1. Andi da di paladëisi ka u dë nëën nöunöu aki, nöö andi u musu dë kabakaba u du?

 A DI ten aki wan paladëisi dë a goonliba aki ka sömëni sëmbë ta mbei möiti u du bumbuu soni. Milionmilion sëmbë di lobi bööböö libi dë nëën, nöö de buta taa nöiti de o kumutu nëën. Söseei de kë heepi sömëni woto sëmbë u ko libi nëën, makandi ku de. Ma andi da di paladëisi dë? Wë a dë di fasi fa soni seti, sö taa sëmbë sa ta dini Jehovah fiifii makandi a di soifi fasi. Di soni aki, ta mbei u ta fii kuma u dë a paladëisi, u di u ku Jehovah dë gaan mati, söseei u di u ku dee wotowan ta libi fiifii makandi ku useei.

2. Faandi mbei di paladëisi ka u dë nëën nöunöu aki dë wan foombo soni?

² A wan foombo fasi Jehovah seeka soni da dee dinima fëën u de sa ta libi fiifii makandi ku deseei, hii fa de ta libi a di hogi goonliba u Saatan aki, ka sëmbë ta buuse de na de (1 Joh. 5:19; Ako. 12:12). Jehovah ta si fa di hogi goonliba aki ta poi sëmbë kaba a sösö. Ma tökuseei a ta heepi dee dinima fëën u de sa ta fii bunu, sö taa de sa ta dini ën go dou ku piizii. Di Wöutu fëën ta kai di paladëisi ka u dë nëën nöunöu aki, wan kamian ka sëmbë sa go „tjubi”, söseei wan „djai ka hia wata dë” (Jes. 4:6; 58:11). U di Jehovah dë ku dee sëmbë dee ta libi a di apaiti paladëisi aki, mbei de an ta dë pantapanta, söseei de ta dë waiwai, hii fa de ta libi a dee lasiti daka u di goonliba aki di taanga u pasa.​—Jes. 54:14; 2 Tim. 3:1.

3. Unfa di soni di sikifi a Jesaaja kapitë 65 bi pasa tuutuu na awooten?

³ Jehovah bi mbei di tjabukama Jesaaja konda unfa soni bi o dë da dee sëmbë dee bi o ta libi a di paladëisi ka u dë nëën  nöunöu aki. Di soni aki sikifi a Jesaaja kapitë 65, nöö di fosu pasi di abi pasa tuutuu bi dë a di jaa 537 bifö Keesitu. A di ten dë, dee Dju dee bi lei taa de ta tjali u dee zöndu u de, bi kumutu a katibo a Babilon ko a di köndë u de baka. Jehovah bi mbei dee sëmbë fëën feni gaan bunu, söseei a bi heepi de u de bi sa mbei Jelusalen ko hanse baka, u di a bi booko kaba a sösö. Boiti di dë, a bi heepi de u de bi sa toona mbei di Wosu fëën ko bunu baka, sö taa de bi sa abi wan kamian a Isaëli ka de bi sa nango dini ën kumafa a kë.​—Jes. 51:11; Sak. 8:3.

4. Unfa di tjabukama woto u Jesaaja kapitë 65 pasa tuutuu a di ten fuu aki?

⁴ Di u tu fasi fa di tjabukama woto u Jesaaja pasa tuutuu, bi dë a di jaa 1919 baka Keesitu, di dee dinima u Jehovah u di ten aki bi kumutu a di Gaan Babilon. Baka di dë, hën pikipiki sëmbë ko ta dini Jehovah a hii së u goonliba kumafa a kë, söseei de bi ko ta möön libi fiifii ku deseei kumafa a kë tu. Sömëni baaa ku sisa di bi ta du di peleikiwooko fajafaja, bi heepi seti sömëni kemeente, söseei de bi nango a fesi a di biibi. Dee womi ku dee mujëë dee bi abi hogihati, ku dee bi ta libi wan fanafiti libi bi „ko dë njunjun sëmbë di abi njunjun fasi kumafa Gadu kë” (Ef. 4:24). Ma sömëni u dee soni dee Jesaaja bi taki o pasa tuutuu a di njunjun goonliba. Ma tökuseei u ta feni wini u dee soni dë nöunöu kaa. Boo taki unfa u ta feni wini u di paladëisi ka u dë nëën nöunöu aki, söseei woo taki faandi mbei wa musu kumutu nëën nöiti.

