1, 2. (a) Andi Jesosi bi taki ku dee bakama fëën di ndeti ufö a dëdë? (Luku di peentje a bigi u di woto.) (b) Faandi mbei wa musu fëëkëtë di soni mbei u ta peleiki? (c) Andi woo taki a di woto aki?

DI NDETI ufö Jesosi dëdë, hën a bi fan wan hii pisiten ku dee apösutu fëën. A bi piki de taa a lobi de gaanfa seei. A bi konda di woto u di doloifi pau da de tu, di u bi taki fëën a di fosu woto. Jesosi bi kë da dee bakama fëën taanga u de ta mbei libi u de „ta pai hia fuuta”. Hën da de bi musu ta hoi dou a di paaja di de ta paaja di bunu buka u di Könuköndë.​—Johanisi 15:8.

² Ma Jesosi an bi piki dee bakama fëën andi de bi musu ta du nöö a kaba, ma a bi piki de faandi mbei de bi musu ta du di soni di a bi piki de. A bi piki de faandi mbei de bi musu ta du di peleikiwooko go dou. A dë fanöudu fuu seei an fëëkëtë faandi mbei u musu ta du di peleikiwooko. Te u ta pakisei di soni aki, nöö a ta da u taanga fuu hoi dou, ta paaja di bunu buka „be hii föluku musu jei” (Mateosi 24:13, 14). A di woto aki, woo taki u fö soni di sikifi a Bëibel, di ta mbei u ta du di peleikiwooko. Söseei woo taki u fö soni di Jehovah ta da u sö taa libi fuu sa ta pai hia fuuta.

3. (a) Te u luku di soni di sikifi a Johanisi 15:8, nöö andi da di möön gaan soni di mbei u ta peleiki? (b) Andi dë kuma dee doloifi dee Jesosi bi taki u de a di woto fëën, nöö faandi mbei u sa taki taa sö a dë tuu?

³ Di möön gaan soni mbei u ta du di peleikiwooko, hën da u di u kë gafa Jehovah, söseei u di u kë u di në fëën ko santa. (Lesi Johanisi 15:1, 8.) Di Jesosi bi konda di woto u di doloifi pau da dee bakama fëën, hën a bi taki taa Jehovah dë kuma wan sëmbë di abi wan goon, nöö a ta paandi doloifi. Jesosi bi taki taa hën da di doloifi pau, nöö dee bakama fëën da dee pau maun (Johanisi 15:5). Dee doloifi, naso dee fuuta di di libi u dee bakama u Jesosi ta pai, da di peleikiwooko di de ta du. Jesosi bi piki dee apösutu fëën taa: „Nöö a di fasi dë mi Tata o feni gaan nëbai e, dee sëmbë, ee di libi fuunu ta pai hia fuuta dëën.” Te wan doloifi pau ta pai bumbuu doloifi, nöö sëmbë ta gafa di sëmbë di paandi di doloifi. A di wan seei fasi te u ta mbei hii möiti ta paaja di bunu buka u di Könuköndë, nöö a ta tja gafa ko da Jehovah.​—Mateosi 25:20-23.

4. (a) Unfa u ta mbei di në u Gadu ko santa? (b) Unfa i ta si di mbei di i sa mbei di në u Gadu ko santa?

⁴ Di në u Gadu dë santa kaa. Soni an dë di u sa du fuu mbei a ko möön santa. Wë nöö unfa u ta mbei di në u Gadu ko santa te u ta du di peleikiwooko? Luku andi di tjabukama u Gadu de kai Jesaaja bi taki. A bi taki taa: „Jehovah di ta tii liba ala un musu si kuma wan sëmbë di santa” (Jesaaja 8:13). U ta mbei di në u Jehovah ko santa, te u ta si taa di në dë da wan në di hii sëmbë musu ta lesipeki, söseei te u ta heepi wotowan u de seei ko si taa di në Jehovah da wan santa në (Mateosi 6:9). Te u ta heepi sëmbë u de ko sabi unfa Jehovah abi bunu fasi tjika, söseei te u ta mbei de ko sabi taa a kë u libisëmbë musu libi u teego a wan paladëisi a goonliba aki, nöö u ta heepi de u de ko si taa hii dee soni di Saatan bi taki u Jehovah, na tuu soni (Kenesesi 3:1-5). U ta mbei di në u Gadu ko santa tu, te u ta heepi sëmbë u de ko sabi taa Jehovah fiti u ’kisi gafa’, taa ’hën wanwan fiti u kisi hei, ku makiti a mundu’ (Akoalimbo 4:11). Rune da wan Kotoigi di ta du di pioniliwooko 16 jaa longi kaa. A bi taki taa: „Mi ta tei ën u bigi seei te mi ta pakisei taa mi dë wan kotoigi u di sëmbë di mbei di mundu. Di soni aki ta mbei mi ta kë peleiki go dou.”

