1-2. Andi u musu du a di pisiten di u ta wakiti di njunjun goonliba?

 U TA tei ën u bigi seei taa Jehovah paamusi u taa a o seeka di goonliba aki faa ko toon wan njunjun goonliba ka leti libi o dë (2 Pet. 3:13). Hii fa wa sabi un daka Jehovah o du di soni di a paamusi u aki, tökuseei dee soni dee u ta si ta pasa a di ten aki ta lei u taa wa o abi u wakiti longi möön.​—Mat. 24:32-34, 36; Tjab. 1:7.

² Aluwasi ee u dë sömëni jaa longi a di tuutuu lei, tökuseei hii u tuu musu mbei möiti fuu ko ta möön biibi di soni di Jehovah paamusi u dë. Faandi mbei? Wë u di di biibi fuu sa ko suwaki. Apösutu Paulosu bi taki taa di suwaki di wan sëmbë biibi ta ko suwaki da „di zöndu di sa kisi u söndö fuu mëni” (Heb. 12:1). Ee wa kë u di biibi fuu ko suwaki, nöö hii juu u musu ta kai pakisei a dee soni dee ta lei u taa di njunjun goonliba o ko abiti möön.​—Heb. 11:1.

3. Fuun soni woo taki a di woto aki?

³ A di woto aki woo taki u dii soni di sa heepi u fuu ko ta möön biibi di paamusi di Jehovah paamusi u taa woo libi a wan njunjun goonliba. Woo taki u di kai di u musu ta kai pakisei a di lusupaima, di kai di u musu ta kai pakisei a di makiti di Jehovah abi, ku di du di u musu ta du soni di o mbei u ku Jehovah ko dë möön gaan mati. Nöö baka di dë, woo taki unfa di soni di Jehovah bi piki Habaki sa mbei di biibi fuu ko möön taanga. Ma boo luku fosu unfa di biibi di u musu möön biibi  di paamusi di Jehovah paamusi u taa woo libi a wan njunjun goonliba, sa heepi u ku dee soni dee ta miti u a di ten aki.

DEE SONI DEE MBEI U MUSU ABI WAN TAANGA BIIBI

4. Na un ten u musu lei taa u abi wan taanga biibi?

⁴ Hiniwan daka u ta du soni ka u musu lei taa u abi wan taanga biibi. U ta luku ambë woo ta hulu, un pei soni woo du u mbei piizii, na un siköö woo go, ku ambë woo tööu, söseei u ta luku ee woo pai miii, nasö un pei wooko woo du. Fëën mbei a bi o bunu fuu hakisi useei taa: ’Dee soni dee mi ta buta taa mi o du, ta lei taa mi ta biibi taa dee soni u di goonliba aki an o dë u nöömö u? Naa mi ta buta taa mi o du dee seei soni di dee sëmbë dee an ta biibi taa de sa libi u teego, ta du?’ (Mat. 6:19, 20; Luk. 12:16-21) Woo sa du soni a wan köni fasi, te u ta mbei möiti fuu ko ta möön biibi taa di njunjun goonliba o ko abiti möön.

5-6. Faandi mbei u abi wan taanga biibi fanöudu te fuka ta miti u? Konda wan woto.

⁵ Soni sa miti u tu ka u musu lei taa u abi wan taanga biibi. Sëmbë sa ta du ku u, u sa ko abi wan siki di data an sa kula, nasö wan woto soni sa miti u di sa mbei u lasi hati. Kandë bigibigi u sa ta si kuma woo hoi dou te dee lö fuka aki ta miti u. Ma möön gaanfa dee lö soni aki ta dë u wan longi pisiten, nöö fëën mbei u abi wan taanga biibi fanöudu fuu sa hoi dou, söseei fuu sa dini Jehovah ku piizii go dou.​—Lom. 12:12; 1 Pet. 1:6, 7.

⁶ So juu te wan fuka miti u, nöö u sa si kuma di njunjun goonliba di Jehovah paamusi u an o ko möönsö. Di soni aki kë taki taa di biibi fuu suwaki ö? Wë aan fu dë sö. Buta pakisei a di soni aki. Te tjuba ta kai sömëni wiki longi, nöö kandë u sa si kuma sonu an o jabi möön. Ma te u kaba fëën sonu ta jabi. Sö nöö a dë taa te u lasi hati gaanfa seei, nöö u sa ta si kuma nöiti di njunjun goonliba o ko. Ma ee di biibi fuu taanga, nöö woo dë seiki taa di soni di Gadu paamusi u o pasa tuutuu (Ps. 94:3, 14, 15; Heb. 6:17-19). Di dë di woo dë seiki u di soni dë, o mbei taa woo sa buta di dini u Jehovah a di fosu kamian a u libi go dou.

