Soni di dee lesima hakisi
Faandi mbei wa musu buta dee buku ku dee woto soni u Jehovah Kotoigi a wan woto website nasö a kamian ka sëmbë ta fan ku wotowan a Internet?
So sëmbë ta pakisei taa u di wa ta sei dee buku fuu, mbei de sa ta buta de a woto website nasö a kamian ka sëmbë sa fan ku wotowan a Internet. Ma di soni aki an bunu seepiseepi, u di a sa tja gaan bookohedi ko da di ölganisaasi. Boiti di dë, wan wëti dë di an ta da sëmbë pasi u de du dee lö soni aki. De ta kai di lö wëti dë Gebruiksvoorwaarden. * (Luku di pisi a basu.) Di wëti aki ta taki gbelingbelin taa sëmbë an musu buta soni kuma peentje, poku, footoo, fëlön, buku nasö woto soni u di website fuu a Internet. Hën da de an musu buta de a woto website nasö a kamian ka sëmbë sa fan ku wotowan a Internet. Faandi mbei dee baaa an kë fuu du di soni aki?
Wëti dë di ta tjubi dee soni a di website fuu, sö taa sëmbë an wooko ku de a wan fasi di an fiti. Di soni aki dë fanöudu seei, u di a sa tapa sëmbë u de an wooko ku dee soni u di website fuu a wan fasi di an fiti. Sëmbë di go disa di tuutuu biibi ku sëmbë di na lobi di wooko di u ta du, ta tei dee buku fuu buta a di u de website, u di de kë u Jehovah Kotoigi ku woto sëmbë go a di website u de. Ma dee sëmbë aki ta buta soni a di website u de, u ganjan sëmbë (Psalöm 26:4; Nöngö 22:5). Woto sëmbë tei soni a di website fuu nasö de ta tei di jw.org logo fuu ta mbei reklame. De ta buta de a soni di de ta sei nasö a app di de ta buta a tëlëfon. Ma u di di ölganisaasi fuu hën abi taki a dee soni aki liba, mbei u sa tja sëmbë go a kuutu te de ta du dee soni aki (Nöngö 27:12). Ma ee u ta disa baaa ku sisa fuu nasö woto sëmbë u de tei soni a di website fuu buta a woto website, nasö u de buta di jw.org logo fuu a soni di de ta sei, nöö a sa pasa taa dee kuutubangi an heepi u te u bi o tja sëmbë go a kuutu.
Hogi sa miti u te u ta download dee buku fuu tei a woto website boiti jw.org. „Di köni saafu di dë u futoou” nöö Jehovah ta tei u lei u soni u Bëibel (Mateosi 24:45, NW). Ku dee website aki nöö di „saafu” ta wooko u lei u soni u Bëibel: www.pr418.com, tv.pr418.com, ku wol.pr418.com. Söseei dee dii app aki nöö dee baaa mbei da u fuu sa buta a tëlëfon nasö a tablet: JW Language®, JW Library®, ku JW Library Sign Language®. Wa o feni na wan reklame nasö soni u di goonliba u Saatan a dee website ku dee app aki. Ma ee u bi o download dee buku fuu tei a woto website nasö a woto app, nöö a sa pasa taa sëmbë tooka soni a de.—Psalöm 18:26; 19:8.
Boiti di dë, ee u buta soni u dee website fuu a kamian ka sëmbë sa fan ku deseei a Internet, nöö sëmbë di go disa di tuutuu biibi ku woto sëmbë, sa feni pasi u de taki hogi u di ölganisaasi u Jehovah. So u dee baaa ku dee sisa fuu ta buja ku dee lö sëmbë aki a Internet, nöö di soni dë ta poi Jehovah në. Na a di lö fasi dë woo sa heepi wan sëmbë faa tooka di fasi fa a ta pakisei, faa sa ko fusutan di tuutuu lei (1 Timoteo 6:3-5; 2 Timoteo 2:23-25). Söseei so sëmbë ta mbei website nasö soni ka sëmbë sa fan ku wotowan a Internet, faa djei kuma di ölganisaasi hën mbei de nasö wan u dee baaa u Tii Kulupu. Ma na sö a dë. Na wan u dee baaa u di Tii Kulupu abi fu hënseei website nasö wan soni ka sëmbë sa fan ku ën a Internet.
Te u ta da sëmbë taanga u de go a jw.org, nöö u ta heepi paaja di „bunu buka” (Mateosi 24:14). Dee baaa ta mbei dee website fuu ku dee app fuu ko möön bunu. U kë u hii sëmbë feni wini u de. Fëën mbei u sa manda wan buku fuu a e-mail da sëmbë nasö u sa manda wan link u wan soni u di website fuu da de. A sö wan fasi u ta manda sëmbë go a dee sëmbë dee Jehovah ta tei u lei u soni, hën da a „di köni saafu di dë u futoou”.
^ pal. 1 A basu u di website fuu jw.org, i sa feni di pisi „Gebruiksvoorwaarden”. Di pisi aki ta tja i go a wan kamian ka i sa feni soni di ta taki andi wa musu du ku dee soni dee dë a di website fuu.