BIIBI ta mbei u ko taanga seei. Hii fa Saatan kë poi u ku Jehovah, tökuseei di biibi di u abi sa heepi u fuu „tapa dee faja piiwa” di Saatan ta suti ko a u (Ef. 6:16). Ee u abi biibi, nöö woo sa pasa hiniwan fuka di ta ko a u pasi, aluwasi dee fuka fuu bigi kuma wan gaan kuun. Jesosi bi piki dee bakama fëën taa: „Ee un abi wan piki biibi tëin sö seei kuma di sii fu di pau de kai mutaadi, nöö i sa go taki da wan gaan kununu taa ’hopo kumutu dë’, nöö a o kumutu dë go” (Mat. 17:20). U di biibi ta mbei u ku Jehovah ko dë möön gaan mati, mbei a bunu fuu hakisi useei dee soni aki: Andi da biibi? Unfa di fasi fa di hati fuu dë, nama ku di biibi fuu? Unfa u sa mbei di biibi fuu ko möön taanga? Ambë u musu ta biibi?​—Lom. 4:3.

Na te wan sëmbë ta biibi andi di Bëibel ta taki, hën da a abi biibi. ’Biga dee [taku jeje] seei ta biibi [taa Gadu dë], hën mbei de ta dëdë ku panta sö’ (Jak. 2:19). Wë nöö andi da biibi?

Di Bëibel ta piki u andi da biibi. Di fosu soni di a ta taki u biibi, hën da „biibi . . . da wan soni dë a i hati i ta mëni nöö i sabi gbelingbelin taa joo feni ën nöömö” (Heb. 11:1a). Ee i abi biibi, nöö joo biibi taa Jehovah ta taki tuutuu soni, söseei joo biibi taa hii soni di a ta taki o pasa tuutuu. Jehovah bi piki dee Isaëli sëmbë taa: „Ee un sa mbei taa didia an jabi möön nasö taa ndeti an tapa möön a di juu di mi buta da de, nöö di buka di mi mbei ku di futuboi u mi de kai Dafiti sa booko tu” (Jel. 33:20, 21). I ta fëëë taa ndeti ku didia an o dë möön u di di sonu an o ta jabi möön, söseei u di an o go möön u? Wë nönö. Na seei. Wë ee i dë seiki taa di sonu o ta jabi, söseei taa a o nango hiniwan daka, nöö i sa dë seiki tu taa di sëmbë di seeka soni u ndeti ku didia sa dë, sa du dee soni dee a paamusi u.​—Jes. 55:10, 11; Mat. 5:18.

Di u tu soni di Bëibel ta taki u biibi, hën da biibi ta mbei i dë seiki u „wanlö soni ja ta si ma i sabi gbelingbelin taa de dë tuu” (Heb. 11:1b). Na un futu? Wë boo taa wan mii hakisi i taa: ’Unfa i du sabi taa ventu dë tuutuu?’ Hii fa ja si ventu wan daka, tökuseei joo kë heepi di mii faa ko fusutan taa di soni aki dë tuutuu. Kandë joo piki ën taa u sa jei di ventu te a ta böö, söseei taa u ta si unfa dee uwii u dee pau ta buli te di ventu ta böö, nasö kandë joo piki ën woto soni jeti. Te di mii ko biibi di soni aki, nöö a o ko fusutan taa hii fa ja sa si wan soni, tökuseei i sa biibi ta a dë. Sö nöö a dë tu ku biibi.​—Lom. 1:20.

Soni hën ta mbei wan sëmbë ko abi biibi. Fëën mbei ee wan sëmbë kë ko abi biibi, nöö a musu ko sabi „di tuutuu lei finifini” (1 Tim. 2:4, NW). Ma na sabi nöö u musu ko sabi di tuutuu lei. Apösutu Paulosu bi taki taa: „Ku i hati i ta biibi” (Lom. 10:10). Na biibi nöö wan sëmbë musu biibi dee soni dee a ta lei a di Bëibel, ma a musu ko lobi de tu. Te a dë sö ufö a o sa lei taa a abi biibi, u di a o ta libi a wan fasi di ta kai ku Gadu (Jak. 2:20). Wan sëmbë di an lobi dee lei u Bëibel tuutuu an o kë biibi dee soni dë, u di an kë si soni woto fasi nasö u di a kë du soni kumafa a kë (2 Pet. 3:3, 4; Jud. 18). Di soni aki mbei, na hii dee sëmbë dee bi si dee foombo soni dee Gadu  bi mbei sëmbë du, bi ko abi biibi (Nöb. 14:11; Joh. 12:37). Di santa jeje u Gadu an ta mbei hii sëmbë ko abi biibi. Ma dee sëmbë dee lobi di tuutuu lei nöö a ta mbei ko abi biibi.​—Gal. 5:22; 2 Tes. 2:10, 11.