7. Ku un soni u musu ta köni?

⁷ Di peleikiwooko da wan woto soni ka u musu lei taa u abi wan taanga biibi. Sömëni sëmbë di u ta peleiki da, ta si kuma di njunjun goonliba di Gadu paamusi u, an dë wan tuutuu soni (Mat. 24:14; Eze. 33:32). U musu ta köni sö taa wa ko ta si dee soni dee Jehovah ta lei u kumafa dee lö sëmbë dë ta si de. Fëën mbei u musu ta du soni u mbei di biibi fuu ko möön taanga. Boo luku dii fasi fa u sa du di soni dë.

KAI PAKISEI A DI LUSUPAIMA

8-9. Unfa di kai di u musu ta kai pakisei a di lusupaima sa heepi u fuu ko abi wan möön taanga biibi?

⁸ Wan u dee fasi fa u sa mbei di biibi fuu ko möön taanga, da te u ta kai pakisei a di lusupaima. Di lusupaima da wan soni di ta mbei u dë seiki taa dee soni dee Gadu paamusi u o pasa tuutuu. U musu ta tei ten u kai pakisei a di soni di mbei Gadu paka di lusupaima da u, söseei a di fa di paima dë dii tjika. Te u ta du di soni aki, nöö woo ta möön biibi taa woo sa libi u teego a wan möön bunu goonliba, kumafa Gadu paamusi u. Faandi mbei u sa taki sö?

⁹ Andi Jehovah bi du sö taa di lusupaima bi sa paka? Wë Jehovah bi manda di wan kodo Womi Mii fëën di a lobi gaanfa seei ko a goonliba aki, nöö a bi ko dë wan libisëmbë di an abi zöndu. Di Jesosi bi dë a goonliba aki, a bi miti sömëni pei fuka. Te u kaba fëën a tja pena, hën a dëdë wan hati dëdë. Wan gaan paima wë Jehovah paka dë e! Nöiti di lobihati Gadu fuu bi o da pasi taa di Womi Mii fëën tja sitaafu, söseei taa a dëdë sö taa u sa abi wan bunu libi  u wan kölö pisiten nöö (Joh. 3:16; 1 Pet. 1:18, 19). U di Jehovah du sö wan gaan soni, mbei u sa dë seiki taa a o du hii soni sö taa u sa libi u teego a di njunjun goonliba.

KAI PAKISEI A DI MAKITI DI JEHOVAH ABI

10. Andi Jehovah abi di makiti u du, te u luku Efeise 3:20?

¹⁰ Wan woto fasi fa u sa mbei di biibi fuu ko möön taanga da te u ta kai pakisei a di makiti di Jehovah abi. A abi di makiti u du hii dee soni dee a paamusi u taa a o du. Tuu taa sömëni sëmbë a di ten aki an ta biibi taa woo sa libi u teego a wan njunjun goonliba. Ma möön gaanfa, Jehovah ta paamusi u soni di libisëmbë an sa du nöiti. A sa du di soni dë, u di hën da di makiti Gadu u mundu (Jöpu 42:2; Maik. 10:27). Fëën mbei an ta bigi da u te Gadu paamusi u taa a o du gaan foombo soni da u.​—Lesi Efeise 3:20.

11. Andi da wan u dee foombo soni di Jehovah bi paamusi taa a o du? (Luku di pisi „ Dee foombo soni dee Gadu bi paamusi dee sëmbë fëën bi ko pasa tuutuu”.)

¹¹ Pakisei so u dee soni dee Jehovah bi paamusi dee sëmbë fëën na awooten, di de bi ta si kuma an bi o sa pasa nöiti. A bi piki Abahamu ku Sala taa de bi o pai wan womi mii hii fa de bi ko gaan kaa (Ken. 17:15-17). Boiti di dë, a bi piki Abahamu taa a bi o da dee bakamii fëën di köndë Kaana. A bi djei kuma di soni dë an bi o pasa tuutuu di dee Isaëli sëmbë dee bi dë dee bakamii u Abahamu, bi dë a Egepiti kuma saafu sömëni jaa longi. Ma di soni dë pasa tuutuu. Bakaten, Jehovah bi taki taa Elizabëti bi o pai wan mii, hii fa a bi ko gaandi kaa. Söseei a bi piki Malia, wan mujëë di an bi duumi ku manu wan daka, taa a o pai di Womi Mii fëën. Di soni dë bi o mbei taa di soni di Gadu bi paamusi u sömëni dusu jaa a fesi a di djai u Eden, ko pasa tuutuu!​—Ken. 3:15.

