1. Un gaandi u abi?

U TA tei ën u bigi seei taa u sa dë a di ölganisaasi u Jehovah! U ta dë bööböö, söseei u ta wai te u ta dini Jehovah makandi ku dee baaa ku dee sisa fuu. Ma andi i sa ta du a di kemeente?

2. Andi Paulosu bi taki a wantu u dee biifi fëën di Gadu bi mbei a sikifi?

² U sa ko sabi andi u sa ta du a di kemeente, te u buta pakisei a di soni di apösutu Paulosu bi taki a so u dee biifi fëën di Gadu bi mbei a sikifi. A hiniwan u dee biifi fëën, Paulosu bi tei di kemeente maaka ku wan libisëmbë sinkii. Söseei a bi tei hiniwan sëmbë u di kemeente maaka ku peipei kamian u libisëmbë sinkii.​—Lom. 12:4-8; 1 Kol. 12:12-27; Ef. 4:16.

3. Andi woo taki a di woto aki?

³ A di woto aki, woo luku dii soni di u sa lei a di soni di Paulosu bi taki. Di fosu soni, hën da woo si taa hii sëmbë abi wan wooko * di a sa du a di kemeente. Di u tu soni, hën da woo luku andi u sa du ee u ta si kuma wa abi na wan du a di kemeente. Nöö di u dii soni hën da, faandi mbei u musu ta du di wooko di Jehovah da u fuu du a di kemeente.

4. Andi u ta lei u Loomë 12:4, 5?

⁴ Di fosu soni di u ta lei a di soni di Paulosu bi taki, hën da hiniwan fuu abi wan wooko di u sa du a di wosudendu u Jehovah. Paulosu bi taki taa: „Ja si fa di sinkii fuu aki dë nö? A abi sömëni pisi, ma de an ta du di wan wooko. Wë söseei a dë a u tu kuma biibima. Fa u ku [Jesosi] Keesitu nama aki, nöö u dë hia seei, ma töku u dë kuma di wan kodo sinkii nöö, nöö hiniwan fuu dë kuma wan kamian fëën” (Lom. 12:4, 5). Andi Paulosu bi kë taki? Wë a bi kë taki taa hiniwan fuu abi wan soni di u ta du a di kemeente, nöö hiniwan fuu dë fanöudu.

5. Andi da dee „peipei gudu” di Jehovah da di kemeente?

⁵ Kandë te i ta jei u sëmbë di abi wan wooko a di kemeente, nöö kandë wantewante i ta pakisei dee sëmbë dee ta tei fesi (1 Tes. 5:12; Heb. 13:17). A dë sö tuu taa Jehovah tei Jesosi faa da di kemeente „peipei gudu” (Ef. 4:8). Dee „peipei gudu” aki da dee baaa u di Tii Kulupu, dee baaa dee ta heepi dee baaa aki, dee baaa dee dë a di bëikantoo komite, dee keling-gaanwomi, dee baaa dee ta lei baaa ku sisa soni a dee peipei siköö di di ölganisaasi ta hoi, dee gaanwomi ku dee dinai. Jehovah buta dee baaa aki u de luku dee sikapu fëën. A da de di santa jeje fëën u de sa heepi dee baaa ku dee sisa u de, u de ko abi wan möön taanga biibi.​—1 Pet. 5:2, 3.

6. Andi dee baaa di Jehovah buta a wooko ku di santa jeje fëën, ta mbei möiti u du, te u luku 1 Tesalonika 2:6-8?

⁶ Jehovah ta da dee baaa di santa jeje fëën sö taa de sa ta du peipei wooko. Leti kumafa peipei kamian u libisëmbë sinkii ta du soni u tja wini ko da hii di sinkii, sö nöö dee baaa dee Jehovah buta a wooko ku di santa jeje fëën, ta wooko taanga u de sa heepi hii dee baaa ku dee sisa u di kemeente. De an ta suku u sëmbë gafa de. Ma de ta mbei taanga möiti u de da dee baaa ku dee sisa u de taanga. (Lesi 1 Tesalonika 2:6-8.) U ta da Jehovah tangi u di u abi dee baaa aki dee an ta pakisei deseei fosu!

