WOTO 20
KANDA 67 Go paaja di buka
Be lobi heepi i fii sa peleiki go dou!
„Hii nasiön sëmbë u goonliba musu ko jei di bunu njunsu u Gadu, biga te a dë sö kaa ufö di kaba u goonliba sa dë.”—MAIK. 13:10.
SONI DI WOO LUKU
Woo si fa lobi sa heepi u fuu ta peleiki fajafaja, söseei fuu ta du di peleikiwooko ku hii u hati.
1. Fuun soni u bi taki a di jaa-komakandi u 2023?
U BI taki u wantu soni a di jaa-komakandi u 2023. a U bi taki u so soni di u bi ko fusutan möön bunu, söseei u bi taki u wan gaan soni di nama ku di fasi fa u ta du di peleikiwooko. U bi taki taa so sëmbë sa abi di okasi jeti, u tei di së u di föluku u Jehovah baka te di Gaan Babilon booko kaba a sösö. Boiti di dë, u bi taki taa a bigi u ëlufumu-liba u di jaa 2023, nöö an o dë fanöudu möön u dee peleikima ta sikifi hii dee soni di de du a di peleikiwooko möön. Dee soni dee tooka aki ta lei taa di peleikiwooko an de fanöudu sö möön u? Nönö!
2. Faandi mbei a ta dë fanöudu fuu ta du di peleikiwooko möön u ta si dee daka ta pasa? (Maik. 13:10)
2 Möön dee daka ta pasa, möön a ta dë fanöudu fuu ta du di peleikiwooko. Faandi mbei u taki sö? Wë u di di ten an fika hia möön. Buta pakisei a di fasi fa Jesosi bi taki taa di peleikiwooko bi o dë a dee lasiti daka u di goonliba aki. (Lesi Maikusi 13:10.) Mateosi bi taki taa, Jesosi bi taa di bunu buka musu paaja te dou hii di goonliba, be hii föluku jei. Nöö baka di dë ufö di ten u dë aki o „kaba” (Mat. 24:14). Di wöutu di Mateosi wooko ku ën dë, ta lei u taa di hogi goonliba u Saatan aki o poi seei kaba a sösö fiaa. Jehovah buta di „daka ku di juu” kaa (Mat. 24:36; 25:13; Tjab. 1:7). Nöö daka fu daka u ta ko möön zuntu ku di ten dë (Lom. 13:11). Fëën mbei u musu ta peleiki fu te kuma di kaba dou.
3. Faandi mbei u ta du di peleikiwooko?
3 Wan fanöudu soni di u sa ta hakisi useei da: Faandi mbei u ta peleiki di bunu buka? Wë di soni dë an taanga u sabi. U ta du di peleikiwooko u di u abi lobi. Te u ta du di peleikiwooko, nöö u ta lei taa u lobi di bunu buka di u ta paaja. U ta lei tu taa u lobi libisëmbë, ma di möön gaan soni, hën da u ta lei taa u lobi Jehovah ku di në fëën. Boo buta pakisei a hiniwan u dee soni u taki dë.
U TA PELEIKI U DI U LOBI DI BUNU BUKA
4. Unfa u ta fii te u jei wan bunu buka?
4 I ta mëni jeti unfa i bi ta fii di i bi jei wan bunu buka u? Kandë wan sëmbë fii bi pai wan mii, nasö kandë i bi feni wan wooko di i bi abi fanöudu seei. Nöö kandë wantewante dë i bi bigi paaja di buka da dee famii fii, ku dee mati fii. Sö i bi fii di i bi jei di möön bunu buka u hii di goonliba u? Wë di bunu buka dë da di bunu buka u di Könuköndë u Gadu.
5. Unfa i bi ta fii di i bi ko sabi andi di Bëibel ta lei u tuutuu? (Luku dee peentje.)
5 Toona pakisei luku unfa i bi fii, di i bi ko sabi andi di Bëibel ta lei u tuutuu. I bi ko si taa di Tata fuu di dë a liba ala lobi i, söseei taa a kë fii ko dë wan u dee sëmbë u di wosudendu fëën. I bi ko si taa a paamusi u taa o tja wan kaba ko a fuka ku pena, söseei taa joo sa si fa dee sëmbë fii o weki ko a libi baka a di njunjun goonliba. Boiti di dë, i bi lei sömëni woto soni jeti (Maik. 10:29, 30; Joh. 5:28, 29; Lom. 8:38, 39; Ako. 21:3, 4). Dee soni dee i bi lei bi dou i hati seei (Luk. 24:32). I bi lobi de sö tee taa ja bi sa dë nöö ja konda soni u de da wotowan!—Luku Jelemia 20:9.