12. Andi u sa dë seiki taa Jehovah abi di makiti u du, te u luku Josua 23:14 ku Jesaaja 55:10, 11?

¹² Te u ta kai pakisei a hii dee soni dee Jehovah bi paamusi, söseei te u ta kai pakisei a dee fasi fa a bi mbei dee soni dë pasa tuutuu, nöö u ta ko fusutan taa a abi makiti seei. Te u ta du di soni dë, nöö woo ta möön biibi di paamusi di Jehovah paamusi u taa woo libi a wan njunjun goonliba. (Lesi Josua 23:14; Jesaaja 55:10, 11.) Di soni dë o mbei u sa heepi wotowan u de ko fusutan taa di njunjun goonliba di Jehovah paamusi u an dë wan anasiwoto. Di Jehovah bi ta konda soni u di njunjun mundu ku di njunjun goonliba, hën a bi taki taa: „Bumbuu soni seei de dë fii sa a’ futoou a de liba, nöö de tuu seei o ko pasa”.​—Ako. 21:1, 5.

DU SONI DI O MBEI I KU JEHOVAH KO DË MÖÖN GAAN MATI

13. Unfa dee komakandi sa mbei di biibi fuu ko möön taanga? Konda wan woto.

¹³ Di u dii fasi fa u sa mbei di biibi fuu ko möön taanga, da te u ta du soni di o mbei u ku Jehovah ko dë möön gaan mati. Buta pakisei a di fasi fa u ta feni wini u dee komakandi. Wan sisa de ta kai Anna, bi ta du sömëni tookatooka soni a di hii-ten diniwooko sömëni jaa longi. A bi taki taa: „Dee komakandi heepi mi u di biibi u mi an ko suwaki. Aluwasi ee di sëmbë di ta hoi wan taki a di komakandi an kaba sa’ u hoi taki bumbuu, nasö ee an taki u wan njunjun soni di ma bi sabi, tökuseei mi ta jei soni a dee komakandi di ta heepi mi u mi fusutan dee lei u Bëibel möön bunu, söseei di ta mbei di biibi u mi ko möön taanga.” b Boiti di dë, di biibi fuu sa ko möön taanga te u ta haika dee piki u dee baaa ku dee sisa fuu a dee komakandi.​—Lom. 1:11, 12; 10:17.

14. Unfa di peleikiwooko ta mbei di biibi fuu ko möön taanga?

 ¹⁴ Te u ta du di peleikiwooko, nöö di biibi fuu ta ko möön taanga tu (Heb. 10:23). Wan sisa de kai Barbara, di ta dini Jehovah möön leki 70 jaa kaa bi taki taa: „Sensi ten kaa mi ta si taa di peleikiwooko da wan soni di ta mbei di biibi u mi ko möön taanga. Möön mi ta konda dee waiti soni dee Jehovah paamusi u da sëmbë, möön di biibi u mi ta ko möön taanga.”

15. Unfa di lei di u ta lei soni u Bëibel ta mbei di biibi fuu ko möön taanga? (Luku dee peentje tu.)

¹⁵ Boo luku wan woto soni di o mbei di biibi fuu ko möön taanga. Di soni dë da di tei di u ta tei ten u lei soni u Bëibel. Wan sisa de kai Susan bi taki taa a ta möön kösökösö dëën u lei soni u Bëibel te a buta dee daka ka a o ta du ën. A bi taki taa: „A sonde, mi ta seeka di woto u Di Hei Wakitimawosu di woo luku di woto wiki. A munde ku feifidaka, mi ta seeka miseei da di komakandi di u ta hoi a mindiwiki. Nöö dee woto daka dee fika, mi ta öndösuku woto soni u Bëibel.” U di Susan ta lei soni u Bëibel hii juu, mbei di biibi fëën ta ko möön taanga. Wan sisa de kai Irene, di bi ta dini Jehovah sömëni jaa longi a di hedikantoo fuu, bi taki taa di lei di a ta lei soni u dee tjabukama woto u Bëibel ta mbei di biibi fëën ko möön taanga. A bi taki taa: „A ta foondo mi seei taa hii dee pikipiki soni dee Jehovah bi taki a dee tjabukama woto ta pasa tuutuu.” c

