1-2. Un bookohedi sömëni Kotoigi ta abi?

APÖSUTU Paulosu bi da Timoteo taanga faa mbei hii möiti faa sa ta dini Gadu. Di soni aki dë da hii u tuu kuma Keesitu sëmbë a di ten aki tu (2 Tim. 4:5). Wë u di u kë du di soni di Paulosu bi taki, mbei u ta mbei hii möiti fuu du di diniwooko u Gadu. Ma tökuseei so juu a ta taanga da u. A ta taanga da sömëni u dee baaa ku dee sisa fuu u de du di peleikiwooko (2 Tim. 4:2). Wë pakisei dee baaa ku dee sisa fuu dee ta libi a köndë ka lanti tapa di wooko fuu. Dee baaa ku dee sisa aki ta du di peleikiwooko, hii fa de sabi taa de sa kisi de buta a dunguwosu.

² Sömëni fuka ta miti dee sëmbë u Jehovah, di sa mbei taa de lasi hati. Sömëni u de musu ta wooko taanga u dee sëmbë u de feni dee soni di de abi fanöudu. De bi o ta kë peleiki möön gaanfa, ma a kaba u di wiki, nöö de an ta abi kaakiti sö möön. So baaa ku sisa ko suwaki gaanfa, so u de ko gaandi kaa, nöö so u de an sa ta pena kumutu a wosu seei. Di soni aki mbei de an sa ta du hia soni a di dini u Jehovah. Wotowan ta fii bookosaka hii juu, u di de ta si kuma Jehovah an ta kai de gaan soni. Wan sisa de kai Mary *, di ta libi a di pisiwata u Asia, bi taki taa: „Te mi ta fii bookosaka, nöö mi musu ta mbei taanga möiti u duwengi dee fii u mi. Di soni aki ta mbei mi wei seei. Te u kaba fëën, ma ta abi kaakiti tjika u mi du di peleikiwooko möön. Fëën mbei mi lo’ u kuutu miseei.”

3. Andi woo luku a di woto aki?

³ Aluwasi andi ta miti u, Jehovah sa da u kaakiti fuu sa dini ën ka u sa dini ën dou. Ufö u luku unfa Jehovah sa heepi u,  nöö boo luku fosu unfa a bi da Paulosu ku Timoteo kaakiti u de bi sa ta du di diniwooko u de go dou, hii fa soni bi ta taanga da de.

4. Andi da wantu fuka di bi ta miti Paulosu?

⁴ Sömëni fuka bi ta miti Paulosu. A bi abi di kaakiti u Jehovah fanöudu gaanfa seei. Möönmöön di dee felantima fëën bi fon mën, di de bi butëën a dunguwosu, söseei di de bi kë kii ën (2 Kol. 11:23-25). Paulosu an bi sen u taki taa so juu hënseei bi ta fii booko saka (Lom. 7:18, 19, 24). Paulosu bi dë ku wan suwaki tu, di bi dë „kuma maka” di ta tjökö ën, nöö a bi kë seei u Gadu puu ën dëën.​—2 Kol. 12:7, 8.

5. Andi Paulosu bi sa du hii fa soni bi ta taanga dëën?

⁵ Jehovah bi da Paulosu kaakiti faa sa ta du di diniwooko fëën go dou, hii fa sömëni fuka bi ta miti ën. Boo buta pakisei a wantu soni di Paulosu bi sa du, hii fa a bi abi bookohedi. Di de bi söötö ën nëën wosu a Loomë, a bi peleiki da dee hedima u dee Dju, söseei a kan taa a bi peleiki da wanlö heihei sëmbë tu (Tjab. 28:17; Fil. 4:21, 22). A bi ta peleiki tu da dee wakitima, söseei a bi ta peleiki da dee sëmbë dee bi ta ko luku ën (Tjab. 28:30, 31; Fil. 1:13). A di seei ten dë, Gadu bi mbei Paulosu sikifi biifi, di bi heepi dee tuutuu Keesitu sëmbë a di ten ala, te kisi di ten fuu aki tu. Boiti di dë, dee soni dee Paulosu bi du, bi da dee baaa ku dee sisa u di kemeente u Loomë taanga. Di soni dë bi mbei de bi sa „ta konda di Buka waiwai söndö fëëë” (Fil. 1:14). Paulosu an bi sa ta du hii dee soni dee a bi kë du, ma tökuseei a bi ta du hii soni di a bi sa du. Di soni aki bi „mbei di paaja u di Buka u Masa Jesosi [go] a fesi seei”​—Fil. 1:12.

