Dee sëmbë dee lo’ u da wotowan soni o ta dë waiwai
„Dee sëmbë ta da sëmbë soni, de dë waiwai.”—TJABUKAMA 20:35.
KANDA: 76, 110
1. Andi ta lei taa Jehovah lo’ u da sëmbë soni?
WAN ten bi dë ka Jehovah bi dë hën wanwan. Nöö hën a mbei woto soni di abi fusutan buta a liba ala ku goonliba aki. Jehovah, „di piizii Gadu” lo’ u da sëmbë bumbuu soni (1 Timoteo 1:11; Jakobosi 1:17). Nöö u di Jehovah kë taa u musu ta dë waiwai tu, mbei a ta lei u taa u musu lo’ u da wotowan soni.—Loomë 1:20.
2, 3. (a) Faandi mbei u ta dë waiwai te u ta da sëmbë soni? (b) Andi woo luku a di woto aki?
2 Gadu mbei libisëmbë kumafa hënseei dë (Kenesesi 1:27). Di soni aki kë taki taa Jehovah mbei u ku dee fasi di hënseei abi. Ee u kë ta dë waiwai, söseei ee u kë u Jehovah mbei soni waka bunu da u, nöö u musu ta djeesi ën. U musu ta booko u hedi ku wotowan, söseei u musu dë wan sëmbë di lo’ u da wotowan soni (Filipi 2:3, 4; Jakobosi 1:5). Wë faandi mbei u musu ta du dee soni aki? Wë, u di Jehovah mbei u fuu ta du dee soni aki. Aluwasi u dë zöndu libisëmbë, tökuseei u sa djeesi Jehovah, u di woo ta da sëmbë soni tu.
3 Woo taki u woto di sikifi a di Bëibel, di ta lei u taa u musu ta da sëmbë soni. Woo si faandi mbei Jehovah ta wai te u ta da sëmbë soni. Söseei woo luku unfa di lo’ di u lo’ u da sëmbë soni ta heepi u fuu du di wooko di Jehovah da u, nöö woo luku faandi mbei woo ta dë waiwai te u ta da sëmbë soni. Boiti di dë, woo luku faandi mbei u musu ta da sëmbë soni hii juu.
JEHOVAH TA WAI TE U TA DA SËMBË SONI
4, 5. Unfa Jehovah ku Jesosi lei taa de lo’ u da sëmbë soni, nöö faandi mbei u musu ta djeesi de?
4 Jehovah kë fuu ta djeesi ën. Fëën mbei a ta wai te u ta da sëmbë soni (Efeise 5:1). Jehovah kë u libisëmbë ta dë waiwai tu. U ta si di soni aki te u luku di fasi fa a mbei u, di fasi fa a mbei di goonliba, ku dee soni dee a mbei buta da u a goonliba aki (Psalöm 104:24; 139:13-16). U sa taki taa u ta gafa Jehovah te u ta du hii soni u wotowan sa ta dë waiwai.
5 Boiti di dë, u ta djeesi Jesosi di lei u a di möön bunu fasi unfa wan sëmbë sa ta da wotowan soni. A bi taki taa: „Fa i si Mi di ko dë Libisëmbë Mii ko a goonliba aki, nöö ma ko fu sëmbë musu dini mi e, ma mi ko u miseei musu dini sëmbë. Mi ko u mi lasi mi libi seei paka paima fu sömëni hia sëmbë sa ko bunu ku Gadu” (Mateosi 20:28). Söseei apösutu Paulosu bi da dee Keesitu sëmbë taanga. A bi piki de taa: „Fasi fuunu musu djeesi di u Masa Jesosi Keesitu e . . . A bazia ko a goonliba aki ko dë kuma wan futuboi u libisëmbë” (Filipi 2:5, 7). U sa hakisi useei di soni aki: ’Andi mi musu du u mi ko ta djeesi Jesosi möön gaanfa?’—Lesi 1 Petuisi 2:21.
6. Andi Jesosi bi lei u a di woto di a bi konda u di Samalia womi? (Luku di peentje a bigi u di woto.)
6 Jehovah ta wai te u ta djeesi hën ku Jesosi. U ta djeesi de te u ta booko u hedi ku wotowan, söseei te u ta suku fasi u heepi de. Jesosi bi konda wan woto u wan Samalia womi u lei fa di soni aki dë fanöudu tjika. (Lesi Lukasi 10:29-37.) A bi piki dee bakama fëën taa de musu ta heepi wotowan, aluwasi un pei sëmbë de dë nasö aluwasi un pei köndë sëmbë de dë. I ta mëni jeti faandi mbei Jesosi bi konda di woto aki ö? Wë a bi konda di woto aki, u di wan Dju womi bi hakisi ën taa: „Ambë da di otowan u mi di mi musu lobi kuma miseei?” Di soni di Jesosi bi piki ën ta lei u taa ee u kë u Jehovah wai, nöö u musu lo’ u heepi sëmbë a soni kuma di Samalia womi.
