De pai mi a di jaa 1955. U bi dë dii womi mii, nöö mi bi dë di möön njönkuwan. De kiija mi a di köndë Finland a wan pisiwata di de ta kai Vantaa a di ten aki.

Mi mama dopu kuma wan Jehovah Kotoigi wantu jaa ufö a bi pai mi. Mi tata an bi lobi di tuutuu lei, nöö an bi ta da mi mama pasi faa lei u soni u Bëibel, söseei an bi ta dëën pasi faa tja u go a dee komakandi. Fëën mbei mi mama bi ta lei u wantu soni u Bëibel te mi tata an bi dë a wosu.

Sensi di mi bi dë mii, hën mi bi ta piki Jehovah buka a soni. Di mi bi abi seibi jaa, hën wan daka di mujëë di bi ta lei mi soni a siköö hati bi boonu, u di ma bi kë njan wan kuku di de ta kai verilättyjä. De ta mbei di kuku aki ku buuu. Ku wan së maun fëën a bi peeta mi a dee tu së bandja buka u mi, nöö ku di woto së maun fëën a bi ta pooba u tuusi wan pisi u di kuku di bi dë a wan tjökö, go a mi buka. Ma mi bi naki di tjökö puu nëën maun.

Di mi bi abi 12 jaa, hën mi tata lasi libi. Bakaten, mi bi bigi nango a dee komakandi. Dee baaa a di kemeente bi ta libi bunu ku mi, nöö di soni dë bi heepi mi u mi go a fesi a di biibi. Mi bi bigi ta lesi di Bëibel hiniwan daka, söseei mi bi bigi ta lei soni a dee buku fuu finifini. Dee soni aki bi heepi mi u mi dopu a 8 u tanvuuwata-liba u di jaa 1969. A di ten dë mi bi abi 14 jaa.

 Di mi bi kaba siköö, hën wantewante mi bigi du di kowoonu pioniliwooko. Wantu wiki baka di dë, hën mi bi foloisi go libi a di foto Pielavesi, ka de bi abi möön peleikima fanöudu.

Di mi bi dë ala, hën mi miti wan sisa de kai Sirkka, hën mi ku ën tööu bakaten. Mi bi lobi ën seei, u di a bi abi sakafasi, söseei a bi lobi Jehovah gaanfa seei. An bi ta suku gudu, nasö bai në. U tu tuu bi kë dini Jehovah ku hii u hati, söseei u bi dë kabakaba u du hiniwan soni di dee baaa bi hakisi u fuu du. U tööu a 23 u gaanliba u di jaa 1974. Wa bi go ku fakansi di u tööu. Ka u di dë, u bi foloisi go a wan piki foto a di köndë Finland di de ta kai Karttula. Ala de bi abi peleikima fanöudu gaanfa seei.

Jehovah bi lei u sensi bigi u di tööu libi fuu taa a o ta da u hii dee soni di u abi fanöudu, ee u buta di Könuköndë fëën a di fosu kamian a u libi (Mat. 6:33). Wa bi abi wagi di u bi ta dë a Karttula. Bigibigi ku baisigi u bi nango a kamian. Nöö di wei bi ta kötö seei te di pisiten u di jaa bi dou ka ëisi ta kai. U bi abi wan wagi fanöudu fuu du di peleikiwooko, u di di pisiwata ka u bi ta peleiki bi bigi seei. Ma wa bi abi möni tjika u bai wan wagi.

Wan daka, hën wan u dee gaan baaa u mi bi ko luku u. Hën a hakisi u ee wa kë di wagi fëën. Dee pampia u di wagi bi seeka kaa. Di wan kodo soni di u bi musu du, hën da u bi musu lai oli dëën. A sö wan fasi u feni di wagi di u bi abi fanöudu.

Jehovah bi lei u taa a o ta da u dee soni dee u abi fanöudu. Di soni di u bi musu du, hën da u bi musu buta di Könuköndë fëën a di fosu kamian a u libi.