6. Andi bi heepi Paulosu faa bi sa du di diniwooko fëën, te u luku 2 Kolenti 12:9, 10?

⁶ Paulosu bi sabi taa na ku hënseei kaakiti a bi ta du dee soni dee a bi sa du a di dini di a bi ta dini Jehovah. Ma a bi sa du dee soni dë u di Jehovah hën bi ta dëën kaakiti. A bi taki taa: „Te wan sëmbë kaakiti ku saanfa-u-du fëën kaba, nöö nëën [Jehovah] sa feni pasi u wooko nëën liba ku di kaakiti [fëën] awaa.”(Lesi 2 Kolenti 12:9, 10.) Jehovah bi da Paulosu kaakiti ku di santa jeje fëën, faa bi sa du di diniwooko fëën, aluwasi sëmbë bi ta du ku ën, aluwasi de bi butëën a dunguwosu, nasö aluwasi woto fuka bi ta miti ën.

7. Un bookohedi Timoteo bi sa abi, di bi sa mbei a taanga dëën faa du di diniwooko fëën?

 ⁷ Timoteo bi dë wan njönku baaa di bi ta wooko makandi ku Paulosu, nöö hënseei bi musu ta futoou di kaakiti u Gadu faa sa du di diniwooko fëën. Timoteo bi ta du di sëndëlengi wooko makandi ku Paulosu, nöö Paulosu bi lo’ u mandëën faa go da dee baaa ku dee sisa a dee kemeente taanga (1 Kol. 4:17). Kandë Timoteo bi ta sa si kuma an bi o sa du di wooko aki. Nöö a kan taa fëën mbei Paulosu bi piki ën taa: „Ja musu mbei sëmbë dou i ku wojo fu di i njönku mbei e” (1 Tim. 4:12). A di pisiten dë, Timoteo bi lo’ u dë ku siki (1 Tim. 5:23). Ma Timoteo bi sabi taa Jehovah bi o dëën di santa jeje fëën, faa bi sa ta du di peleikiwooko go dou, söseei faa bi sa heepi dee baaa ku dee sisa fëën.​—2 Tim. 1:7.

8. Unfa Jehovah ta da dee sëmbë fëën kaakiti a di ten aki?

⁸ A di ten aki, Jehovah ta da dee sëmbë fëën „di gaan kaakiti” fëën, sö taa de sa ta hoi deseei nëën (2 Kol. 4:7). Boo luku fö soni di Jehovah seeka da u fuu sa feni di kaakiti di u abi fanöudu, söseei di sa heepi u fuu hoi useei nëën. Dee soni aki da di begi di u sa ta begi, di lesi di u sa ta lesi di Bëibel, di nama di u sa ta nama ku de baaa ku dee sisa fuu, ku di peleiki di u sa ta peleiki.

9. Unfa begi sa heepi u?

⁹ Begi ta da u kaakiti. Paulosu ta piki u a Efeise 6:18, taa u musu ta begi Gadu „hiniwan juu”. Te u du sö, nöö Gadu o heepi u. Wan baaa de kai Jonnie di ta libi a Bolifia, bi si fa Jehovah bi heepi ën di sömëni fuka bi ta miti ën. Di baaa aki mama ku hën tata bi ko suwaki gaanfa seei, nöö a di wan seei ten hën mujëë seei bi ko suwaki tu. A bi ta taanga da Jonnie faa bi sa ta luku hii dee dii sëmbë aki tuu. Hën mama bi ko lasi libi, nöö a bi tei wan pisiten ufö hën mujëë ku hën tata bi ko bëtë. Jonnie ta taki unfa soni bi dë dëën a di ten dë. Jonnie bi taki taa: „Te mi bi ta booko mi hedi ku soni, nöö mi bi ta konda finifini da Jehovah unfa mi ta fii. Di soni dë bi ta heepi mi gaanfa seei.” Jehovah bi da Jonnie di kaakiti di a bi abi fanöudu faa bi sa hoi dou. Wan baaa di dë gaanwomi u kemeente de kai Ronald, di ta libi a di köndë Bolifia, bi ko jei taa hën mama abi di siki de kai kankël. Wan liba baka di a jei di soni aki, hën hën mama bi ko lasi libi. Andi bi heepi ën a dee taanga pisiten dë? A bi taki taa: „Mi bi ta piki Jehovah hii soni di dë a mi hati te mi ta begi ën. Mi sabi taa a ta fusutan mi möön leki hiniwan woto sëmbë. A ta fusutan mi möön fa mi ta fusutan miseei.” So juu u sa fii kuma wa o sa hoi dou te fuka ta miti u, söseei wa ta sabi andi u musu taki te woo begi Jehovah. Ma Jehovah ta da u taanga fuu begi ën aluwasi wa saandi u musu taki.​—Lom. 8:26, 27.