Di u bi bigi lei soni u Bëibel, nöö u bi ta wai sö tee taa wa bi sa dë nöö wa konda dee soni dee u bi ta lei da wotowan! (Luku palaklafu 5)
6. Andi i ta lei u di woto u Ernest ku Rose?
6 Boo buta pakisei a di woto u wan baaa de kai Ernest. b Hën tata lasi libi di a bi abi teni jaa, nöö a bi taki taa: „Mi bi ta hakisi miseei taa: ’A go a liba ala u, naa soni fëën kaba a mundu?’ Mi bi ta haun ku dee mii dee bi abi tata a libi jeti.” Ernest bi lo’ u go a beepe go tjökö kini begi a di geebi fëën tata. A bi ta taki begi taa: „Gadu gaantangi, mi kë sabi naasë mi tata dë.” Baka 17 jaa di Ernest tata lasi libi, hën a bigi lei soni u Bëibel. A bi wai seei di a ko sabi taa dee sëmbë dee lasi libi na sabi na wan hojo soni, taa a dë kuma de ta duumi wan fundu duumi, söseei taa dee sëmbë dee dëdë o weki ko a libi baka (Peleik. 9:5, 10; Tjab. 24:15). Ernest bi ko sabi di soni di a bi ta suku sömëni jaa longi! A bi wai seei di a ko sabi dee soni di di Bëibel ta lei u. Hën mujëë de kai Rose, nöö a bi bigi ta lei soni u Bëibel makandi ku ën tu. A bi lobi dee soni dee a bi ta lei. Te u kaba fëën, hën de dopu a di jaa 1978. De bi ta peleiki fajafaja da dee famii u de ku dee mati u de. Söseei de bi ta peleiki da dee woto sëmbë dee bi kë haika de tu. Di soni dë bi mbei taa de bi heepi möön leki 70 sëmbë u dopu ko dë mati u Jehovah.
7. Andi u ta du te u lobi dee soni dee u ta lei a Bëibel? (Luk. 6:45)
7 A de gbelingbelin u si taa te u lobi dee lei u Bëibel, nöö wa sa ta hoi de da wanwan. (Lesi Lukasi 6:45.) U ta fii kuma dee bakama u Jesosi fu awooten di bi taki taa: „Wa sa tjubi dee soni u wojo bi si ku dee u jesi bi jei” (Tjab. 4:20). U di u lobi di tuutuu lei gaanfa seei, mbei u kë konda soni fëën da hii dee sëmbë dee u sa.
U TA PELEIKI U DI U LOBI SËMBË
8. Andi ta da u taanga fuu konda di bunu buka da woto sëmbë? (Luku di pisi „ Lobi sëmbë—Heepi de u de ko dë bakama u Jesosi”.) (Luku di peentje tu.)
8 U lobi sëmbë leti kumafa Jehovah ku di Womi Mii fëën lobi sëmbë (Nöng. 8:31; Joh. 3:16). U ta fii gaanfa seei da dee sëmbë dee ’an sabi Gadu, söseei dee saanfa-u-du u de kaba’ (Ef. 2:12). Dee bookohedi u de ta mbei de ta fii kuma de dë a wan gaan fundu baaku dendu. Ma u abi wan tatai u hai de puu nëën, di tatai dë da di bunu buka u di Könuköndë u Gadu. Di lobi di u lobi de, ku di fii di u ta fii da de, ta da u taanga fuu mbei hii möiti di u sa mbei u konda di bunu buka da de. Te de jei di bunu buka, nöö de ta biibi taa soni o waka bunu da de. A ta heepi de u de ko abi wan möön bunu libi nöunöu kaa, söseei a ta heepi de u de sa feni „di tuutuu libi”. Di libi dë da di teego libi a di njunjun goonliba u Gadu.—1 Tim. 6:19.
