A BI dë ëlufumu-liba u di jaa 1932 a di foto Mëkisikou. Möön leki wan milion sëmbë ta libi naandë. Wan wiki a fesi, hën de bi buta dee fosu faja a di foto, di ta lei un ten dee wagima sa lëi. Ma wan woto soni bi ta hai dee sëmbë pakisei. Dee njunsuma bi dë a di kamian ka de ta tei talanwagi ku dee camera u de, ta wakiti wan apaiti sëmbë. Ambë bi dë di sëmbë dë? Joseph F. Rutherford, di ta tei fesi a di Watch Tower Society. Dee Kotoigi u di köndë seei bi ta wakiti u tei Baaa Rutherford ku wai. A bi o ko u di dii-daka könklësi u de di de bi o hoi.

Di buku The Golden Age bi taki taa: „Di könklësi aki o dë wan u dee apaiti soni di o pasa a di köndë aki”, di o heepi u fuu paaja di bunu buka a di köndë Mëkisikou. Ma a bi dë wan piki könklësi ka 150 sëmbë nöö bi ko. Ma nöö andi bi mbei a bi dë apaiti sö?

Ufö di könklësi dë, gaansë sëmbë an bi jei soni u di tuutuu lei a Mëkisikou jeti. Sensi di jaa 1919, de bi bigi hoi gaan komakandi, ma baka di jaa dë, hën dee kemeente bi ko möön biti. Di de bi mbei wan bëikantoo a di foto Mëkisikou a di jaa 1929, nöö a bi djei kuma soni bi o go möön bunu. Ma soni bi dë di bi ta tapa di wooko jeti. Di ölganisaasi bi piki dee pionili, di de bi ta kai kolporteur a di ten ala, taa de an bi musu ta bai soni nasö ta sei soni te de bi ta peleiki. Di soni aki bi mbei wan kolporteur hati bi boonu sö tee taa a bi go disa di tuutuu lei, hën a hopo u fu hënseei kulupu u lei soni u Bëibel. A di pisiten dë, de bi musu tooka di baaa di bi ta tei fesi a di bëikantoo u di an bi ta tja hënseei bunu. Dee Kotoigi u Mëkisikou dee bi ta hoi deseei a Gadu, bi abi degihati fanöudu seei.

Di Baaa Rutherford bi go a di köndë, nöö a bi da dee Kotoigi dë degihati seei ku tu taki di a bi hoi a di könklësi, söseei ku feifi taki di de bi bia a ladio. A bi dë di fosu pasi di dee baaa bi wooko ku ladio u paaja di bunu buka a di köndë Mëkisikou. Baka di könklësi, hën de bi buta wan woto baaa u tei fesi a di bëikantoo, u seeka di wooko a di köndë. Dee Kotoigi bi ko dë fajafaja seei, nöö u di Jehovah bi feni de bunu, mbei de bi sa du di peleikiwooko go dou.

A di jaa 1933, de bi hoi tu könklësi a di köndë. Wan bi hoi a di foto de kai Veracruz, nöö di wotowan bi hoi a di foto Mëkisikou. Dee baaa ku dee sisa bi ta peleiki seei, nöö soni bi ta waka bunu da de a di peleikiwooko. A di jaa 1931, de bi abi 82 peleikima, ma a di jaa 1941, de bi ko abi teni toon möön hia! Söwan 1000 sëmbë bi ko a di foto Mëkisikou a di könklësi u di jaa 1941.

A di jaa 1943, dee Kotoigi bi bigi kai sëmbë da di könklësi di de bi o hoi a 12 foto u di köndë Mëkisikou.  Di në fëën da „Vrije Natie”. * (Luku di pisi a basu.) De bi ta buta wan gaan böutu a de fesi ku wan a de baka. Sensi di jaa 1936, dee Kotoigi bi ta wooko ku dee soni dë u kai sëmbë u de ko a dee könklësi u de.

Soni bi waka bunu seei a di foto Mëkisikou, di dee Kotoigi bi wooko a sö wan fasi u kai sëmbë. Di kolanti La Nación bi sikifi wan soni u dee Kotoigi dee bi go a di könklësi dë. A bi taki taa: „Di fosu daka, de bi hakisi de u de kai möön hia sëmbë ko. Di debooko fëën, hën de bi dë seei djou a sitaati.” Dee sëmbë u Lomusu keiki an bi wai seei taa soni bi ta waka bunu sö da dee Kotoigi. De bi kë tapa de. Ma dee baaa ku dee sisa an bi fëëë. De bi ta kai sëmbë da di könklësi go dou. Wan woto di de bi sikifi a di kolanti La Nación bi taki taa: „Hii sëmbë u di foto bi si de.” De bi taki taa dee baaa ku dee sisa bi ta „bisi böutu a de sinkii ta kai sëmbë, nöö de bi ta djei ’bëëë ku soni a dendu’”. I bi sa si wan footoo a di woto di de sikifi, di ta lei fa dee baaa ku dee sisa bi dë a dee sitaati u di foto Mëkisikou tjika. De bi sikifi a di footoo basu taa: „De bi dë seei djou a sitaati.”

A di pisiten dë, gaansë u dee Kotoigi bi musu ta mbei taanga möiti seei u de bi sa nango a dee könklësi dee bi ta hoi a di köndë Mëkisikou. Sömëni u dee baaa ku dee sisa bi ta libi a matu köndë, nöö talan pasi ku wagi pasi an bi dë zuntu ku de pisi. Wan kemeente bi sikifi a wan biifi taa: „Di wan kodo soni di dë zuntu ku u aki da wan pei tëlëfön.” Dee sëmbë dee bi kë go a di könklësi bi musu waka a buliki liba nasö de bi musu waka ku futu sömëni daka longi u de bi sa go tei wan talanwagi, di bi o tja de go a di foto ka de bi ta hoi di könklësi.

Gaansë u dee Kotoigi bi pooti, nöö a bi taanga da de u feni möni u go a di könklësi. Di de bi go dou ala, nöö sömëni u de bi dë a Kotoigi pisi, di bi tei de ku wai a de wosu. Wotowan bi ta duumi a Könuköndë zali. Wan daka, söwan 90 baaa ku sisa bi duumi a di bëikantoo, nöö de bi kandi a buku dosu liba. Di Jaarboek bi taki taa dee baaa ku dee sisa bi tei ën u bigi, u di dee dosu bi „suti u duumi möön di kötökötö goon”.

Dee Kotoigi bi wai seei taa de bi sa ko makandi ku dee baaa ku dee sisa u de, nöö de an bi ta pena booko de hedi ku di möiti di de bi mbei u dou a di könklësi möön. Nöunöu, möön leki 850.000 Kotoigi dë a di köndë Mëkisikou, nöö deseei dë ku tangi a hati tu. * (Luku di pisi a basu.) Wan soni di bi sikifi a di Jaarboek u di jaa 1949, bi lei taa hii fa dee baaa ku dee sisa bi musu mbei taanga möiti, tökuseei de bi dë fajafaja a di dini u Jehovah jeti. Te de bi go a wan gaan komakandi, nöö de bi ta taki soni fëën baka wan hii pisiten. Di soni di dee baaa ku dee sisa bi lo’ u hakisi deseei da: „Na un ten wan woto gaan komakandi o dë möön?”​—Awooten soni fuu u Centraal-Amerika.