1. Unfa Jehovah bi seti di föluku fëën a di ten u dee fesiten Keesitu sëmbë?

 TE JEHOVAH da dee sëmbë fëën wan wooko u de du, nöö an ta kë u de du ën fanjanfanjan (1 Kol. 14:33). A kë taa di bunu buka musu paaja a hii së u goonliba (Mat. 24:14). A da Jesosi di faantiwöutu u tii di wooko. Nöö Jesosi ta du soni ku köni, sö taa di wooko an du fanjanfanjan. Te de bi hopo wan njunjun kemeente a di ten u dee fesiten Keesitu sëmbë, nöö de bi ta buta gaanwomi u tei fesi, söseei u heepi di kemeente (Tjab. 14:23). Wan kulupu baaa bi dë a Jelusalen, nöö so u de bi dë apösutu, söseei so u de bi dë gaanwomi. De bi ta lei hii dee kemeente tuu unfa de musu ta du soni (Tjab. 15:2; 16:4). Nöö u di dee baaa ku dee sisa bi du soni kumafa de bi piki de, mbei ’di biibi u di kemeente bi ko möön taanga. Nöö hiniwan daka, möön hia sëmbë bi ta piki di buka ta ko ta nama ku de’.​—Tjab. 16:5.

2. Unfa Jehovah bi ta tii di föluku fëën, söseei unfa a bi ta lei de soni u di Wöutu fëën sensi di jaa 1919?

² Te kisi di ten aki, Jehovah ta lei di föluku fëën fa de musu ta du soni. Sensi di jaa 1919, hën Jesosi ta wooko ku wan piki kulupu salufu baaa u seeka di peleikiwooko, söseei u lei dee bakama fëën soni u di Wöutu u Gadu a di soifi ten, sö taa de sa ta du soni ku köni (Luk. 12:42). a A dë seei gbelingbelin u si taa Jehovah ta mbei dee soni de ta du waka bunu.​—Jes. 60:22; 65:13, 14.

3-4. (a) Konda unfa u ta feni wini te wa ta du soni fanjanfanjan. (b) Andi woo luku a di woto aki?

³ Ee u bi ta du soni fanjanfanjan, nöö wa bi o sa du di wooko di Jesosi da u fuu du (Mat. 28:19, 20). Boo taa ee dee baaa  an bi seeka wan pisiwata da hiniwan kemeente ka de bi musu ta peleiki, nöö hiniwan sëmbë bi o ta peleiki ka a kë. Kandë hii juu seei u bi o ta peleiki a di seei pisiwata, nöö kandë so kamian bi o dë ka wa bi o go peleiki nöiti. Pakisei luku fa u ta feni wini a sömëni fasi, u di wa ta du soni fanjanfanjan.

⁴ Leti kumafa Jesosi bi ta tii dee bakama fëën di a bi dë a goonliba aki, sö nöö a ta tii di föluku u Gadu a di ten aki tu. A di woto aki woo luku unfa Jesosi bi ta du soni u tii dee bakama fëën a di ten di a bi dë a goonliba aki, söseei woo luku unfa di ölganisaasi fuu ta djeesi ën. Woo luku tu unfa u sa lei taa u ta kai di ölganisaasi u Jehovah gaan soni.

DI ÖLGANISAASI FUU TA WAKA A JESOSI BAKA

5. Andi da wan u dee fasi fa u ta waka a Jesosi baka? (Johanisi 8:28)

⁵ Jesosi bi ta du soni, söseei abi ta taki soni kumafa hën Tata bi ta lei ën. Wë sö nöö di ölganisaasi u Jehovah ta du soni. A ta lei taa a ta waka a Jesosi baka, u di a ta wooko ku di Wöutu u Gadu u heepi u fuu ko sabi andi bunu ku andi an bunu, söseei a ta wooko ku di Wöutu u Gadu u lei u unfa u sa ta du soni fuu sa ta feni wini. (Lesi Johanisi 8:28; 2 Tim. 3:16, 17.) Di ölganisaasi lo’ u da u taanga fuu ta lesi, söseei fuu ta du dee soni dee u ta lei a di Wöutu u Gadu. Unfa u ta feni wini te u ta du di soni di di ölganisaasi ta piki u aki?