5. (a) Te u luku Johanisi 15:9, 10, nöö andi da wan woto soni di mbei u ta peleiki? (b) Unfa Jesosi bi heepi dee bakama fëën u de ko fusutan taa a bi o dë fanöudu u de hoi dou?

⁵ Lesi Johanisi 15:9, 10. Di u tu soni di mbei u ta paaja di bunu buka u di Könuköndë, hën da u di u lobi Jehovah ku Jesosi (Maikusi 12:30; Johanisi 14:15). Jesosi bi piki dee bakama fëën taa de musu fika namanama ku ën ’nöö de o ta si di lobi fëën nöömö’. Faandi mbei Jesosi bi taki di soni aki? Wë a bi sabi taa a bi o dë fanöudu u dee bakama fëën hoi dou ee de bi kë ta libi kuma tuutuu bakama fëën. Te u lesi Johanisi 15:4-10, nöö u ta si taa Jesosi bi piki dee bakama fëën sömëni pasi taa de bi musu „fika namanama”  ku ën, u di a bi kë heepi de u de ko fusutan taa a bi o dë fanöudu u de hoi dou.

6. Unfa u sa lei taa u kë u Keesitu ta lobi u nöömö?

⁶ Unfa u sa lei taa u kë u Keesitu ta lobi u nöömö, söseei taa u kë faa feni u bunu? Wë u sa du di soni aki te u ta piki hën buka a soni. Jesosi kë fuu djeesi ën. A bi taki taa: „Mi ta si di lobi u mi Tata, fu di mi ta piki hën buka a dee soni a ta manda mi.” Jesosi bi lei u unfa u sa ta djeesi ën.​—Johanisi 13:15.

7. Unfa di piki di i ta piki wan sëmbë buka a soni, ta nama ku di lobi di i lobi di sëmbë?

⁷ Jesosi bi lei gbelingbelin taa te i lobi wan sëmbë, nöö i ta piki hën buka a soni. A bi taki taa: „Di sëmbë di sabi andi ku andi mi mandëën faa du nöö a ta piki mi buka, nöö di sëmbë dë, hën lobi mi e” (Johanisi 14:21). Dee soni dee Jesosi bi manda u fuu du, kumutu nëën Tata. Fëën mbei te u ta du di peleikiwooko kumafa a manda u, nöö u ta lei tu taa u lobi Jehovah (Mateosi 17:5; Johanisi 8:28). Nöö te u ta lei Jehovah ku Jesosi taa u lobi de, nöö de o ta lobi u nöömö.

8, 9. (a) Andi da wan woto soni di mbei u ta peleiki? (b) Unfa dee soni dee Jehovah taki a Ezekiëli 3:18, 19 ku 18:23, ta da u taanga fuu peleiki go dou?

⁸ Di u dii soni di mbei u ta du di peleikiwooko, hën da u di u kë mbei sëmbë ko sabi soni u di gaan daka u Jehovah di dë a pasi ta ko. Di Bëibel ta taki taa Noa bi dë wan sëmbë di „bi ta konda da dee sëmbë u di ten dë fa u de musu libi bunu a Gadu wojo”. (Lesi 2 Petuisi 2:5.) A bi musu u dë sö taa Noa bi ta piki sëmbë taa di Gaan Wata bi o ko. Faandi mbei u sa taki sö? Wë u sa taki sö u di Jesosi bi taki taa: „Dee sëmbë u di ten naandë bi dë ta njan u de ta bebe ta tei mujëë ta da mujëë manu, tee dou di daka Noa go a di gaan sipi. De an bi mëni seei taa sö wan hogi dë u ko miti de. Ma te u de kë mëni, nöö hën tjuba kai gbulululu singi di goonliba piii, sawa de tuu fia tja go kii puu dë. Nöö mi taki da unu taa leti sö nöö a o dë a di juu ten mi o toona ko a goonliba” (Mateosi 24:38, 39). Wë hii fa gaansë sëmbë an bi kë haika Noa, tökuseei a bi ta konda soni u di Gaan Wata da sëmbë, leti kumafa Jehovah bi piki ën.

