1-3. (a) Unfa Jehovah ta si hogilibi te u luku di soni di sikifi a Psalöm 5:4-6? (b) Faandi mbei u sa taki taa di du di sëmbë ta du hogihogi ku piki mii an ta kai ku ’di wëti u Keesitu’?

JEHOVAH GADU buuse hii pei hogi libi. (Lesi Psalöm 5:4-6.) Na piki buuse a buuse di go di sëmbë nango a piki mii. Di soni aki da wan hogi soni seei! U dee Jehovah Kotoigi ta djeesi Jehovah, nöö useei ta buuse di go di sëmbë nango a piki mii, söseei wa ta disa sëmbë u de libi dee lö libi dë a di kemeente.​—Lom. 12:9; Heb. 12:15, 16.

² Di du di sëmbë ta du hogihogi ku piki mii an ta kai ku ’di wëti u Keesitu’! (Gal. 6:2) Faandi mbei u taki sö? Kumafa u bi lei a di woto di pasa, nöö di wëti u Keesitu da hii dee soni dee Jesosi bi ta lei sëmbë. Dee soni dë da dee soni dee a bi taki ku dee soni dee a bi du. Di goonsei u di wëti u Keesitu da lobi ku letilibi. U di dee tuutuu Keesitu sëmbë ta hoi di wëti aki, mbei de ta libi ku miii a wan fasi di ta mbei dee mii fii taa de lobi de tuutuu, söseei di ta mbei dee mii fii taa de o ta tjubi de u soni an du de. Ma di du di sëmbë ta du hogihogi ku piki mii ta lei taa dee sëmbë dë ta pakisei deseei nöö, söseei a ta lei taa de an ta booko de hedi ku miii. Di soni aki sa mbei dee mii fii taa sëmbë an lobi de.

³ A tjali taa sëmbë ta du hogihogi ku piki mii a hii së u goonliba. Di soni aki ta pasa ku dee tuutuu Keesitu sëmbë tu. Unfa a du ko? Wë „dee takusëmbëma ku dee sëmbë ta ganjan sëmbë”, ta mbei möiti u de ko a di kemeente tu (2 Tim. 3:13). Boiti di dë, so sëmbë  di bi dë a di kemeente, bi mbei di zöndu sinkii u de buta de u de go a piki mii. Boo luku faandi mbei di du di sëmbë ta du hogihogi ku piki mii da wan gaan zöndu. Bakaten woo luku andi dee gaanwomi ta du te wan sëmbë a di kemeente du wan gaan zöndu, möönmöön te wan sëmbë go a piki mii. Woo luku tu unfa mama ku tata sa tjubi dee mii u de. *

4-5. Faandi mbei di du di wan sëmbë ta du hogihogi ku piki mii, da wan hogi di a du ku di mii?

⁴ Te wan sëmbë du hogihogi ku wan mii, nöö di soni dë ta toobi sëmbë wan hii pisiten. A ta hati di mii ku hii dee sëmbë dee sabi ën. Dee sëmbë aki sa dë dee famii fëën, nasö dee baaa ku dee sisa u di kemeente. Di du di sëmbë ta du hogihogi ku piki mii da wan gaan zöndu.

⁵ A dë wan hogi di di sëmbë ta du ku di mii. Te wan sëmbë libi hogi ku wotowan, nasö te a ta du wan soni di o tja fuka ko da wotowan, nöö hën da a du zöndu. Woo si a di woto di o ko baka disi, taa wan sëmbë di ta du hogihogi ku piki mii, da wan sëmbë di ta du wan gaan zöndu. A ta du wan soni di o poi di mii libi. Di soni aki sa mbei di mii an ko ta futoou sëmbë möön. U musu ta tjubi dee mii u sëmbë an du di soni aki ku de, nöö u musu ta da dee mii di de du di soni aki ku de, kötöhati, söseei u musu heepi de.​—1 Tes. 5:14.

6-7. Faandi mbei u sa taki taa di du di sëmbë ta du hogihogi ku piki mii, da wan hogi di di sëmbë ta du ku di kemeente, söseei ku lanti?

