1. Na un fasi u sa wooko makandi ku Jehovah?

DI JEHOVAH mbei libisëmbë te a kaba, hën a bi kë u de wooko makandi ku ën. Hii fa hii u tuu ko dë zöndu libisëmbë, tökuseei u sa ta wooko makandi ku Jehovah hii daka. U „ta wooko makandi” ku Gadu te u ta paaja di bunu buka u di Könuköndë, söseei te u ta heepi sëmbë u de ko dë bakama u Keesitu (1 Kolenti 3:5-9). U ta tei ën u bigi seei taa di makiti Gadu di mbei hii soni, tei u fuu du sö wan gaan wooko dëën! Ma boiti di peleiki di u ta peleiki, u ta wooko makandi ku Jehovah a woto fasi tu. A di woto aki, woo luku tu unfa u ta wooko makandi ku Jehovah te u ta heepi dee famii fuu ku dee sëmbë a di kemeente, te u ta tei wotowan ku wai a wosu, te u nango heepi te di ölganisaasi ta du wan wooko a wan kamian, söseei te u ta mbei möiti u du möön soni a di dini di u ta dini Jehovah. ​—Kolosën 3:23.

2. Faandi mbei wa musu ta tei dee soni dee wotowan ta du da Jehovah, maaka ku dee u ta du dëën?

² Te woo luku di woto aki, nöö u musu hoi a pakisei taa sëmbë  ku sëmbë ta tooka. Wa abi di wan jaa, wa abi di wan seei köni u du soni, soni an dë di wan seei fasi da hii u tuu, söseei so fuu ta dë ku suwaki. Fëën mbei ja musu ta tei dee soni dee wotowan ta du da Jehovah, maaka ku dee i ta du dëën. Apösutu Paulosu bi taki taa: „Hiniwan sëmbë musu wegi di soni a ta du luku ee a bunu, ee an bunu, nöö joo dë waiwai. An o dë fii luku ee di fii kai ku di u di otowan.”​—Galasia 6:4.

3. Faandi mbei u sa taki taa wan sëmbë di ta sölugu dee sëmbë fëën, ta wooko makandi ku Gadu?

³ Jehovah kë fuu ta sölugu dee famii fuu. Kandë i ta wooko fii sa bai dee soni di dee sëmbë fii abi fanöudu. Sömëni mujëë ta fika a wosu u de sa ta luku dee mii u de. Te dee gaansëmbë fuu an sa sölugu deseei möön, nöö u musu sölugu de. Di Bëibel ta taki taa: „Ee wan sëmbë an ta sölugu hënseei wosu dendu ku dee famii fëën, nöö di sëmbë dë hogi möön leki dee sëmbë dee an dë a biibi. Fa a ta libi fëën dë, a dë kuma an nama ku Masa Jesosi seei” (1 Timoteo 5:8). Ee i abi famii di i musu sölugu, nöö kandë ja o ta du sö hia soni da Jehovah kumafa i bi o kë. Ma na lasi hati! Jehovah ta feni ën bunu te i ta sölugu dee sëmbë fii wosudendu.​—1 Kolenti 10:31.

4. Unfa mama ku tata ta buta di Könuköndë wooko a di fosu kamian, nöö unfa soni ta waka te de du ën?

⁴ Mama ku tata di dë bakama u Keesitu ta wooko makandi ku Jehovah te de ta heepi dee mii u de u de buta maaka da deseei a di dini di de ta dini Jehovah. Sömëni mama ku sömëni tata du di soni aki. Te u kaba fëën, dee mii u de bi buta taa de o ta du di hii-ten diniwooko, aluwasi a ko dë taa de musu foloisi go a wan woto kamian. So u dee mii aki ko ta du di sëndëlengiwooko, wotowan ta du di pioniliwooko a kamian ka möön peleiki dë fanöudu, nöö wotowan ta wooko a Bëtëli. A dë sö tuu taa te dee mii foloisi go a wan longi kamian, nöö de mama ku de tata an o sa ta dë makandi ku de kumafa de bi o kë. Ma tökuseei de ta da dee mii u de taanga u de dini Jehovah go dou, aluwasi ka de dë. Faandi mbei de ta du di soni dë? Wë u di de ta wai seei taa dee mii u de ta buta di dini di de ta dini Jehovah a di fosu kamian (3 Johanisi 4). Sömëni u dee mama ku dee tata dë, ta si soni kuma di mujëë de kai Hana, di bi taki taa a bi „leni” Jehovah di womi mii fëën de kai Samuëli. Dee mama ku dee tata aki ta tei ën u bigi seei taa de sa wooko makandi ku Jehovah a di lö fasi aki.​—1 Samuëli 1:28.

