1-2. Un soni u sa ta hakisi useei te a nama ku begi?

 I BI hakisi iseei wan daka kaa ee Jehovah ta piki dee begi fii ö? Sömëni sëmbë ta hakisi deseei di soni aki. Sömëni baaa ku sisa bi taki taa de bi hakisi deseei di soni aki kaa, möönmöön di fuka bi ta miti de. Te soni ta miti u, nöö a sa ta möön taanga da u fuu si unfa Jehovah ta piki dee begi fuu.

² A di woto aki woo luku faandi mbei u sa dë seiki taa Jehovah ta piki dee begi u dee dinima fëën (1 Joh. 5:15). Söseei woo piki dee hakisi aki: Faandi mbei a ta djei kuma na hii juu Jehovah ta piki dee begi fuu? Unfa Jehovah ta piki dee begi fuu a di ten aki?

3. Faandi mbei Jehovah kë fuu ta begi ën?

³ Di Bëibel ta piki u taa Jehovah lobi u gaanfa seei, söseei taa a ta kai u gaan soni (Hag. 2:7; 1 Joh. 4:10). Fëën mbei a ta da u taanga fuu begi ën, nöö u hakisi ën faa heepi u (1 Pet. 5:6, 7). A kë fuu ku ën dë mati, söseei a kë fuu hoi dou te fuka ta miti u.

4. Unfa u du sabi taa Jehovah ta piki dee begi u dee dinima fëën? (Luku di peentje tu.)

⁴ Sömëni woto dë a di Bëibel di ta lei u unfa Jehovah bi piki dee begi u dee dinima fëën. I sabi wan u dee woto dë u? Wan u dee woto dë da di u Könu Dafiti. A bi abi felantima di bi kë du hogi ku ën, nöö a bi ta begi Jehovah faa heepi  ën. Wan daka a bi begi taa: „Jehovah o, haika di begi u mi. Seti jesi haika di begi u mi. I da wan Gadu di ta du soni a wan leti fasi, söseei hii juu i ta du andi i taki taa joo du. Wë mi ta begi i, piki mi baa” (Ps. 143:1). Jehovah bi piki di begi u Dafiti (1 Sam. 19:10, 18-20; 2 Sam. 5:17-25). Fëën mbei Dafiti bi sa taki ku hii hën hati taa: „Jehovah dë zuntu ku hii dee sëmbë dee ta kai ën.” U sa biibi di soni dë tu.​—Ps. 145:18.

5. Hii juu Jehovah bi ta piki dee begi u dee dinima fëën kumafa de bi mëni ö? Konda wan woto. (Luku di peentje tu.)

⁵ Kandë Jehovah an o piki dee begi fuu a di fasi fa u bi mëni. Apösutu Paulosu bi si di soni aki. A bi hakisi Jehovah faa puu ’wan soni dëën di bi ta tjökö ën leti kuma maka’. Dii pasi Paulosu bi begi Jehovah faa heepi ën ku di fuka aki. Jehovah bi piki dee begi dë u? Wë aai. Ma an bi piki de kumafa Paulosu bi mëni taa a bi o piki de. Jehovah an bi puu di fuka, ma a bi da Paulosu di kaakiti di a bi abi fanöudu u dini ën go dou.​—2 Kol. 12:7-10.

6. Faandi mbei so juu a sa ta djei kuma Jehovah an ta piki dee begi fuu?

⁶ So juu Jehovah sa piki dee begi fuu a wan fasi di wa bi mëni tu. U sa dë seiki taa Jehovah sabi andi da di möön bunu fasi u heepi u. A sa „du soni gaanfa möön leki fa u ta begi ën. A sa du soni pasa ka pakisei fuu sa dou seei” (Ef. 3:20). Di soni dë mbei Jehovah sa piki dee begi fuu a wan ten, nasö a wan fasi di wa bi mëni seei.

