1. Faandi mbei Jehovah mbei soni ko dë a libi?

WAN ten bi dë ka Jehovah wanwan tö bi dë. Ma di soni dë an bi ta mbei a ta tjali. Jehovah an abi sëmbë fanöudu faa sa ta dë waiwai. Ma a bi kë u woto soni ko dë a libi tu, söseei a bi kë u de ta dë waiwai. Nöö u di a abi lobi, mbei a bi bigi mbei soni.​—Ps. 36:9; 1 Joh. 4:19.

2. Unfa Jesosi ku dee ëngëli bi fii di Jehovah bi mbei woto soni?

² Di Jehovah o bigi mbei soni, hën a mbei di Womi Mii fëën de kai Jesosi. Baka di dë, hën a tei di fosu Womi Mii fëën aki, u heepi ën „mbei hii soni”, te kisi dee milionmilion ëngëli tu (Kol. 1:16). Jesosi bi ta wai seei taa a bi sa wooko makandi ku hën Tata (Nöng. 8:30). Dee ëngëli seei bi ta wai tu. De bi si di Jehovah ku di Gaan Bunu Wookoma fëën de kai Jesosi, bi mbei liba ala ku goonliba aki. Andi dee ëngëli bi du? Wë de bi ta „gafa [Gadu] ta kai wolo zöiiin” di a mbei di goonliba. Nöö a musu u dë sö taa de bi ta gafëën tu da hiniwan u dee soni dee a bi mbei bakaten, möönmöön di a bi mbei libisëmbë (Jöpu 38:7; Nöng. 8:31). Hiniwan u dee soni dee Jehovah mbei aki, ta lei fa Jehovah abi lobi tjika, söseei fa a köni tjika.​—Ps. 104:24; Lom. 1:20.

3. Un heepi di lusupaima di Jesosi bi paka tja ko, kumafa 1 Kolenti 15:21, 22 ta taki?

³ Jehovah bi kë taa libisëmbë bi musu ta libi waiwai u nöömö a di waiti goonliba di a bi mbei. Ma di Adam ku Eva hopo fia ku di Tata u de di bi lobi de, hën zöndu ku dëdë ko dë a goonliba  (Lom. 5:12). Andi Jehovah bi du? Wantewante dë, a bi taki andi a bi o du u heepi libisëmbë (Ken. 3:15). Jehovah bi seeka soni u di Womi Mii fëën de kai Jesosi bi sa ko paka wan paima, di bi o jabi pasi da dee bakamii u Adam ku Eva, u de kumutu a zöndu ku dëdë basu. A sö wan fasi, a bi o da hiniwan sëmbë pasi u de taki ee de kë dini ën. Nöö dee sëmbë dee bi o dini ën, bi o sa libi u teego.​—Joh. 3:16; Lom. 6:23; Lesi 1 Kolenti 15:21, 22.

4. Fuun soni woo taki a di woto aki?

⁴ Di paamusi di Gadu paamusi u taa a o weki dee sëmbë dee dëdë ko a libi baka, ta mbei u ta hakisi useei sömëni soni. U sa ta hakisi useei taa unfa soni o pasa te Gadu o weki sëmbë ko a libi baka? Woo sa sabi dee sëmbë fuu möön te Gadu weki de u? Na un fasi di weki di sëmbë o weki ko a libi baka o mbei u ta wai? Söseei unfa di pakisei di woo ta pakisei fundu u di weki di sëmbë o weki baka, sa heepi u fuu lei taa u ta tei di lobi, di köni, ku di pasensi di Gadu abi, u bigi? Boo taki u hiniwan u dee soni aki.