6. Andi da wan u dee fasi fa u sa feni wini te u ta lei soni u Bëibel?

⁶ U ta feni wini seei te u ta wooko ku dee buku fuu u lei soni u Bëibel. U sa ta tei dee soni dee di Bëibel ta taki, maaka ku dee soni dee di ölganisaasi ta lei u. Te u ta si taa de ta kai ku di Wöutu u Gadu, nöö u ta ko möön abi futoou a di ölganisaasi u Jehovah.​—Lom. 12:2.

7. Un buka Jesosi bi ta paaja da sëmbë, nöö unfa di ölganisaasi u Jehovah ta lei taa de ta waka nëën baka?

⁷ Jesosi bi ta peleiki „di bunu buka u di Könuköndë u Gadu” (Luk. 4:43, 44). Söseei a bi piki dee bakama fëën u de konda soni u di Könuköndë da sëmbë (Luk. 9:1, 2; 10:8, 9). A di ten aki, hii dee sëmbë dee dë a di ölganisaasi u Jehovah tuu ta peleiki di bunu buka u di Könuköndë. Aluwasi naasë de ta libi, söseei aluwasi un faantiwöutu de abi a di ölganisaasi.

8. Un gaandi u abi?

⁸ A dë wan gaandi di u abi u konda di bunu buka u di könuköndë u Gadu da sëmbë! Na hii sëmbë abi di gaandi aki. Di Jesosi bi dë a goonliba, an bi da dee taku jeje pasi u de konda soni fëën da sëmbë (Luk. 4:41). A di ten aki, ee wan sëmbë kë bigi du di peleikiwooko makandi ku dee sëmbë u Jehovah, nöö a musu ta libi a wan fasi di ta kai ku Jehovah. U ta lei fa u ta tei di gaandi aki u bigi tjika, te u ta konda di bunu buka u di Könuköndë u Gadu da sëmbë a hiniwan okasi, söseei a hiniwan juu di u feni. U kë dë leti kuma Jesosi, fëën mbei u ta mbei hii möiti u peleiki da wotowan, söseei u heepi de u de ko sabi di tuutuu lei.​—Mat. 13:3, 23; 1 Kol. 3:6.

9. Unfa di ölganisaasi u Jehovah mbei sëmbë ko sabi di në u Gadu?

⁹ Jesosi mbei sëmbë ko sabi di në u Gadu. Di Jesosi bi ta begi hën Tata, hën a bi piki ën taa: „Mi mbei de ko sabi i në” (Joh. 17:26). Leti kuma Jesosi, di ölganisaasi u Jehovah ta du hii soni di de sa du u heepi sëmbë u de ko sabi di në u Gadu. Di Bijbel​—Nyun-Grontapuvertaling da wan u dee fasi fa di ölganisaasi du di soni dë, u di de bi toona buta di në u Gadu a dee kamian ka a bi dë fosufosu. Nöunöu hii di Bijbel​—Nyun-Grontapuvertaling, ku piki pisi fëën tuu dë u feni a möön leki 270 töngö. Te i luku Appendix A4 ku A5 a di Nieuwewereldvertaling van  de Bijbel (studie-uitgave), nöö joo ko sabi möön soni u di buta di u toona buta di në u Gadu a dee kamian ka a bi dë. Appendix C ta taki u sömëni soni tu, di ta lei taa di në u Gadu bi musu dë u si a di Giiki pisi u Bëibel a 237 kamian.

10. Andi u ta lei a di woto u di mujëë di ta libi a di köndë de kai Myanmar?

¹⁰ Leti kuma Jesosi, u kë heepi hii dee sëmbë dee u sa heepi u de ko sabi di në u Masa Gaangadu. Di wan mujëë di abi 67 jaa, di ta libi a wan köndë de kai Myanmar jei taa Gadu abi wan në, hën a bigi këë, hën a taki taa: „Tide da di fosu pasi di mi jei taa di në u Gadu da Jehovah. . . . I lei mi di möön fanöudu soni di sëmbë bi sa lei mi a mundu.” Di woto aki ta lei u taa te wan sëmbë ko sabi di në u Gadu, nöö di soni dë sa tooka hën libi.