7. Faandi mbei a sa dë fanöudu fuu hakisi Jehovah woto soni te u ta begi? Konda wan woto.

⁷ Kandë a o dë fuu begi hakisi woto soni, te u ko fusutan di soni di Jehovah kë fuu du. Luku di woto u wan baaa de kai Martin Poetzinger. Kölö sö baka di a tööu, hën de kisi ën söötö a wan sitaafuma kampu u dee Nazi sodati. Bigibigi a bi ta hakisi Jehovah faa puu ën a di sitaafuma kampu, sö taa a bi sa go sölugu hën mujëë, söseei faa bi sa du di peleikiwooko go dou. Ma baka tu wiki, an bi si na wan soni di bi ta lei taa Jehovah o puu ën a di sitaafuma kampu. Fëën mbei a bi bia ta begi taa: „Jehovah o, gaantangi lei mi andi i kë taa mi musu du.” A bi bigi ta pakisei dee soni dee bi ta miti dee woto baaa dee bi dë a di sitaafuma kampu. Sömëni u de bi ta booko de hedi seei ku de mujëë ku dee mii u de. Baaa Poetzinger bi begi Jehovah taa:  „Ke Jehovah, gaantangi fii, u di njunjun wooko di i da mi. Heepi mi u mi sa ta da dee baaa u mi taanga.” Nëigi jaa longi Baaa Poetzinger bi dë a dunguwosu ta da dee woto baaa taanga!

8. Un fanöudu soni u musu hoi a pakisei te u ta begi?

⁸ U musu hoi a pakisei taa Jehovah abi soni di a kë du, nöö a o du de a di ten di a buta taa a o du de. Wan u dee soni di a buta taa a o du, hën da a o puu hii dee hogi soni dee ta miti u a di ten aki, nöö dee soni dë an o miti u nöiti möön. So u dee hogi soni dë da siki, dëdë ku te soni kuma gaan wata nasö gaan ventu ko booko kamian. Jehovah o mbei di Könuköndë fëën puu hii hogi (Dan. 2:44; Ako. 21:3, 4). Ma a di mindi aki, Jehovah ta da Saatan pasi faa tii di goonliba b (Joh. 12:31; Ako. 12:9). Ee Jehovah puu hii dee fuka fuu nöunöu, nöö a o sa djei kuma Saatan ta tii di goonliba bunu. A o dë fuu wakiti u Jehovah du dee soni dee a paamusi u. Ma di soni dë an kë taki taa an ta heepi u a di ten aki. Boo luku wantu soni di Jehovah ta du u heepi u.

9. Unfa Jehovah sa heepi u te u musu du wan gaan soni a di libi fuu? Konda wan woto.

⁹ Jehovah ta da u köni. Jehovah paamusi u taa a o da u di köni di u abi fanöudu fuu sa du soni a wan bunu fasi. Te u kë du wan gaan soni a di libi fuu, nöö a dë fanöudu seei fuu hakisi Jehovah faa da u köni. Te u ta pakisei ee woo tööu nasö ee wa o tööu, nöö a bunu fuu hakisi Jehovah köni (Jak. 1:5). Boo luku di woto u wan sisa de kai Maria. Di sisa aki an tööu. c Di a bi ta du di kowoonu pioniliwooko hën a bi miti wan baaa. Di sisa bi taki taa: „Möön u bi ta ko sabi useei, möön u bi ta ko lobi useei. Nöö mi bi sabi taa mi bi musu luku andi mi o du. Mi bi begi Jehovah sömëni pasi faa tii mi. Ma mi bi sabi tu taa Jehovah an bi o piki mi andi mi musu du.” Di sisa aki bi hakisi Jehovah faa dëën köni, nöö a bi fii taa Jehovah bi piki di begi fëën. Unfa sö? Wë di a bi go öndösuku soni a dee buku fuu, hën a bi feni woto di bi heepi ën. Boiti di dë, hën mama di dë wan dinima u Jehovah bi fan ku ën, nöö a bi tei di fan fëën. Di soni di hën mama bi piki ën bi heepi ën faa öndösuku hënseei luku. Te u kaba fëën, a bi sa du soni a wan köni fasi.