7. Un gaan bunu dee baaa ku dee sisa dee ta du di hii-ten diniwooko te feni?

⁷ Kandë so baaa nasö sisa a di kemeente ta du di sëndëlengi wooko, di apaiti pioniliwooko, nasö di kowoonu pioniliwooko. A hii së u goonliba u abi baaa ku sisa di tei di peleikiwooko ko dë wooko u de. A sö wan fasi de sa heepi sömëni sëmbë u de ko dë bakama u Jesosi Keesitu. Hii fa gaansë u dee lö baaa ku sisa aki an ta abi hia möni nasö gudu, tökuseei Jehovah ta mbei de feni sömëni gaan bunu (Maik. 10:29, 30). U lobi dee baaa ku dee sisa aki, nöö u wai taa de dë a di kemeente!

8. Faandi mbei u sa taki taa Jehovah abi hiniwan peleikima fanöudu?

⁸ Ma dee baaa dee abi faantiwöutu ku dee dë a di hii-ten diniwooko wanwan abi soni u du a di kemeente u? Wë nönö! Hiniwan peleikima dë fanöudu da Gadu ku di kemeente (Lom. 10:15; 1 Kol. 3:6-9). U ta taki sö u di wan u dee möön gaan wooko di di kemeente abi, hën da u de heepi sëmbë u de ko dë bakama u di Masa fuu, Jesosi Keesitu (Mat. 28:19, 20; 1 Tim. 2:4). Hii sëmbë di ta du di peleikiwooko, ee de dopu nasö ee de an dopu jeti, ta mbei möiti u si di wooko aki kuma di möön fanöudu wooko di de musu du.​—Mat. 24:14.

9. Faandi mbei u lobi dee sisa fuu?

⁹ Jehovah ta lei taa a ta kai dee sisa gaan soni, u di a ta da de wooko u du a di kemeente. Dee sisa aki ta dini Jehovah ku hii de hati.  De sa dë mujëë di abi manu, mujëë di abi mii, mujëë di manu u de dëdë, nasö mujëë di an tööu. Di Bëibel ta taki u sömëni mujëë sëmbë di bi ta du soni di bi ta kai ku Gadu. De da sëmbë di u sa djeesi a di biibi di de bi abi, a di fasi fa de bi ta du soni fajafaja, a di degihati di de bi abi, a di fasi fa de bi ta da sëmbë soni, söseei a di fasi fa de bi ta du bunu da wotowan ku di fasi fa de bi ta du soni ku köni (Luk. 8:2, 3; Tjab. 16:14, 15; Lom. 16:3, 6; Fil. 4:3; Heb. 11:11, 31, 35). U ta da Jehovah tangi u di a da u dee lö sisa aki. De ta lei taa de abi dee bunu fasi dë tu!

10. Faandi mbei u lobi dee baaa ku dee sisa fuu dee ko gaandi?

¹⁰ U ta wai tu taa sömëni baaa ku sisa di ko gaandi kaa, dë a di kemeente fuu. A so kemeente u abi baaa ku sisa di ko gaandi kaa, ma de ta hoi deseei a Jehovah nöömö. Wotowan an dë sö longi a di tuutuu lei. Gaansë u dee baaa ku dee sisa aki ta suwaki u di de ta ko möön gaandi. Di soni aki sa mbei de an sa du hia soni a di kemeente, nasö a di peleikiwooko. Ma hii fa soni sa dë sö da de, tökuseei de ta du andi de sa du a di peleikiwooko. De ta wooko ku di kaakiti di de abi u da wotowan taanga, söseei u heepi de u de ko sa’ u du so soni! U ta lei sömëni soni a de. Jehovah ta kai de gaan soni, nöö u lobi de tu.​—Nöng. 16:31.

11-12. Unfa dee njönkuwan a di kemeente ka i dë, bi da i taanga?

¹¹ Nöö pakisei dee njönkuwan. De ta abi sömëni fuka u di de dë a di goonliba di Saatan Didibi ta tii aki. Nöö de musu mbei möiti u de an ko ta pakisei kumafa a ta pakisei (1 Joh. 5:19). Ma hii fa a dë sö, tökuseei u ta fii bunu seei te u ta si taa dee njönkuwan aki ta da piki a dee komakandi, te de nango a di peleikiwooko, söseei te de ta hopo taki da di biibi u de. Unu dee njönkuwan, un dë fanöudu a di kemeente!​—Ps. 8:2.

¹² Ma a ta taanga da so baaa ku sisa u de si taa de dë fanöudu a di kemeente. Andi sa heepi hiniwan fuu, fuu fii taa u dë fanöudu a di kemeente? Wë boo taki u di soni aki.

13-14. Faandi mbei so baaa nasö sisa sa ta fii kuma de an abi na wan du a di kemeente?

