1. Unfa so baaa ku sisa ta fii te de musu fan ku sëmbë a di peleikiwooko? (Luku di peentje tu.)

 U DEE sëmbë u Jehovah ta peleiki da wotowan u di u lobi di Tata fuu a liba ala, söseei u di u kë heepi sëmbë u de ko sabi ën. Sömëni peleikima lobi di peleikiwooko gaanfa seei. Ma a ta taanga da so peleikima u du ën ku piizii. Faandi mbei? U di so u de ta sen gaanfa seei, söseei de ta si kuma de an saanfa u lei sëmbë soni. So u de an lo’ u go a sëmbë pisi söndö u de kai de. Wotowan ta fëëë taa sëmbë o gandji da de. So u de an lo’ u du soni di sa mbei woto sëmbë hati boonu. Hii fa dee baaa ku dee sisa aki lobi Jehovah gaanfa seei, tökuseei a ta taanga da de u konda soni u di bunu buka da sëmbë di de an sabi. Ma u di de sabi unfa di wooko aki dë fanöudu tjika, mbei hii juu de nango a di peleikiwooko. Jehovah ta wai ku de seei!

2. Faandi mbei ja musu lasi hati ee a ta taanga da i u du di peleikiwooko ku piizii?

² A ta taanga da i so juu u du di peleikiwooko ku piizii, u di i ta fii sö tu ö? Ee sö a dë, nöö na lasi hati. A kan taa di fii di i ta fii taa ja sa u lei sëmbë soni, ta lei taa i abi sakafasi, söseei taa ja kë sëmbë buta pakisei a i poi. A ta lei tu taa ja kë fia ku sëmbë. Na wan sëmbë lobi te de ta gandji dëën, möönmöön te a ta mbei möiti u du bunu soni da wotowan. Ma di Tata fii a liba ala sabi bumbuu unfa i ta fii, nöö a kë da i di heepi di i abi fanöudu (Jes. 41:13). A di woto aki woo buta pakisei a feifi soni di sa heepi u fu wa ta fii sö möön, söseei de o heepi u fuu ta du di peleikiwooko ku piizii.

 MBEI DI WÖUTU U GADU DA I TAANGA

3. Andi bi heepi di tjabukama Jelemia faa bi sa peleiki da woto sëmbë?

³ A di ten di pasa, di Wöutu u Gadu bi da dee dinima fëën taanga, te de bi musu du wan soni di bi taanga da de. Boo luku di woto u di tjabukama Jelemia. A bi ta fëëë di Jehovah bi mandëën faa go peleiki. A bi taki taa: ’Ma sa u fa bumbuu seei. Mi da wan womi mii jeti’ (Jel. 1:6). Andi bi heepi ën u du di peleikiwooko hii fa a bi ta fii sö? Wë di soni di Jehovah bi piki ën dëën taanga seei. A bi taki taa: ’A bi ta tjuma mi a mi hati ku dee bonu o mi. Mi bi ko wei u hoi ën da mi seei, ma bi sa tjëën möön’ (Jel. 20:8, 9). Hii fa di kamian ka Jelemia bi musu peleiki an bi dë wan kösökösö kamian, tökuseei di buka di a bi musu peleiki bi dëën di taanga di a bi abi fanöudu u du di wooko dë.

4. Andi ta pasa te u ta lesi, söseei ta kai pakisei a di Wöutu u Gadu? (Kolosën 1:9, 10)

⁴ Dee Keesitu sëmbë ta feni taanga a di Wöutu u Gadu. Di apösutu Paulosu bi sikifi wan biifi da di kemeente a Kolosën, hën a bi taki taa dee baaa bi musu sabi bumbuu unfa Jehovah kë u de libi, nöö di soni dë bi o heepi de u de „ta libi bunu nëën wojo”, söseei de bi o ta feni wini a hii dee bunu wooko di de bi o ta du. (Lesi Kolosën 1:9, 10.) Wan u dee bunu wooko dë, da di peleiki di de bi ta peleiki di bunu buka. Fëën mbei te u ta lesi di Wöutu u Gadu, ta kai pakisei nëën, nöö woo ko ta biibi Jehovah möön gaanfa, söseei woo ko fusutan möön bunu faandi mbei a dë fanöudu u paaja di bunu buka u di Könuköndë u Gadu.