5. Faandi mbei u sa dë ku di mëni taa na hii sëmbë Gadu o weki ko a libi a di seei ten?

⁵ Jehovah o tei di Womi Mii fëën u weki milionmilion sëmbë. U sa ta dë ku di mëni taa na hii dee sëmbë dë tuu o weki ko a libi a di wan seei ten. Faandi mbei u sa taki sö? Wë ee gaan hia sëmbë ko dë a goonliba wan pasi vou, nöö soni sa waka fanjanfanjan. Ma nöiti Jehovah ta du soni fanjanfanjan. A sabi taa u libisëmbë sa libi fiifii, nöö soni musu seeka bunu (1 Kol. 14:33). Di Jehovah ku Jesosi bi ta seeka di goonliba u libisëmbë bi sa libi nëën, nöö Jehovah bi du soni ku köni, söseei ku pasensi. An bi seeka hii soni wan pasi vou. Ma a bi seeka de pikipiki u te a kaba. Baka di dë, hën  a mbei libisëmbë. Wë sö nöö Jesosi seei o du soni tu a di pisiten u di Dusu Jaa Tii. A o wooko makandi ku dee sëmbë dee o pasa Amagedon libilibi, u seeka wosu, soni u njan, soni bisi, ku woto soni jeti, da dee sëmbë dee o weki ko a libi baka.

6. Un pei sëmbë Jehovah o weki ko a libi tu, kumafa Tjabukama 24:15 ta taki?

⁶ Di möön gaan soni di dee sëmbë dee o pasa Amagedon libilibi o du, hën da de o lei dee sëmbë dee o weki ko a libi baka soni u di Könuköndë u Gadu. Söseei de o lei de andi Jehovah kë taa de musu du. Faandi mbei u taki sö? Wë u di gaansë u dee sëmbë dee o weki ko a libi baka, o dë sëmbë di di Bëibel ta kai sëmbë „dee an bi libi bunu”. (Lesi Tjabukama 24:15.) A o dë u dee sëmbë aki tooka sömëni soni a de libi, sö taa de sa feni wini u di lusupaima u Keesitu, söseei u de sa libi u teego. A o dë fuu heepi milionmilion sëmbë di an bi jei soni u Jehovah wan daka, u de ko sabi Jehovah. Pakisei luku unfa di wooko dë o hia tjika. Hiniwan u dee sëmbë aki o abi wan sëmbë di ta lei ën soni u Bëibel, kumafa soni dë a di ten fuu aki ö? De o buta dee sëmbë aki a tookatooka kemeente u de sa lei de unfa deseei sa heepi dee woto sëmbë dee o weki ko a libi ö? A o dë fuu wakiti fuu si unfa soni o dë. Ma u sabi taa a kaba u di Dusu Jaa Tii u Keesitu „di goonliba o fuu ku di lei u Jehovah” (Jes. 11:9). Woo abi te a hia soni u du a dee dusu jaa dë, ma dee soni dë o ta da u piizii seei!

7. Faandi mbei u sa taki taa dee sëmbë u Gadu o lei taa de ta fii da wotowan, te de o heepi dee sëmbë dee o weki ko a libi baka?

⁷ A di pisiten u di Dusu Jaa Tii u Keesitu, a o dë u hii dee sëmbë u Jehovah tooka soni a de libi go dou, u de sa mbei Jehovah wai ku de. Hën da hii de tuu o ta lei taa de ta fii da wotowan. A sö wan fasi de o ta heepi dee sëmbë dee o weki ko a libi, u de sa bia libi, sö taa de sa libi kumafa Jehovah kë (1 Pet. 3:8). Dee sëmbë dee o weki ko a libi baka o si taa dee sëmbë u Jehovah abi sakafasi. De o si tu taa dee sëmbë u Jehovah ta mbei möiti go dou u de tooka soni sö taa Jehovah sa wai ku de, nöö de o kë dini Jehovah makandi ku dee sëmbë fëën.​—Fil. 2:12.