Wan u dee sëmbë di bi abi wan taanga biibi, da Könu Dafiti (Heb. 11:32, 33). Ma na hii dee sëmbë dee ku Dafiti bi ta dë a wan wosu, bi abi sö wan taanga biibi. Di möön gaan baaa u Dafiti de kai Eliab bi bai Dafiti di a bi si taa a kë go feti ku Goliati. Di soni di a bi du dë bi ta lei taa an bi abi wan taanga biibi taa Jehovah bi sa heepi de (1 Sam. 17:26-28). De an ta pai sëmbë ku biibi, söseei wa ta feni ën a dee gaan sëmbë fuu. Hën da Dafiti bi ko abi biibi u di a bi ta mbei möiti fu hën ku Gadu ko dë mati.

A Psalöm 27, Dafiti ta konda unfa a du ko abi wan taanga biibi (vers 1). Dafiti bi ta pakisei fundu u dee soni dee bi miti ën, söseei a bi ta pakisei fundu u dee soni dee Jehovah bi du ku dee felantima fëën (vers 2, 3). A bi lobi di tenti u Jehovah (vers 4). Hën ku dee woto dinima u Gadu bi ta dini Gadu makandi a di tenti fëën (vers 6). A bi ta begi Jehovah ta suku heepi nëën (vers 7, 8). Dafiti bi kë tu u Jehovah lei ën soni (vers 11). Dafiti bi ta si di abi di a bi musu abi biibi kuma wan fanöudu soni seei. Fëën mbei a bi hakisi hënseei taa: „Andi bi o pasa ku mi ee ma bi ta biibi?”​—vers 13.

I sa ko abi wan taanga biibi kuma Dafiti ee i mbei möiti fii ko ta si soni kuma hën, söseei ee i mbei möiti fii ko ta du dee soni dee a bi ta du, kumafa Psalöm 27 ta taki. U di u ta ko abi biibi baka te u ko sabi soni u di tuutuu lei, mbei u sa taki taa möön i ta lei soni a di Wöutu u Gadu ku dee woto buku fuu dee ta taki soni u di Bëibel, möön joo sa lei taa i abi di fasi aki, di di santa jeje u Gadu ta mbei sëmbë ko abi (Ps. 1:2, 3). Te i ta lei soni u Bëibel, nöö i musu ta tei ten fii pakisei fundu u dee soni dee i ta lei. Ee u ta pakisei fundu u dee soni dee u ta lei, nöö möönmöön woo ta dë ku tangi a hati u dee soni dee Jehovah ta du da u. U di joo dë ku tangi a hati, mbei joo kë lei taa i abi biibi. Hën da joo kë nango a dee komakandi, söseei joo ta kë peleiki da wotowan (Heb. 10:23-25). U ta lei tu taa u abi biibi te wa ta ko „wei u begi Gadu” (Luk. 18:1-8). Fëën mbei ’hiniwanten i musu ta begi’, söseei i musu dë seiki taa „a a’ toobi ku i” (1 Tes. 5:17; 1 Pet. 5:7). Te u abi biibi, nöö di biibi fuu ta mbei u du soni di bunu a Gadu wojo, nöö te u ta du soni di bunu a Gadu wojo, nöö di biibi fuu ta ko möön taanga.​—Jak. 2:22.

A di ndeti ufö Jesosi dëdë, hën Jesosi bi piki dee bakama fëën taa: „Un biibi Gadu, nöö un biibi mi tu” (Joh. 14:1, NW). Di soni aki ta lei u taa wa musu ta biibi a Gadu wanwan, ma u musu ta biibi a Jesosi tu. Unfa i sa lei taa i ta biibi a Jesosi? Boo luku dii fasi fa u sa du di soni dë.