5. Unfa u sa feni möön wini te u ta lesi ta öndösuku soni a di Bëibel?

⁵ Ee u kë feni wini u di Wöutu u Gadu tuutuu, nöö u musu tei ten ta lesi ta öndösuku soni bumbuu, söseei u musu tei ten ta kai pakisei nëën. Wa musu du dee soni aki vou vou. Ee i lesi wan tëkisi hën a taanga da i fii fusutan, nöö na disa ën. I sa wooko ku di buku Ondrosuku Bijbel moro fini​—Gi Yehovah Kotoigi. Di soni aki sa heepi fii ko fusutan di tëkisi möön bunu. Ee i ta tei i ten öndösuku soni a di Bëibel, nöö joo ko möön dë seiki taa dee soni dee i ta lei a Bëibel da tuutuu soni (1 Tes. 5:21). U di joo ko dë möön seiki u dee soni di di Bëibel ta lei i, mbei joo möön dë ku piizii u konda dee soni dee i ta lei da wotowan.

 SEEKA ISEEI BUNU TE I NANGO A DI PELEIKIWOOKO

6. Faandi mbei u musu seeka useei bunu a fesi da di peleikiwooko?

⁶ Te i seeka iseei bunu te i nango a di peleikiwooko, nöö ja o ta senuwe sö möön te i musu fan ku sëmbë. Jesosi bi heepi dee bakama fëën u de seeka deseei bunu ufö de go a di peleikiwooko (Luk. 10:1-11). U di de bi du andi Jesosi bi lei de, mbei taa de bi wai seei ku dee sömëni bunu soni di de bi sa du.​—Luk. 10:17.

7. Unfa u sa seeka useei da di peleikiwooko? (Luku di peentje tu.)

⁷ Unfa u sa seeka useei da di peleikiwooko? U musu pakisei luku andi un kë taki, nöö un musu mbei möiti u konda di soni di u kë taki a sö wan fasi taa a o taanga u fusutan. A bi o bunu tu fu pakisei luku andi dee sëmbë dee u ta peleiki da lo’ u taki, nöö u luku unfa u bi o piki de. Te u ta fan ku wan sëmbë, nöö u musu mbei möiti u na ta senuwe poi, söseei u musu ta booko lafu, nöö u musu ta fan suti ku de.

8. Na un fasi dee Keesitu sëmbë dë kuma di doti paabi di Apösutu Paulosu bi taki soni fëën?

⁸ Apösutu Paulosu bi piki dee Keesitu baaa ku sisa fëën taa: „Fa u ta tja di buka aki, nöö a dë kuma wan sëmbë tei wan gaan gudu fëën buta a wan doti paabi dendu” (2 Kol. 4:7). Ma andi da di gudu dë? Wë, di gudu dë da di bunu buka u di Könuköndë u Gadu di u ta paaja u tjubi sëmbë libi (2 Kol. 4:1). Ma nöö andi da di doti paabi? Di doti paabi dë da dee dinima u Gadu di ta paaja di bunu buka da woto sëmbë. A di ten u Paulosu dee seisonima bi ta tei doti paabi u tja gudu. Dee gudu aki da soni kuma njanjan soni, win, ku möni. Sö nöö Jehovah ta futoou u tjika fuu tja di bunu buka fëën go paaja da woto sëmbë, nöö a o da u di kaakiti di u abi fanöudu fuu sa ta paaja ën u nöömö.

BEGI FII FENI DEGIHATI

9. Andi u musu du u na ta fëëë libisëmbë möön? (Luku di peentje tu.)

⁹ So juu u sa fëëë u di so sëmbë an ta kë haika di bunu buka, nasö u di de ta du ku u. Andi u sa du fu wa fëëë möön? Buta pakisei a di begi di dee apösutu bi begi, di de bi piki de taa de an bi musu peleiki möön. Wë de an bi mbei fëëë da libisëmbë tapa de u de peleiki go dou. De bi hakisi Jehovah faa heepi de u  de ’konda di buka fëën söndö fëëë’. Wantewante Jehovah bi piki di begi u de (Tjab. 4:18, 29, 31). Ee fëëë da libisëmbë ta tapa u fuu peleiki so juu, nöö u sa begi Jehovah hakisi ën faa heepi u. Hakisi ën faa heepi i be di lobi di i abi da sëmbë ko möön taanga, sö taa ja ta fëëë möön u konda di bunu buka fëën da de.