5. Unfa i sa heepi dee baaa ku dee sisa u di kemeente ka i dë? (Luku di peentje a bigi u di woto.)

⁵ Ee ja abi sëmbë di i musu ta sölugu hiniwan daka, nöö kandë i sa heepi dee baaa ku dee sisa dee dë ku suwaki, dee ko gaandi kaa, nasö dee abi heepi fanöudu a wan woto fasi. Nasö kandë i sa heepi dee sëmbë dee ta sölugu dee sëmbë dë. Luku ee sëmbë dë a di kemeente di i sa heepi a dee lö fasi aki tu. Kandë wan sisa dë di ta sölugu hën mama nasö hën tata di ko gaandi kaa. I bi o sa luku di sëmbë fëën dëën sö taa a sa feni pasi du woto fanöudu soni ö? Nasö kandë i sa heepi wan sëmbë, u di joo ta tei ën ku wagi ta tja go a komakandi, u di joo ta tjëën go bai soni di a abi fanöudu, nasö i ku ën sa go luku wan sëmbë di dë a hatiwosu. Te i ta du dee soni aki, nöö a sa pasa taa i ta wooko makandi ku Jehovah u heepi wan sëmbë di bi ta begi ën faa heepi ën.​—Lesi 1 Kolenti 10:24.

6. Unfa u sa lei taa u ta libi bunu ku wotowan?

⁶ Sëmbë sabi taa dee dinima u Gadu da sëmbë di lo’ u tei wotowan ku wai a wosu. A di Bëibel, di Giiki wöutu di de puu ko „kisi oto sëmbë hoi a unu wosu” kë taki „libi bunu ku sëmbë di ja sabi” (Hebelejën 13:2). Woto dë a di Bëibel di ta lei u unfa u sa lei taa u ta libi bunu ku wotowan (Kenesesi 18:1-5). U musu ta heepi wotowan solanga u feni pasi u du ën, aluwasi de dë „sëmbë dee ta biibi Masa kuma u” nasö ee de an dë sëmbë di ta biibi Masa.​—Galasia 6:10.

7. Un wini i ta feni te i ta tei sëmbë di ta du di hii-ten diniwooko a i wosu?

⁷ I sa ta tei sëmbë di ta du di hii-ten diniwooko a i wosu, faa dë taa i ta wooko makandi ku Jehovah. (Lesi 3 Johanisi 5, 8.) Te u ta du di soni aki, nöö u ku dee baaa ku dee sisa aki tuu ta feni wini fëën. Di Bëibel ta taki taa te u ta du soni a di lö fasi aki, hën da u ta „da u seei taanga” (Loomë 1:11, 12). Buta pakisei a di woto u wan baaa de kai Olaf. Di Olaf bi möön njönku, hën wan keling-gaanwomi di an bi tööu jeti bi ko luku di kemeente ka a bi dë, nöö a bi ta suku wan kamian faa bi sa dë di wiki dë, ma sëmbë an bi dë u hoi ën. Hën Olaf hakisi hën mama ku hën tata ee de bi o sa hoi di keling-gaanwomi a de wosu, hii fa hën mama ku hën tata an bi dë Kotoigi. De bi piki Olaf taa soni antoobi, ma a bi o dë u Olaf duumi a wan bangi liba. Di soni dë Olaf bi du, nöö an bi hati ën taa a bi du di soni dë. A bi lobi fa soni bi waka di wiki dë! De bi ta hopo fuuku hiniwan mamate, nöö de bi ta taki u woto u Bëibel te de bi ta bebe te. Di keling-gaanwomi bi da Olaf taanga sö tee taa Olaf bi buta taa a o du di hii-ten diniwooko. Nöunöu Olaf ta du di sëndëlengiwooko söwan 40 jaa longi kaa, nöö a nango a peipei köndë.