8. Faandi mbei u sa dë seiki taa woo sa sabi dee famii fuu ku dee mati fuu dee o weki ko a libi baka?

⁸ Sömëni soni dë di ta mbei u biibi taa woo sa si dee famii ku dee mati fuu sabi, te Gadu weki de ko a libi baka. Te u luku di fasi fa Jehovah bi weki sëmbë ko a libi a di ten di pasa, nöö u ta si taa u sa dë ku di mëni taa te Jehovah o weki sëmbë ko a libi, nöö a o da de wan sinkii di dë kumafa de bi dë ufö de dëdë. Di soni dë ta mbei u dë ku di mëni tu taa Jehovah o mbei de ta fan, ta pakisei a di wan seei fasi, kumafa de bi ta du ën kölö sö ufö de dëdë. Hoi a pakisei taa Jesosi bi tei dëdë maaka ku duumi. Söseei a bi tei di weki di sëmbë o weki ko a libi, maaka ku di weki di sëmbë ta weki a duumi (Mat. 9:18, 24; Joh. 11:11-13). Te wan sëmbë weki a duumi, nöö a ta fan di wan seei fasi, a ta pakisei di wan seei fasi, söseei a ta mëni dee soni dee a bi sabi jeti ufö a go kandi. Luku di woto u Lazalosi. A bi dëdë fö daka longi kaa, nöö sinkii fëën bi bigi pondi. Ma di Jesosi bi weki ën ko a libi baka, dee sisa fëën bi si ën sabi wantewante, nöö Lazalosi seei bi sabi bumbuu taa dee sisa fëën di dë.​—Joh. 11:38-44; 12:1, 2.

9. Faandi mbei u sa taki taa dee sëmbë dee o weki ko a libi baka, o dë zöndu libisëmbë jeti?

⁹ Jehovah paamusi u taa te Keesitu o tii, nöö na wan sëmbë o taki taa: „Mi suwaki” (Jes. 33:24; Lom. 6:7). Hën da dee sëmbë dee o weki ko a libi baka, o dë gösöntu. Ma di soni aki an kë taki taa dee sëmbë aki an o abi zöndu möön  te Gadu weki de. Ee soni bi o dë sö, nöö a kan taa dee famii u de ku dee mati u de an bi o sa sabi de möön. A möön djei kuma a di Dusu Jaa Tii u Keesitu, libisëmbë o ta ko bunu pikipiki, u te de an abi zöndu möön. A kaba u dee dusu jaa ufö Jesosi o toona da hën Tata di Könuköndë. A di ten dë, di Könuköndë o kaba du hii dee soni dee Jehovah bi kë faa du, te kisi di heepi di a musu heepi libisëmbë u de an abi zöndu möön.​—1 Kol. 15:24-28; Ako. 20:1-3.

10. Unfa joo fii te Gadu weki sëmbë ko a libi baka?

¹⁰ Pakisei unfa joo fii te i toona si dee famii fii ku dee mati fii. An dë u taki taa joo wai te na soni. Joo wai sö tee taa i kanda gafa Jehovah u? Wan soni di u dë seiki fëën, hën da joo ko möön lobi di Tata fii di ta booko hën hedi ku i, ku di Womi Mii fëën di an ta pakisei hënseei nöö, u di de seeka soni da u fuu sa si dee sëmbë fuu baka.

11. Andi o pasa ku dee sëmbë dee ta piki Gadu buka, kumafa Jesosi bi taki a Johanisi 5:28, 29?

¹¹ Pakisei fa dee sëmbë dee o ko a liba baka o fii, te de o ta tooka dee fasi di de bi abi fosu, u de sa libi kumafa Gadu kë. Gadu o da dee sëmbë dee o du di soni aki pasi u de libi u teego a di Paladëisi. Ma Jehovah an o da dee sëmbë dee an kë bia libi pasi u de libi a di Paladëisi. An o da de pasi u de poi di bööböö libi di o dë ala.​—Jes. 65:20; Lesi Johanisi 5:28, 29.

12. Na un fasi Jehovah o mbei hii dee sëmbë dee o dë a goonliba aki, feni gaan bunu?

¹² Te di Könuköndë o tii, nöö hii dee sëmbë u Gadu o si taa di soni di sikifi a Nöngö 10:22 da tuutuu soni. A sikifi dë taa: „Di bunu u Jehovah, hën ta mbei sëmbë ko gudu, nöö an ta mbei de ta tjali.” Di santa jeje u Jehovah o ta heepi dee sëmbë fëën u de ko ta möön du soni kuma Keesitu, u te de ko dë söndö föutu (Joh. 13:15-17; Ef. 4:23, 24). Hiniwan daka de o ta ko dë möön gösöntu, söseei de o ta ko dë möön bunu sëmbë. Na piki suti di libi o suti a di ten dë! (Jöpu 33:25) Ma unfa di pakisei di joo ta pakisei fundu u di weki di sëmbë o weki baka, sa heepi i a di ten aki?

