1. Andi hiniwan fuu kë u dee famii fuu du?

WAN sisa de kai Pauline bi taki taa: „Sensi di mi ko sabi soni u di tuutuu lei, hën mi bi kë taa hii dee famii u mi dë makandi ku mi a di Paladëisi. Mi bi kë seei taa mi manu Wayne, ku di womi mii fuu ko ta dini Jehovah makandi ku mi.” * I abi famii di an ko sabi soni u Jehovah jeti ö? A musu u dë sö taa iseei ta fii kumafa Pauline bi ta fii tu.

2. Un hakisi woo piki a di woto aki?

² Wa sa duwengi dee famii fuu u de haika di bunu buka, ma u sa heepi de u de ko kë haika soni u Bëibel (2 Tim. 3:14, 15). Faandi mbei u musu ta peleiki da dee famii fuu? Faandi mbei u musu ta lei taa u ta fusutan de? Andi u sa du u dee famii fuu sa ko lobi Jehovah kumafa useei lobi ën? Unfa dee baaa ku dee sisa a di kemeente ka u dë sa heepi u?

3. Te u luku 2 Petuisi 3:9, nöö faandi mbei u musu peleiki da dee famii fuu?

³ Abiti möön Jehovah o poi di hogi goonliba aki kaba a sösö. „Dee sëmbë dee a kai da u de feni di libi u teego”, de nöö o fika a libi (Tjab. 13:48). U ta tei di ten ku di kaakiti fuu u peleiki da sëmbë di wa sabi, a di pisiwata ka u ta libi. Nöö an dë u taki taa woo kë peleiki da dee famii fuu tu, sö taa deseei sa ko ta dini Jehovah. Di lobihati Tata fuu Jehovah „an kë fu na wan kodo  sëmbë musu lasi kaba a sösö. Ma a kë u hii sëmbë musu bia de libi ko nëën, fu de sa kumutu a di sitaafu di u taki dë basu”.​—Lesi 2 Petuisi 3:9.

4. Un föutu u ta mbei so juu te u ta peleiki da dee famii fuu?

⁴ U musu hoi a pakisei taa wan bunu fasi dë fa u sa paaja di bunu buka da sëmbë, ma wan föutu fasi dë tu. Kandë te u ta peleiki da wan sëmbë di wa sabi, nöö u ta fan a wan suti fasi, ma te u ta fan ku dee famii fuu, nöö kandë an ta dë sö.

5. Andi u musu ta hoi a pakisei te woo peleiki da dee famii fuu?

⁵ Kandë sömëni fuu ta fii wan fasi te u toona pakisei unfa u bi peleiki da wan famii fuu, nöö u ta fii taa u bi sa peleiki da de a wan möön bunu fasi. Apösutu Paulosu bi piki dee Keesitu sëmbë taa: „Te woon fan ku sëmbë, nöö un musu fan a wan bunuhati fasi. Wan musu ta fan sösö soni, ma di fan fuunu musu abi goma. Nöö un musu sabi fa fuun ta piki dee sëmbë dee o ta hakisi unu soni, kumafa a fiti wan biibima” (Kol. 4:5, 6). U musu ta mëni di soni aki te u ta fan ku dee famii fuu. Ee wa du di soni aki, nöö a sa pasa taa u mbei hati u de boonu, ka fuu heepi de.

6-7. Konda wan woto di ta lei faandi mbei wan Keesitu sëmbë musu lei taa a ta fusutan di sëmbë di hën ku hën tööu, hii fa di sëmbë dë an ta dini Jehovah.

⁶ Lei taa i ta fusutan de. Pauline di u bi taki soni fëën kaa, ta taki taa: „Soni u Gadu ku soni u di Bëibel wanwan mi bi ta kë taki ku mi manu. Wa bi ta taki u woto soni möönsö.” Ma Wayne, di manu u Pauline, an bi sabi soni u Bëibel wan apaiti, nöö an bi ta fusutan andi Pauline bi ta taki. A bi ta djei dëën kuma keiki soni wanwan Pauline bi ta pakisei. A bi ta si kuma Pauline go a wan poipoi keiki ka de ta ganjëën.