⁶ A dë wan hogi di di sëmbë ta du ku di kemeente. Ee wan sëmbë u di kemeente du hogihogi ku miii, nöö a ta tja poi në ko da di kemeente (Mat. 5:16; 1 Pet. 2:12). An bi o fiti u hii di kemeente ko ta tja poi në u wan sëmbë hedi, u di milionmilion baaa ku sisa ta mbei taanga möiti u de du soni u tja gafa ko da Jehovah! (Jud. 3) Wa ta da sëmbë pasi u de fika a di kemeente ee de an disa dee hogi soni di de ta du. Söseei wa ta da sëmbë pasi u de fika a di kemeente ee de ta du soni di ta tja poi në ko da di kemeente.

⁷ A dë wan hogi di di sëmbë ta du di ta lei taa a pasa lanti wëti. Keesitu sëmbë musu ta „saka [deseei] a dee tii u lanti basu” (Lom. 13:1). U ta lei taa u ta saka useei a di tii u lanti basu, te u ta lesipeki dee wëti u di köndë ka u dë. Ee wan sëmbë u di kemeente du wan hogi di di wëti u lanti ta kuutu, hën da a pasa di wëti u lanti. Di soni aki sa dë di du di sö wan sëmbë du hogihogi ku piki mii tu (Luku Tjab. 25:8). Dee gaanwomi an abi di leti u sitaafu wan sëmbë di pasa lanti wëti, ma de an o tapa lanti u de an sitaafu wan sëmbë u di kemeente di du hogihogi ku piki mii (Lom. 13:4). Sö wan sëmbë o tja di sitaafu u di soni di a du.​—Gal. 6:7.

8. Unfa Jehovah ta si di du di wan sëmbë ta du wan hogi ku wan wotowan?

⁸ A dë wan zöndu di di sëmbë du a Gadu wojo (Ps. 51:4). Te wan sëmbë du wan hogi ku wan woto sëmbë, hën da a du wan zöndu a Jehovah wojo. Pakisei wan u dee wëti di Gadu bi da dee Isaëli sëmbë. Di wëti dë bi ta taki taa ee wan sëmbë bi ganjan di wotowan fëën, hën da a bi ta du wan zöndu a Jehovah wojo (Leif. 6:2-4). Wë an dë u taki taa ee wan sëmbë u di kemeente du hogihogi ku wan piki mii, nöö a du wan hogi a Gadu wojo tu. Di sëmbë aki ta poi Jehovah në. Fëën mbei u musu ta si di du di sëmbë ta du hogihogi ku piki mii kuma wan soni di dë wan gaan zöndu a Gadu wojo.

9. Andi di ölganisaasi lei dee gaanwomi a dee jaa dee pasa, nöö faandi mbei de lei de dee soni dë?

 ⁹ A dee jaa dee pasa, di ölganisaasi u Jehovah mbei sömëni buku ku woto soni di ta lei andi di Bëibel ta taki u di du di sëmbë ta du hogihogi ku piki mii. Wanlö woto di dë a dee Hei Wakitimawosu ku dee Ontwaakt! ta taki u soni di sa heepi dee sëmbë di de du hogihogi ku de a piki mii ten u de. De ta taki unfa wotowan sa heepi de, unfa de sa da de taanga, söseei unfa mama ku tata sa ta tjubi dee mii u de u sëmbë an du hogihogi ku de. Di ölganisaasi u Jehovah lei dee gaanwomi soni di nama ku Bëibel, di sa heepi de u de sabi andi de musu du te wan sëmbë du hogihogi ku piki mii. Te dou wan pisiten, di ölganisaasi ta toona lei dee gaanwomi woto soni di de musu ta du te wan sëmbë du hogihogi ku piki mii. Faandi mbei di ölganisaasi ta du di soni aki? Wë de ta du di soni aki faa sa dë taa di fasi fa dee gaanwomi ta kuutu soni, sa ta kai ku di wëti u Keesitu.

10-12. (a) Andi dee gaanwomi musu hoi a pakisei te de jei taa wan sëmbë du wan gaan zöndu, nöö ku andi de ta booko de hedi? (b) Andi dee gaanwomi ta mbei möiti u du, te u luku di soni di sikifi a Jakobosi 5:14, 15?