13. Andi Psalöm 139:1-4 ta lei u te a nama ku di fa Jehovah sabi u tjika, nöö unfa di weki di Jehovah o weki sëmbë ko a libi baka, o heepi u fuu si di soni dë?

¹³ Wë kumafa u bi taki kaa, te Jehovah o weki sëmbë ko a libi baka, nöö de o ta mëni dee soni di de bi sabi jeti, söseei de o dë di seei sëmbë di de bi dë jeti. Pakisei di soni dë luku. Jehovah lobi i sö tee taa a ta buta mëni a hii dee soni dee i ta pakisei, a hii dee soni dee i ta taki, a hii dee soni dee i ta du, söseei a di fasi fa i ta fii. Fëën mbei ee a musu weki i ko a libi baka, nöö a o sa mbei i ta pakisei, ta du soni kuma fosu. Könu Dafiti bi sabi taa Jehovah sabi hiniwan fuu bumbuu. (Lesi Psalöm 139:1-4.) Unfa u ta fii te u ko fusutan unfa Jehovah sabi u tjika?

14. Unfa u musu fii te u ta kai pakisei a di fa Jehovah sabi u tjika?

¹⁴ Te u ta kai pakisei a di fa Jehovah sabi u tjika, nöö wa musu ta dë pantapanta. Faandi mbei? Hoi a pakisei taa Jehovah ta booko hën hedi ku u tuutuu. A lobi di fasi fa hiniwan fuu dë. A ta mëni hii dee soni dee u öndöfeni a di libi, dee mbei u ko dë kumafa u dë. Di soni aki ta da u kötöhati seei! Nöiti u musu si kuma u dë u wanwan. Hiniwan miniti, hiniwan daka, Jehovah ta dë leti a u bandja ta wakiti u wan okasi dou faa sa heepi u.​—2 Klon. 16:9.

15. Unfa di weki di Jehovah o weki sëmbë ko a libi baka ta lei taa a köni?

¹⁵ Te sëmbë ta fëëë u dëdë, nöö dee felantima u de sa mbei de du soni di de an bi o kë du.  Dee sëmbë dee Saatan ta tii, ta tei di soni aki u duwengi sëmbë u de bia baka da dee mati u de nasö u de disa di soni di de ta biibi. Ma de an sa duwengi u fuu du di soni dë. U sabi taa ee dee felantima fuu kii u seei, Jehovah o weki u ko a libi baka (Ako. 2:10). U dë seiki taa na wan u dee soni di de ta du, sa tapa u fuu ku Jehovah an dë mati möön (Lom. 8:35-39). Wan köni soni seei Jehovah du, di a paamusi u taa ee u dëdë, nöö a o weki u ko a libi baka! U di a paamusi u di soni aki, mbei wa ta fëëë ee dee sëmbë dee dë ku Saatan a wan së, ta piki u taa de o kii u ee wa du andi de taki. Boiti di dë, di soni aki ta da u taanga fuu hoi useei a Jehovah, aluwasi andi ta miti u.

16. Andi ku andi i musu hakisi iseei, nöö unfa di fasi fa joo piki sa heepi i fii ko sabi unfa i ta futoou Jehovah tjika?

¹⁶ Ee dee sëmbë dee ta buuse Jehovah taki taa de o kii i, joo futoou Jehovah taa a o weki i ko a libi baka u? Unfa i sa sabi ee joo futoou Jehovah a di ten dë? Wan fasi fa i sa sabi, hën da i sa hakisi iseei taa: ’Dee pikipiki soni dee mi ta du hiniwan daka ta lei taa mi ta futoou Jehovah u?’ (Luk. 16:10) Wan woto soni di i sa hakisi iseei da: ’Di fasi fa mi ta libi ta lei taa mi ta biibi di paamusi di Jehovah paamusi mi taa a o da mi dee soni dee mi abi fanöudu, ee mi ta suku di Könuköndë fëën fosu ö?’ (Mat. 6:31-33) Ee i piki aai te i hakisi iseei dee soni aki, hën da i ta lei taa i ta futoou Jehovah. Nöö joo dë seekaseeka da hiniwan soni di o miti i a di ten di ta ko.​—Nöng. 3:5, 6.