I MUSU TA DU SONI GO DOU U LEI TAA I TA KAI DI ÖLGANISAASI U JEHOVAH GAAN SONI

11. Unfa dee gaanwomi sa lei taa de ta futoou di ölganisaasi u Jehovah? (Luku di peentje tu.)

¹¹ Andi da wan u dee fasi fa dee gaanwomi sa lei taa de ta futoou di ölganisaasi u Jehovah? Te di ölganisaasi lei dee gaanwomi unfa de musu du soni, nöö de musu tei ten lesi di soni bumbuu, söseei de musu du hii soni di de sa du u du soni kumafa di ölganisaasi lei de. Di ölganisaasi an ta lei de nöö unfa de musu ta hoi dee tookatooka pisi u dee komakandi, söseei an ta lei de nöö unfa de musu ta begi te de o begi a di kemeente fesi, ma a ta lei de tu unfa de musu ta luku dee sikapu u Keesitu. Te dee gaanwomi ta du hii dee soni di di ölganisaasi ta lei de, nöö dee baaa ku dee sisa ta fii taa Jehovah lobi de, söseei taa a ta heepi de.

12. (a) Faandi mbei u musu ta du soni kumafa dee baaa dee ta tei fesi ta lei u? (Hebelejën 13:7, 17) (b) Faandi mbei u musu ta buta pakisei a dee bunu fasi u dee baaa dee ta tei fesi?

¹² Te dee gaanwomi lei u wan soni di u musu du, nöö a bi o bunu fuu dë kabakaba u du ën. Te u ta du sö, nöö an o ta taanga da dee baaa dee ta tei fesi u du di wooko u de. Di Bëibel ta da u taanga fuu ta saka useei, söseei fuu ta dë kabakaba u du soni kumafa dee baaa dee ta tei fesi ta lei u. (Lesi Hebelejën 13:7, 17.) Wë so juu a sa ta taanga da u fuu du di soni dë. Faandi mbei? Biga u da zöndu libisëmbë. Boiti di dë, ee u ta buta pakisei a dee fasi di de abi di wa lobi, ka fuu ta buta pakisei a dee bunu fasi di de abi, nöö hën da u ta heepi di felantima fuu. Unfa sö? Wë di felantima fuu an kë fuu ko dë seiki taa Gadu hën ta wooko ku di ölganisaasi aki u tii u. Fëën mbei ee u bigi ta pakisei hogi u dee gaanwomi, nöö u sa bigi ko ta pakisei hogi u di ölganisaasi tu, söseei a sa pasa taa wa ko ta futoou di ölganisaasi möön. Andi u sa du fuu ko sabi dee mindimindi woto u dee felantima fuu, söseei andi u sa du fuu koti pasi da de?

NA DISA WOTOWAN U DE MBEI JA KO TA FUTOOU DI ÖLGANISAASI MÖÖN

13. Unfa dee felantima u Gadu ta pooba u mbei sëmbë ko ta si di ölganisaasi u Gadu kuma wan hogi ölganisaasi?

¹³ Dee felantima u Gadu ta pooba u mbei sëmbë ko ta si dee bunu soni dee di ölganisaasi ta du, kuma soni di hogi. Di Wöutu u Gadu ta lei u taa Jehovah kë u dee dinima fëën ta dë limbolimbo a hii futu. A kë u de ta libi a wan fasi di fiti, söseei a kë u de ta dini ën kumafa a kë. Jehovah taa ee wan sëmbë ta du hogi, nöö ee an kë tooka di fasi fa a ta libi möönsö, nöö de musu puu ën a di kemeente (1 Kol. 5:11-13; 6:9, 10). Wë u ta du soni leti kumafa di Wöutu u Gadu ta lei u. Ma u di u ta du soni kumafa Gadu taki, mbei a sa pasa taa dee felantima fuu ta tei di soni dë u kuutu u. De ta taki taa wa lobi sëmbë, taa u ta kuutu sëmbë, söseei taa wa ta si dee sëmbë dee an dë kuma u a wojo.

14. Ambë ta mbei sëmbë ta paaja mindimindi woto u di ölganisaasi u Jehovah?

 ¹⁴ Ko fusutan ambë da di sëmbë di ta suku u poi di në u di ölganisaasi. Saatan hën da di sëmbë di ta mbei de ta paaja mindimindi woto u di ölganisaasi. „Nëën mindi soni ku lëgëdë kumutu” (Joh. 8:44; Ken. 3:1-5). Fëën mbei an musu ta foondo u te Saatan ta wooko ku so sëmbë u paaja mindimindi woto u di ölganisaasi u Jehovah. Di soni dë hën bi pasa a di ten u Jesosi ku dee fesiten Keesitu sëmbë.