Di u bi dë a wan pionili siköö a di jaa 1978, hën Raimo Kuokkanen, a wan u dee baaa dee bi ta lei u soni a di siköö, bi da u taanga u fuu di pampia u go a di Giliati siköö. Fëën mbei u bi bigi lei u fan Ingisitöngö sö taa u bi sa go a di siköö. Ma a di jaa 1980, ufö u fuu di pampia, hën de kai u fuu go wooko a di bëikantoo u Finland. A di ten dë, ee i bi ta wooko a Bëtëli, nöö ja bi sa go a di Giliati siköö. Ma u bi kë dini Jehovah a di kamian ka a bi kë fuu dini ën, na ka useei bi kë. Fëën mbei u bi tei di kai di de bi da u fuu go wooko a Bëtëli. Ma wa bi tapa ku di lei di u bi ta lei Ingisitöngö,  u di u bi ta wakiti luku ee tökuseei u bi o feni di okasi u go a di Giliati siköö.

Wantu jaa baka di dë, hën di Tii Kulupu bi taki taa dee sëmbë dee ta wooko a Bëtëli sa fuu di pampia u go a di Giliati siköö. Wantewante u fuu di pampia. Ma wa du ën u di wa bi ta wai ku di wooko fuu a Bëtëli. U bi lobi ën seei! Ma u bi kë go wooko ka de bi abi möön peleikima fanöudu. De kai u ko a di Giliati siköö, nöö a wajamaka-liba u di jaa 1985 u kaba di siköö. U bi dë a di u 79 kalasi. Baka di siköö, hën de manda u go a Kolombia.

Di u bi dou a Kolombia, hën de buta u a di bëikantoo fu ala. Mi bi ta du hii soni u du di wooko u mi bunu. Ma baka wan jaa, mi bi bigi ta si kuma a bi o möön bunu ee u bi sa du wan woto soni. A bi dë di fosu pasi a mi libi di mi bi hakisi dee baaa u de da u wan woto wooko. Bakaten de manda u fuu go du di peleikiwooko kuma sëndëlengi a Neiva, di dë a di pisiwata de kai Huila.

Hii juu mi bi lobi u du di peleikiwooko. Di mi bi ta du di pioniliwooko a di köndë Finland di ma bi tööu jeti, nöö so juu mi bi ta bigi peleiki a mamate te go dou ndeti buka. Di mi tööu, nöö mi ku Sirkka bi ta peleiki hii daka. So juu te u bi nango peleiki a kamian di bi longi ku wosu, nöö u bi ta duumi a di wagi fuu. Di soni aki bi ta heepi u fu wa lasi ten, söseei u bi sa bigi du di peleikiwooko fuukufuuku di woto daka.

Di sëndëlengi wooko bi heepi u fuu ta du di peleikiwooko fajafaja. Di kemeente ka u bi nango bi ko möön bigi. Dee baaa ku dee sisa u Kolombia bi abi lesipeki, de bi lobi sëmbë, söseei de bi ta tei soni u bigi.

Tu foto bi dë zuntu ku ka u bi ta peleiki. Nöö na wan Kotoigi bi ta libi a dee foto dë. Mi bi ta hakisi miseei unfa di bunu buka bi o sa dou ala. Ma u di de bi ta feti a dee foto dë, mbei sëmbë di an bi ta libi a dee foto dë an bi sa go ala. Fëën mbei mi bi ta begi hakisi Jehovah ee wan sëmbë u wan dee foto dë bi sa toon wan Kotoigi. Mi bi ta pakisei taa sö wan sëmbë bi musu ta libi a Neiva faa bi sa ko sabi soni u di tuutuu lei. Mi bi ta begi tu taa baka te di sëmbë dë dopu, nöö a musu ko dë wan gaangaan sëmbë a di biibi, söseei a musu toona go nëën foto faa go peleiki ala. Ma Jehovah bi abi wan möön bunu soni a pakisei.

Kölö sö baka di dë, hën mi bigi lei wan njönku kijoo de kai Fernando González, soni u Bëibel. A bi ta libi a Algeciras, wan u dee foto ka Kotoigi an bi dë. Hiniwan wiki Fernando bi ta waka söwan 50 kilomëti ko a wooko a Neiva. A bi ta seeka bunu a fesi te u bi ta lei ën soni u Bëibel, nöö wantewante a bi bigi nango a dee komakandi. Di fosu wiki di u bigi lei Fernando soni u Bëibel, hën a bi bigi ta lei dee sëmbë a di foto ka a bi ta libi dee soni dee a bi ta lei.