17. (a) Unfa di weki di Jehovah o weki sëmbë ko a libi baka, ta lei taa a abi pasensi? (b) Unfa u sa lei taa u ta tei di pasensi di Jehovah abi, u bigi?

¹⁷ Jehovah buta di daka ku di juu kaa, ka a o booko di hogi goonliba aki (Mat. 24:36). An o biinga du soni ufö di ten dë dou. A kë weki dee sëmbë dee dëdë ko a libi tuutuu, ma a abi pasensi (Jöpu 14:14, 15). A ta wakiti u di bunu ten dou, faa sa weki de ko a libi baka (Joh. 5:28). U musu tei ën u bigi taa Jehovah abi pasensi. Pakisei di soni aki luku: U di Jehovah abi pasensi, mbei sömëni sëmbë bi feni ten „bia de libi ko nëën”, te kisi useei tu (2 Pet. 3:9). Jehovah bi o kë u hii sëmbë feni di libi u teego. Fëën mbei, boo lei taa u ta tei di hoi di Jehovah ta hoi pasensi, u bigi. Unfa u sa du di soni dë? Wë u sa du ën te u ta mbei hii möiti di u sa, fuu feni dee sëmbë dee „ta si soni a di soifi fasi u de feni di libi u teego”, nöö u heepi de u de ko lobi Jehovah, söseei u de dini ën (Tjab. 13:48, NW). Te u du sö, nöö dee sëmbë  aki o feni wini u di pasensi u Jehovah, leti kumafa useei ta feni wini fëën.

18. Faandi mbei u musu ta hoi pasensi da wotowan?

¹⁸ Jehovah ta hoi pasensi ku u. A sabi taa baka dee dusu jaa ufö wa o abi zöndu möön. Nöö solanga di ten dë an dou, Jehovah o ta da u paadon u dee zöndu fuu. Fëën mbei u musu ta djeesi Jehovah. U musu ta buta pakisei a dee bunu fasi di wotowan abi, söseei u musu ta hoi pasensi da de. Boo luku di woto u wan sisa. Soni bi ko ta da di manu u di sisa aki bookohedi sö tee taa an bi ko nango a dee komakandi möön. Di sisa bi taki taa: „Di soni dë bi taanga da mi tuutuu. Libi fuu bi ko tooka wan pasi vou sö, nöö wa bi sa du dee soni dee u bi kë du möön.” Ma hii fa soni bi ko dë sö, di sisa aki bi lobi hën manu, nöö a bi ta hoi pasensi dëën. A bi ta buta futoou a Jehovah, nöö a bi ta hoi dou. A bi du soni kuma Jehovah. A bi ta buta pakisei a dee bunu soni di hën manu bi ta du. A bi taki taa: „Mi manu abi sömëni bunu fasi, nöö a ta mbei hii möiti faa sa kisi hënseei baka.” A dë fanöudu seei fuu ta hoi pasensi ku dee sëmbë fuu wosudendu nasö u di kemeente, dee soni ta taanga da!

19. Andi u musu dë kabakaba u du?

¹⁹ Jesosi ku dee ëngëli bi ta wai di Gadu bi mbei di goonliba. Ma pakisei luku unfa de o wai tjika te de si di goonliba ko fuu ku sëmbë di an abi zöndu, di lobi Jehovah, söseei di ta dini ën. Pakisei fa dee sëmbë dee o go tii ku Keesitu a liba ala o wai tjika, te de o ta si fa libisëmbë ta feni wini u di wooko di de ta du (Ako. 4:4, 9-11; 5:9, 10). Pakisei tu fa di libi o dë te wa o ta këë möön, ma woo ta bai ta lafu. Söseei pakisei fa soni o dë te siki, tjali, ku dëdë an o dë möön (Ako. 21:4). Dë kabakaba u djeesi di Tata fii a di lobi di a abi, a di köni di a abi, söseei a di pasensi di a abi. Ee i mbei di möiti dë, nöö joo ta dë waiwai aluwasi andi ta miti i (Jak. 1:2-4). U sa dë ku tangi a hati seei u di Jehovah paamusi u taa „tee sëmbë dëdë de o toona weki baka”!​—Tjab. 24:15.