⁹ A di ten aki useei ta konda soni u di Könuköndë da sëmbë, u heepi de u de ko sabi andi Gadu o du da libisëmbë a di ten di ta ko. Jehovah kë seei taa sëmbë musu haika di buka di u ta tja go da de, sö taa de sa „fika a libi”, nöö useei këën sö tu (Ezekiëli 18:23). Te u go peleiki da sëmbë a de pisi, söseei te  u ta peleiki a kamian ka hia sëmbë ta waka pasa, nöö u ta mbei möiti u piki hii sëmbë taa di Könuköndë u Gadu o ko poi di hogi goonliba aki kaba a sösö.​—Ezekiëli 3:18, 19; Daniëli 2:44; Akoalimbo 14:6, 7.

10. (a) Te u luku Mateosi 22:39, nöö andi da wan woto soni di mbei u ta peleiki? (b) Unfa Paulosu ku Silasi bi heepi wan wakitima u wan dunguwosu a di foto Filipi?

¹⁰ Di u fö soni di mbei u ta peleiki, hën da u di u lobi sëmbë (Mateosi 22:39). Di soni aki ta mbei u ta peleiki go dou, u di u sabi taa sëmbë sa ko ta si soni woto fasi te soni ko tooka a de libi. Wan daka, wanlö sëmbë an bi kë haika di buka di Paulosu ku Silasi bi ta tja, hën de bi buta de a dunguwosu a di foto Filipi. Hën de dë tefa di tuwalufu juu ndeti sö, hën goon seki jabi dee döö u di dunguwosu. Hën di wakitima u di dunguwosu ko fëëë tee taa a bi kë kii hënseei, u di a bi mëni taa dee sëmbë dee bi dë a di dunguwosu bi kule go. Ma Paulosu tapëën fu an du di soni dë. A bai dëën taa: „Nönö mati, na kii i seei e!” Hën di wakitima u di dunguwosu hakisi taa: „Mati, andi mi musu du ufö mi sa feni di heepi u Gadu?” Nöö hën Paulosu ku Silasi piki ën taa: ’I musu biibi Masa Jesosi Keesitu, nöö ja o lasi go kaba a sösö.’​—Tjabukama 16:25-34.

11, 12. (a) Andi di woto u di wakitima u di dunguwosu ta lei u u di peleikiwooko? (b) Faandi mbei u ta kë du di peleikiwooko go dou?

¹¹ Andi di woto u di wakitima u di dunguwosu ta lei u u di peleikiwooko? Wë baka di di goon seki ufö di wakitima u di dunguwosu bi ko ta si soni woto fasi, hën a hakisi Paulosu ku Silasi u de heepi ën. Wë sö nöö a dë a di ten fuu aki tu. So sëmbë di an ta kë haika di bosikopu u Bëibel di u ta paaja, sa ko ta si soni woto fasi te wan soni miti de, nöö di soni dë sa mbei de ko suku heepi a u. So sëmbë ta lasi wooko nasö kandë de ku de mujëë nasö de manu booko tööu. Wotowan sa ta tjali seei u di de ko jei taa de abi wan taku siki nasö u di wan sëmbë u de ko lasi libi. Te dee lö soni aki ta pasa, nöö de sa kë ko sabi so soni. Kandë de o ta hakisi deseei taa: ’Andi mi musu du u mi sa feni di heepi u Gadu?’ Kandë de o kë haika di bosikopu di u ta konda da sëmbë, taa abiti möön Gadu o mbei soni ko möön bunu a goonliba.