¹⁰ Te dee gaanwomi musu kuutu wan sëmbë di du wan gaan zöndu, nöö de musu hoi a pakisei taa di wëti u Keesitu ta lei de taa de musu lobi dee sëmbë u di kemeente, söseei taa de musu du andi Gadu taki taa bunu. De musu wegi sömëni soni luku te de jei taa wan sëmbë du wan gaan zöndu. Dee gaanwomi ta booko de hedi möön gaanfa ku di mbei di de musu ta mbei möiti u sëmbë an tja poi në ko da Jehovah (Leif. 22:31, 32; Mat. 6:9). Dee gaanwomi ta booko de hedi tu ku di dë di dee baaa ku dee sisa u de musu dë taanga a di biibi, söseei de kë heepi dee sëmbë di wotowan bi du wan hogi ku de.

¹¹ Boiti di dë, dee gaanwomi o mbei möiti tu u de ko sabi ee di sëmbë di du di hogi ta tjali u di soni di a du, nöö ee a ta tjali tuutuu, nöö de o heepi ën fu hën ku Jehovah ko bunu baka. (Lesi Jak. 5:14, 15.) Wan Keesitu sëmbë di du wan gaan zöndu dë kuma wan sëmbë di dë ku suwaki. Di soni aki kë taki taa hën ku Jehovah an dë bunu möön. * U sa taki taa dee gaanwomi dë kuma data a di biibi. De ta mbei möiti u heepi di sëmbë ’di dë ku suwaki faa ko bëtë’. De ta tei dee soni dee sikifi a di Bëibel u de heepi di sëmbë fu hën ku Jehovah sa ko bunu baka. Ma di wan kodo fasi fa de o sa heepi di sëmbë, hën da ee a ta tjali tuutuu u di soni di a du.​—Tjab. 3:19; 2 Kol. 2:5-10.

¹² A dë gbelingbelin u si taa dee gaanwomi abi wan gaan faantiwöutu. De ta booko de hedi tuutuu ku dee sëmbë dee Gadu da de u de luku dëën (1 Pet. 5:1-3). De kë u dee baaa ku dee sisa u de musu ta fii bunu a di kemeente. Fëën mbei de ta du wan soni wantewante te de jei taa wan sëmbë du wan gaan zöndu. Di gaan zöndu aki sa dë di du di wan sëmbë du hogihogi ku wan piki mii nasö wan woto soni. Andi dee gaanwomi ta du te sö wan soni pasa? Buta pakisei a dee hakisi dee dë a bigi u  palaklafu 13,  15, ku  17.

13-14. Dee gaanwomi ta piki lanti ee de ko jei taa wan sëmbë du hogihogi ku piki mii, te di wëti u di köndë ta taki taa wan sëmbë musu du ën u? Konda wan woto.

 ¹³ Dee gaanwomi o tja wan sëmbë go a lanti ee de ko sabi taa a du hogihogi ku piki mii ö? Wë so köndë abi wëti di ta taki taa ee wan sëmbë ko sabi taa wan sëmbë du hogihogi ku piki mii, nöö a musu go a lanti ku di taki dë. Dee gaanwomi dee ta dë a dee köndë dë ta du soni kumafa di wëti ta taki (Lom. 13:1). Dee lö wëti dë an ta pasa dee wëti u Gadu (Tjab. 5:28, 29). Fëën mbei te wan sëmbë piki dee gaanwomi taa wan sëmbë du hogihogi ku wan mii, nöö wantewante dee gaanwomi ta fan ku dee baaa u di bëikantoo u hakisi de andi de musu du, sö taa de du soni kumafa di wëti u di köndë ta taki.

 ¹⁴ Te dee gaanwomi fan ku di mii di de du hogihogi ku ën, ku di mii mama ku hën tata, nasö ku woto sëmbë di sabi soni u di woto, nöö de ta piki de taa de sa go piki lanti u di köndë taa sö wan soni pasa. Ma unfa a dë ee di sëmbë di du di soni da wan sëmbë u di kemeente, nöö dee sëmbë u di pisiwata ko sabi soni u di woto? Di baaa nasö di sisa di go konda di woto dë da lanti musu si kuma a tja poi në ko da Jehovah u? Wë nönö. Di sëmbë di du hogihogi ku di mii, hën tja poi në ko da Jehovah.

