1-2. (a) Andi ta lei taa libisëmbë abi kötöhati fanöudu, söseei taa Gadu mbei de u de sa ta da wotowan kötöhati? (b) Un gaan hogi de ta du ku so miii?

HII libisëmbë abi kötöhati fanöudu, nöö Gadu mbei u a sö wan fasi taa useei sa ta da wotowan kötöhati tu. Te wan mii ta pëë, hën a kai koti kini, nöö a ta këë kule go nëën mama ku hën tata. Te a dë sö, di mama ku di tata an sa mbei di koti buka ko bëtë wantewante dë, ma de sa da di mii kötöhati. Kandë de o hakisi di mii ee andi du ën, nöö de ganjëën faa kabuka, nöö de buta deesi a di koti buka dëën, nöö de tai ën ku soni. So juu an ta tei longi seei, nöö di mii ta toona go ta pëë fëën baka. Baka wan pisiten ufö di koti buka ta bëtë.

² Ma so juu so soni ta miti miii di hogi möön di soni aki. So juu a ta pasa taa de du hogihogi ku wan mii a di së manu ku mujëë soni. Kandë de du di soni aki ku di mii wan pasi nöö, ma so juu de sa du ën ku ën sömëni pasi. Di soni aki sa ta pasa sömëni jaa longi. Ma aluwasi wan pasi nöö de du di soni aki ku wan mii, a sa ta toobi di mii sömëni jaa longi. So juu de ta sitaafu di sëmbë di du di soni aki ku di mii. Ma so juu de an ta feni di sëmbë sitaafu. Ma aluwasi ee de ko sitaafu di sëmbë di du di soni ku di mii seei, tökuseei di soni aki sa ta toobi di mii u tee a ko gaan sëmbë seei.

3. Andi Jehovah kë te u luku 2 Kolenti 1:3, 4? Un hakisi woo luku?

³ Ee a ta taanga da wan baaa nasö wan sisa di de bi du hogihogi ku ën a piki mii ten, nöö andi sa heepi ën? (Lesi 2 Kolenti 1:3, 4.) A dë gbelingbelin u si taa Jehovah kë u dee sëmbë fëën feni kötöhati, söseei a kë u de fii taa a lobi de. Fëën mbei  boo taki u dee dii hakisi aki: (1) Faandi mbei dee sëmbë di de bi du hogihogi ku de a piki mii ten, abi kötöhati fanöudu? (2) Ambë sa da dee sëmbë aki kötöhati? (3) Unfa u sa da de kötöhati?

4-5. (a) Faandi mbei u musu hoi a pakisei taa piki mii ku gaan sëmbë tooka? (b) Andi sa pasa ku wan mii te de du hogihogi ku ën?

⁴ So sëmbë di ko gaan sëmbë kaa, sa abi kötöhati fanöudu jeti u di de bi du hogihogi ku de a piki mii ten. Faandi mbei a dë sö? Wë fuu sa fusutan di soni aki, nöö u musu hoi a pakisei taa miii tooka gaanfa seei ku gaan sëmbë. Di fasi fa wan mii ta fii te de du hogihogi ku ën, tooka gaanfa ku di fasi fa wan gaan sëmbë ta fii te de libi hogi ku ën. Boo taki u wantu soni di o heepi u fuu fusutan di soni aki.

⁵ A ta dë fanöudu u wan mii ko ta futoou dee sëmbë dee ta kiijëën. Te dee sëmbë dee ta kiija di mii ko dë mati ku di mii, nöö di mii ta futoou de. Di soni aki ta heepi di mii fu an ta dë fëëëfëëë, söseei a ta heepi ën faa sa ta futoou wotowan tu (Ps. 22:9). Ma a tjali taa möön gaanfa a di mii pisi seei de lo’ u du hogihogi ku ën, nöö a lo’ u pasa taa sëmbë u di mii seei, nasö sëmbë di dee gaan sëmbë fëën sabi bumbuu, de ta lo’ u du dee soni aki ku ën. Te wan sëmbë di di mii ta futoou, hën du hogihogi ku ën, nöö a sa ta taanga da di mii faa futoou woto sëmbë, aluwasi baka sömëni jaa seei.