UNFA DEE SËMBË DEE DË A DI PALADËISI AKI TA FII?

5. Un wini dee sëmbë dee dë a di paladëisi ka u dë nëën nöunöu aki ta feni, te u luku Jesaaja 65:13?

⁵ U ta fii bunu. Di tjabukama woto u Jesaaja bi ta lei taa dee sëmbë dee bi o dë a di paladëisi ka u dë nëën nöunöu aki, bi o tooka gaanfa seei ku dee sëmbë dee an bi o dë nëën. (Lesi Jesaaja 65:13.) Jehovah ta da hii dee dinima fëën dee soni di de abi fanöudu u de ku ën sa dë mati go dou. U abi di santa jeje fëën, di Wöutu fëën, ku te a hia woto soni di sa heepi u fuu ta dë gingin a di biibi, söseei fuu ta dë waiwai. (Luku Akoalimbo 22:17.) Ma soni dë wan hii woto fasi da dee sëmbë dee na dë a di paladëisi ka u dë aki. ’Hangi ta kii de . . . , dëëwata ta kii de . . . , [söseei] de ta sen te de an saandi u de du.’ De an dë zuntu ku Gadu.​—Amös. 8:11.

6. Unfa Joëli 2:21-24 ta lei u fa Jehovah ta sölugu u tjika, söseei unfa u sa feni wini u dee soni dë tjika?

⁶ A di tjabukama woto u Joëli, Joëli bi wooko ku dee wöutu alisi, win, ku oleifi fatu u lei fa Jehovah ta sölugu dee dinima fëën tjika (Joë. 2:21-24). Jehovah ta du di seei soni dë ku di Bëibel, dee buku fuu, di website fuu, dee komakandi, dee keling komakandi, söseei ku dee könklësi fuu. Hii daka u sa ta lei soni ku dee soni dë, nöö de ta mbei u fii bunu seei.

7. Andi ta mbei u ta fii bunu te dou a u hati? (Jesaaja 65:14)

⁷ U ta dë waiwai, söseei u ta dë tifeedi. Dee sëmbë u Gadu sa ta dë ku „piizii”, u di de ta tei dee soni dee Jehovah ta du da de u bigi. (Lesi Jesaaja 65:14.) Di taanga di u ta feni a dee soni dee Gadu paamusi u a di Wöutu fëën, ku di dë di u dë seiki taa dee soni dë o pasa tuutuu, u di Jesosi dëdë paka di lusupaima da u, ta mbei u ta fii bunu te dou a u hati. Te u ku dee baaa ku dee sisa fuu ta taki soni u dee soni dë, nöö u ta dë waiwai seei!​—Ps. 34:8; 133:1-3.

8. Andi da dee tu fanöudu soni u di paladëisi di u dë nëën aki?

⁸ Di lobi di dee sëmbë u Jehovah lobi de na de, ku di libi di de ta libi makandi kuma wan famii, da tu fanöudu soni u di paladëisi di u dë nëën aki. Di soni aki ta heepi u fuu fusutan  unfa di libi o dë a di njunjun goonliba. A di ten dë dee sëmbë u Jehovah o ta möön lobi deseei, söseei de o ta möön libi makandi möön fa de ta du ën a di ten aki (Kol. 3:14). Wan sisa bi taki andi a bi si a dee sëmbë u Jehovah di a bi miti de di fosu pasi. A bi taki taa: „Ma bi saandi mi bi musu du u mi bi sa ta dë waiwai, söseei u mi bi sa abi wan piizii wosudendu libi. Ma a dee Jehovah Kotoigi mi bi si u di fosu pasi unfa sëmbë ku sëmbë sa lei taa de lobi deseei.” Ee wan sëmbë kë dë waiwai tuutuu, söseei ee a kë dë tifeedi, nöö a musu dë a di paladëisi ka u dë nëën nöunöu aki. Aluwasi unfa dee sëmbë u di goonliba aki ta si dee dinima u Jehovah, tökuseei de abi wan bunu në a Jehovah ku hii dee dinima fëën.​—Jes. 65:15