15-16. (a) Faandi mbei tu, nasö möön leki tu sëmbë musu taki taa wan sëmbë du wan zöndu, ufö dee gaanwomi sa hoi wan kuutu komite te u luku 1 Timoteo 5:19? (b) Andi dee gaanwomi ta du te de ko jei taa wan sëmbë u di kemeente du hogihogi ku piki mii?

 ¹⁵ Faandi mbei dee gaanwomi musu jei a tu sëmbë, nasö a möön leki tu sëmbë ufö de sa taki taa wan sëmbë du wan gaan zöndu? Wë u di te sëmbë kuutu soni a di lö fasi aki, nëën di Bëibel ta taki taa di soni kuutu a wan leti fasi. Te wan sëmbë du wan gaan zöndu, ma an piki taa sö a du tuutuu, nöö tu sëmbë musu piki taa a du ën tuutuu ufö dee gaanwomi o sa hoi wan kuutu komite u di taki dë (Deto. 19:15; Mat. 18:16; lesi 1 Tim. 5:19). Di soni aki kë taki taa tu sëmbë musu taki taa wan sëmbë du hogihogi ku wan mii ufö wan sëmbë sa tja di taki dë go a lanti ö? Wë nönö. Tu sëmbë an musu u taki taa wan sëmbë du hogihogi ku wan mii ufö dee gaanwomi nasö woto sëmbë sa go a siköutu ku di taki.

¹⁶ Te dee gaanwomi ko jei taa wan sëmbë u di kemeente du hogihogi ku piki mii, nöö de o go a siköutu ku di taki ee lanti wëti ta taki taa de musu du ën. Baka di dë, de ta öndösuku andi pasa tuutuu, nöö de ta luku a di Bëibel ee de musu hoi wan kuutu komite. Dee gaanwomi ta hakisi di sëmbë fosu, ee a du di zöndu tuutuu. Ee di sëmbë taki taa an du ën, nöö dee gaanwomi nango hakisi woto sëmbë di sa sabi soni u di woto. Ee tu sëmbë, nasö möön leki tu sëmbë taki taa wan sëmbë du hogihogi ku wan mii, nöö a tjika u dee baaa hoi wan kuutu komite u di taki dë. * Aluwasi wan kodo sëmbë nöö taki taa wan sëmbë du hogihogi ku piki mii, tökuseei di soni dë an kë taki taa di sëmbë dë ta mindi soni. Ee tu sëmbë an dë u taki ee wan sëmbë du hogihogi ku wan mii, tökuseei dee gaanwomi ta fusutan taa a sa dë sö taa di sëmbë du wan hogi soni, di ta hati wotowan. Dee gaanwomi o ta da dee sëmbë di di soni aki hati, kötöhati, söseei de o ta heepi de. De o ta buta pakisei tu a di fasi fa de sa tjubi di kemeente u sëmbë an sa du hogihogi ku dee mii.​—Tjab. 20:28.

17-18. Konda andi de ta du a wan kuutu komite.

 ¹⁷ Andi da di soni mbei de ta hoi wan kuutu komite? Di wöutu „kuutu” an kë taki taa dee gaanwomi ta kuutu sëmbë, nasö taa de ta buta wëti da wotowan, ma lanti de de sa sitaafu wan sëmbë di du hogihogi ku piki mii, u di sö wan sëmbë pasa lanti wëti. Dee gaanwomi ta lesipeki dee wëti u lanti. De ta disa hogiduma da lanti u de kuutu (Lom. 13:2-4; Tit. 3:1). Ma dee gaanwomi ta wegi luku ee wan sëmbë di du wan gaan zöndu sa dë a di kemeente jeti, nasö ee de musu puu ën a di kemeente.