¹³ Luku di u tu soni di u sa lei a di soni di Paulosu bi taki. Paulosu bi buta pakisei a wan soni di ta miti sömëni baaa ku sisa a di ten aki. A ta taanga da so baaa nasö sisa u de biibi taa wotowan abi de fanöudu. Paulosu bi sikifi taa: „Nöö ee di futu fii sa mati taa: ’Wë di ma dë maun, nöö ma dë wan pisi u di sinkii,’ di fan dë o mbei an dë wan pisi u di sinkii tuu nö? Nöö ee jesi sa mati taa: ’Wë di ma dë wojo kaa nöö ma dë wan pisi u di sinkii,’ di dë o mbei an dë wan pisi u di sinkii tuu nö?” (1 Kol. 12:15, 16) Andi Paulosu bi kë lei u?

¹⁴ Ee i ta tei iseei maaka ku dee woto baaa ku sisa a di kemeente, nöö a sa pasa taa i ko ta pakisei taa ja abi na wan du a di kemeente. Kandë so baaa nasö sisa sa’ u lei sëmbë soni a wan bunu fasi, kandë so u de sa’ u seeka soni bunu seei, nasö kandë wotowan sa’ u da wotowan taanga ku kötöhati. Kandë i ta si kuma ja o sa du dee soni aki kumafa de ta du ën. Ee sö i ta fii, nöö di dë ta lei taa i abi sakafasi (Fil. 2:3). Ma i musu ta köni ku di soni aki tu. Biga ee hii juu i ta tei iseei maaka ku dee sëmbë dee sa’ u du soni a wan bunu fasi, nöö i sa lasi hati. Kandë i sa bigi pakisei taa ja abi na wan du a di kemeente. Andi sa heepi i te i ko ta fii sö?

15. Andi u musu ta hoi a pakisei te a nama ku dee soni dee u sa’ u du, te u luku 1 Kolenti 12:4-11?

¹⁵ Wë luku di soni aki: Jehovah bi da so baaa ku sisa u fesiten di santa jeje fëën u de bi sa du gaangaan soni, ma na hii dee Keesitu sëmbë bi ta du di wan seei wooko ku di santa jeje. (Lesi 1 Kolenti 12:4-11.) Jehovah bi da de peipei wooko u de du, ma de bi abi hiniwan u dee Keesitu sëmbë aki fanöudu. A di ten aki, Jehovah an ta da u di santa jeje fëën möön fuu du foombofoombo soni. Ma u sa ta du peipei wooko a di dini di u ta dini ën. Hii fa a dë sö, tökuseei Jehovah ta kai hii u tuu gaan soni.

16. Andi u musu du, te u luku di soni di Paulosu taki?

 ¹⁶ Ka fuu tei useei maaka ku woto baaa ku sisa, u sa du di soni di apösutu Paulosu bi taki. A bi taki taa: „Hiniwan sëmbë musu wegi di soni a ta du luku ee a bunu, ee an bunu, nöö joo dë waiwai. An o dë fii luku ee di fii kai ku di u di otowan”.​—Gal. 6:4.

17. Un wini woo feni te u ta du andi Paulosu bi taki?

¹⁷ Te u ta libi ku di soni di Paulosu bi taki, söseei te u ta öndösuku useei, nöö u sa ko si taa u sa’ u du soni di wotowan an sa du. Kandë wan gaanwomi an ta hoi suti taki, ma kandë a sa’ u peleiki bunu da sëmbë. Nasö kandë an sa’ u seeka soni bunu, ma kandë sëmbë sabi ën kuma wan gaanwomi ka peleikima nango u suku lai di kumutu a Bëibel. Nasö kandë sëmbë sabi ën kuma wan sëmbë di lo’ u tei wotowan a wosu (Heb. 13:2, 16). Te u ko sabi andi useei sa’ u du bunu, nöö woo dë waiwai u di woo sabi taa u ta du soni u heepi di kemeente. Wa o ta haun ku dee baaa ku dee sisa dee sa’ u du so soni bunu möön u.

18. Unfa u sa ko toon wan möön bunu leima?

¹⁸ Aluwasi andi u ta du a di kemeente, hiniwan fuu musu luku ee u sa du dee soni dë möön bunu. Jehovah ta heepi u ku di ölganisaasi fëën fuu du soni a wan möön bunu fasi. A di mindi wiki komakandi Jehovah ta lei u unfa u sa ta du di diniwooko fuu a wan möön bunu fasi. I ta mbei möiti fii wooko ku dee soni dee i ta lei a di komakandi dë u?