7. Unfa u ta lei taa di fasi fa Jehovah ta du soni, da di möön bunu fasi u du soni?
7 Di soni di pasa a di djai u Eden ta lei u wan woto soni di musu mbei u kë ta da wotowan soni. Saatan bi taki taa soni bi o waka möön bunu da Adam ku Eva ee de bi pasa Jehovah buka, söseei ee de bi pakisei deseei nöö. Eva bi pakisei hënseei nöö, nöö a bi kë ko dë kuma Gadu. Adam bi pakisei hënseei nöö, nöö a bi kë du soni di bi o kai ku Eva, ka faa du soni di bi o kai ku Gadu (Kenesesi 3:4-6). Ma soni an bi waka bunu seepiseepi. U ta fusutan gbelingbelin taa na wan sëmbë sa ta dë waiwai ee a ta pakisei hënseei nöö. Ma te wa ta pakisei useei nöö, söseei te u lo’ u da sëmbë soni, nöö u ta lei taa di fasi fa Jehovah ta du soni, da di möön bunu fasi u du soni.
DU DI WOOKO DI GADU DA U FUU DU
8. Faandi mbei a bi musu u dë taa Adam ku Eva bi buta pakisei a wotowan?
8 Hii fa Adam ku Eva wanwan nöö bi dë a di djai u Eden, tökuseei a bi musu u dë taa de bi buta pakisei a wotowan. Faandi mbei u taki sö? Wë u di Jehovah bi da de wooko u de du. A bi piki de u de pai mii fuu di goonliba, söseei u de mbei di goonliba ko toon wan paladëisi (Kenesesi 1:28). A bi musu u dë taa Adam ku Eva bi kë u dee mii u de bi musu ta dë waiwai, leti kumafa Jehovah bi kë u hii sëmbë musu ta dë waiwai. Jehovah bi kë taa hii dee bakamii u Adam ku Eva wooko makandi u mbei di goonliba ko toon wan paladëisi. A bi o dë wan gaan wooko seei!
9. Faandi mbei libisëmbë o ta piizii seei te de o ta mbei di goonliba ko toon wan paladëisi?
9 A di ten di ta ko, sëmbë di an o abi zöndu möön, seei o wooko makandi ku Jehovah u mbei di goonliba ko toon wan paladëisi, söseei u mbei soni ko ta waka a goonliba kumafa Jehovah kë. A di lö fasi aki, de o sa feni di böö u Gadu (Hebelejën 4:11). Pakisei fa di wooko aki o ta da de piizii! Jehovah o mbei soni waka bunu da de gaanfa seei, u di de an ta pakisei deseei nöö, söseei u di de ta booko de hedi ku wotowan.
10, 11. Andi o heepi u fuu sa peleiki da sëmbë, söseei fuu sa heepi de u de ko dë bakama u Keesitu?
10 A di ten aki, Jehovah da u wan apaiti wooko fuu du. A kë fuu peleiki, söseei a kë fuu heepi sëmbë be de ko dë bakama u Jesosi.
Ee u kë du di wooko aki, nöö u musu ta booko u hedi ku wotowan. Hën da woo sa du di wooko aki ee u lobi Jehovah, söseei ee u lobi woto sëmbë.11 Paulosu bi taki taa hën ku dee woto fesiten Keesitu sëmbë da sëmbë di ta ’wooko makandi ku Gadu’, u di de bi ta peleiki, söseei u di de bi ta lei sëmbë soni u di tuutuu lei (1 Kolenti 3:6, 9). A di ten aki, useei sa ko dë sëmbë di ta ’wooko makandi ku Gadu’, te u ta tei u ten, u kaakiti, ku dee soni dee u abi, u du di peleikiwooko di Gadu piki u fuu du. U ta tei di soni aki u bigi seei!
Te u ta heepi sëmbë u de ko sabi di tuutuu lei, nöö woo ta dë waiwai (Luku palaklafu 12)
12, 13. Un wini i bi o taa wan sëmbë ta feni te a ta heepi sëmbë u de ko dë bakama u Keesitu?