¹⁸ Dee gaanwomi dee dë a wan kuutu komite, ta luku soni di nama ku di fasi fa wan sëmbë dë mati ku Jehovah tjika, söseei de ta luku unfa a dë ku dee baaa ku dee sisa u di kemeente. De ta wooko ku di Bëibel u de ko sabi ee wan sëmbë di du hogihogi ku piki mii, ta tjali u di soni di a du. Ee an ta tjali u di soni di a du, nöö dee gaanwomi ta piki ën taa de o puu ën a di kemeente, nöö bakaten de ta taki a wan kemeente komakandi taa di sëmbë dë an dë Jehovah Kotoigi möön (1 Kol. 5:11-13). Ma ee a tjali tuutuu u di soni di a du, nöö de o sa dëën pasi faa fika a di kemeente. Ma hii fa a dë sö, dee gaanwomi o piki ën taa a sa kan  taa nöiti möön a kisi faantiwöutu a di kemeente. U di dee gaanwomi ta booko de hedi ku dee mii u di kemeente, mbei de o piki dee mama ku dee tata dee dë a di kemeente taa de musu ta köni ku di lö sëmbë dë te de si taa a ta kë hulu ku di mii u de. Te dee gaanwomi o du di soni aki, nöö de musu köni u de an piki sëmbë ku ambë di sëmbë bi du hogihogi.

19-22. Andi mama ku tata sa du u de tjubi dee mii u de? (Luku di peentje u di kafiti.)

¹⁹ Ambë abi di faantiwöutu u tjubi dee mii u hogi an miti de? Wë, dee mama ku dee tata de abi di faantiwöutu dë. * Dee mii fii da „wan gudu di Jehovah da i” (Ps. 127:3). Jehovah da i di faantiwöutu u tjubi dee mii fii. Andi i sa du fii tjubi dee mii fii u de an du hogihogi ku de?

²⁰ Di fosu soni di i musu du, hën da i musu mbei möiti fii ko sabi soni u di du di sëmbë ta du hogihogi ku piki mii. Mbei möiti fii ko sabi un pei sëmbë lo’ u du hogihogi ku piki mii, söseei mbei möiti fii ko sabi andi dee lö sëmbë dë lo’ u du u ganjan piki mii. I musu ta köni te i si taa wan sëmbë sa kë du hogihogi ku di mii fii (Nöng. 22:3; 24:3). Hoi a pakisei taa möön gaansë u sëmbë di ta du dee lö soni aki ku piki mii ta dë sëmbë di di mii sabi kaa, nasö di a ta futoou.

²¹ Di u tu soni, hën da i musu lo’ u da woto ku di mii fii, nöö i musu ta dëën taanga faa sa ta piki i soni tu (Deto. 6:6, 7). Di soni aki kë taki taa i musu ta haika bunu te di mii fii ta piki i wan soni (Jak. 1:19). Hoi a pakisei taa a ta pasa möön gaanfa taa wan mii di de du hogihogi ku ën, an ta kë piki sëmbë taa sö de du ku ën. De sa ta fëëë taa sëmbë an o kë biibi de, nasö de sa ta fëëë u di di sëmbë bi piki de taa a o du soni ku de ee de piki sëmbë. Ee i ta si kuma wan soni an nango bunu ku di mii fii, nöö hakisi ën faa piki i andi du ën, nöö haika bunu andi a o piki i.

²² Di u dii soni, hën da i musu lei dee mii fii soni. Piki de wantu soni di dë fanöudu u de ko sabi te a nama ku manu ku mujëë soni. Luku andi de o sa fusutan a di jaa di de abi. Piki de andi de musu taki ku andi de musu du te wan sëmbë panjan de a wan fasi di an fiti. Wooko ku dee soni di di ölganisaasi u Jehovah ta da u, u heepi u fuu sa tjubi dee mii fuu.​—Luku di pisi „ Lei soni, nöö lei dee mii fii tu”.

23. Unfa u dee Jehovah Kotoigi ta si di du di sëmbë ta du hogihogi ku piki mii, nöö fuun soni woo taki a di woto di ta ko?

²³ U dee Jehovah Kotoigi ta si di du di sëmbë ta du hogihogi ku piki mii, kuma wan gaan zöndu. U di u ta hoi di wëti u Keesitu, mbei wa ta tjubi sëmbë di du hogihogi ku piki mii u de an kisi di sitaafu u di soni di de du. Ma andi u sa du u heepi dee baaa ku dee sisa fuu di de bi du hogihogi ku de? Woo taki u di soni aki a di woto di ta ko.