6. Faandi mbei di du di sëmbë ta du hogihogi ku piki mii da wan gaan hogi soni?

⁶ Miii an sa heepi deseei, nöö di du di sëmbë ta du hogihogi ku miii da wan gaan hogi soni seei. Te wan sëmbë go a wan mii ufö a dou dee jaa faa sa fusutan manu ku mujëë soni, nöö a ta tja gaan hogi ko da di mii. A sa mbei di mii ko ta si di duumi di womi ku mujëë ta duumi ku deseei a wan föutu fasi, a sa mbei di mii ko ta fii taa an dë wan bumbuu sëmbë, nasö a sa mbei an ko ta futoou sëmbë möön.

7. (a) Faandi mbei an taanga da wan gaan sëmbë faa ganjan wan mii faa du hogihogi ku ën, nöö unfa wan sëmbë sa du di soni aki? (b) Andi sa pasa te wan sëmbë ganjan wan mii a di lö fasi aki?

⁷ Miii an ta kaba sabi unfa de musu wegi soni luku, söseei de an ta sabi na un ten wan soni sa tja hogi ko da de (1 Kol. 13:11). Fëën mbei an taanga u wan sëmbë ganjan wan mii faa du hogihogi ku ën. Dee sëmbë dee ta du hogihogi ku piki mii, lo’ u ganjan de. De sa ta piki de taa deseei hën suku ën, nasö taa de an musu piki sëmbë. De sa ta piki de taa na wan sëmbë o biibi de ee de go taki taa sö pasa ku de, nasö de sa ta piki de taa sömëni gaan sëmbë nango a piki mii u di a dë wan fasi u lei taa de lobi de. So juu a ta tei ten u sö wan mii ko fusutan taa dee soni di de bi taki dëën an dë sö tuutuu. Sö wan mii sa göö ko bigi ku di pakisei taa a kaba a sösö, nasö taa an bunu. A sa ta fii kuma an fiti u sëmbë lobi ën, na Gadu seei.

8. Faandi mbei u sa dë seiki taa Jehovah sa da wan sëmbë di de bi du hogihogi ku ën, kötöhati?

⁸ Wë u sa ta fusutan faandi mbei te de du hogihogi ku wan mii, nöö di soni dë sa ta toobi ën sömëni jaa longi. Wë di du di de ta du hogihogi ku piki mii da wan gaan hogi soni seei! Dee lö gaan hogi aki di sëmbë ta du a hii së u goonliba, ta lei taa u ta libi a dee lasiti daka u di goonliba aki. U ta libi a wan ten ka sömëni sëmbë an „abi fii a de hati da na wan kodo sëmbë”, söseei a wan ten ka „takusëmbëma ku dee sëmbë ta ganjan sëmbë . . . ta hogi nango fesi nöömö” (2 Tim. 3:1-5, 13). Dee soni di Saatan ta du u ganjan sëmbë, da gaan hogi soni seei, nöö a ta dë wan tjali soni te sëmbë ta du andi Saatan kë. Ma Jehovah taanga möön Saatan ku dee sëmbë dee ta du andi Saatan kë. Hii juu Jehovah ta sabi andi Saatan ta du. U sa dë seiki taa Jehovah sabi unfa u ta tja pen tjika,  nöö a sa da u di kötöhati di u abi fanöudu. Wan gaan bunu seei u feni, u di u sa ta dini ’di Gadu ka hii kötöhati ta kumutu, söseei di ta heepi u fuu feni kötöhati a hii dee hia sitaafu dee ta miti u a di goonliba aki fuu sa toona kötö dee sëmbë hati dee ta tja sitaafu tu. Leti kumafa a bi heepi u, nöö sö u seei sa heepi de tu fu de feni kötöhati’ (2 Kol. 1:3, 4). Ma ambë Jehovah ta tei u da wotowan kötöhati?

9. Ee mama ku tata an ta luku dee mii u de kumafa de musu du ën, nöö andi Jehovah o du te u luku di soni di Könu Dafiti taki a Psalöm 27:10?