9. Andi o pasa ku dee soni dee ta mbei u ta tja sitaafu, te u luku Jesaaja 65:16, 17?

⁹ U ta dë bööböö, söseei wa ta dë pantapanta. Jesaaja 65:14 ta taki taa dee sëmbë dee an dë a di paladëisi ka u dë nëën nöunöu aki o ta ’bai këë u di pen o dë a de hati, söseei u di saanfa-u-du u de kaba’. Wë nöö unfa a dë ku dee soni dee ta mbei taa dee sëmbë u Gadu ta tja pen ku sitaafu? Wë baka wan pisiten dee soni dë an o dë möön. (Lesi Jesaaja 65:16, 17.) Jehovah o puu hii dee soni dee ta mbei u ta tja sitaafu, nöö te u kaba fëën wa o ta mëni dee soni dë möön seei.

10. Faandi mbei i ta tei ën u bigi taa i sa ta dë makandi ku dee baaa ku dee sisa? (Luku di peentje tu.)

¹⁰ U ta fii bunu seei te u dë a dee komakandi. Te u dë a de, nöö wa ta buta pakisei a dee bookohedi fuu. Boiti di dë, u ta heepi dee baaa ku dee sisa fuu u de ta fii bunu, te u ta lei taa u lobi wotowan, te u ta dë ku wai a hati, ta libi fiifii ku wotowan, ta abi tjalihati u sëmbë, söseei te u ta lei taa u abi sakafasi. Di santa jeje u Gadu ta mbei u ko abi dee fasi dë (Gal. 5:22, 23). U ta tei ën u bigi seei taa u dë a di ölganisaasi u Gadu! Dee sëmbë dee an o go disa di paladëisi di u dë nëën aki, o si fa Gadu o du hii dee soni dee a paamusi u a di ten di ta ko, ka a o mbei wan „njunjun mundu ku wan njunjun goonliba”.

11. Unfa di paladëisi di u dë nëën aki ta mbei u ta fii, te u luku Jesaaja 65:18, 19?

¹¹ U ta tei ën u bigi seei, söseei u ta piizii. Jesaaja bi taki tu taa u musu „dë waiwai, söseei un musu piizii”, u di u dë a di paladëisi di u dë nöunöu aki. Jehovah hën seeka soni buta da u sö. (Lesi Jesaaja 65:18, 19.) Fëën mbei an ta bigi da u taa Jehovah ta wooko ku u fuu heepi sëmbë u de kumutu a dee ölganisaasi u di goonliba aki, u di de an ta lei de ambë da  Gadu tuutuu. Söseei Jehovah ta wooko ku u fuu heepi sëmbë u de ko dë a di waiti paladëisi ka u dë aki tu. U ta piizii seei ku dee gaan bunu dee u ta feni u di u dë a di tuutuu lei, söseei u ta kë konda soni fëën da wotowan.​—Jel. 31:12.

12. Unfa u ta fii te u luku dee soni di Jehovah paamusi u a Jesaaja 65:20-24, nöö faandi mbei u ta fii sö?

¹² U ta tei ën u bigi, söseei u ta wai taa u ku Jehovah dë gaan mati. Pakisei hii dee soni dee woo si, ku hii dee soni dee woo du a di njunjun goonliba! Di Bëibel ta paamusi u taa: „Nöiti möön a o pasa taa wan beibi . . . libi wantu daka nöö. Söseei nöiti möön a o pasa taa wan sëmbë di ko gaandi kaa an libi dou hii dee daka fëën.” Woo ’mbei wosu, nöö useei o ta libi a de. Woo paandi doloifi djai, nöö woo ta njan dee fuuta u de.’ Wa o ta „wooko taanga u sösö”, biga u da sëmbë di „Jehovah [o] wensi bunu da”. A paamusi u taa woo abi wan gaan suti libi, ka hogi an o ta miti u möön. A o sabi andi hiniwan sëmbë abi fanöudu „ufö de bai kai” ën, söseei a o ta „da hiniwan soni di dë ku libi di soni di a kë”.​—Jes. 65:20-24; Ps. 145:16.