¹² Ee u ta du di peleikiwooko go dou söndö disa, nöö woo sa heepi dee sëmbë aki, te de bia ko ta si soni woto fasi (Jesaaja 61:1). Charlotte da wan Kotoigi di ta du di pioniliwooko 38 jaa longi kaa. A bi taki taa: „A di ten aki, saanfa-u-du u sëmbë kaba. De musu jei di bunu buka.” Ejvor seei da wan Kotoigi, nöö a ta du di pioniliwooko 34 jaa kaa. A bi taki taa: „Möönmöön sëmbë ta fii bookosaka a di ten aki. Nöö mi kë heepi de seei. Fëën mbei mi ta du di peleikiwooko.” A dë gbelingbelin u si taa di lobi di u lobi sëmbë ta mbei u ta kë du di peleikiwooko go dou!

13, 14. (a) Andi da di soni di Gadu ta da u, di sikifi a Johanisi 15:11? (b) Unfa u sa ko abi di wai di Jesosi bi abi nëën hati? (c) Unfa di piizii di u ta piizii te u ta du di peleikiwooko ta heepi u?

¹³ Di ndeti ufö Jesosi dëdë, hën a bi piki dee bakama fëën taa Jehovah bi o da de soni u di libi u de sa pai hia fuuta. Andi da dee soni dee a bi o da de, nöö unfa dee soni aki sa heepi u a di ten aki?

¹⁴ Piizii. Di peleiki di u ta peleiki ta hebi da u poi ö? Na seei. Baka di Jesosi bi konda di woto u di doloifi pau da dee bakama fëën, hën a bi taki taa te woo ta du di peleikiwooko,  nöö di wai di a abi nëën hati o dë a u hati tu. (Lesi Johanisi 15:11.) Ma unfa di wai di Jesosi bi abi nëën hati bi o sa dë a u hati tu? Hoi a pakisei taa Jesosi bi taki taa a dë kuma di doloifi pau, nöö dee bakama fëën dë kuma dee pau maun. Dee pau maun ta feni wata ku dee woto soni di de abi fanöudu te dë namanama ku di pau seei. Wë a di wan seei fasi, u sa ta dë waiwai kumafa Jesosi bi ta dë waiwai ee u fika namanama ku ën, söseei te u ta djeesi ën. Hën da di wai di Jesosi bi abi nëën hati o dë a u hati tu, te u ta du di kë u Gadu (Johanisi 4:34; 17:13; 1 Petuisi 2:21). Hanne da wan Kotoigi di ta du di pioniliwooko möön leki 40 jaa longi kaa, nöö a ta taki taa: „Di wai di mi ta abi a mi hati te mi kaba peleiki, ta da mi taanga u dini Jehovah go dou.” Di piizii di u ta piizii te u ta du di peleikiwooko ta da u taanga fuu peleiki go dou, aluwasi gaansë sëmbë an ta kë haika.​—Mateosi 5:10-12.

15. (a) Andi da wan soni di Gadu ta da u, di sikifi a Johanisi 14:27? (b) Unfa di kötöhati di u ta feni ta heepi u fuu sa ta du di peleikiwooko go dou?

¹⁵ Kötöhati. (Lesi Johanisi 14:27.) Di ndeti ufö Jesosi dëdë, hën a bi piki dee apösutu fëën taa: „Di soni di mi ta disa da unu aki, hën da kötöhati.” Unfa di kötöhati di Jesosi disa da u ta heepi u fuu du di peleikiwooko go dou? Te u ta du di peleikiwooko go dou, nöö u ta feni kötöhati u di u sabi taa u ta mbei Jehovah ku Jesosi ta wai ku u (Psalöm 149:4; Loomë 5:3, 4; Kolosën 3:15). Ulf da wan Kotoigi di ta du di pioniliwooko 45 jaa longi kaa, nöö a ta taki taa: „So juu mi ta wei te mi kumutu a di peleikiwooko, ma bakaten mi ta fii bunu seei, u di mi sabi taa mi ta wooko ku di ten u mi a di möön bunu fasi.” U ta wai seei taa woo sa ta feni kötöhati u nöömö!

16. (a) Andi da wan soni di Gadu ta da u, di sikifi a Johanisi 15:15? (b) Andi dee bakama u Jesosi bi musu du u de ku Jesosi bi sa dë mati go dou?