⁹ Dee sëmbë di de mama ku de tata an bi tjubi de u sëmbë an du hogihogi ku de a piki mii ten u de, nasö di famii u de bi du hogihogi ku de a piki mii ten u de, abi kötöhati fanöudu seei. Könu Dafiti bi sabi taa hii juu u sa ta futoou Jehovah taa a o da u kötöhati. (Lesi Psalöm 27:10.) Dafiti bi dë seiki taa Jehovah o ko dë kuma wan Tata u dee sëmbë di dee famii u de bi libi hogi ku de. Na un fasi Jehovah ta du di soni aki? Wë a ta tei dee dinima fëën dee ta dini ën ku hii de hati, u du di soni aki. Dee baaa ku dee sisa fuu a di kemeente, dë kuma famii fuu. Jesosi seei bi taki taa dee sëmbë dee bi ta dini Jehovah makandi ku ën, bi dë baaa fëën, sisa fëën, nasö mama fëën.​—Mat. 12:48-50.

10. Un wooko apösutu Paulosu bi ta du?

¹⁰ Boo luku woto di ta lei u fa dee baaa ku dee sisa a di kemeente dë kuma wan famii. Apösutu Paulosu bi dë wan gaanwomi di bi ta wooko taanga, söseei a bi abi wan taanga biibi tu. A bi dë wan sëmbë di wotowan bi sa waka nëën baka a di dini u Gadu. Gadu bi mbei a piki wotowan taa de sa djeesi ën kumafa a bi ta djeesi Keesitu (1 Kol. 11:1). Luku andi Paulosu bi taki u di wooko di a bi ta du kuma gaanwomi u kemeente. A bi taki taa: „U bi dë a unu mindi leti kuma wan mama ta kiija dee piki mii fëën” (1 Tes. 2:7). Wë sö nöö dee gaanwomi a di ten aki seei sa fan a wan sutifasi te de o wooko ku di Bëibel u da wan sëmbë kötöhati.

11. Unfa u du sabi taa na gaanwomi wanwan sa da wotowan kötöhati?

¹¹ Dee gaanwomi wanwan nöö sa da dee sëmbë di wotowan bi du hogihogi ku de, kötöhati  ö? Wë, nönö. Hii u tuu abi di faantiwöutu u ’da useei taanga’ (1 Tes. 4:18). Wan sisa di taanga a di biibi sa möön heepi dee sisa dee abi kötöhati fanöudu. Wë u ta fusutan faandi mbei Jehovah bi tei hënseei maaka ku wan mama di ta kötö di womi mii fëën hati (Jes. 66:13). Di Bëibel ta taki soni u mujëë sëmbë di bi ta da wotowan kötöhati te de bi dë ku fuka (Jöpu 42:11). Jehovah ta wai seei te a ta si unfa dee sisa a di ten aki ta da woto sisa kötöhati te de dë ku fuka! So juu wan nasö tu gaanwomi sa hakisi wan sisa di taanga a di biibi faa heepi wan woto sisa di sëmbë bi du hogihogi ku ën a piki mii ten fëën. *

12. Andi u musu ta köni fu wa du?

¹² Wë te u ta mbei möiti u heepi wan baaa nasö wan sisa, nöö u musu köni be wa duwengi ën faa piki u soni di an kë piki u (1 Tes. 4:1). Wë hii fa a dë sö, andi u sa du u heepi dee sëmbë aki? Boo luku feifi soni di dë a di Bëibel, di sa heepi u fuu da wotowan kötöhati.

13. Andi di ëngëli u Jehovah bi du da Elia, te u luku andi sikifi a 1 Könu 19:5-8, nöö unfa u sa waka nëën baka a di soni di a du aki?

¹³ Du wan soni u heepi di sëmbë ku di fuka fëën. Di di tjabukama de kai Elia bi ta kule go tjubi u de an feni ën kii, nöö a bi fëëë tee taa an bi kë dë a libi möön. Jehovah bi manda wan ëngëli faa go da di womi aki taanga. Di ëngëli bi da Elia dee soni dee a bi abi fanöudu a di ten dë. A bi tja wan paabi ku soni u njan go da Elia, hën a dëën taanga faa njan. (Lesi 1 Könu 19:5-8.) Di soni aki ta lei taa so juu wan piki soni nöö u ta du da wan sëmbë, nöö a ta heepi ën kaa. Kandë ee wan njanjan i boi, nasö wan kado i tja go da wan sëmbë, nasö i sikifi soni a wan kaita da wan baaa nasö wan sisa di lasi hati, nöö di soni dë sa mbei a fii taa i lobi ën, söseei taa i ta booko i hedi ku ën. Ee a ta taanga da i fii haika wan sëmbë te a ta konda da i unfa a ta fii, nöö i sa du wan u dee soni di u taki u de aki fii sa heepi ën.

