I bi sabi di soni aki ö?
Faandi mbei woto köndë sëmbë bi sa dë sodati u Könu Dafiti tu?
WOMI di an bi dë Isaëli sëmbë bi dë sodati u Dafiti tu. So u dee womi aki bi da: „Seilëki di bi dë wan Amon sëmbë, Ulia di bi dë wan Hëti sëmbë, ku Jetima di bi dë wan Moab sëmbë” a (1 Klon. 11:39, 41, 46). Dee Keleiti sëmbë, dee Peleiti sëmbë, ku dee Gati sëmbë seei bi dë sodati u Dafiti tu (2 Sam. 15:18). A kan taa dee Keleiti sëmbë ku dee Peleiti sëmbë bi dë zuntu famii u dee Filisiti sëmbë (Eze. 25:16). Dee Gati sëmbë bi kumutu a di foto u dee Filisiti sëmbë de ta kai Gati.—Jos. 13:2, 3; 1 Sam. 6:17, 18
Faandi mbei Dafiti bi mbei woto köndë sëmbë dë sodati fëën? A bi dë seiki taa de bi ta hoi deseei nëën, ma di möön fanöudu soni, hën da de bi ta hoi deseei a Jehovah. Wan wöutu buku di ta taki soni u Bëibel bi taki u dee Keleiti sëmbë ku dee Peleiti sëmbë taa: „De bi hoi deseei a Dafiti a di pisiten di soni bi ta möön taanga dëën a di tii fëën.” Unfa de bi lei taa de bi hoi deseei nëën? Di „dee womi u Isaëli” bi go disa Könu Dafiti u tei di së u „wan wisiwasi womi de kai Seiba”, nöö dee Keleiti sëmbë ku dee Peleiti sëmbë bi hoi baka da Dafiti, söseei de bi heepi Dafiti u tapa Seiba fu an du di soni di a bi abi pakisei u du (2 Sam. 20:1, 2, 7). Wan woto soni di bi pasa, hën da taa di womi mii u Könu Dafiti de kai Adonia bi kë toon könu a Salumon kamian. Ma dee Keleiti sëmbë ku dee Peleiti sëmbë bi hoi deseei a Dafiti, nöö de bi heepi ën buta Salumon kuma könu u di hën Jehovah bi kë u toon könu baka Dafiti.—1 Kön. 1:24-27, 38, 39.
Wan woto köndë sëmbë di bi hoi hënseei a Dafiti tu, bi dë di Gati sëmbë de kai Itai. Itai ku dee 600 feti womi fëën bi tei Könu Dafiti së, di di womi mii fëën Absalöm bi kë mbei dee Isaëli sëmbë mbei a toon könu a Dafiti kamian. Dafiti bi piki Itai taa an bi dë faa feti dëën u di hën da wan woto köndë sëmbë. Ma Itai bi taki taa: „Kumafa u dë seiki taa Jehovah ku könu dë a libi, sö nöö mi dë seiki taa mi o dë ku i hii mi libi longi, aluwasi ee mi sa lasi mi libi seei.”—2 Sam. 15:6, 18-21.
Itai bi hoi hënseei a Könu Dafiti, di sëmbë di Jehovah bi salufu
Hii fa dee Keleiti sëmbë, dee Peleiti sëmbë, ku dee Gati sëmbë bi dë woto köndë sëmbë, tökuseei de bi ta lesipeki Jehovah kuma di wan kodo tuutuu Gadu, söseei de bi ta lesipeki Dafiti kuma di sëmbë di Jehovah bi salufu. Dafiti bi musu u ta tei ën u bigi seei taa dee womi aki bi dë nëën bandja u heepi ën!
a Di wëti di Gadu bi da dee Isaëli sëmbë a Detolonomi 23:3-6 bi ta taki taa dee Amon sëmbë ku dee Moab sëmbë an bi musu go a di Wosu u Gadu. Ma a djei kuma di wëti aki bi ta lei taa de an bi o sa ko dë goonmii u di köndë, ma de bi sa libi a di köndë, söseei de bi sa hulu dee sëmbë u Gadu, ta libi ku de makandi. Luku Inzicht in de schrift, Volume 1, blz. 95.