15. Andi dee hedima u keiki bi du ku Jesosi ku dee bakama fëën?

¹⁵ Hii fa Jesosi, di Womi Mii u Gadu bi dë söndö föutu, söseei hii fa a bi ta du wanlö gaan foombo wooko, tökuseei Saatan bi mbei so sëmbë paaja mindimindi woto fëën. Dee hedima u keiki bi ta piki sëmbë taa „di gaan hedima u dee taku jeje”, hën bi ta heepi Jesosi u puu taku jeje a sëmbë liba (Maik. 3:22). Di tesi bi ta miti Jesosi, hën dee hedima u keiki bi mindi soni dëën taa a kosi Gadu, söseei de bi manda dee sëmbë dee bi sai dë u de taki taa de musu kii ën (Mat. 27:20). Bakaten, di dee bakama u Jesosi bi ta paaja di bunu buka u di Könuköndë, hën dee felantima bi „ta poi dee biibima u Masa Jesosi da dee oto sëmbë u di köndë” u de hopo du ku de (Tjab. 14:2, 19). Di Waktitoren u 1 u tuwalufumu-liba u di jaa 1998, bi ta taki wan soni u Tjabukama 14:2. A bi taki taa dee sëmbë dee dë ku Saatan a wan së, an ta kë jei di bosikopu di dee bakama u Jesosi ta paaja, söseei de ta taki mindimindi woto u de da sëmbë, u sëmbë an musu ta kë haika de, söseei u de ko ta buuse de.

16. Andi wa musu fëëkëtë te u ta jei sëmbë ta taki mindimindi woto?

¹⁶ Saatan ta mindi soni a di ten fuu aki tu. A „ta ganjan sëmbë a hii di goonliba” (Ako. 12:9).  Ee a ko pasa taa i jei sëmbë taki mindimindi woto u di ölganisaasi, nasö u dee baaa dee ta tei fesi, nöö u ta da i taanga fii toona mëni di fasi fa dee felantima u Gadu bi ta libi ku Jesosi, söseei ku dee fesiten Keesitu sëmbë. A di ten aki, sëmbë ta du ku dee Jehovah Kotoigi, söseei de ta mindi soni da de leti kumafa di Bëibel bi taki a fesi (Mat. 5:11, 12). Wa o ta biibi mindimindi woto ee u sabi ambë da di sëmbë di ta paaja de, söseei ee u du wan soni wantewante u tjubi useei. Wë nöö andi u musu du fuu tjubi useei da mindimindi woto?

17. Unfa u sa ta köni u mindimindi woto an mbei u ko suwaki? (2 Timoteo 1:13) (Luku di pisi „ Andi u musu du ku dee mindimindi woto dee sëmbë ta paaja”.)

¹⁷ Na haika mindimindi woto. Apösutu Paulosu bi lei u gbelingbelin andi u musu du te u ta jei sëmbë ta taki mindimindi woto. A bi piki Timoteo faa „tapa wanlö sëmbë” di „ta hai dee mindimindi soni ta konda”, söseei taa an „musu a’ bisi ku dee peipei oto dee an ta kai ku Gadu, dee de ta mindi ta taki” (1 Tim. 1:3, 4; 4:7). Wan pikimii di ta hai sa pii sundjusundju soni a goon buta a buka, ma nöiti wan gaangaan sëmbë ku fusutan o du di soni dë, u di a sabi taa di soni dë sa mbei a ko dë ku suwaki. Wë sö nöö a dë ku dee mindimindi woto tu, wa ta kë haika de seei, u di u sabi bumbuu taa de an bunu. Tuutuu soni nöö u ta kë haika.​—Lesi 2 Timoteo 1:13.

18. Unfa u sa lei taa u ta futoou di ölganisaasi u Jehovah?

¹⁸ A di woto aki u taki u dii fasi nöö fa di ölganisaasi u Gadu ta waka a Jesosi baka. Te i ta lei soni u Bëibel, nöö mbei möiti fii ko si dee sömëni woto fasi fa di ölganisaasi fuu ta waka a Jesosi baka. Heepi dee wotowan u di kemeente be de ko ta futoou di ölganisaasi möön gaanfa. Boiti di dë, i musu ta du soni go dou u lei taa i ta futoou di ölganisaasi. Joo sa lei taa i ta futoou ën, te i ta dini Jehovah ku hii i hati go dou, söseei te i ta hoi iseei a di ölganisaasi di a ta tei u du dee soni dee a kë du a goonliba aki (Ps. 37:28). U abi di gaandi u dë wan u dee sëmbë u di lobihati föluku u Jehovah. Fëën mbei, boo ta lei taa u ta tei di gaandi aki u bigi seei u nöömö.