14. Andi u ta lei a di woto u Elia?

¹⁴ Be de fii taa na wan sëmbë o du soni ku de möön. U sa lei wan woto soni a di woto u Elia. A wan foombo fasi Jehovah bi heepi di tjabukama aki ku de soni dee a bi abi fanöudu faa waka di longi pasi go a di kuun de kai Holeb. Kandë Elia bi fii taa soni an o du ën a di longi kamian ka Jehovah bi mbei wan buka ku dee sëmbë fëën a di ten di pasa. Kandë a bi ta fii taa dee felantima fëën an bi o sa ko du hogi ku ën ka a sai dë. Andi u sa lei a di woto aki? Ee u kë da dee sëmbë di de du hogihogi ku de a piki mii ten u de, kötöhati, nöö di fosu soni di u sa du, hën da u sa heepi de u de fii taa soni o go bunu ku de. Dee gaanwomi musu hoi a pakisei taa wan sisa di ta fii bookosaka, sa fii möön bunu u sindo fan makandi ku de nëën pisi, möön fa a bi o fii u sindo fan makandi ku de a di Könuköndë zali.

15-16. Ambë da wan sëmbë di ta haika bunu te wotowan ta fan?

¹⁵ I musu ta haika bunu. Di Bëibel ta taki taa: „Wan musu hesi u taki soni tumisi e, ma un musu hesi u jei soni” (Jak. 1:19). U dë sëmbë di ta haika bunu te wotowan ta fan u? Kandë u sa ta pakisei taa te u ta luku di sëmbë diin söndö fuu taki wan soni, hën da u dë wan sëmbë di ta haika bunu. Ma na di soni dë wanwan a kë taki. Elia bi piki Jehovah andi bi ta toobi ën, nöö Jehovah bi ta haikëën. Jehovah bi fusutan taa Elia bi ta fëëë. A bi sabi taa Elia bi ta fii kuma a dë hën wanwan, söseei taa a bi ta si kuma hii dee soni dee a bi du, bi dë u sösö. Ma Jehovah bi heepi ën fu an bi ta booko hën hedi möön. Jehovah bi lei taa a bi haika Elia tuutuu.​—1 Kön. 19:9-11, 15-18.

 ¹⁶ Unfa u sa lei taa u ta fii da dee baaa fuu, nasö dee sisa fuu, te u ta haika andi de ta taki da u? So juu wantu wöutu di u ta taki a wan köni fasi, sa lei unfa u ta fii. Kandë i sa taki taa: „A ta hati mi seei taa sö wan soni pasa ku i! An bunu u de libi sö ku miii!” Kandë i sa hakisi di sëmbë wan soni, nasö tu soni fii ko sabi ee i fusutan andi a kë taki tuutuu. Kandë i sa hakisi ën taa: „I sa heepi mi u mi ko fusutan möön bunu andi i kë taki ku di pisi dë u?” Nasö i sa taki taa: „Wë di soni di i taki dë ta mbei mi fusutan taa . . . Hën i kë taki ö?” Dee lö soni aki sa mbei di sëmbë si taa i ta haikëën tuutuu, söseei taa i ta suku u ko fusutëën tuutuu.​—1 Kol. 13:4, 7.

17. Faandi mbei u musu abi pasensi, söseei faandi mbei wa musu „hesi u taki soni tumisi”?

¹⁷ Ja musu „hesi u taki soni tumisi”. Ja musu ta suku u koti di sëmbë buka, nasö u kuutu di fasi fa a ta pakisei. Abi pasensi! Di Elia bi piki Jehovah unfa a bi ta fii, hën a bi taki soni söndö u pakisei, u di a bi ta fii bookosaka. Bakaten, Jehovah bi mbei Elia ko abi wan möön taanga biibi, hën Elia toona taki dee seei soni baka (1 Kön. 19:9, 10, 13, 14). Andi di soni aki ta lei u? Wë a ta lei u taa na wan kodo pasi nöö dee sëmbë dee ta fii bookosaka, musu feni pasi u de konda unfa de ta fii. U kë lei taa u dë kuma Jehovah, u di woo haika de ku pasensi. Wa kë suku u lei de andi de sa du u puu deseei a di fuka, ma u kë lei de taa u ta fii ku de.​—1 Pet. 3:8.

