U DI soni ta ko möön taanga a dee „lasiti daka” u di goonliba aki, mbei u musu abi pasensi gaanfa seei (2 Timoteo 3:1-5). Sömëni sëmbë an abi pasensi. De lo’ u pakisei deseei nöö, de lo’ u buja, söseei de an ta duwengi deseei. Fëën mbei u musu hakisi useei dee soni aki: ’Mi ko dë kuma dee sëmbë dee an abi pasensi a di ten aki ö? Na un ten u sa taki taa wan sëmbë abi pasensi tuutuu? Andi mi sa du u mi ko abi pasensi?’

Te di Bëibel ta taki u „pasensi”, nöö andi a kë taki? Wë pasensi an kë taki nöö taa i musu ta hoi dou te i dë ku wan fuka. Ma a kë taki taa i ta hoi dou ku wan soni a pakisei. Hën da i ta hoi taa soni o waka möön bunu bakaten. Wan sëmbë di abi pasensi an ta pakisei hënseei nöö, ma a ta booko hën hedi ku di fasi fa wotowan ta fii, aluwasi ee de mbei hati fëën boonu, nasö aluwasi de an libi bunu ku ën. Sö wan sëmbë ta hoi taa hën ku dee sëmbë dë sa ko dë mati baka. Fëën mbei u ta fusutan te di Bëibel ta taki taa te i lobi wan sëmbë ufö i sa abi pasensi ku ën. * (Luku di pisi a basu.) (1 Kolenti 13:4) Pasensi da wan u dee fasi di di santa jeje u Gadu ta da sëmbë (Galasia 5:22, 23). Fëën mbei andi u musu du fuu sa ko abi pasensi tuutuu?

Ee u kë ko abi pasensi, nöö u musu ta hakisi Jehovah faa heepi u ku di santa jeje fëën, di a ta da dee sëmbë dee ta futoou ën (Lukasi 11:13). Di kaakiti u di jeje u Gadu taanga gaanfa seei, ma tökuseei useei musu du soni a wan fasi di ta kai ku dee begi fuu (Psalöm 86:10, 11). Di soni aki kë taki taa hiniwan daka u musu ta mbei taanga möiti fuu ta lei taa u abi pasensi, söseei u musu ta mbei möiti faa ko dë wan fasi di u abi seei vö. Ma na hii juu woo sa ta du di soni aki. Ma andi sa heepi u?

U musu ta lei soni u Jesosi, nöö u musu ta mbei möiti fuu djeesi ën. Di apösutu Paulosu bi taki taa u musu ko dë „njunjun sëmbë”, nöö a bi taki tu taa u musu ko abi pasensi. A di pisi dë seei a bi da u taanga fuu du wan soni. A bi taki taa: „Be di kötöhati u Keesitu tii di hati fuunu” (Kolosën 3:10, 12, 15, NW). Ee u kë ta du di soni aki, nöö u musu ta waka a Jesosi baka, söseei u musu abi di futoou taa Gadu o seeka soni a di soifi ten. Ee u ta biibi di soni aki, nöö woo ta hoi pasensi, aluwasi andi ta pasa.​—Johanisi 14:27; 16:33.

Hii u tuu kë u di njunjun goonliba ko hesihesi seei. Ma u ta lei u ko abi möön pasensi, te u ta pakisei di fasi fa Jehovah bi abi pasensi ku u. Di Bëibel ta piki u taa: ’Wan musu pakisei taa fa Jehovah sai dë, nöö a ta buuja poi. Nönö, kwetikweti. Ma pasensi nöö a ta hoi da libisëmbë sö. Fa i si a sai dë, an kë fu na wan kodo sëmbë musu lasi kaba a sösö. Ma a kë u hii sëmbë musu bia de libi ko nëën, fu de sa kumutu a di sitaafu di u taki dë basu’ (2 Petuisi 3:9). Fëën mbei te u ta pakisei unfa Jehovah abi pasensi ku u tjika, nöö a o heepi u fu useei ko ta abi pasensi ku wotowan  (Loomë 2:4). Na un ten a dë fanöudu fuu lei taa u abi pasensi?