19. Andi sa heepi i fii sa go a di Siköö da Könuköndë Peleikima?

¹⁹ Wan woto fasi fa Jehovah ta heepi u, hën da ku di Siköö da Könuköndë Peleikima. Dee baaa ku dee sisa dee nango a di siköö aki, da baaa ku sisa di ta du di hii-ten diniwooko, söseei dee abi 23 jaa te go miti 65 jaa. Kandë joo pakisei taa nöiti joo sa go a di siköö aki. Ma ka fii suku soni di ta mbei ja sa go a di siköö aki, suku soni di ta lei faandi mbei i kë go nëën. Nöö seeka soni sö taa i sa go a di siköö aki. Joo sa go u di Jehovah o heepi i, söseei u di iseei bi mbei möiti fii sa go.

20. Andi u sa lei u Loomë 12:6-8?

²⁰ Di u dii soni di u sa lei a di soni di Paulosu bi taki, sikifi a Loomë 12:6-8. (Lesi ën.) A di tëkisi aki, Paulosu bi toona taki taa hiniwan sëmbë a di kemeente abi wan apaiti soni di a sa’ u du bunu. Ma nöunöu a ta möön buta pakisei a di wooko di u musu wooko ku dee köni aki u heepi di kemeente.

21-22. Andi u sa lei u di woto u Robert ku di u Felice?

²¹ Luku wan woto u wan baaa di woo kai Robert. Di baaa aki bi ta du di diniwooko a wan woto köndë, ma bakaten de bi hakisi ën fa toona go a di köndë fëën, sö taa a bi sa wooko a di Bëtëli fa ala. Hii fa dee baaa bi piki ën taa na soni a du mbei de hakisi ën faa du di soni aki, tökuseei Robert bi taki taa: „Sömëni liba longi ma bi ta dë waiwai, u di mi bi ta fii kuma ma bi du di wooko di de bi da mi u mi du, a wan bunu fasi. So juu mi bi ta fii seei u kumutu a Bëtëli.” Unfa di baaa aki bi ko dë waiwai baka? Wë wan woto gaanwomi bi toona mëni ën taa hiniwan ten Jehovah ta lei u soni te a da u wan wooko fuu du dëën. Nöö te a da u wan njunjun wooko fuu du, nöö woo sa du di wooko dë a wan möön bunu fasi. Robert bi ko fusutan taa an bi musu luku unfa soni bi dë a di ten di pasa, ma a bi musu möön buta pakisei a dee soni dee a sa du nöunöu.

²² Sö wan soni bi miti wan baaa de kai Felice Episcopo tu. Di baaa aki ku hën mujëë bi go a di Giliati-siköö a di jaa 1956, hën bakaten de bi bigi du di keling-wooko a di köndë  Bolifia. A di jaa 1964, hën de pai wan mii. Felice bi taki taa: „A bi taanga da u fuu disa di wooko di u bi ta du, u di u bi lobi ën seei. Wan hii jaa longi mi bi ta fii bookosaka. Ma Jehovah bi heepi mi. Mi bi tooka di fasi fa mi bi ta si soni, hën mi buta pakisei a di kiija di mi musu kiija di mii fuu.” I sa fusutan unfa soni bi dë da Robert ku Felice ö? I ta fii bookosaka u di ja abi dee faantiwöutu dee i bi abi möön u? Wë ee sö soni dë da i, nöö joo möön dë waiwai te i ta möön buta pakisei a dee soni dee i sa ta du nöunöu a di dini di i ta dini Jehovah ku dee baaa ku dee sisa fii. Luku unfa i sa ta heepi wotowan ku dee köni dee i abi, nöö di soni dë o heepi i fii dë waiwai u di i ta heepi di kemeente.

23. Andi u musu du, nöö andi woo luku a di woto di ta ko?

²³ Jehovah abi hii u tuu fanöudu. A kë taa u musu dë a di wosudendu fëën. Ee u tei ten u sindo pakisei andi ku andi u sa ta du u da dee baaa ku sisa fuu taanga, söseei te u ta mbei taanga möiti fuu du dee soni aki, nöö an o pasa hesihesi taa u ta fii taa wa abi na wan du a di kemeente! Ma unfa a dë ku di fasi fa u ta si wotowan a di kemeente? Unfa u sa lei taa u ta lesipeki de, söseei taa u lobi de? A di woto di ta ko, woo taki u dee soni aki.