 Di fosu soni di i musu du u lei taa i ta biibi a Jesosi, hën da i musu ta si di lusupaima kuma wan kado di Gadu da i vö. Apösutu Paulosu bi taki taa: „Nöö hii fa mi ta libi a di goonliba aki, nöö ku biibi nöö a di [Mii] u Masa Gadu liba, di bi lobi mi tee a tei mi dëdë dëdë da mi” (Gal. 2:20). Te i ta biibi a Jesosi, nöö i ta biibi taa di lusupaima sa heepi i. I ta biibi tu taa u di lusupaima hedi mbei Gadu sa da i paadon u dee zöndu fii. Boiti di dë, i ta biibi tu taa u di Jesosi paka di lusupaima da u, mbei u sa libi u teego. Nöö di soni dë ta lei taa Gadu lobi i (Lom. 8:32, 38, 39; Ef. 1:7). Ee i ta biibi tuutuu taa di lusupaima sa heepi i, nöö ja o ta kuutu iseei.​—2 Tes. 2:16, 17.

Di u tu soni di i musu du u lei taa i ta biibi a Jesosi, hën da i musu ta begi Jehovah fii ku ën sa ko dë möön gaan mati. U sa ta begi Jehovah u di Jesosi dëdë paka paima da u, söseei u sa nango nëën „waiwai go begi ën ka a dë nëën könubangi dë ta tii u ku ën bunuhati. Nöö a o abi tjali fuu, nöö a o ta heepi u a soni ku ën bunuhati te u dë a wan fuka” (Heb. 4:15, 16; 10:19-22). Te u ta begi, nöö a ta heepi u fu wa du zöndu.​—Luk. 22:40.

Di u dii soni di i musu du u lei taa i ta biibi a Jesosi, hën da i musu ta piki Jesosi buka. Apösutu Johanisi bi taki taa: ’Nöö ee wan sëmbë i ta biibi a di Womi Mii u Gadu i si dë, nöö i abi di libi u teego kaa. Ma ee wan sëmbë ja ta piki hën buka, nöö ja o feni di libi dë möönsö, biga di hatiboonu u Gadu dë a i liba kaa’ (Joh. 3:36). Johanisi ta lei taa te i ta biibi wan sëmbë, nöö joo ta piki hën buka a soni tu. Di soni aki ta lei u taa te i ta piki Jesosi buka a soni, ufö i sa taki taa i ta biibi ën. I ta piki Jesosi buka te i ta hoi „dee wëti u Keesitu”. Dee wëti u Keesitu da hii dee soni dee Jesosi bi lei dee bakama fëën, ku dee soni dee a bi piki de taa de musu ta du (Gal. 6:2). I ta piki Jesosi buka tu te i ta du dee soni di „di köni saafu di dë u futoou” ta piki u fuu du, u di Jesosi hën ta tii de (Mat. 24:45, NW). Te i ta piki Jesosi buka, nöö joo sa hoi dou hii fa gaan fuka ta miti i.​—Luk. 6:47, 48.

Wan daka, wan womi bi piki Jesosi taa: „Mësitë o, mi ta biibi e. Ma nöö fii heepi mi be mi biibi tjika” (Maik. 9:24). Di womi aki bi abi biibi, ma a bi fusutan taa a bi abi möön biibi fanöudu. Wë sö nöö a dë tu taa so juu soni o miti u a di libi ka woo abi möön biibi fanöudu. Hii u tuu sa du soni nöunöu kaa u mbei di biibi fuu ko möön taanga. Wë kumafa u bi taki kaa, te u ta lei soni a di Wöutu u Gadu, söseei te u ta pakisei fundu u dee soni dee u ta lei, nöö di biibi fuu o ko möön taanga. Nöö te di biibi fuu ko taanga kaa, nöö a o heepi u fuu ko möön lobi Jehovah. Di biibi fuu sa ko möön taanga tu te u ku dee woto baaa ku sisa ta dini Jehovah makandi, te u ta konda soni u di biibi fuu da wotowan, söseei te u ta begi nöömö. Boiti di dë, te u ta mbei di biibi fuu ko möön taanga, nöö woo feni di möön gaan bunu di wan sëmbë sa feni. Di Wöutu u Gadu ta piki u taa: „Ma nöö un dee sëmbë u mi naandë, . . . un musu heepi unu seei makandi be di biibi fuunu musu ta göö möönmöön u sëmbë si ën a unu libi. . . . Un musu ta hoi unu seei a wan fasi ka di lobi u Gadu sa dou a unu, nöö a di lobi dë seei dendu un musu dë.”​—Jud. 20, 21.