Sikisi liba baka di Fernando bi bigi lei soni u Bëibel hën a dopu a jailiba u di jaa 1990. Baka di dë hën a bigi du di kowoonu pioniliwooko. U di wan Kotoigi bi ko dë na Algeciras, mbei di bëikantoo bi si taa de bi sa manda sëmbë di ta du di apaiti pioniliwooko go ala. A bakajailiba u di jaa 1992, hën de seti wan kemeente a di foto dë.

Fernando an bi fika ta peleiki a di foto ka a bi ta libi wanwan. Baka di a tööu, hën ku hën mujëë foloisi go libi a di foto San Vicente del Caguán. Na wan Kotoigi bi dë a di foto dë. De bi  heepi seti wan kemeente ala. A di jaa 2002, Fernando toon wan keling-gaanwomi, nöö hën ku hën mujëë Olga ta du di keling-wooko a di ten aki jeti.

Di woto aki ta lei taa a dë fanöudu fuu begi hakisi Jehovah soni di nama ku di diniwooko fuu. Jehovah sa du dee soni dee wa sa du. Hën abi di koti wooko, na u.​—Mat. 9:38.

A di jaa 1990, hën de hakisi u fuu du di keling-wooko. Di fosu kamian ka u bi du di wooko dë bi dë a di mama foto u Kolombia de ta kai Bogotá. U bi ta si kuma wa bi o sa du di wooko bumbuu. Mi ku mi mujëë an abi wan apaiti soni di u sa’ u du bunu. Söseei wa bi guwenti u libi a wan gaan foto. Ma Jehovah du di soni di a bi paamusi u a Filipi 2:​13. A taki taa: „Hënseei wë ta wooko a i hati fii kë du dee soni dee ta dëën piizii, nöö hënseei ta toona da i taanga tu fii sa du de.”

Bakaten de hakisi u fuu du di keling-wooko a wan kamian di dë zuntu ku Medellín, di foto di mi bi taki soni fëën a bigi u di woto aki. Dee sëmbë u di foto dë bi ko guwenti di feti di sëmbë bi ta feti a sitaati, nöö an bi ta bigi da de möön. Wan daka, di mi bi dë a wan sëmbë pisi ta lei ën soni u Bëibel, hën wanlö sëmbë dee bi dë a döö, bi bigi ta suti goni. Mi bi kë kai tapa bëë a goon, ma di sëmbë di mi bi ta lei soni u Bëibel bi dë fëën piii ta lesi di palaklafu go dou. Di a lesi di palaklafu te a kaba, hën a hopo go a döö. Te wan pisi, hën a toona ko ku tu pikimii a wosu, hën a taa: „Piimisi fii e, mi bi musu go tei dee mii u mi aki.”

Woto soni bi pasa tu ka u bi sa lasi u libi. Wan daka di u bi nango a sëmbë pisi ta peleiki da de, hën mi si mi mujëë ta kule ta ko a mi, nöö mi bi sa si taa a bi ta fëëë. A bi piki mi taa wan womi bi hai wan goni u suti ën. A bi bigi da mi seei. Ma bakaten u bi ko fusutan taa di womi an bi kë suti Sirkka, ma a bi kë suti wan womi di bi ta pasa leti a Sirkka bandja.

Baka wan pisiten, wa bi ta fëëë di feti di de bi ta feti a sitaati sö möön. U bi feni taanga a di fasi fa dee Kotoigi fu ala bi ta hoi dou, hii fa dee lö soni dë, ku möön hogi soni bi ta miti de. U bi taki taa ee Jehovah bi ta heepi de, nöö a o heepi u tu. U bi ta haika dee gaanwomi dee bi ta libi a dee pisiwata dë, u bi ta du soni u tjubi useei, nöö u bi ta disa dee woto soni a Jehovah maun.