 ⁷ Pauline seei bi taki taa bëina hiniwan sapate ku hiniwan sata ku sonde a bi ta dë makandi ku dee baaa ku dee sisa. De bi nango a komakandi, de bi ta peleiki makandi, söseei a bi nango a de pisi. A bi taki taa: „So juu te Wayne bi ko dou a wosu, nöö na wan sëmbë bi ta sai dë, nöö di soni dë bi ta mbei a ta fii taa a dë hën wanwan.” Wë an dë u taki taa Wayne bi o kë fu hën mujëë ku di womi mii fëën dë makandi ku ën. An bi sabi ku ambë de ta hulu, nöö a bi ta fii kuma di mujëë fëën bi ko möön lobi dee mati dee a bi ko abi, möön hën. Di soni aki mbei Wayne bi taki taa a o booko tööu. Unfa i si kuma Pauline bi sa möön lei taa a ta fusutan hën manu?

8. Andi dee famii fuu ta möön luku a u, te u luku 1 Petuisi 3:1, 2?

⁸ Be dee soni dee i ta du dë u si möön gaanfa. Dee famii fuu ta möön luku dee soni dee u ta du, möön dee soni dee u ta taki. (Lesi 1 Petuisi 3:1, 2.) Pauline bi ko fusutan di soni aki bakaten. A ta taki taa: „Mi sabi taa Wayne lobi u, nöö mi sabi tu taa na booko a bi kë booko di tööu sö. Ma baka di a piki mi taa a o booko tööu, hën mi ko fusutan taa mi musu ta du dee soni dee Jehovah taki taa wan sëmbë di tööu musu ta du. Mi ko fusutan tu taa a bi o möön bunu u mi ta du bunu soni, ka u mi ta peleiki da Wayne hii juu.” Pauline an bi ta taki soni u Bëibel hiniwan juu ku Wayne möön, nöö a bi bigi ta da woto ku ën di nama ku woto soni. Wayne bi ta si taa di mujëë fëën bi ko ta möön abi bunu fasi, söseei taa di womi mii u de bi ta ko abi möön lesipeki, nöö a bi ko ta möön piki de buka a soni (Nöng. 31:18, 27, 28). Di Wayne bi ko si unfa di Bëibel bi heepi dee sëmbë fëën wosudendu u de ko abi möön bunu fasi, hën a bigi ta haika soni u di Wöutu u Gadu.​—1 Kol. 7:12-14, 16.

9. Faandi mbei wa musu ko wei u heepi dee famii fuu?

 ⁹ Na ko wei u heepi dee famii fii. U sa djeesi Jehovah a di soni aki. „Hii juu” Jehovah ta da sëmbë di okasi u de sa haika di bunu buka, sö taa de sa feni libi (Jel. 7:25). Apösutu Paulosu bi piki Timoteo taa an musu ko wei u heepi wotowan. Faandi mbei a bi piki ën di soni dë? Wë u di hën ku dee sëmbë dee bi o ta haikëën tuu bi o sa feni libi (1 Tim. 4:16). U lobi dee famii fuu. Fëën mbei u kë u de ko sabi dee tuutuu lei dee dë a di Wöutu u Gadu. Dee soni dee Pauline bi ta du ku dee soni dee a bi ta taki, bi heepi dee sëmbë fëën. Nöunöu Pauline dë waiwai, u di hën ku hën manu ta dini Jehovah makandi. De tuu ta du di pioniliwooko, nöö hën manu dë wan gaanwomi u kemeente.

10. Faandi mbei u musu abi pasensi?

¹⁰ I musu abi pasensi. Te u buta taa woo ta dini Gadu, nöö dee famii fuu sa ta tei u u hogi, u di a ta taanga da de u de fusutan di njunjun fasi fa u ko ta libi. Wan u dee soni di de lo’ u si taa tooka a u, hën da di hoi di wa ta hoi dee piizii möön di nama ku poipoi biibi, söseei di nama di wa ta nama möön ku politiki soni u köndë. Bigibigi kandë so u dee famii fuu hati o ta boonu ku u (Mat. 10:35, 36). Ma tökuseei wa musu si kuma nöiti de o sa tooka. Ee wa ta mbei möiti möön u heepi de u de ko sabi soni u di tuutuu lei, nöö a o dë kuma u kuutu de taa de an bunu tjika u de feni di libi u teego. Jehovah an da u di wooko fuu ta kuutu sëmbë, ma Jesosi a da di wooko dë (Joh. 5:22). Ee u abi pasensi, nöö kandë te u kaba fëën dee famii fuu o kë haika di bunu buka.​—Luku di pisi „ Wooko ku di website fuu u lei sëmbë soni”.

