi taki, ufö u soi. A bi taki taa: „Ee a dë u di Gaan Könu, nöö un dëën hën soni e. Nöö un da Masa Gadu di soni di dë fëën.”​—Luk. 20:25.

Boo taa wan Keesitu sëmbë ta suku pampia faa sa libi a wan köndë, nasö taa a ta suku pasipö, ma a ko fusutan taa a musu soi taa a o hoi hënseei a wan soni. Wë ee di soni aki kë taki taa a musu soi da wan soni di o mbei taa a pasa Gadu wëti, nöö hati fëën an musu dëën pasi fa du ën. Kandë gaan lanti u di köndë sa dëën pasi faa tooka so soni u di soi di a o soi, sö taa háti fëën an toobi ën.

Te wan sëmbë tooka soni u di soi di a soi, nöö a sa kai ku di soni di sikifi a Loomë 13:1. A taki taa: „Hii sëmbë musu ta saka a dee tii u lanti basu.” Fëën mbei wan Keesitu sëmbë sa taki taa an dë wan föutu soni ee a soi taa a o du wan soni di Gadu kë u wan Keesitu sëmbë du.

A dë fanöudu fii haika di háti fii di ta wooko ku dee lei u Bëibel, te de o hakisi i fii buta maun a wan soni liba, nasö fii du wan woto soni te joo soi. Dee Loomë sëmbë fu awooten, ku sëmbë di an bi go a siköö, bi ta panjan wan feti ufangi te de bi ta soi. Di soni dë bi kë taki taa de bi ta tei di në u di feti gadu u de soi, u lei taa de dë sëmbë di wotowan sa futoou. Dee Giiki sëmbë bi ta hopo wan maun go a liba, te de bi ta soi. Ku di soni dë de bi ta lei taa de ta fusutan taa wan gadu dë di ta luku andi libisëmbë ta du, söseei taa a ta haika andi de ta taki, nöö a o hakisi de paima.

An dë u taki taa wan dinima u Jehovah an o tei wan soni u di köndë di nama ku poipoi gadu, nöö a soi. Ma andi joo du te de piki i fii buta maun a wan Bëibel te joo soi, u lei taa joo taki di tuu? Wë ee hën i musu du sö wan soni, nöö an föutu fii du ën, u di di Bëibel ta taki u dinima u Jehovah di bi hakisi wotowan u de du so soni te de bi o soi (Ken. 24:2, 3, 9; 47:29-31). A dë fanöudu fii hoi a pakisei taa ee joo soi a sö wan fasi, nöö i ta soi a Gadu fesi taa joo taki di tuu. I musu dë kabakaba u taki di tuu a hii soni di de o hakisi i.

U di di dë di u ku Jehovah dë mati da wan gaan fanöudu soni da u, mbei u musu begi, söseei u musu pakisei bunu ufö u soi. Te u du sö nöö háti fuu an o toobi u, söseei wa o pasa dee mama wëti u Bëibel. Ee i soi da wan soni, nöö i musu du ën.​—1 Pet. 2:12.