10. Unfa Jehovah ta heepi u fuu dë kotoigi fëën? (Jesaaja 43:10-12)

¹⁰ Jehovah tei u ko kotoigi fëën, nöö a ta paamusi u taa a o heepi u, söseei taa a o heepi u fuu ko abi di degihati di u abi fanöudu. (Lesi Jesaaja 43:10-12.) Boo buta pakisei a dee fö fasi fa Jehovah ta du di soni aki. Di fosu soni, hën da Jesosi ta dë ku u te u ta peleiki (Mat. 28:18-20). Di u tu soni, hën da Jehovah buta dee ëngëli fëën u ta heepi u (Ako. 14:6). Di u dii soni hën da Jehovah ta da u di santa fëën fuu sa toona mëni dee soni dee u bi lei (Joh. 14:25, 26). Nöö, di u fö soni da dee baaa ku sisa dee Jehovah da u fuu ku de ta peleiki makandi. Di heepi di Jehovah ku dee baaa ku sisa ta heepi u, ta mbei u ko abi degihati fuu sa du di peleikiwooko go dou söndö fëëë.

FITI ISEEI A DEE SËMBË DEE I TA PELEIKI DA, SÖSEEI SI DE KUMA SËMBË DI SA TOOKA

11. Unfa u sa feni möön hia sëmbë te u ta peleiki? (Luku di peentje tu.)

¹¹ I ta fii booko saka te ja miti sëmbë a wosu ö? I sa hakisi iseei taa: ’Na un së dee sëmbë u di pisi wata aki dë nöunöu?’ (Tjab. 16:13) ’De go a wooko, nasö de go bai soni ö?’ Ee sö a dë, nöö i si kuma i sa feni möön hia sëmbë ee i peleiki a sitaati ö? Wan baaa de kai Joshua bi taki taa: „Sömëni pasi mi feni okasi u peleiki a kamian ka sëmbë lo’ u go bai soni, söseei a woto kamian ka hia sëmbë lo’ u dë.” Di baaa aki ku ën mujëë Bridget, bi feni möön sëmbë a wosu u peleiki da, di de bi ta bëli dee sëmbë aki a ndeti buka, nasö a sonde sapate.​—Ef. 5:15, 16.

12. Unfa u sa ko sabi andi wan sëmbë ta biibi, nasö ku andi a ta booko hën hedi?

¹² Ee wan sëmbë an kë haika i, nöö mbei möiti u ko sabi andi a ta biibi, nasö ku andi a ta booko hën hedi. Joshua ku Bridget lo’ u wooko ku dee hakisi dee dë a dee talakitaati u fan ku sëmbë. Te de bi ta wooko ku di talakitaati unfa i ta si di Bëibel? Nöö de bi ta taki  taa: „So sëmbë ta si di Bëibel kuma di buku u Gadu, ma wotowan an ta si ën sö. Unfa i ta si di Bëibel?” Di soni aki sa heepi i fii bigi fan ku wan sëmbë.

13. Faandi mbei u sa taki taa u du di wooko di u bi musu du, aluwasi ee sëmbë an kë haika u te u ta peleiki da de? (Nöngö 27:11)

¹³ Aluwasi ee sëmbë an ta haika u te u ta peleiki da de, tökuseei u ta du di wooko di u musu du. Faandi mbei? U di u du andi Jehovah ku di womi mii fëën piki u fuu du (Tjab. 10:42). Aluwasi ee wa feni na wan sëmbë u peleiki da, nasö ee na wan sëmbë an kë haika u, tökuseei u sa dë ku piizii, u di u sabi taa di Tata fuu a liba ala ta wai ku u.​—Lesi Nöngö 27:11.

14. Faandi mbei u sa wai te wan u dee peleikima feni wan sëmbë di kë sabi möön soni u Bëibel a di pisiwata ka u ta peleiki?

