DI JAA di pasa dë, dusudusu baaa a hii së u goonliba bi toon dinai nasö gaanwomi a di kemeente u de. Ee i da wan u dee baaa aki, nöö u dë seiki taa i ta wai taa i sa dini Jehovah ku dee baaa ku dee sisa fii a di lö fasi aki.

Ma a sa dë taa i ta booko i hedi pikisö tu ku di fasi fa i musu du di wooko fii. Wan njönku gaanwomi de kai Jason taki taa: „Di mi bi toon wan gaanwomi, nöö mi bi ta si kuma ma bi o sa tja hii dee faantiwöutu u mi.” Mosesi ku Jelemia seei bi ta si kuma de an bi o sa du dee wooko di Jehovah bi da de (Ëkisodesi 4:10; Jelemia 1:6). Ee iseei ta fii sö tu, nöö andi i sa du fu ja ta fii sö möön, söseei fii sa nango a fesi nöömö? Wë i sa lei sömëni soni seei a di woto u Timoteo.​—Tjabukama 16:1-3.

Timoteo bi sa abi 20 jaa di a bi bigi waka a peipei köndë ku apösutu Paulosu. Di de hakisi ën faa du di wooko aki, nöö kandë a bi ta si kuma an bi o sa lei woto sëmbë soni, söseei taa an bi o sa da wotowan lai, u di a bi njönku jeti (1 Timoteo 4:11, 12; 2 Timoteo 1:1, 2, 7). Ma a bi ta mbei möiti go dou. Teni jaa baka di dë, hën Paulosu bi piki dee baaa ku dee sisa u Filipi taa: „Fa mi dë aki mi a’ di mëni taa abiti möön nöö Masa Jesosi o jabi pasi da mi u mi manda Timoteo ko haika unu.” Faandi mbei Paulosu bi taki di soni aki? A bi piki de taa: „Ma abi sëmbë aki kuma hën möönsö di ta mëni unu ku hii ën hati.”​—Filipi 2:19, 20.

Faandi mbei u sa taki taa Timoteo da wan sëmbë di dee gaanwomi sa djeesi? Luku dee sikisi soni aki.

1. A bi ta booko hën hedi ku sëmbë tuutuu. Paulosu bi piki dee baaa ku dee sisa u Filipi taa Timoteo bi o ta booko hën hedi ku de tuutuu (Filipi 2:20). Timoteo bi kë u dee baaa ku dee sisa fëën ko dë gaan mati ku Jehovah, nöö a bi dë kabakaba u tei hën ten ku hën kaakiti u heepi de.

Wan baaa de kai William, di dë gaanwomi 20 jaa longi kaa, lo’ u piki dee baaa te de toon gaanwomi taa: „Un musu lei dee baaa ku dee sisa fuunu taa un lobi de. Un musu ta möön booko unu hedi ku de möön fa un ta booko unu hedi ku dee woto wooko dee un abi.” Ja musu dë kuma wan sëmbë di ta lëi wan besi, di ta biinga faa dou a juu a dee kamian ka a musu dou, ma an ta tapa a pasi u sëmbë sa subi a di besi.

2. A bi buta di dini di a ta dini Jehovah a di fosu kamian. Paulosu bi taki taa Timoteo an bi dë kuma dee sëmbë dee ’ta biinga ku deseei soni nöö, dee aan toobi ku soni u Jesosi Keesitu wan bëtë’ (Filipi 2:21). Paulosu bi si taa dee baaa bi ta booko de hedi ku di u deseei soni gaanfa poi. So juu de bi ta du u deseei soni ufö de du dee soni dee nama ku di dini di de bi ta dini Jehovah. Ma Timoteo an bi dë sö! Di de bi hakisi ën faa du möön soni da Jehovah, hën a bi piki kumafa Jesaaja bi piki, di a bi taki taa: „Luku mi aki! Manda mi.”​—Jesaaja 6:8.

Andi sa heepi i fu an hebi da i fii sa ta du dee u fii seei soni ku dee u di kemeente a di wan seei ten? Di fosu soni di i musu du, hën da i musu tei di lai u Paulosu. A bi taki taa: „Ko sabi unfa u wegi soni te un kaba luku ee undi da di möön [fanöudu] wan fuun tei” (Filipi 1:10). Buta di dini di i ta dini Jehovah a di fosu kamian. Di u tu soni di i musu du, hën da i musu ta köni ku soni di sa tei di ten ku di kaakiti fii pasa maaka. Paulosu bi piki Timoteo taa: „I musu kule da dee hangi dee ta ko a un dee njönku sëmbë hati e, dee na bunu u du. . . . Nöö haika dee soni dee fii musu ta kule a de baka: leti libi, biibi a Gadu, lobi, ku kötöhati.”​—2 Timoteo 2:22.

3. A bi ta wooko taanga da Jehovah. Paulosu bi taki taa: „Fa mi ku [Timoteo] ta wooko makandi ta paaja di buka u Masa Jesosi, nöö a dë leti kuma wan mii ta heepi hën tata a wooko” (Filipi 2:22). Timoteo an bi malëngë. A bi ta wooko taanga ku Paulosu, nöö di soni aki bi mbei de ko dë gaan mati seei.