¹⁶ Mati. Baka di Jesosi bi piki dee apösutu fëën taa a bi kë u de dë waiwai, hën a bi konda da de faandi mbei a dë fanöudu u de lobi hii sëmbë (Johanisi 15:11-13). Baka di dë, hën a bi piki de taa: „Mati mi ta kai unu.” Di dë di wan sëmbë sa dë mati u Jesosi da wan gaan soni seei! Ma unfa dee apösutu u Jesosi bi o sa ta dë mati fëën u nöömö? Jesosi bi taki taa: ’Mi buta unu fu di libi fuunu musu ta pai hia fuuta.’ (Lesi Johanisi 15:14-16.) Di soni aki kë taki taa wa musu disa u du di peleikiwooko. Tu jaa ufö di dë, Jesosi bi piki dee apösutu fëën taa: „Nöö fa i si woon go  dë, nöö un musu ta konda soni da de gbelingbelin, be de fusutan taa abiti möön nöö Gadu o seti di tii fëën” (Mateosi 10:7). Fëën mbei di ndeti ufö Jesosi dëdë, a bi da dee bakama fëën taanga u de hoi dou a di peleiki di de musu ta peleiki da sëmbë (Mateosi 24:13; Maikusi 3:14). Wë Jesosi bi sabi taa di soni aki bi o taanga u du. Ma a bi sabi tu taa dee bakama fëën bi o sa du di wooko aki, söseei taa de ku ën bi o sa dë mati go dou. Unfa de bi o sa du dee soni aki? Wë wan woto soni bi o heepi de.

17, 18. (a) Andi da wan soni di Gadu ta da u, di sikifi a Johanisi 15:7? (b) Unfa di soni di Jehovah bi da dee bakama u Jesosi bi heepi de? (c) Andi da dee soni di Jehovah ta da u a di ten aki, di ta heepi u?

¹⁷ Di piki di Gadu ta piki dee begi fuu. Jesosi bi taki taa: „Un sa hakisi hiniwan soni di un kë nöö woon feni ën e” (Johanisi 15:7, 16). Di soni di Jesosi bi taki aki bi musu u da dee apösutu fëën taanga! * (Luku di pisi a basu.) Dee apösutu an bi kaba fusutan taa an bi o tei longi möön, nöö de bi o kii Jesosi. Ma di soni dë an bi kë taki taa de an bi o abi sëmbë u heepi de möön. Jehovah bi dë kabakaba u piki dee begi u de, söseei u heepi de te de bi o ta du di peleikiwooko. Nöö a bi heepi de tuu. Baka di Jesosi dëdë, hën dee apösutu bi begi Jehovah hakisi ën faa da de degihati, hën Jehovah piki dee begi u de.​—Tjabukama 4:29, 31.

¹⁸ U dee bakama u Jesosi a di ten aki seei sa dë mati fëën tu. Te u ta du di peleikiwooko go dou, nöö u ku ën o ta dë mati nöömö. U sa dë seiki taa Jehovah dë kabakaba u piki dee begi fuu, te u ta hakisi ën faa heepi u te a ta taanga da u fuu du di peleikiwooko (Filipi 4:13). U dë ku tangi a hati seei taa Jehovah ta piki dee begi fuu, söseei taa u ku Jesosi dë mati. Dee soni di Jehovah ta da u, ta da u taanga fuu ta du di peleikiwooko go dou.​—Jakobosi 1:17.

19. (a) Faandi mbei u ta peleiki go dou? (b) Andi ta heepi u fuu du di wooko di Gadu da u?

¹⁹ A di woto aki, u bi taki u fö soni di mbei u ta du di peleikiwooko go dou. Dee fö soni aki da: di gafa di u musu ta gafa Jehovah, di mbei di u musu mbei di në fëën ko santa, di lei di u musu lei taa u lobi Jehovah ku Jesosi, di piki di u musu piki sëmbë andi Gadu o du, ku di lei di u musu lei taa u lobi sëmbë. U bi taki tu u fö soni di Gadu da u. Dee soni dë da: piizii, kötöhati, mati, ku di piki di Gadu ta piki dee begi fuu. Dee fö soni aki ta da u taanga fuu du di wooko di Gadu da u fuu du. Jehovah ta wai seei te a ta si fa u ta mbei möiti tjika u di libi fuu sa „pai hia fuuta”!