10. Faandi mbei a dë fanöudu fuu ta lesi di Bëibel, söseei fuu ta kai pakisei nëën, te u luku Hebelejën 4:12?

¹⁰ Di Bëibel ta da u kaakiti. Leti kumafa Paulosu bi ta feni kaakiti te a bi ta lesi di Bëibel, sö nöö useei sa feni kaakiti te u ta lesi ën (Lom. 15:4). Te u ta lesi di Wöutu u Gadu, söseei te u ta kai pakisei a dee soni dee u ta lesi, nöö Jehovah sa da u di santa jeje fëën fuu sa si unfa dee soni dee u ta lesi sa heepi u. (Lesi Hebelejën 4:12.) Baaa Ronald, di u bi taki soni fëën a fesi kaa, bi taki taa: „Mi ta wai seei taa mi ko abi di guwenti u lesi wan pisi u di Bëibel hiniwan ndeti. Mi ta kai pakisei a dee fasi dee Jehovah abi, söseei a di fasi fa a bi ta libi ku dee sëmbë fëën. Di soni aki ta da mi kaakiti.”

11. Unfa di Bëibel bi heepi wan sisa di bi ta tjali gaanfa?

 ¹¹ Te u ta pakisei fundu u di Wöutu u Gadu, nöö a ta heepi u fu wa booko u hedi tumisi. Boo luku unfa di Bëibel bi heepi wan sisa di bi ta tjali u di manu fëën bi dëdë. Wan gaanwomi bi piki ën taa ee a lesi di buku Jöpu, nöö a sa heepi ën. Di a lesi di buku dë, hën a bigi kuutu Jöpu u di fasi fa a bi ta pakisei. A bi ta pakisei taa: „Jöpu, na soni u dee bookohedi fii wanwan nöö i musu ta pakisei!” Ma a bi ko fusutan taa hënseei bi ta du soni kuma Jöpu. Di soni aki bi heepi ën faa tooka di fasi fa a bi ta pakisei, söseei a bi heepi ën faa feni di kaakiti di a bi abi fanöudu, u di hën manu bi lasi libi.

12. Unfa Jehovah ta tei dee baaa ku dee sisa u da u kaakiti?

¹² Dee baaa ku dee sisa ta da u kaakiti. Jehovah ta tei woto dinima fëën tu, u da dee dinima fëën kaakiti. Paulosu bi ta hangi u dë makandi ku dee baaa ku dee sisa fëën a di biibi, u de sa ta ’da deseei taanga’ (Rom. 1:11, 12). Mary, di sisa di u bi taki soni fëën kaa, da wan sëmbë di lo’ u dë makandi ku dee baaa ku dee sisa tu. A bi taki taa: „Jehovah bi tei baaa ku sisa di an pena sabi un booko mi abi, u de sa da mi taanga. De bi sikifi biifi manda da mi, nöö dee soni di de bi taki bi dë soni di mi bi abi fanöudu. Mi ta feni taanga tu te mi ta fan ku woto sisa di bi abi di wan seei fuka di mi bi abi. Dee gaanwomi seei ta kai mi gaan soni a di kemeente.”

13. Unfa u sa ta da useei taanga te u go a dee komakandi?

¹³ Di kamian ka u sa ta möön da u seei taanga, hën da te u nango a dee komakandi. Te i nango a dee komakandi, nöö i sa ta da wotowan taanga, u di joo ta piki de taa i lobi de, söseei u di joo ta lei taa i ta tei dee soni di de ta du u bigi. Wan gaanwomi de kai Peter, bi piki wan sisa di manu fëën an dë a di tuutuu lei, taa: „A ta da u taanga seei te u ta si taa i ta ko a dee komakandi. Hii juu i ta seeka dee sikisi mii fii, nöö i ta seeka wan piki da de u de sa piki a dee komakandi.” A bi tei ën u bigi seei taa di baaa bi taki di soni aki. Di sisa bi taki taa: „Di soni aki mi bi abi fanöudu u mi sa feni kaakiti baka.”

14. Unfa di peleikiwooko ta heepi u?

¹⁴ Di peleikiwooko ta da u kaakiti. Te u ta konda soni u Bëibel da wotowan, nöö u ta fii bunu, aluwasi ee sëmbë ta haika, nasö aluwasi ee de an ta haika (Nöng. 11:25). Wan sisa de kai Stacy, bi ko si unfa di peleikiwooko ta da u taanga. Di de bi puu wan famii fëën a di kemeente, a bi ta tjali gaanfa seei. A bi ta hakisi hënseei ee an bi sa du möön soni u heepi ën. A bi ta taanga dëën fu an pakisei di soni dë möön. Wë andi bi heepi di sisa aki? Wë a dë di peleikiwooko! U di a bi nango a di peleikiwooko, mbei a bi sa ta buta pakisei a di fasi fa a bi sa heepi dee sëmbë u di pisiwata ka a ta peleiki. A bi taki taa: „A di pisiten dë, Jehovah bi mbei mi feni wan sëmbë di bi kë lei soni u Bëibel, nöö a bi nango a fesi seei. Di soni aki bi da mi taanga. Di soni di ta heepi mi möön gaanfa, da di peleikiwooko.”