11-13. Andi u sa lei a di fasi fa Alice bi libi ku hën mama ku hën tata?

¹¹ I musu abi suti fasi, ma köni be de an tooka di fasi fa i ta pakisei. (Nöng. 15:2). Boo luku di woto u wan sisa de kai Alice. Di sisa aki an bi ta libi ku hën mama ku hën tata möön di a bi ko sabi soni u di tuutuu lei. Hën mama ku hën tata an bi ta biibi a Gadu, nöö de bi dë a politiki soni u köndë. Baka wan pisiten, hën Alice bi ko fusutan taa a musu konda soni u di bunu buka da dee famii fëën tu. A bi taki taa: „Ee i wakiti tumisi longi ufö i bigi konda da dee famii fii taa sö i go a wan keiki, nöö a o möön toobi de te de jei ën.” Alice bi ta sikifi biifi da hën mama ku hën tata. A bi ta hakisi de unfa de ta si dee lei u Bëibel. A bi ta hakisi de soni di a bi si kuma bi o sa hai de pakisei. Wan u dee soni aki da di soni di di Bëibel ta taki u lobi (1 Kol. 13:1-13). Alice bi da hën mama ku hën tata tangi u di fasi fa de bi kiijëën, söseei a bi manda kado da de tu. Te a bi nango luku hën mama ku hën tata, nöö a bi ta heepi hën mama du wooko a wosu. Bigibigi hën mama ku hën tata an bi wai ku ën taa a go a keiki.

¹² Di Alice bi dë nëën mama ku hën tata pisi, nöö a bi ta lesi di Bëibel hiniwan daka go dou, kumafa a bi guwenti. A ta taki taa: „Di soni aki bi heepi mi mama faa ko fusutan taa mi ta si di Bëibel kuma wan fanöudu soni.” A di seei ten dë, Alice tata bi bigi ko ta lei soni u Bëibel, sö taa a bi sa ko fusutan faandi mbei di mujëë mii fëën ko ta si soni woto fasi, söseei a bi kë suku föutu a di Bëibel. Alice ta taki taa: „Mi bi dëën wan Bëibel, nöö mi bi sikifi wan soni buta a di Bëibel dëën.” Andi bi ko pasa bakaten? Alice tata an bi feni na wan föutu a di Wöutu u Gadu, ma dee soni dee a bi lesi bi dou hën hati.

¹³ U musu abi suti fasi, ma u musu ta köni be dee famii fuu an tooka di fasi fa u ta pakisei, aluwasi soni ta taanga da u (1 Kol. 4:12b). Alice bi musu ta hoi dou, u di hën mama bi ta du ku ën. Alice bi taki taa: „Di mi bi tei dopu, hën mi mama bi taki taa mi ’kaba a sösö.’” Andi Alice bi du? Alice ta taki taa: „Ma bi du kuma ma jei andi mi mama bi taki. Mi bi piki ën taa  mi kë ko dë wan Jehovah Kotoigi, söseei taa mi kë hoi miseei a di soni dë. Mi bi pooba u lei ën taa mi lobi ën tuutuu. Hën mi ku ën tuu bigi këë, hën bakaten mi boi wan suti soni dëën. Sensi di ten dë, hën mi mama ko ta si taa di Bëibel mbei mi ko dë wan möön bumbuu sëmbë.”