13. Unfa Jesaaja 65:25 ta lei fa sëmbë bi o tooka soni a de libi, te de bi o bigi dini Jehovah?

¹³ U ta dë bööböö, nöö wa ta fëëë taa hogi sa miti u. Sömëni fuu bi hogi seei kuma taku mbeti, nöö u bi ta du gaan hogihati soni, ma te u kaba fëën u tooka ko dë wan hii oto sëmbë u di di santa jeje u Gadu bi heepi u. (Lesi Jesaaja 65:25.) De bi mbei taanga möiti seei u disa dee taku fasi u de (Lom. 12:2; Ef. 4:22-24). Ma tökuseei dee sëmbë u Gadu ta mbei föutu, u di de da zöndu libisëmbë. Jehovah hai „hii pei sëmbë” ko nëën, nöö u di de lobi ën, söseei u di de lobi de na de, mbei de ta libi fiifii makandi ku deseei (Tit. 2:11). Wë di Kaba Hei Gadu u mundu wanwan tö sa du di gaan foombo soni dë!

14. Unfa di woto u wan baaa ta lei u taa u sa biibi di soni di sikifi a Jesaaja 65:25?

¹⁴ Sëmbë sa tooka di fasi fa de ta libi tuutuu ö? Boo buta pakisei a di woto u wan njönku kijoo, di bi go a dunguwosu sömëni pasi di a bi abi 20 jaa. A bi ta libi wan fanafiti libi gaanfa seei, söseei a bi lo’ u du hogihati soni. De bi ta kisi ën buta a dunguwosu u di a bi ta fufuu wagi, u di a bi ta booko sëmbë wosu go fufuu soni, söseei a bi ta du sömëni woto hogi. Hii juu a bi ta dë kabakaba u feti ku sëmbë. Ma di fosu pasi di a jei soni u dee lei u Bëibel, söseei di a bigi go a dee komakandi u dee Jehovah Kotoigi, hën a ko fusutan faandi mbei a dë a libi. A ko fusutan taa a musu ta du soni kumafa Gadu kë, söseei taa a musu ta dini ën makandi ku di föluku fëën. A bi ko dopu te u kaba fëën, nöö a lo’ u kai pakisei a di fasi fa di tëkisi u Jesaaja 65:25 ta nama ku di libi fëën. A bi hogi kuma di mbeti de kai lëun, ma a tooka seei ko ta libi fiifii ku sëmbë kuma sikapu mii.

15. Faandi mbei u kë kai sëmbë u de ko dini Jehovah makandi ku, nöö unfa u sa du di soni dë?

¹⁵ Jesaaja 65:13 ta bigi ku dee wöutu: „Di möön Hei Masa Jehovah taki taa.” Nöö vers 25 ta kaba ku dee wöutu: „sö Jehovah taki.” Hii juu dee soni dee Jehovah paamusi u ta pasa tuutuu (Jes. 55:10, 11). Jehovah seti soni kaa, sö taa libisëmbë sa ta dini ën fiifii makandi a di soifi fasi. A seeka soni a söwan fasi taa gaan hia sëmbë sa ta dini ën fiifii makandi kuma de da sëmbë u di wan wosudendu. A dë seei gbelingbelin u si taa tu u di ölganisaasi aki an dë a goonliba. U di u da sëmbë u di wosudendu u Jehovah, mbei wa ta dë pantapanta taa hogi sa miti u ka u dë aki, söseei nöunöu kaa u ta bigi fii taa u dë bööböö, hii fa u dë a di hogi goonliba u Santa aki jeti (Ps. 72:7). U dee soni aki mbei u kë heepi  sömëni sëmbë di u sa heepi, u de ko dini Jehovah makandi ku u. U sa du di soni dë, te u ta buta pakisei a di heepi di u musu heepi sëmbë u de ko toon bakama u Keesitu.​—Mat. 28:19, 20.