15. Andi i ta lei a di soni di Mary bi taki?

¹⁵ So juu so baaa ku sisa sa ta feni taa de an sa du di peleikiwooko wan apaiti. Wë ee i ta fii sö tu, nöö hoi a pakisei taa Jehovah ta wai te i ta du hii soni di i sa du dëën. Boo toona buta pakisei a di sisa de kai Mary di u bi taki soni fëën kaa. Di a bi foloisi go peleiki a wan kemeente ka de ta fan wan woto töngö, nöö a bi ta taanga dëën, u di a bi musu lei wan woto töngö. A bi taki taa: „Wan hii pisiten ma bi sa ta da piki bumbuu. Bëibel tëkisi nöö mi bi sa ta lesi, söseei talakitaati wanwan mi bi sa ta da sëmbë a di peleikiwooko.” Mary bi ta fii  kuma an bunu tjika te a bi tei hënseei maaka ku wotowan di bi ta fan di töngö bumbuu. Ma bakaten a bi ko tooka di fasi fa a bi ta pakisei. A bi ko fusutan taa Jehovah sa wooko ku ën hii fa an sa du so soni. A bi taki taa: „Dee lei u Bëibel an taanga u fusutan, nöö de ta heepi sëmbë u de ko abi wan möön bunu libi.”

16. Andi sa heepi dee sëmbë dee an sa kumutu a wosu, u de sa feni kaakiti?

¹⁶ Aluwasi ee wa sa kumutu a wosu seei, tökuseei Jehovah ta si unfa u ta kë du di peleikiwooko tjika, nöö a ta tei ën u bigi seei. Jehovah sa da u di okasi fuu sa peleiki da dee sëmbë dee ta luku u, nasö fuu peleiki da dee data ku dee sösutu. Ee u ta tei dee soni dee u bi sa du a di ten di pasa, maaka ku dee soni dee u sa du nöunöu, nöö a sa pasa taa u lasi hati. Ma ee u ta buta pakisei a di fasi fa Jehovah ta heepi u a di ten aki, nöö di soni dë o da u di kaakiti fuu sa hoi dou ku piizii, aluwasi fuka ta miti u.

17. Faandi mbei u musu ta peleiki go dou, aluwasi ee sëmbë an ta haika u, te u luku peleikima 11:6?

¹⁷ Wa sabi ambë o tei di bunu buka di u ta paaja. (Lesi Peleikima 11:6.) Wan sisa de kai Barbara, di pasa 80 jaa, ta peleiki da sëmbë ku tëlëfön, nasö a ta sikifi biifi da de. A bi sikifi wan biifi, hën a tei di Hei Wakitimawosu u 1 u gaanliba u di jaa 2014 faa manda da wan sëmbë. Di Hei Wakitimawosu aki bi abi wan woto de kai „San Gado du gi yu?”. Söndö u di sisa aki sabi, a bi manda di biifi da wan womi ku hën mujëë, di an bi dë Jehovah Kotoigi möön. De bi lesi di Hei Wakitimawosu aki sömëni pasi. Di womi bi ta fii kuma Jehovah hën bi ta fan ku ën. De bi bigi ko a dee komakandi, nöö te u kaba fëën de bi ko dë Jehovah Kotoigi baka, hii fa 27 jaa longi de an bi ta dini Jehovah möön. An dë u taki taa Barbara bi feni kaakiti di a si unfa soni bi waka di a bi manda biifi da sëmbë!

18. Andi u sa du fuu sa feni di kaakiti di Gadu ta da sëmbë?

¹⁸ Jehovah seeka soni a sömëni fasi fuu sa feni di kaakiti fëën. Te u ta begi, ta lesi di Bëibel, ta nama ku dee baaa ku dee sisa fuu, söseei te u ta du di peleikiwooko, nöö u ta lei taa u ta biibi taa Jehovah sa heepi u tuutuu. Boo ta suku kaakiti hii juu a di Tata fuu di dë a liba ala, di „sa du wan soni da dee sëmbë dee ta dini ën ku hii de hati.”​—2 Klon. 16:9.