Sömëni soni ta pasa a di libi fuu ka u musu lei taa u abi pasensi. Boo taa ee u kë taki wan fanöudu soni te tu sëmbë ta fan, nöö a dë fanöudu fuu lei taa u abi pasensi, nöö u wakiti te de kaba (Jakobosi 1:19). U musu lei taa u abi pasensi tu, te wan sëmbë mbei hati fuu boonu. Ka fuu biinga du wan soni söndö fuu pakisei, nöö a bi o bunu fuu hoi a pakisei taa Jehovah ku Jesosi seei ta lei taa de abi pasensi ku u te u ta mbei föutu. De an ta buta pakisei a dee pikipiki föutu dee u ta mbei. Ma de ta buta pakisei a dee bunu fasi dee u abi, nöö de ta hoi pasensi da u u te u ko sa’ u du soni möön bunu.​—1 Timoteo 1:16; 1 Petuisi 3:12.

U musu lei taa u abi pasensi tu, te wan sëmbë ta piki u taa u taki wan soni nasö taa u du wan soni di an bunu. Kandë di fosu soni di u bi o kë du, hën da u bi o kë fia, nasö hati fuu bi o kë boonu. Ma di Wöutu u Gadu ta piki u fuu du soni woto fasi. A ta piki u taa: „A möön bunu u wan sëmbë abi pasensi, ka faa abi gaanfasi. Ja musu dë wan sëmbë di hati fii ta boonu hesi, biga don sëmbë wanwan hati ta boonu hesi” (Peleikima 7:8, 9). Fëën mbei hii fa wan sëmbë sa ta taki soni fuu di an dë sö tuutuu, tökuseei u musu abi pasensi, nöö u musu pakisei bunu ufö u du wan soni. Di soni aki Jesosi bi du, di de bi mindi soni dëën.​—Mateosi 11:19.

Mama ku tata musu ta möön ta lei taa de abi pasensi te de musu heepi dee mii u de u de tooka di fasi fa de ta tja deseei, söseei u de an du dee soni di di zöndu sinkii u de ta kë. Boo luku di woto u wan baaa de kai Mattias di ta wooko a di Bëtëli di dë a Scandinavia. Di Mattias bi dë wan njönku kijoo, nöö dee siköö mati fëën bi ta mbei ën fa u di biibi fëën hedi. Bigibigi, hën mama ku hën tata an bi sabi taa sö soni bi ta miti ën. Ma bakaten de bi bigi ta si taa an bi ta kaba biibi dee soni dee a bi ta lei möön. Di tata u Mattias, de kai Gillis, ta taki taa hën ku hën mujëë bi musu lei taa de abi pasensi ku di womi mii u de. Mattias bi ta hakisi de wantu soni. A bi ta hakisi de taa: „Ambë da Gadu? Di Bëibel da di Wöutu u Gadu tuutuu ö? Unfa u du sabi taa Gadu hën kë fuu libi sö?” A bi ta hakisi hën tata tu taa: „Faandi mbei un musu kuutu mi ee ma ta biibi di wan seei soni di un ta biibi?”

 Gillis bi taki taa: „So juu ku hatiboonu di womi mii fuu bi ta hakisi u soni. Na taa ku mi nasö ku hën mama a bi abi ën, ma ku di tuutuu lei. A bi ta fii taa di tuutuu lei bi ta mbei di libi ta taanga dëën.” Unfa Gillis bi heepi di womi mii fëën? Gillis ta taki go dou taa: „Mi ku di womi mii u mi bi ta sindo sömëni juu longi ta fan.” Möön gaanfa Gillis bi ta haika, nöö a bi ta hakisi ën soni, sö taa a bi sa ko fusutan unfa a bi ta fii, söseei unfa a bi ta pakisei. So juu Gillis bi ta konda soni da di womi mii fëën, nöö a ta piki ën faa go pakisei ën luku, nöö baka wantu daka, nöö de bi ta toona taki fëën. Ma so juu, Gillis seei bi ta taki taa a musu go pakisei di soni di di womi mii fëën bi taki dëën. U di de bi ta fan hii juu, mbei Mattias bi bigi ko ta fusutan di soni mbei Jesosi ko paka di lusupaima da u, söseei taa Jehovah lobi u, nöö hën abi di leti u tii. Gillis ta taki taa: „A bi tei ten, nöö so juu a bi ta taanga seei, ma pikipiki a bi bigi ko ta lobi Jehovah. Mi ku mi mujëë ta wai seei taa u bi lei taa u abi pasensi ku di womi mii fuu, so taa u bi sa heepi ën u dee lei u Jehovah dou hën hati a dee njönku jaa fëën.”