Di lobi di u abi da sëmbë ku di fii di u ta fii da de, ta da u taanga fuu du hii soni di u sa du u paaja di bunu buka da de (Luku palaklafu 8)
9. Un soni u ta konda da sëmbë taa o pasa a di ten di ta ko, nöö faandi mbei? (Ezekiëli 33:7, 8)
9 Di lobi di u abi da woto sëmbë ta da u taanga fuu piki de taa abiti möön di hogi goonliba aki o poi kaba a sösö. (Lesi Ezekiëli 33:7, 8.) U ta fii da hii sëmbë, söseei u ta fii da dee famii fuu dee an ta dini Jehovah. Sömëni sëmbë ta libi u de nango nöö, ma de an sabi taa wan gaan fuka dë a pasi ta ko. „Sensi di Masa Gadu mbei goonliba, nöö di lö gaan fuka dë an bi ko pasa wan daka jeti. Nöö söseei tu an o pasa ufö di ten dë dou. Nöö fa a o pasa naandë, nöö an o pasa möön tu” (Mat. 24:21). U kë u hii sëmbë ko sabi andi o pasa a di ten dë. Di fosu soni di o pasa, hën da de o poi dee poipoi keiki, nöö baka di dë di hogi goonliba aki o poi kaba a sösö a di feti u Amagedon (Ako. 16:14, 16; 17:16, 17; 19:11, 19, 20). U kë taa gaan hia sëmbë haika dee soni dee u ta konda da de, nöö de ko dini Jehovah makandi ku u. Ma unfa a dë ku dee famii fuu, ku dee sëmbë dee an ta kë haika u?
10. Faandi mbei a dë fanöudu fuu ta konda da sëmbë andi o pasa a biti möön?
10 Leti kumafa u bi luku a di woto a fesi, nöö a kan taa Jehovah o tjubi dee sëmbë dee o bigi biibi ën, te de si fa di Gaan Babilon o booko kaba a sösö. Ee sö soni o pasa, nöö hën da nöunöu kaa u musu ta konda da sëmbë taa di Gaan Babilon o booko kaba a sösö. Hoi a pakisei taa dee soni dee u ta konda da sëmbë nöunöu, sa dë soni di de o toona mëni a di ten dë. (Luku Ezekiëli 33:33.) Kandë te de toona pakisei dee soni dee u bi konda da de, nöö de o bia ko dini Jehovah makandi ku u ufö a lati poi. Leti kumafa di wakitima u di foto Filipi bi ko ta si soni a wan woto fasi baka ’di goon bi seki’, sö nöö a sa pasa taa so sëmbë di an ta haika u nöunöu sa ko ta si soni woto fasi te de poi di Gaan Babilon kaba a sösö.—Tjab. 16:25-34.
U TA PELEIKI U DI U LOBI JEHOVAH KU DI NË FËËN
11. Unfa u ta lei taa Jehovah fiti u kisi gafa, söseei taa a fiti u kisi hei, ku makiti a mundu? (Akoalimbo 4:11) (Luku dee peentje.)
11 Di lobi di u lobi Jehovah ku di santa në fëën, da di möön fanöudu soni mbei u ta paaja di bunu buka. U ta si di peleiki di u ta peleiki kuma wan fasi fa u sa ta gafa di Gadu di u lobi. (Lesi Akoalimbo 4:11.) Ku hii u hati u ta piki ku dee ëngëli a liba ala, di de taki taa: „Masa Gadu o, i bigi. I nöö waiti tjika fii kisi gafa e. I wanwan fiti fii kisi hei, ku makiti a mundu.” U ta gafa Jehovah, söseei u ta hei ën te u ta lei sëmbë taa hën „mbei hii soni u mundu”. Söseei te u ta lei de taa u musu tei ën u bigi taa a da u libi. Boiti di dë, u ta lei taa Jehovah fiti u kisi makiti, te u ta tei u ten ku u kaakiti, ku dee soni dee u abi u du di peleikiwooko ku hii u hati (Mat. 6:33; Luk. 13:24; Kol. 3:23). Fuu taki ën kumafa a dë, nöö u lo’ u taki soni u di Gadu fuu. U ta kë konda soni u di në fëën da wotowan, söseei u ta kë u de ko sabi unfa Gadu dë tuutuu. Faandi mbei?
U ta lei taa Jehovah fiti u kisi makiti, te u ta tei u ten ku u kaakiti, ku dee soni dee u abi u du di peleikiwooko ku hii u hati (Luku palaklafu 11)
12. Unfa u ta tja gafa ko da di në u Jehovah te u ta du di peleikiwooko?
12 U di u lobi Jehovah mbei u ta du soni u tja gafa ko da di në fëën (Mat. 6:9). Di soni aki kë taki taa woo ta piki sëmbë taa dee hogihati soni di Saatan ta taki u Jehovah da mindimindi soni (Ken. 3:1-5; Jöpu 2:4; Joh. 8:44). Te u ta peleiki, nöö u ta kë konda da hii dee sëmbë dee kë haika u unfa Jehovah dë tuutuu. U ta kë u de ko sabi taa lobi da di möön gaanwan u hii dee fasi dee a abi tuu, söseei taa a ta tii a wan leti fasi. U ta kë u de ko sabi tu taa abiti möön di Könuköndë fëën o puu hii dee soni dee ta fuka u, söseei taa a o mbei u ko ta libi bööböö (Ps. 37:10, 11, 29; 1 Joh. 4:8). Te u ta lei sëmbë soni u Jehovah, nöö u ta tja gafa ko da di në fëën. U ta dë waiwai tu, u di u sabi taa u du andi u bi musu du, u lei taa u da wan Kotoigi u Jehovah. Unfa sö?