14. Faandi mbei nöiti u musu mbei dee famii fuu tapa u fuu du soni da Jehovah?

¹⁴ A sa tei ten ufö dee sëmbë fuu ko fusutan unfa di dini di u ta dini Jehovah dë gaan soni da u tjika. Alice mama ku hën tata bi kë faa du wan apaiti wooko. Ma di a piki de taa a o go du di pioniliwooko ka faa go du di wooko di hën mama ku hën tata bi kë faa du, hën hën mama bigi këë. Ma tökuseei Alice an bi du di soni di de bi kë. A bi taki taa: „Ee wan kodo pasi seei i mbei dee famii fii tapa i fii du wan soni di i bi kë du da Jehovah, nöö de o kë tapa i da woto soni tu. Ma ee i ta libi bunu ku dee sëmbë fii, hii fa ja ta mbei de tapa i fii du soni da Jehovah, nöö kandë so u de o kë haika i te i ta konda soni u Bëibel da de.” Sö wë soni bi waka da Alice. Nöunöu Alice mama ku hën tata tuu ta du di pioniliwooko, nöö hën tata dë wan gaanwomi u kemeente.

15. Unfa dee „bunu soni” dee wotowan ta du sa heepi dee famii fuu, te u luku Mateosi 5:14-16 ku 1 Petuisi 2:12?

¹⁵ Jehovah ta hai sëmbë ko nëën ku dee „bunu soni” di dee sëmbë u di kemeente ta du. (Lesi Mateosi 5:14-16; 1 Petuisi 2:12.) Ee i manu nasö i mujëë an dë wan Jehovah Kotoigi, nöö kandë i sa mbei a ko sabi dee baaa ku sisa u di kemeente ka i dë. Pauline, di sisa di u bi taki soni fëën a bigi u di woto, bi ta kai dee baaa ku dee sisa u di kemeente ka a dë,  u de ko nëën pisi, sö taa hën manu bi sa ko sabi de. Wayne bi taki unfa wan baaa bi heepi ën faa ko sabi unfa dee Kotoigi dë tuutuu. A bi taki taa: „An bi go a wooko, ma a bi puu wan daka fika a wosu, faa bi sa ko luku sport ku mi a teefei. Di a du di soni dë, hën mi taki a miseei taa: ’Na keiki soni wanwan di womi aki ta pakisei!’”

16. Faandi mbei u musu ta kai dee famii fuu u de ta ko a dee komakandi?

¹⁶ Wan fasi fa u sa heepi dee famii fuu, hën da te u ta kai de u de ko a komakandi ku u (1 Kol. 14:24, 25). Di fosu komakandi di Wayne bi go, da di komakandi di u ta hoi u mëni di dëdë u Jesosi. Ma a bi go a di komakandi dë, u di de bi hoi ën baka wooko juu, söseei u di di komakandi dë an bi o hoi longi. A bi taki taa: „Ma bi fusutan hii soni u di taki di de bi hoi, ma ma fëëkëtë dee sëmbë dee mi bi si. De bi ta ko a mi ko fan ku mi, nöö de bi ta da mi maun. Mi bi sa si a di fasi fa de bi dë taa de bi lobi sëmbë tuutuu.” Wan baaa ku hën mujëë bi ta libi bunu ku Pauline seei. De bi ta heepi ën luku di womi mii fëën te de bi dë a dee komakandi, söseei te de bi dë a di peleikiwooko. Fëën mbei di Wayne bi kë ko sabi soni u di tuutuu lei, hën a bi hakisi di manu u di sisa dë faa lei ën soni u Bëibel.

17. Andi da wan soni di wa musu tei useei u hogi fëën, nöö faandi mbei wa musu ko wei u heepi dee famii fuu?

¹⁷ U ta kë seei taa dee famii fuu ko ta dini Jehovah makandi ku u. Ma hii fa u ta mbei taanga möiti u heepi de u de ko toon dinima u Gadu, tökuseei a sa pasa taa de an ko a di tuutuu lei. Ee a ko dë sö, tökuseei wa musu tei useei u hogi u di de an kë dini Jehovah. Wa sa duwengi sëmbë u de biibi dee soni dee u ta biibi. Ma te dee famii fii si taa i ta dë waiwai u di i ta dini Jehovah, nöö di soni dë sa mbei deseei ko kë dini Jehovah tu. Fëën mbei i musu ta begi da de, söseei i musu ta fan ku de a wan suti fasi. Na ko wei u heepi dee famii fii! (Tjab. 20:20) I sa dë seiki taa Jehovah o mbei i feni gaan bunu u di i ta mbei taanga möiti u heepi dee famii fii. Ee de haika i, nöö de o feni libi!