Ma so juu soni an bi ta hogi sö kumafa u bi ta mëni. Wan daka, di mi bi dë a wan sëmbë pisi, hën mi jei kuma tu mujëë taanpu a döö ta kosi deseei. Ma bi kë go luku andi bi ta pasa, ma di mujëë di bi ta libi a di wosu bi kai mi u mi ko a baiko ko luku andi ta pasa. Di mi bi go luku hën mi ko si taa an bi dë tu mujëë sëmbë, ma a bi dë tu papakai di bi ta djeesi sëmbë a di fasi fa de ta fan.

A di jaa 1997, hën de hakisi mi u lei wotowan soni a di Dinai-siköö. b Hii juu mi bi ta si ën kuma wan gaandi u go a dee siköö di di ölganisaasi ta hoi. Ma nöiti mi bi pakisei taa mi bi o abi di gaandi u lei wotowan soni a wan u dee siköö aki.

Bakaten mi bi ta du di wooko di wan pisiwata-gaanwomi bi ta du. Di mi bi kaba u du di wooko dë, hën mi toona go du di keling-wooko baka. So wan 30 jaa longi mi bi ta du di keling-wooko, söseei mi bi ta lei sëmbë soni a di Dinai-siköö. Mi lobi dee wooko aki seei. Dee wooko aki mbei mi bi feni gaan bunu seei. Hii fa de an bi dë wan kösökösö soni u du. Be mi konda faandi mbei mi taki sö.

Mi da wan sëmbë di ta du soni fajafaja. Di soni aki bi heepi mi u mi pasa dee hebi fuka dee bi ta miti mi. Ma so lesi mi bi ta dë fajafaja poi u seeka soni a di kemeente. So juu mi bi ta duwengi sëmbë u soi lobi da wotowan, söseei u na ta suku fini a wotowan poi. Ma a di seei ten dë ma bi ta soi lobi da wotowan, söseei mi bi ta suku fini a wotowan poi.​—Lom. 7:21-23.

So juu mi bi ta lasi hati u di mi bi ta mbei föutu (Lom. 7:​24). Mi bi piki Jehovah taa a bi o möön bunu u mi disa di sëndëlengiwooko, nöö mi toona go a di köndë Finland baka. A di ndeti dë seei mi bi go a komakandi. Di soni di mi bi jei a komakandi bi da mi taanga u du di sëndëlengiwooko go dou, söseei a bi da mi taanga u mi ta mbei möiti u wooko a dee suwakifasi u mi. Te ko miti di daka u tide, mi ta foondo seei fa Jehovah piki di begi u mi gbelingbelin. Boiti di dë, mi ta tei ën u bigi taa a heepi mi a wan sutifasi, u wooko a dee suwakifasi u mi.

Mi ku Sirkka de ku tangi a hati taa Jehovah bi da u di gaandi u du di hii-ten diniwooko, bëina hii u libi longi. Mi ta tei ën u bigi seei taa Jehovah da mi wan mujëë di lobi sëmbë, söseei wan mujëë di tja hënseei bunu a hii dee jaa dee pasa.

Abiti möön mi o tapa 70 jaa, nöö mi o tapa u du di keling-wooko, söseei mi o tapa u lei sëmbë soni a di Dinai-siköö. Ma ta tjali u di mi o tapa u du dee soni aki. Faandi mbei? Wë, u di mi sabi taa di soni di Jehovah ta tei u bigi möön gaanfa, hën da te u abi sakafasi, te u dë ku tangi a hati, ku te u ta gafa ën ku wan limbo hati (Mik. 6:8; Maik. 12:32-34). An dë nömönömö taa u musu abi gaan faantiwöutu ufö u sa gafa Jehovah.

Te mi ta pakisei dee wooko dee mi bi du, nöö mi ta fusutan taa ma bi feni de u di mi bi bunu möön wotowan, söseei ma bi abi dee gaandi aki u di mi bi sa u du soni a wan apaiti fasi. Na seei! Ma Jehovah hën bi da mi dee wooko dë, u di a abi bunuhati. A da mi dee gaandi aki hiifa mi abi suwakifasi. Mi sabi taa Jehovah wanwan nöö bi sa heepi mi u du dee wooko dë. Hii fa mi abi suwaki fasi tökuseei di kaakiti u Gadu bi feni pasi u wooko a mi liba u tja gafa ko dëën.​—2 Kol. 12:9.