8. Konda wan woto u lei faandi mbei u musu ta libi bunu ku wotowan, aluwasi bigibigi de an ta tei dee soni dee u ta du da de u bigi?

⁸ Sömëni fasi dë fa u sa lei taa u lobi wotowan, aluwasi bigibigi de an ta tei dee soni dee u ta du da de u bigi. Wan sisa u Sipanjöluköndë bi ta lei wan mujëë de kai Yesica, soni u Bëibel. Yesica bi kumutu a di köndë de kai Ekwadölu. Wan daka, di di sisa bi ta lei Yesica soni u Bëibel, hën Yesica bi ta këë seei. Di sisa bi hakisi ën faandi mbei a bi ta këë sö. Yesica piki ën taa ufö a foloisi ko a Sipanjöluköndë, nöö a bi pooti gaanfa seei. Wan daka, an bi abi soni u njan faa da di mujëë mii fëën. Wata nöö a bi abi. Hën a tei di mii fëën ta ganjan faa duumi, nöö a di wan seei ten dë a bi ta begi Gadu faa heepi ën. An bi tei longi seei, hën tu Kotoigi go a Yesica pisi, hën de dëën wan u dee buku dee u ta paati da sëmbë. Ma Yesica an bi fan bunu ku de seei, hën a tënë di buku di de dëën, hën a taki taa: „Di soni aki un tja ko da mi, u mi da di mujëë mii u mi faa njan u?” Dee sisa bi pooba u fan ku Yesica, ma an bi kë haika de. Bakaten, dee sisa bi tja wan manda fuufuu ku soni u njan go buta da Yesica nëën dööbuka. Fëën mbei di këë di Yesica bi ta këë, bi dë u di a bi ko fusutan taa Gadu hën bi kë heepi ën di daka di a bi begi. Nöunöu Yesica dë kabakaba u dini Jehovah. Wë u ta si gbelingbelin taa soni bi  waka bunu, u di dee sisa aki bi libi bunu ku wotowan.​—Peleikima 11:1, 6.

9, 10. (a) Andi da wantu fasi fa dee Isaëli sëmbë bi sa ta heepi du soni da Jehovah? (b) Na un fasi dee baaa sa heepi a di kemeente a di ten aki?

⁹ A di ten di pasa, dee Isaëli sëmbë bi sa go heepi te de bi ta du wan wooko da Jehovah (Ëkisodesi 36:2; 1 Kloniki 29:5; Nehemia 11:2). A di ten aki iseei sa heepi tu. I sa tei i ten, dee soni dee i abi, ku di köni di i abi u heepi dee baaa ku dee sisa fii. Te i ta du sö, nöö joo ta dë waiwai, söseei Jehovah o mbei i feni gaan bunu.

¹⁰ Di Bëibel ta da dee womi taanga u de wooko makandi ku Jehovah a di kemeente. De sa du sö, te de ta mbei möiti u de ko toon dinai nasö gaanwomi a di kemeente (1 Timoteo 3:1, 8, 9; 1 Petuisi 5:2, 3). Dee baaa dee ta du di soni aki ta kë heepi wotowan a soni, söseei de ta kë heepi de a di dini di de ta dini Jehovah tu (Tjabukama 6:1-4). Dee baaa sa ta heepi ku buku soni u di kemeente, de sa ta luku na un kamian ku un kamian di kemeente musu ta peleiki, de sa ta seeka soni sö taa di Könuköndë zali sa ta dë limbolimbo, nasö de sa du wan woto soni. Dee Gaanwomi hakisi i fii du wan u dee soni aki ö? Wë, dee baaa dee ta du dee wooko aki ta taki taa dee wooko aki ta mbei de ta piizii seei.