12 Te u ta tei u ten ku u kaakiti u peleiki, söseei u lei sëmbë soni, nöö di soni dë ta mbei u ta dë waiwai. Di soni aki sömëni baaa ku sömëni sisa di ta lei sëmbë soni u Bëibel, taki. U ta wai seei te u ta si fa dee sëmbë dee u ta lei soni u Bëibel ta wai te de ko fusutan dee soni di di Bëibel ta lei u, te de ko ta biibi dee soni dë, te de ta tooka soni a de libi, söseei te de bigi ta konda dee soni di de ta lei da wotowan. Jesosi seei bi wai di dee 70 sëmbë di a bi manda go peleiki, bi ’toona ko nëën waiwai’, u di soni bi waka bunu da de a di peleikiwooko.—Lukasi 10:17-21.
13 Dee baaa ku dee sisa fuu a hii së u goonliba ta wai seei te de ta si fa di Bëibel ta heepi sëmbë u de ko abi wan möön bunu libi. Wan njönku sisa di an tööu jeti, de kai Anna bi kë dini Jehovah möön gaanfa. * (Luku di pisi a basu.) Fëën mbei a bi foloisi go libi a wan u dee köndë u Europa ka de abi möön peleikima fanöudu. A bi taki taa: „A di kamian aki, mi ta feni sömëni sëmbë u lei soni u Bëibel, nöö mi lobi di soni dë gaanfa seei. Di dini di mi ta dini Jehovah ta mbei mi ta dë waiwai. Te mi dou a wosu, nöö ma ta abi ten u sindo ta booko mi hedi ku soni. Mi ta pakisei unfa mi sa heepi dee sëmbë dee mi ta lei soni u Bëibel ku dee bookohedi u de. Mi ta pakisei fa mi sa da de taanga, söseei andi mi sa du u heepi de. Nöunöu mi ko dë seiki taa ’dee sëmbë ta da sëmbë soni, de dë waiwai möön leki dee sëmbë ta feni.’”—Tjabukama 20:35.
Aluwasi sëmbë an kë haika u te u ta peleiki, tökuseei u ta dë waiwai te u ta paaja di buka u Gadu
14. Andi sa heepi i fii sa ta du di peleikiwooko waiwai go dou, aluwasi sëmbë an ta kë haika i?
14 Aluwasi sëmbë an ta haika u te u ta peleiki da de, tökuseei u sa ta dë waiwai, u di u ta da de di okasi u de jei di bunu buka. Jehovah kë fuu du di seei soni di a bi piki Ezekiëli faa du. A bi piki ën taa: „Aluwasi de haika i, nasö de an kë haika i, tökuseei i musu piki de di soni di mi piki i fii piki de” (Ezekiëli 2:7; Jesaaja 43:10). Aluwasi sëmbë an kë haika u te u ta peleiki da de, tökuseei Jehovah ta si dee möiti dee u ta mbei. (Lesi Hebelejën 6:10.) Wan baaa bi taki u di peleiki di a ta peleiki. A bi taki taa: „U ta paandi, u ta munjan, söseei u ta begi Jehovah faa mbei sëmbë kë ko sabi möön soni.”—1 Kolenti 3:6.
Te u nango a hiniwan wosu a di kamian ka de da u fuu peleiki, nöö u ta heepi sëmbë u de jei soni u di bunu buka u di Könuköndë (Luku palaklafu 14)
ANDI U SA DU FUU SA TA DË WAIWAI?
15. Te sëmbë ta da u tangi ufö u musu ta da de soni ö?
15 Jesosi kë fuu ta da sëmbë soni, u di a sabi taa di soni dë o mbei u ta dë waiwai. Te u lo’ u da sëmbë soni, nöö sömëni sëmbë seei o ko ta da sëmbë soni tu. Fëën mbei Jesosi bi taki taa: „I musu ta da sëmbë soni, nöö i seei o kisi tu. Nöö möön hia seei joo kisi e. Biga Gadu o lai ën a wan gaan manda ta zin ta fugu tee di manda an sa tei möön, nöö a hopo ën da i. Biga ku di wan seepi maaka di i ta maaka da otowan, nöö ku ën seei de o maaka da i tu” (Lukasi 6:38). Ma na hii sëmbë o ta tei ën u bigi te i ta da de soni, tökuseei i musu ta da sëmbë soni go dou. Ja sa sabi nöiti unfa di lo’ di i lo’ u da sëmbë soni, sa heepi wan sëmbë tjika.