Hii fa Gillis ku hën mujëë bi ta heepi di womi mii u de ku pasensi, tökuseei de bi abi di futoou taa Jehovah bi o heepi de. Gillis ta taki taa: „Mi bi lo’ u piki Mattias taa u di u lobi ën gaanfa, mbei mi ku hën mama bi ta begi dëën. U ta begi dëën fajafaja u Jehovah heepi ën faa ko fusutan dee lei fëën.” Dee sëmbë aki ta wai seei taa de bi abi pasensi ku di womi mii u de, söseei taa de an bi ko wei!

U musu lei taa u abi pasensi tu te u ta luku dee sëmbë fuu, nasö dee mati fuu di ko suwaki u wan longi pisiten. Luku di woto u Ellen di ta libi a Scandinavia. * (Luku di pisi a basu.)

Söwan aiti jaa pasa, buuu bi naki Ellen manu tu pasi. Di soni dë bi mbei di töönzön fëën a bi ta wooko bunu sö möön. Di soni dë mbei a bi lasi di fii di ta mbei sëmbë ta dë waiwai, söseei di fii di ta mbei sëmbë tjali, nöö an bi sa ta fii da sëmbë tu. Di soni aki ta taanga da Ellen seei. A ta taki taa: „Mi bi musu lei taa mi abi pasensi, söseei mi bi musu ta begi sömëni pasi.” A ta taki tu taa: „Di tëkisi di bi ta da mi kötöhati seei, hën da Filipi 4:13, di ta taki taa: ’Mi sa du hii soni, u di di sëmbë di ta heepi mi ta da mi kaakiti.’” Jehovah ta heepi Ellen ta dëën kaakiti, nöö di soni dë ta mbei a sa ta abi pasensi go dou.​—Psalöm 62:5, 6.

Di möön bunu sëmbë di u sa djeesi a di fasi fa a ta lei taa a abi pasensi, hën da Jehovah (2 Petuisi 3:15). U ta lesi a di Bëibel unfa Jehovah bi lei taa a abi pasensi (Nehemia 9:30; Jesaaja 30:18). I ta mëni di woto jeti di ta taki unfa Jehovah bi piki Abahamu di a bi hakisi ën ee andi a o du ku Sodom ö? Jehovah da Abahamu pasi faa fan. Ku pasensi a haika hiniwan u dee soni dee a bi hakisi ën, nöö a bi lei taa a bi ta haika di soni di Abahamu bi taki, nöö hën a lei ën taa a sa dë seiki taa an o du soni ku Sodom ee teni bunuhati sëmbë nöö dë a di foto (Kenesesi 18:22-33). Hii juu Jehovah ta haika sëmbë ku pasensi, nöö nöiti a ta du soni a wan fasi di an fiti!

Pasensi da wan u dee fasi di hii Keesitu sëmbë musu ko abi. Ee u ta mbei hii möiti fuu lei taa u abi pasensi, nöö a o tja gafa ko da di Tata fuu Jehovah, di ta booko hën hedi ku u, söseei di abi pasensi ku u. Nöö woo „ta djeesi dee otowan nöömö, dee bi tai hati ta biibi tefa de feni dee soni dee Gadu bi paamusi de”.​—Hebelejën 6:10-12.