10. Andi Jehovah o du u heepi dee dinima fëën, te u luku Filipi 4:13? Konda wan woto. (Luku di peentje tu.)

¹⁰ Jehovah ta da u kaakiti fuu sa hoi dou. Leti kumafa Jehovah bi da apösutu Paulosu kaakiti faa hoi dou, sö nöö a o da u ën tu.  (Lesi Filipi 4:13.) Boo luku unfa Jehovah bi heepi wan baaa de kai Benjamin faa hoi dou, hii fa soni bi ta taanga dëën seei. Di di baaa aki bi njönku, nöö sömëni jaa longi hën ku dee sëmbë fëën bi ta libi a lowema kampu na Afiikan. Benjamin bi taki taa: „Hii juu mi bi ta begi ta hakisi Jehovah faa da mi kaakiti, sö taa mi bi sa ta du soni di ta kai ku ën. Jehovah bi piki dee begi u mi, u di a bi da mi kötöhati, a bi da mi degihati u mi ta du di peleikiwooko go dou, söseei a bi da mi buku di bi ta heepi mi u mi ku ën dë mati go dou.” A bi taki tu taa: „Mi bi ta lesi woto u baaa ku sisa, nöö mi bi ta si unfa Jehovah bi ta heepi de u de hoi dou. Di soni dë bi heepi mi u mi dë kabakaba u mi hoi miseei a Jehovah tu.”

11-12. Unfa Jehovah sa wooko ku dee baaa ku dee sisa fuu u piki dee begi fuu? (Luku di peentje tu.)

¹¹ Jehovah ta wooko ku dee baaa ku dee sisa fuu. Di ndeti ufö Jesosi dëdë, a bi begi fajafaja seei. A bi begi hakisi Jehovah u sëmbë an si ën kuma wan sëmbë di kosi Gadu, söseei di fiti u kisi dëdë sitaafu. Jehovah an bi du di soni di Jesosi bi hakisi ën, ma a bi manda wan ëngëli ko dëën taanga (Luk. 22:42, 43). Jehovah sa mbei wan baaa nasö wan sisa bëli u tu u da u taanga, nasö a sa mbei de ko luku u a u pisi. Hii u tuu sa mbei möiti u „fan a wan suti fasi” ku dee baaa ku dee sisa fuu.​—Nöng. 12:25.

¹² Boo luku di woto u wan sisa de kai Miriam. Wantu wiki baka di di sisa aki manu lasi libi, hën a bi dë a wosu hën wanwan ta tjali, söseei a bi ta fii kuma saanfa-u-du fëën bi kaba. A bi ta këë seei, nöö a bi abi wan sëmbë fanöudu fu hën ku ën fan. A bi taki taa: „Ma bi abi kaakiti u bëli sëmbë. Fëën mbei mi bi begi Jehovah. Di mi bi dë ta këë ta begi, hën di tëlëfön u mi bai. Wan gaanwomi bi bëli mi. A bi dë wan mati u mi.” Miriam bi feni kötöhati a di gaanwomi dë ku hën mujëë. A dë seiki taa Jehovah hën bi mbei di gaanwomi bëli ën.

13. Konda wan woto di ta lei taa Jehovah sa wooko ku sëmbë di an ta dini ën u piki dee begi fuu.

¹³ Jehovah sa wooko ku sëmbë di an ta dini ën (Nöng. 21:1). So juu Jehovah sa mbei  sëmbë di an ta dini ën du wan soni u heepi dee dinima fëën. Jehovah bi mbei Könu Altasëlisi da Nehemia pasi faa toona go a Jelusalen, sö taa a bi sa heepi seeka di foto (Neh. 2:3-6). A di ten aki, Jehovah sa mbei sëmbë di an ta dini ën heepi u tu te u dë a fuka.