18. Na un fasi di begi di u ta begi makandi ku wan sëmbë sa dëën kötöhati?

¹⁸ Begi fajafaja makandi ku de. Te wan sëmbë ta fii bookosaka, nöö kandë an o ta fii u begi. Wan sëmbë sa ta fii kuma an fiti faa begi Jehovah. Wan fasi fa u sa da dee lö sëmbë aki kötöhati, hën da te u ta begi makandi ku de, nöö u kai de në a di begi. U sa piki Jehovah a di begi unfa u ku dee baaa ku dee sisa a di kemeente lobi di sëmbë tjika. U sa hakisi Jehovah tu faa heepi di sëmbë, söseei faa dëën kötöhati. Te u begi a dee lö fasi aki, nöö a sa heepi di sëmbë gaanfa seei.​—Jak. 5:16.

19. Andi sa heepi u fuu seeka useei fuu sa da wan sëmbë kötöhati?

 ¹⁹ Taki soni di sa mbei di sëmbë fii bunu, söseei di sa dëën kötöhati. Pakisei bunu ufö i taki wan soni. Te u ta taki soni söndö pakisei, nöö a sa hati wotowan. Ma te u ta fan suti ku wotowan, nöö de sa fii bunu (Nöng. 12:18). Fëën mbei i musu begi Jehovah faa heepi i fii sa taki soni di o sa mbei di sëmbë fii bunu, söseei di o sa dëën taanga ku kötöhati. Hoi a pakisei taa dee möön bunu soni dee sa da wan sëmbë kötöhati, da dee wöutu u Jehovah dee dë a di Bëibel.​—Heb. 4:12.

20. Unfa so sëmbë sa ta si deseei, u di de bi du hogihogi ku de a piki mii ten u de? Andi u kë mbei dee sëmbë aki sabi?

²⁰ So baaa ku sisa di de bi du hogihogi ku de a piki mii ten u de, sa ta si kuma de sundju, nasö taa de an dë na wan hojo soni. De sa ta si tu kuma de an fiti u wotowan lobi de. Ma soni an dë kumafa de ta mëni dë! Fëën mbei wooko ku di Bëibel u lei de taa Jehovah lobi de gaanfa seei. (Luku di pisi „ Di Wöutu u Gadu ta da u kötöhati”.) Buta pakisei a di fasi fa wan ëngëli bi da di tjabukama de kai Daniëli kötöhati, di a bi ta fii bookosaka. Jehovah bi kë u di womi aki ko fusutan taa a lobi ën gaanfa (Dan. 10:2, 11, 19). Wë sö nöö Jehovah kë u dee baaa ku dee sisa dee ta fii bookosaka, ko fusutan taa a lobi de gaanfa tu!

21. (a) Andi o pasa ku dee sëmbë dee ta du hogi soni ee de an bia libi? (b) Andi u musu dë kabakaba u du ufö di ten dë dou?

²¹ Te u ta da wotowan kötöhati, nöö a ta heepi de u de ko si taa Jehovah lobi de. U musu hoi pakisei tu taa Jehovah da wan Gadu di lobi letilibi. Jehovah sabi hiniwan sëmbë di de bi du hogihogi ku de a piki mii ten u de, aluwasi woto sëmbë an sabi. Jehovah ta si hii soni, nöö a o mbei hii dee sëmbë dee du hogihogi ku wotowan kisi sitaafu ee de an bia libi (Nöb. 14:18). Ma ufö di ten dë dou, nöö boo du hii soni di u sa du fuu lei taa u lobi dee sëmbë di de bi du hogihogi ku de. U di u ta libi a di goonliba u Saatan mbei dee soni aki ta pasa. Ma u ta wai seei u di u sabi taa Jehovah o mbei dee sëmbë di de bi du hogihogi ku de, an tja di pen di de bi ta tja möön! Abiti möön dee hogi soni aki an o ta ko a sëmbë pakisei möön, söseei sëmbë an o ta mëni dee soni aki möön tu.​—Jes. 65:17.