 Sömëni wooko dë di i sa du a di ölganisaasi u Jehovah a di ten aki. Dee wooko aki o da i piizii seei, nöö de o heepi i fii ku dee baaa ku dee sisa fii ko dë gaan mati. Fëën mbei i musu ta mbei möiti fii ta abi hia soni ta du „a di wooko u Masa”.​—1 Kolenti 15:58.

4. A bi ta du dee soni dee a bi ta lei. Paulosu bi piki Timoteo a wan biifi di a bi sikifi dëën taa: „I sabi hii fa mi ta lei sëmbë, i sabi unfa mi ta libi tu. I saandi mi kë musu pasa a bakaten fa i si mi ta wooko aki. I sabi fa mi ta biibi Gadu tjika, womi. I sabi fa mi ta hoi pasensi ku sëmbë. I sabi fa mi ta lobi Gadu ku libisëmbë tuu. Womi, i sabi fa mi bi hoi dou a hii dee soni dee pasa ku mi” (2 Timoteo 3:10). Timoteo bi ta du dee soni dee a bi ta lei. Fëën mbei a bi ko abi möön faantiwöutu.​—1 Kolenti 4:17.

Wan gaanwomi dë di bi o sa heepi i fii sa du di diniwooko fii möön bunu ö? Tom, di dë wan gaanwomi sömëni jaa kaa, ta mëni jeti taa wan gaanwomi bi ta booko hën hedi ku ën, hën a bi lei ën unfa a sa du di diniwooko fëën möön bunu. Tom taki taa: „Mi bi lo’ u hakisi ën soni, nöö mi bi ta du dee soni dee a bi ta piki mi tu. Di soni aki heepi mi u ma ta si kuma ma o sa du dee wooko u mi.”

5. A bi ta lei soni go dou. Paulosu bi piki Timoteo taa: „I musu ta biinga ku i seei fii libi kumafa Gadu kë a hii futu” (1 Timoteo 4:7). Hii fa wan sëmbë di ta fia kule abi wan sëmbë di ta lei ën unfa a musu ta du soni, tökuseei hënseei musu ta mbei möiti tu. Paulosu bi piki Timoteo taa: „I musu ta lesi dee wöutu u Masa Gaangadu da dee sëmbë nöömö. I musu ta konda di buka fëën da de, ta leti de finifini a dee soni u Masa Gaangadu. . . . Dee soni mi ta fan ku i aki, womi, i musu ta du de ku hii i hati nango nöömö, nöö sëmbë o si taa i nango fesi seei.”​—1 Timoteo 4:13-15.

Iseei musu ta mbei möiti fii ko sa’ u du dee wooko fii möön bunu. I musu ta lei soni u Bëibel bumbuu, nöö i musu ta mbei möiti fii ko sabi andi da dee njunjun fasi fa dee baaa kë fuu du soni. Ja musu ta futoou iseei pasa maaka. Te joo du wan soni, nöö an bi o dë wan bunu soni u pakisei taa ja a’ fu go öndösuku soni u di i sabi sömëni soni kaa. I musu dë kuma Timoteo, di bi ’ta mbei möiti nöömö u libi fëën ku di lei u Gadu di a bi ta lei sëmbë, sa dë a tatai liba’.​—1 Timoteo 4:16.

6. A bi ta biibi taa di santa jeje u Jehovah bi o heepi ën. Paulosu bi piki Timoteo taa: „Di gaan bumbuu soni di Masa Gadu futoou i te a butëën a i maun naandë, womi, i musu köni ku ën gaanfa e. I musu ta tjubi ën ku di heepi u di [santa jeje] u Gadu di i si ta libi a u hati aki, be an kaba a sösö” (2 Timoteo 1:14). Timoteo bi musu ta biibi taa di santa jeje u Gadu bi o heepi ën.

Donald da wan baaa di dë gaanwomi sömëni jaa longi kaa. A bi taki taa: „Gaanwomi ku dinai musu ta si di dë di de ku Jehovah dë mati, kuma wan gaan dii soni. Te de ta du di soni aki, nöö de o ta ’feni kaakiti’ u de sa ta du dee wooko u de. Te de ta begi Gadu faa da de di santa jeje fëën, söseei te de ta mbei möiti u de ko abi dee fasi di di santa jeje u Gadu ta da sëmbë, nöö de o sa heepi dee baaa ku dee sisa u de a wan bunu fasi.”​—Psalöm 84:7; 1 Petuisi 4:11.

A ta da u piizii seei te u ta si taa baaa dë di ta toon gaanwomi ku dinai, nöö de ta mbei möiti u go a fesi a di dini di de ta dini Jehovah, leti kumafa i ta du ën. Jason, di u bi taki soni fëën kaa, bi taki taa: „Mi lei te a hia soni fa mi ko dë gaanwomi aki, nöö ma ta si kuma ma o sa tja di faantiwöutu u mi möön. Nöunöu mi ta wai seei taa mi abi di faantiwöutu aki, nöö mi ta si ën kuma wan gaandi seei!”

Joo mbei möiti go dou a di dini di i ta dini Jehovah u? Ee i ta djeesi Timoteo, nöö iseei o sa heepi dee baaa ku dee sisa fii a wan bunu fasi.