11. Un wini wan sisa bi feni di a bi go heepi mbei Könuköndë zali nasö woto soni?

¹¹ A lo’ u pasa taa dee sëmbë dee nango ta heepi te di ölganisaasi ta mbei kamian ka u sa nango ta dini Gadu, ta feni njunjun mati. Wan sisa de kai Margie bi heepi mbei Könuköndë zali 18 jaa longi. Te a bi nango heepi, nöö a bi ta fan ku dee möön njönku sisa, söseei a bi ta lei de soni tu. A bi taki taa te sëmbë ta heepi a di lö fasi aki, nöö de sa ta da wotowan taanga, nöö deseei ta feni taanga tu  (Loomë 1:12). Wë, di soni bi ko ta taanga dëën bakaten, nöö dee mati dee a bi ko feni dë, bi dëën taanga seei. I bi go heepi mbei wan zali nasö wan woto soni kaa u? Wë i sa go heepi, aluwasi ja sabi soni u di wooko dë.

12. Unfa i sa heepi te wan gaan soni pasa a wan kamian?

¹² U sa ta wooko makandi ku Jehovah tu, te u nango ta heepi dee baaa ku dee sisa fuu te wan gaan soni pasa. Kandë u sa da möni u heepi de (Johanisi 13:34, 35; Tjabukama 11:27-30). Wan woto fasi fa u sa heepi de, da te u ta heepi de seeka kamian nasö te u ta heepi de mbei wan soni di bi booko. Di wosu u wan sisa de kai Gabriela, di ta libi a di köndë Poland, bi booko seei di wan gaan wata bi ko. Di sisa aki bi wai seei di a bi si taa dee baaa ku dee sisa u di pisiwata ka a bi ta dë, bi ko heepi ën. Te a ta pakisei di soni di bi pasa dë, nöö a ta taki taa an ta booko hën hedi ku dee soni dee a lasi, ma a ta buta pakisei a dee soni dee a feni. A taki taa: „Di soni di pasa dë, mbei mi si taa di dë di mi dë a di ölganisaasi u Jehovah dë wan gaan soni seei, nöö di soni aki ta mbei mi ta dë waiwai.” Sömëni sëmbë bi taki di wan seei soni, di de bi si fa dee baaa ku dee sisa bi ko heepi de, di wan gaan soni bi miti de. Nöö dee sëmbë dee ta wooko makandi ku Jehovah u heepi dee baaa ku dee sisa aki, ta wai seei u di de bi si taa de bi du wan bunu soni.​—Lesi Tjabukama 20:35; 2 Kolenti 9:6, 7.

13. Unfa di heepi di u nango heepi wotowan ta mbei u ko möön lobi Jehovah? Konda wan woto.

¹³ Wan sisa de kai Stephanie ku wanlö woto peleikima u di pisiwata ka a ta dë, bi wooko makandi ku Gadu tu. De bi heepi baaa ku sisa di fusi kumutu a de köndë ko na Amëëkanköndë, u di feti bi dë a di köndë u de. De bi heepi dee baaa ku dee sisa dë u de feni kamian ka de bi sa libi, söseei de bi heepi de u de feni woto soni di de bi abi fanöudu. Di sisa aki taki taa: „A bi da u piizii seei di u bi si fa de ta wai, ku fa de ta tei ën u bigi taa dee baaa ku dee sisa u de bi lei de taa de lobi de. Dee baaa ku dee sisa aki ta taki taa u heepi de, ma te u luku ën bunu, nöö de bi heepi u möön fa u bi heepi de. U bi ko möön lobi Jehovah di u bi si fa de lobi ën, fa de ta libi kuma wan famii, fa de lei taa de abi biibi tjika, ku fa de bi ta futoou Jehovah. Di soni aki da u möön taanga fuu ta tei dee soni di di ölganisaasi u Jehovah ta du da u u bigi.”

14, 15. (a) Unfa di tjabukama u Gadu de kai Jesaaja bi du soni? (b) Unfa Keesitu sëmbë sa djeesi Jesaaja a di ten aki?