13. Faandi mbei u ta tei ën u bigi taa u ta tja di në, Jehovah Kotoigi? (Jesaaja 43:10-12)
13 Jehovah tei u ko dë „Kotoigi” fëën. (Lesi Jesaaja 43:10-12.) Wantu jaa pasa, di Tii Kulupu bi taki taa: „A dë wan gaandi seei te wan sëmbë ta tja di në taa hën da wan u dee Kotoigi u Jehovah. Soni seei an dë di bigi sö.” c Faandi mbei a dë wan gaandi? Buta pakisei a di soni aki. Boo taa de taki taa i du wan soni di an bunu. Wë, i bi o abi wan kotoigi fanöudu u lei taa de ta mindi soni da i, söseei taa i da wan bunuhati sëmbë di na bi o du sö wan soni nöiti. Wë nöö ambë i bi o tei kuma kotoigi? An dë u taki taa i bi o tei wan sëmbë di i ta futoou, söseei di ta tja hënseei a wan bunu fasi, sö taa sëmbë sa biibi ën. U di Jehovah sabi u bumbuu mbei a tei u ko Kotoigi fëën, nöö a ta futoou u. A sabi taa woo konda da woto sëmbë taa hën da di wan kodo tuutuu Gadu. U di u ta tei ën u bigi seei taa u da Kotoigi u Jehovah, mbei u ta konda soni fëën da sëmbë a hiniwan okasi di u feni, söseei u ta lei sëmbë taa dee mindimindi woto di de ta taki fëën an dë sö. Te u ta du sö kaa, nöö hën da u ta du andi di në fuu kë taki. U da Jehovah Kotoigi!—Ps. 83:18; Lom. 10:13-15.
WOO TA PELEIKI U TE KUMA DI KABA DOU
14. Andi u dë setiseti ta wakiti u si?
14 U dë seei setiseti ta wakiti u si andi o pasa a di ten di ta ko! U abi di biibi taa Jehovah o heepi sömëni sëmbë jeti u de sa tei di së fëën ufö di gaan fuka dou. U ta wai seei taa sömëni sëmbë sa bia baka da di goonliba u Saatan a di hogi pisiten dë, nöö dë ko dini Jehovah makandi ku u!—Tjab. 13:48.
15-16. Andi woo ta du go dou, nöö un longi woo du di soni dë?
15 U abi wan gaan wooko u du ufö di ten dë dou. Wa o du di wooko dë nöiti möön. U abi di gaandi u peleiki di bunu buka u di Könuköndë u Gadu da sëmbë a hii së u goonliba. Ma a di seei ten u musu ta konda da de andi o pasa abiti möön. Dee sëmbë musu sabi taa di kaba u di hogi goonliba aki zuntu. Nöö te di kuutudaka dë dou, nöö de o ko fusutan taa a Jehovah Gadu di buka di u bi ta paaja bi kumutu tuutuu.—Eze. 38:23.
16 Wë nöö, andi u dë kabakaba u du? U dë kabakaba u du di peleikiwooko ku hii u hati, u di u abi lobi. U lobi di bunu buka, u lobi libisëmbë, ma di möön gaan soni, hën da u lobi Jehovah ku di në fëën. Fëën mbei woo ta du di peleikiwooko fajafaja go dou u te kuma Jehovah taa: „A tjika!”
KANDA 54 „Di pasi hën disi”
a Di jaa-komakandi u 2023 bi hoi a 7 u tinimu-liba. A bi hoi na Amëëkanköndë a di foto New York, a di zali fuu ka u ta hoi gaan komakandi a di pisiwata de kai Newburgh. Hii di komakandi bi dë u si a JW Broadcasting®. Di fosu pisi dë a di Broadcasting® u ëlufumu-liba u di jaa 2023, nöö di lasiti pisi fëën dë a di u jailiba 2024.
b Luku di woto „Bijbel e kenki sma libi—Mi ben lobi den krin piki di Bijbel e gi”, di dë a di Waktitoren u 1 u bakajailiba u di jaa 2015.