UNFA U SA HEEPI WOTOWAN U DE KË KO A DI PALADËISI KA U DË AKI

16. Andi ta heepi sëmbë u de kë ko a di paladëisi di u dë nëën aki?

¹⁶ Hiniwan fuu sa du wan soni u heepi wotowan u de kë ko a di paladëisi ka u dë aki. Woo sa du di soni dë, te u ta djeesi Jehovah. An ta hai sëmbë ko a di ölganisaasi fëën ku taanga. Ma a ta hai sëmbë ko nëën ku lobi (Joh. 6:44; Jel. 31:3). Te dee bunuhati sëmbë ko sabi unfa Jehovah dë, söseei unfa a lobi sëmbë tjika, nöö de ta kë ko dë mati fëën. Unfa dee bunu fasi dee u abi, ku di bunu fasi fa u ta du soni, sa heepi wotowan u de kë ko a di paladëisi di u dë nëën aki?

17. Unfa u sa heepi wotowan u de kë ko a di paladëisi ka u dë aki?

¹⁷ Wan fasi fa u sa heepi wotowan u de kë ko a di paladëisi ka u dë aki, hën da te u ta libi bunu ku dee baaa ku dee sisa fuu, söseei te u ta lei de taa u lobi de. Te sëmbë ko a dee komakandi fuu u di fosu pasi, nöö u kë de fii di seei fasi kumafa dee sëmbë na awooten bi fii, di de bi go a dee komakandi u dee baaa ku sisa u Kolenti. De bi taki taa: „Gadu dë a unu mindi tuutuu” (1 Kol. 14:24, 25; Sak. 8:23). Fëën mbei a bunu fuu ta mbei möiti go dou fuu ta ’libi kötökötö fasi ku u na u. Wa musu ta suku takitaki’.​—1 Tes. 5:13.

18. Andi sa mbei taa sëmbë kë ko a di ölganisaasi u Jehovah?

¹⁸ Hii juu u musu ta mbei möiti fuu ta si dee baaa ku dee sisa fuu kumafa Jehovah ta si de. Woo sa du di soni dë, te u ta buta pakisei a dee bunu fasi di de abi, ma na a dee fasi u de  dee an bunu. Biga te u kaba fëën, de an o abi fasi di an bunu möön. Ee toobi ko a u mindi, nöö hii juu seei u sa seekëën ku lobi. Woo sa du sö, te u ta ’fii ku di otowan fuu ta tjali ku ën, ta dëën paadon’ ku hii u hati (Ef. 4:32). Te u ta du sö, nöö dee sëmbë dee kë u sëmbë musu ta libi ku de a di seei fasi dë, o kë ko a di paladëisi ka u dë aki. a

NA KUMUTU A DI PALADËISI KA U DË AKI

19. (a) Andi so sëmbë bi taki di de bi toona ko a di paladëisi di u dë nëën aki? (Luku di pisi „ De bi go, hën de toona ko baka”.) (b) Andi u musu dë kabakaba u du? (Luku di peentje tu.)

¹⁹ U lobi di paladëisi di u dë nëën aki seei! A waiti gaanfa seei, söseei möön hia sëmbë ko dë nëën. Boo ta tei ën u bigi taa Jehovah seti di paladëisi aki da u. Ee wan sëmbë kë feni taanga, ee a kë ta dë bööböö, söseei ee a kë ta dë waiwai, nöö a musu ko a di paladëisi aki, nöö an musu kumutu nëën! Ma a bunu fuu ta köni, u di Saatan ta mbei hii möiti faa sa ganjan u puu a di paladëisi aki (1 Pet. 5:8; Ako. 12:9). Wa musu dëën pasi faa feni u ganjan. Boo ta mbei hii möiti u soni an ko poi di bunu libi ku di bööböö libi di u abi a di waiti paladëisi aki.