¹⁴ I bi o kë ta wooko makandi ku Jehovah möön gaanfa u? I bi o kë go heepi ka de abi möön peleikima fanöudu ö? Wë an dë u taki  taa wa musu u foloisi go a wan longi kamian fuu sa heepi wotowan. Ma so baaa ku sisa dë di ta du di soni aki. Dee baaa ku dee sisa aki dë kuma di tjabukama u Gadu de kai Jesaaja. Jehovah bi hakisi taa: „Ambë o dë bosikopuma fuu? Ambë mi o manda go?” Hën Jesaaja bi piki taa: „Luku mi aki! Manda mi” (Jesaaja 6:8). I bi o sa du soni u heepi di ölganisaasi u Jehovah u? I ta dë kabakaba u du soni u heepi di ölganisaasi u Jehovah u? Andi da wantu fasi fa i sa du soni u heepi di ölganisaasi u Jehovah?

¹⁵ Di Jesosi bi ta taki soni u di peleiki di dee bakama fëën musu ta peleiki ta heepi sëmbë u de ko dë bakama fëën, hën a bi taki taa: „Wan si fa dee sëmbë ta ko gidjii nöömö a mi nö? De dë kuma wan gaan goon njanjan lepilepi fii koti buta a suwa, ma wookoma biti poi o. Nöö un musu begi di goon Masa, be a manda möön hia wookoma fu de koti di njanjan buta a suwa” (Mateosi 9:37, 38). Kandë i sa go du di pioniliwooko a wan kamian ka möön peleikima dë fanöudu, nasö kandë i sa heepi wan woto sëmbë faa du di soni aki. Sömëni baaa ku sömëni sisa ta si taa di möön bunu fasi fa de sa lei taa de lobi Gadu, söseei taa de lobi woto sëmbë, da te de ta du di pioniliwooko a wan kamian ka möön peleikima dë fanöudu. I sa pakisei luku na un woto fasi i bi o sa du möön soni da Jehovah. Wë ee i du möön soni da Jehovah, nöö joo ta dë waiwai seei.

16, 17. Andi da wantu woto fasi fa i sa du möön soni a di dini di i ta dini Jehovah?

¹⁶ I dë kabakaba u go wooko a Bëtëli, u go heepi mbei zali nasö woto soni ö? I dë kabakaba u go heepi u wan pisiten, wan pasi a wan wiki nasö möön leki wan pasi ö? Hii juu di ölganisaasi u Jehovah ta abi sëmbë fanöudu di dë kabakaba u go heepi ka heepi dë fanöudu, söseei di o dë kabakaba u du hiniwan soni di de o hakisi de u de du, aluwasi de möön sa’ u du wan woto wooko. Jehovah ta tei ën u bigi seei te sëmbë dë kabakaba u disa soni di de bi o kë du, u de go heepi ka möön peleikima dë fanöudu.​—Psalöm 110:3.

¹⁷ I bi o kë u sëmbë heepi i fii sa dë seekaseeka fii sa dini Jehovah möön gaanfa u? Kandë i sa go buta i në fii sa go a di Siköö da Könuköndë Peleikima. Di siköö aki ta heepi baaa ku sisa di dë a di hii-ten diniwooko kaa, sö taa di ölganisaasi u Jehovah sa tei de u du möön wooko da de. Dee sëmbë dee nango a di siköö aki, musu dë kabakaba u de go dini a hiniwan kamian di de o manda de go. I bi o kë du möön soni da Jehovah a di lö fasi aki ö?​—1 Kolenti 9:23.

18. Un wini joo feni te i ta wooko makandi ku Jehovah hii daka?

¹⁸ U di u da sëmbë u Jehovah, mbei u lo’ u da sëmbë soni, u ta libi bunu ku wotowan, söseei u ta lobi de tu. U ta booko u hedi ku wotowan hiniwan daka. Di soni aki ta mbei u ta dë waiwai, söseei a ta mbei u ta dë bööböö (Galasia 5:22, 23). Aluwasi fa soni dë da i, joo ta dë waiwai solanga i ta djeesi Jehovah a di da di a ta da sëmbë soni, söseei joo dë wan u dee sëmbë fëën di ta wooko makandi ku ën!​—Nöngö 3:9, 10.