Di woto di Mateosi sikifi u di ten di de pai Jesosi ku dee soni dee pasa nëën libi a pikimii ten fëën, tooka u dee soni di Lukasi sikifi. Mateosi ku Lukasi bi buta pakisei a tu sëmbë apaiti a dee buku di de sikifi.

Mateosi bi sikifi soni di nama ku Josëfu. A bi konda andi Josëfu bi du, di a ko jei taa Malia bi dë ku bëë. A bi sikifi taa Josëfu bi sunjan fa wan ëngëli bi ko konda dëën unfa Malia bi du dë ku di bëë, söseei unfa Josëfu bi du dee soni di di ëngëli bi piki ën (Mateosi 1:19-25). Boiti di dë, Mateosi ta konda da u unfa wan ëngëli bi piki Josëfu a wan sunjan, faa fusi kumutu a Egepiti köndë ku dee sëmbë fëën, söseei Mateosi ta konda unfa Josëfu bi haika di ëngëli. Baka di dë, Mateosi ta konda da u taa Josëfu bi sunjan taa wan ëngëli bi ko piki ën taa a bi musu toona go a Isaëli, hën Josëfu bi toona go a Isaëli go ta libi a Nazalëti ku dee sëmbë fëën (Mateosi 2:13, 14, 19-23). A dee tu fosu kapitë u di buku di Mateosi sikifi, a ta kai Josëfu në aiti pasi, ma fö pasi nöö a kai Malia në.

Ma a di buku di Lukasi sikifi, a buta pakisei a Malia. A ta konda da u unfa di ëngëli Gabiëli bi ko a Malia. A ta taki u di go di Malia bi go luku wan famii fëën de kai Elizabëti, söseei andi Malia bi taki u gafa Jehovah (Lukasi 1:26-56). Boiti di dë, a ta konda da u andi Simion bi piki Malia u dee sitaafu di Jesosi bi o tja bakaten. Baka di dë, Lukasi ta taki u di go di Jesosi ku dee sëmbë fëën bi go a di Wosu u Gadu, di a bi abi 12 jaa. A di woto aki, Lukasi an taki u dee soni di Josëfu bi taki, ma a ta taki u dee soni dee Malia bi taki. A ta piki u taa di soni bi toobi Malia tee (Lukasi 2:19, 34, 35, 48, 51). A dee tu fosu kapitë u di buku di Lukasi sikifi, a ta kai Malia në 12 pasi, ma 3 pasi nöö a kai Josëfu në. Hën da Mateosi ta möön konda da u andi Josëfu bi ta pakisei, ku andi a bi du. Ma Lukasi ta buta pakisei möön gaanfa a dee soni dee Malia bi ta pakisei, ku dee soni dee bi pasa nëën libi.

Di buku Mateosi ku di buku Lukasi an ta kai dee në u dee seei avo u Jesosi. Mateosi ta kai dee në u dee avo u Josëfu, nöö a ta lei taa Jesosi, di womi mii di Josëfu bi tei kiija, abi di leti u sindo a di könubangi u Dafiti a tata së. Wë faandi mbei u sa taki sö? Wë u di Josëfu bi dë wan bakamii u di womi mii u Könu Dafiti de kai Salumon (Mateosi 1:6, 16). Ma Lukasi ta kai dee në u dee avo u Malia, nöö a ta lei taa Jesosi abi di leti u sindo a di könubangi u Dafiti a mama së, te u luku ën „a libisëmbë fasi” (Loomë 1:3). Wë faandi mbei u sa taki sö? Wë u di Malia bi dë wan bakamii u di womi mii u Könu Dafiti de kai Natan (Lukasi 3:31). Ma nöö faandi mbei Lukasi an sikifi taa Malia da di mujëë mii u Eli? Wë u di sëmbë bi möön lo’ u sikifi dee në u dee womi sëmbë u wan famii. Fëën mbei di Lukasi sikifi taa Josëfu da di womi mii u Eli, nöö sëmbë bi fusutan taa Josëfu bi dë di pai u Eli.​—Lukasi 3:23.

Dee në u dee avo u Jesosi dee sikifi a di buku Mateosi ku di buku Lukasi ta lei taa Jesosi hën da di Mësiasi di Gadu bi o manda ko. Sëmbë bi sabi bumbuu taa Jesosi bi dë wan bakamii u Könu Dafiti. Fëën mbei dee Faliseima ku dee Saduseima an bi sa fia ku ën taa na sö a dë. Dee soni di Mateosi ku Lukasi ta konda u dee avo u Jesosi, ta heepi u fuu ko abi wan möön taanga biibi. Söseei de ta mbei u abi di futoou taa hii dee woto soni dee Gadu paamusi u o pasa tuutuu.