16. Ambë u musu lo’ u da soni, nöö faandi mbei u musu lo’ u da de soni?
16 Dee sëmbë dee lo’ u da wotowan soni tuutuu, an ta dë ku di mëni taa dee sëmbë dë o toona da de wan soni baka. Jesosi bi taki taa: „Te joo kai sëmbë u de ko a i wosu ko njan, nöö i musu suku dee pootima e. Ee wan sëmbë aan möni, ee wan sëmbë wojo booko, ee wan sëmbë lan, nöö de i musu ta kai be de ko njan a i wosu. Nöö joo feni bunu fëën. Biga dee lö sëmbë dë, de an sa toona paka i baka” (Lukasi 14:13, 14). Di Bëibel ta taki tu taa: „Di sëmbë di lo’ u da sëmbë soni o feni gaan bunu.” Söseei a ta taki taa: „Di sëmbë di ta heepi dee pooti sëmbë dë waiwai” (Nöngö 22:9; Psalöm 41:1). U musu lo’ u da sëmbë soni u di u kë heepi de tuutuu.
17. Andi da wantu fasi fa u sa ta da sëmbë soni, di o ta mbei u ta dë waiwai?
Tjabukama 20:31-35). Te u luku di soni di Paulosu bi taki, ku di fasi fa a bi ta du soni, nöö u ta si taa a dë fanöudu seei fuu ta tei u ten ku u kaakiti fuu heepi wotowan. Söseei u musu ta booko u hedi ku de, nöö u musu lobi de tu.
17 Di Paulosu bi piki sëmbë taa Jesosi bi taki taa „dee sëmbë ta da sëmbë soni, de dë waiwai möön leki dee sëmbë ta feni”, nöö na u wan kodo fasi u da sëmbë soni nöö a bi ta taki. Hën da u sa da sëmbë degihati, u sa da de lai ku di Bëibel, söseei u sa heepi de ku soni (18. Andi sömëni öndösukuma bi taki u di dë di wan sëmbë sa ta dë waiwai?
18 Sëmbë di ta öndösuku soni u ko sabi unfa libisëmbë ta du soni, ko si taa te sëmbë ta da wotowan soni, nöö de ta dë waiwai. Wanlö sëmbë bi taki taa de ta möön dë waiwai baka te de heepi wotowan a soni. Dee sëmbë dee ta öndösuku soni ta taki taa te sëmbë ta heepi wotowan a soni, nöö de ta fii taa de ta du wan bumbuu soni ku de libi. So öndösukuma ta da sëmbë taanga u de go du wooko ka de o sa ta heepi wotowan, u di di soni dë o mbei de o ta fii möön bunu, söseei a o mbei de ta möön dë waiwai. Wë di soni di dee öndösukuma aki ko sabi aki an ta foombo u, biga Jehovah di Gadu di mbei u, bi mbei sëmbë sikifi a Bëibel gaanduwe kaa taa te u ta da wotowan soni, nöö woo ta dë waiwai.—2 Timoteo 3:16, 17.
I MUSU TA MBEI MÖITI GO DOU FII TA DA SËMBË SONI
19, 20. Andi ta da i taanga fii ta da wotowan soni?
19 Te dee sëmbë dee u ku de ta nama, ta pakisei deseei nöö, nöö a sa taanga da u fuu ta da sëmbë soni. Ma Jesosi bi taki taa dee tu möön gaan wëti dee dë a Gadu Buku, da di wëti di ta taki taa u musu lobi Gadu ku hii u hati ku hii u [libi] ku hii u pakisei, te dou ku hii di kaakiti di u abi, ku di wëti di ta taki taa u musu lobi woto sëmbë leti kumafa u lobi useei (Maikusi 12:28-31). U bi lei a di woto aki taa dee sëmbë dee lobi Jehovah, ta djeesi ën. Jehovah ku Jesosi tuu lo’ u da sëmbë soni. De ta da u taanga fuu djeesi de a di lö fasi dë, u di de sabi taa di soni dë o mbei u ta dë waiwai. Ee u ta mbei möiti u ta da Gadu ku woto sëmbë soni, nöö di soni dë o tja gafa ko da Jehovah, söseei u ku wotowan tuu o feni wini fëën.
20 U dë seiki taa i ta mbei hii möiti kaa fii sa ta da wotowan soni, söseei fii ta heepi de, möönmöön dee baaa ku dee sisa fii (Galasia 6:10). Ee i ta du di soni aki go dou, nöö sëmbë o ta da i tangi, de o lobi i, söseei joo ta dë waiwai. Di Bëibel ta taki taa: „Soni o ta waka bunu da wan sëmbë di lo’ u da wotowan soni, nöö di sëmbë di ta da wotowan te a hia wata, o feni te a hia wata tu” (Nöngö 11:25). Hii daka u ta feni pasi fuu da wotowan soni. Boiti di dë, u ta feni pasi fuu da wotowan soni a di dini di u ta dini Gadu. Woo taki u so u dee soni dë a di woto di ta ko.
^ pal. 13 De tooka di në aki.