14. Andi i lobi u di woto u Soo Hing? (Luku di peentje tu.)

¹⁴ Wan sisa de kai Soo Hing bi fii taa Jehovah bi wooko ku di data fëën u heepi ën. Di womi mii u Sisa Soo Hing abi hedi dendu siki. Söseei wan soni bi pasa di bi mbei di womi mii kisi gaan makei. Baka di di soni dë pasa, hën Soo Hing ku hën manu disa di wooko u de u de sa sölugu di mii u de. Di soni dë bi mbei de bi ko abi möni fuka. Soo Hing bi taki taa a bi ta fii kuma an bi sa hoi dou möön. A bi konda hii soni da Jehovah, söseei a bi hakisi ën faa heepi ën. Wan data bi buta taa a o suku wan fasi u heepi Soo Hing ku dee sëmbë fëën wosudendu. Di data bi heepi de u de feni heepi a lanti, söseei de bi feni wan wosu di an bi dii u paka poi. Bakaten Soo Hing bi taki taa: „U bi si unfa Jehovah bi ta heepi u. Hën da ’di Sëmbë di ta haika begi’ tuutuu.”​—Ps. 65:2.

15. Andi bi heepi wan sisa faa ko si taa Jehovah ta piki dee begi fëën?

¹⁵ An ta pasa hesihesi taa Jehovah ta piki dee begi fuu a wan gaan foombo fasi. Ma a ta piki dee begi fuu a sö wan fasi taa u ta feni andi u abi fanöudu fuu sa hoi useei nëën go dou. Fëën mbei a bunu fii dë ku wojo fii sa si unfa Jehovah ta piki dee begi fii. Wan sisa de kai Yoko bi ta fii kuma Jehovah an bi ta piki dee begi fëën. Ma a bi bigi ta sikifi dee soni dee a bi begi hakisi Jehovah a wan buku. Baka wan pisiten, a bi toona go luku dee soni dee a bi sikifi a di buku, hën a ko si taa Jehovah bi piki gaansë u dee begi fëën. A bi si tu taa Jehovah bi piki dee begi dee hënseei bi fëëkëtë. A bunu fuu ta tei ten u pakisei unfa Jehovah ta piki dee begi fuu.​—Ps. 66:19, 20.

16. Unfa u sa lei taa u abi biibi te a nama ku begi? (Hebelejën 11:6)

¹⁶ U ta lei taa u abi biibi te u ta begi Jehovah, ma söseei te u ta dë tifeedi ku di fasi fa a ta piki dee begi fuu, aluwasi unfa a piki de. (Lesi Hebelejën 11:6.) Boo luku di woto u wan baaa de kai Mike ku hën mujëë Chrissy. Di baaa aki ku hën mujëë bi kë go wooko a  Bëtëli. Mike bi taki taa: „Sömëni jaa longi u bi fuu pampia fuu bi sa go wooko a Bëtëli, söseei sömëni pasi u bi begi Jehovah, ma nöiti de kai u fuu go wooko ala.” Mike ku Chrissy an bi lasi hati. De bi dë seiki taa Jehovah sabi un wooko möön bunu da de u de du. De bi ta du hii soni di de bi sa du. De bi ta du di kowoonu pioniliwooko a kamian ka möön peleikima bi dë fanöudu, söseei de bi ta heepi mbei kamian u dini Jehovah. Nöunöu de ta du di keling-wooko. Mike bi taki tu taa: „Na hii juu Jehovah bi ta piki dee begi fuu kumafa u bi mëni. Ma a bi ta piki dee begi fuu bunu möön fa u bi mëni seei.”

17-18. Fuun soni u sa dë seiki, te u luku Psalöm 86:6, 7?

¹⁷ Lesi Psalöm 86:6, 7. Dafiti bi dë seiki taa Jehovah bi ta haika dee begi fëën, söseei taa a bi ta piki de. I sa dë seiki u dee soni dë tu. Dee woto dee sikifi a di woto aki, ta lei u taa Jehovah sa da u di köni ku di kaakiti di u abi fanöudu fuu sa hoi dou. A sa wooko ku dee baaa ku dee sisa fuu, nasö ku sëmbë di an ta dini ën u heepi u.

¹⁸ Hii fa so juu Jehovah an ta piki dee begi fuu kumafa u bi mëni, tökuseei u sabi taa a o piki de. A o da u di soni di u abi fanöudu, söseei a o da u ën a di soifi ten. Fëën mbei na disa u begi. Ma biibi taa Jehovah o piki dee begi fii, söseei taa a di njunjun goonliba a o „da hiniwan soni di dë ku libi di soni di a kë”.​—Ps. 145:16.