„A O PASA NÖÖMÖ”

16. Faandi mbei u sa taki taa useei sa feni wini u dee soni dee Jehovah bi piki Habaki? (Hebelejën 10:36, 37)

¹⁶ So u dee dinima u Jehovah ta wakiti di kaba u di hogi goonliba aki wan longi pisiten kaa. So sëmbë ta si kuma di kaba u di hogi goonliba aki an ta ko hesi tjika. Ma Jehovah sabi fa dee dinima fëën ta fii. A bi piki di tjabukama Habaki taa: „Di wojolimbo sunjan o pasa tuutuu a di soifi ten. A ta biinga u dou a  di kaba, nöö an dë wan mindimindi woto. Un musu ta mëni ën nöömö hii fa an pasa jeti, biga a o pasa nöömö. An o ko lati!” (Hab. 2:3) Gadu bi taki di soni aki sö u Habaki wanwan bi sa feni wini fëën u? Useei sa feni wini u di soni dë a di ten aki tu ö? Wë di seei soni aki Jehovah bi mbei apösutu Paulosu piki dee Keesitu sëmbë dee bi ta wakiti di njunjun goonliba. (Lesi Hebelejën 10:36, 37.) Fëën mbei aluwasi ee u ta si kuma di soni di Jehovah paamusi u an ta ko hesi tjika, tökuseei u sa dë seiki taa „a o pasa nöömö. An o ko lati!”

17. Unfa wan sisa du di soni di Jehovah bi piki Habaki?

¹⁷ Sömëni jaa longi kaa sömëni dinima u Jehovah ta du di soni di Jehovah bi taki. A bi taki taa: „Un musu ta mëni ën nöömö.” Wan sisa de kai Louise bi bigi dini Jehovah a di jaa 1939. A bi taki taa: „A di ten dë mi bi ta si kuma Amagedon bi o ko ufö mi bi kaba siköö. Ma soni an bi waka sö. Di lesi di mi bi ta lesi soni u dee sëmbë u Bëibel dee bi ta wakiti u dee soni dee Jehovah bi paamusi de pasa tuutuu, bi heepi mi u mi wakiti Jehovah faa du dee soni dee a paamusi u. Mi bi ta lesi soni u Noa, Abahamu, Josëfu ku dee woto dinima u Jehovah di bi musu wakiti wan longi pisiten ufö de feni wan bunu di Jehovah bi paamusi de. Di biibi di mi bi ta biibi taa dee soni dee Jehovah paamusi u o pasa tuutuu, bi heepi mi, söseei a bi heepi woto sëmbë tu fuu dë seiki taa di njunjun goonliba dë zuntu.” Di soni aki ta kai ku sömëni dinima u Jehovah di ta dini ën sömëni jaa kaa!

18. Unfa di luku di u ta luku dee soni dee Jehovah mbei, sa mbei u ko ta möön biibi taa di njunjun goonliba o dou?

¹⁸ A dë sö tuu taa di njunjun goonliba an dou jeti. Ma buta pakisei a dee soni kuma dee teeja, dee pau, dee mbeti, söseei buta pakisei a libisëmbë. Hii fa wan ten bi dë ka dee soni aki an bi dë, tökuseei na wan sëmbë sa fia taa de an dë tuutuu. De dë a mundu u di Jehovah hën mbei de (Ken. 1:1, 26, 27). Di Gadu fuu paamusi u taa a o seeka di goonliba, nöö a o du di soni di a paamusi u dë. A di njunjun goonliba sëmbë o libi u teego, söseei de o abi wan bunu gösöntu. U sa dë seiki taa di njunjun goonliba o dou a di ten di Gadu buta.​—Jes. 65:17; Ako. 21:3, 4.

19. Unfa i sa mbei di biibi fii ko möön taanga?

¹⁹ Du hii soni di i sa du nöunöu u mbei di biibi fii ko möön taanga. Hii juu i musu ta lei taa i ta tei di lusupaima u bigi. Kai pakisei a di makiti di Jehovah abi. Du soni di o mbei i ku Jehovah ko dë möön gaan mati. Te i ta du dee soni aki, nöö joo ko dë wan u dee sëmbë „dee bi tai hati ta biibi tefa de feni dee soni dee Gadu bi paamusi de”.​—Heb. 6:11, 12; Lom. 5:5.