¹⁴ U sa wai tu te woto peleikima feni wan sëmbë a di pisiwata ka u ta peleiki. Di hei Wakitimawosu tei di wooko fuu nama ku di suku di de ta suku wan mii di lasi. Sömëni sëmbë ta suku di mii aki a hii kamian. Te de feni di mii, nöö na di sëmbë di feni ën wanwan nöö ta wai, ma hii dee woto sëmbë dee bi ta suku ën tuu ta wai. Sö nöö hii di kemeente ta wooko makandi u heepi sëmbë u de ko toon bakama u Jesosi. U abi hii sëmbë a di kemeente fanöudu u peleiki da dee sëmbë a di pisiwata ka u ta peleiki, söseei hii u tuu ta wai te wan sëmbë ta ko a dee komakandi.

BUTA PAKISEI A DI LOBI DI I LOBI JEHOVAH KU WOTO SËMBË

15. Unfa Mateosi 22:37-39 sa heepi u fuu ko ta du di peleikiwooko ku möön piizii? (Luku di peentje u di tu.)

¹⁵ Te u ta buta pakisei a di lobi di u lobi Jehovah ku woto sëmbë, nöö di soni dë o heepi u fuu sa ta du di peleikiwooko ku möön piizii. (Lesi Mateosi 22:37-39.) Pakisei unfa Jehovah ta wai te a ta si taa u ta du di peleikiwooko, söseei pakisei luku unfa wan sëmbë o ta wai te a bigi lei soni u Bëibel! Hoi a pakisei tu taa dee sëmbë dee ta haika di bosikopu fuu sa feni di libi u teego.​—Joh. 6:40; 1 Tim. 4:16.

16. Unfa u sa ta du di peleikiwooko ku piizii te wa sa kumutu a wosu? Konda wan woto

¹⁶ A dë sö taa wan soni ta tapa i fii kumutu a wosu ö? Ee sö a dë, nöö luku andi i sa du u lei taa i lobi Jehovah ku woto sëmbë. Baaa  Samuel ku ën mujëë Dania an bi sa kumutu a wosu a di pisiten di di Kolona siki bi ta paaja a goonliba. Hii fa soni bi ta taanga da dë, tökuseei de bi ta du di peleikiwooko go dou ku tëlëfön, de bi ta sikifi biifi da sëmbë, söseei de bi ta lei sëmbë soni u Bëibel a Zoom. Baaa Samuel bi ta peleiki da dee sëmbë dee a bi ta miti te a bi go a di hatiwosu ka de bi ta kula ën, u di a bi abi kanker. A bi taki taa: „Te soni ta taanga da u, nöö di soni dë sa mbei taa u ta fëëë, söseei di biibi fuu sa ko suwaki tu. U musu mbei möiti fuu ta dë waiwai a di dini di u ta dini Jehovah.” A di seei ten dë Dania bi kai, nöö dii liba longi a bi musu dë a bedi kandikandi. Sikisi liba longi a bi abi u dë a wan suwakima sutuu. A bi taki taa: „Mi bi ta du andi mi bi sa du a di pisi ten dë. Mi bi abi di okasi u ta peleiki da di sösutu di bi ta ko luku mi a wosu, söseei mi bi ta fan ku dee sëmbë dee bi ta tja soni ko da u. Mi bi fan bunu seei ku wan mujëë a tëlëfön di ta wooko a wan kamian ka de ta mbei deesi”. Hii fa Samuel ku Dania an bi sa du sömëni soni kuma fosu möön, tökuseei de bi ta du andi de sa du, nöö di soni aki bi ta da de piizii seei.

17. Unfa u sa feni möön wini u dee soni dee u lei a di woto aki?

¹⁷ I sa mbei möiti u wooko ku hii dee feifi soni dee u taki soni u de a di woto aki. Hiniwan u dee soni aki dë kuma dee soni dee u ta lai a wan soni di u ta seeka u boi. Te i lai hii dee soni dë mökisi ko a wan, nöö di njanjan fii o suti seei. Ee wooko ku hii dee soni dee u taki soni u de a di woto aki, nöö de o heepi u te u ta fii bookosaka, söseei de o heepi u fuu ta dë ku möön piizii a di peleikiwooko.