1-2. Andi woo luku a di woto aki?

 UNFA i ta fii te i bi musu kisi wan soni di i abi fanöudu tuutuu, ma an dou a di ten di i bi ta mëni taa joo feni ën? I ta lasi hati ö? Wë Nöngö 13:12 ta taki wan soni di ta miti hii u tuu. A ta taki taa: „Te wan sëmbë an sa feni di soni di a ta dë ku di mëni taa a o feni, nöö hati fëën o ko suwaki.” Ma unfa a bi o dë ee i bi ko sabi taa fanöudu soni hën pasa, mbei di soni di i bi ta wakiti an dou jeti? Wë ee sö soni dë, nöö an dë u taki taa i bi o hoi pasensi, söseei taa i bi o dë kabakaba u wakiti.

² A di woto aki woo luku wantu mama wëti u Bëibel di sa heepi u fuu ko abi „pasensi” (Mik. 7:7). Baka di dë, woo luku na un ten u musu lei taa u ta wakiti Jehovah ku pasensi faa du wan soni. Te u kaba fëën, woo luku andi da dee gaan bunu dee Jehovah seeka da dee sëmbë dee ta wakiti ën ku pasensi.

3. Andi u ta lei a Nöngö 13:11?

³ Wan woto sikifi a Nöngö 13:11, di ta lei u faandi mbei u musu ko abi pasensi. A sikifi dë taa: „Te wan sëmbë feni gudu söndö faa mbei möiti fëën, nöö pikipiki a ta lasi de. Ma dee gudu dee wan sëmbë ta feni pikipiki, o ko möön hia.” Andi u sa lei a di tëkisi aki? Wë u ta lei taa a dë wan köni soni te u ta du soni ku pasensi. Hën da te wa ta biinga du soni.

4. Andi di mama wëti di dë a Nöngö 4:18 ta heepi u fuu ko fusutan?

⁴ Nöngö 4:18 ta piki u taa: „Di pasi u dee limbohati sëmbë dë kuma di limbo di i ta si a fuuku mamate. Pikipiki a ta ko möön limbo, u te a ko dë kuma di limbo di di sonu ta tuwë a sonuhati.” Di tëkisi aki ta lei u gbelingbelin taa pikipiki Jehovah  ta heepi dee sëmbë fëën, u de ko fusutan dee soni dee a abi a pakisei. Boiti di dë, di tëkisi aki ta lei u tu unfa wan Keesitu sëmbë nango a fesi a di biibi. A ta tei ten ufö wan sëmbë ko abi wan taanga biibi. Ee u ta tei ten ta lei soni a di Bëibel, söseei ee u ta du dee soni di di Wöutu u Gadu ku di ölganisaasi fëën ta piki u, nöö pikipiki woo ko abi dee fasi di Keesitu bi abi. Woo ko sabi soni u Gadu möön gaanfa tu. Boo luku wan woto di Jesosi bi konda, di nama ku di soni aki.

5. Un woto Jesosi bi konda, di ta lei taa a ta tei ten u wan sëmbë go a fesi a di biibi?

⁵ Jesosi bi konda wan woto di ta lei unfa di Könuköndë bosikopu di u ta paaja, dë kuma wan piki sii di ta nasi a dee sëmbë hati dee lobi letilibi. A bi taki taa: „Di sii ta nasi, nöö di soni ta göö u te a ko bigi, ma di womi [di goonma] an sabi unfa di soni dë waka. Pikipiki di goon seei ta da njanjan. Di böngö fosu ta hopo ko, nöö a ta pai njanjan, nöö te u kaba fëën di njan ta ko lepi” (Maik. 4:27, 28). Andi Jesosi bi kë taki ku di soni aki? Wë a bi kë taki taa leti kumafa wan soni di u paandi ta göö pikipiki, sö nöö wan sëmbë di ta biibi di Könuköndë bosikopu nango a fesi a di biibi pikipiki tu. Wë te dee sëmbë dee u ta lei soni u Bëibel ta ko dë möön gaan mati ku Jehovah, nöö u ta si taa de ta tooka sömëni soni a de libi (Ef. 4:22-24). Ma u musu hoi a pakisei taa Jehovah hën ta mbei dee sëmbë aki ko abi di fii u de sa go a fesi.​—1 Kol. 3:7.

6-7. Andi u ta lei a di fasi fa Jehovah mbei di goonliba?

⁶ Jehovah da wan Gadu di abi pasensi. Fëën mbei a hii soni di a ta du, a ta tei di ten di dë fanöudu, faa sa du di soni di a kë du. A ta du di soni aki faa sa tja gafa ko da di në fëën, söseei a ta du ën u mbei wotowan feni wini fëën. Pakisei fa Jehovah bi tei hën ten u seeka di goonliba da libisëmbë.

⁷ Te di Bëibel ta taki u di fasi fa Jehovah seeka di goonliba, nöö a ta taki soni u di fasi fa a „bigi”, söseei a ta taki u di fasi fa Jehovah „maakëën”. Boiti di dë, a ta taki unfa Jehovah seti dee hukuhuku u di goonliba  (Jöpu 38:5, 6). Na mbei nöö Jehovah bi mbei di goonliba nöö a kaba, ma a bi tei ten u buta pakisei a dee soni di a mbei (Ken. 1:10, 12). Pakisei unfa dee ëngëli bi fii di de si dee njunjun soni dee Jehovah mbei. Wë di soni aki bi mbei dee ëngëli bi wai seei (Jöpu 38:7). Wë andi u ta lei a di soni aki? A tei sömëni dusu jaa u Jehovah mbei di goonliba, dee teeja ku hii dee libilibi soni dee dë nëën. Ma di Jehovah bi luku hii dee soni dee a mbei, hën a bi taki taa „hii de tuu bunu seei”.​—Ken. 1:31.

8. Andi woo luku nöunöu?

⁸ A dee soni dee u luku djunsu dë, u ta si sömëni mama wëti u Bëibel di ta lei u taa u musu abi pasensi. Nöunöu woo luku na un ten u musu lei taa u dë kabakaba u wakiti Jehovah.

9. Na un ten u musu ta wakiti Jehovah?

⁹ So juu a ta dë fanöudu fuu wakiti Jehovah faa piki dee begi fuu. Te u ta begi Jehovah faa da u taanga fuu hoi dou u di wan fuka ta miti u, nasö faa heepi u fuu disa wan soni di an lobi, nöö u sa ta fii kuma a ta tei ten ufö Jehovah piki dee begi fuu. Faandi mbei Jehovah an ta piki hii dee begi fuu wantewante?

10. Faandi mbei u musu ta wakiti ku pasensi u Jehovah piki dee begi fuu?

¹⁰ Jehovah ta haika dee begi fuu (Ps. 65:2). A ta si di begi di u ta begi ën ku hii u hati kuma wan soni di ta lei taa u ta biibi ën (Heb. 11:6). Te u ta begi Jehovah faa heepi u ku wan soni, nöö a ta kë si taa u dë kabakaba u mbei möiti u du soni di ta kai ku ën (1 Joh. 3:22). Fëën mbei te u ta hakisi Jehovah faa heepi u fuu disa wan soni di an ta kai ku ën, nöö u musu abi pasensi, söseei u musu mbei hii möiti fuu sa disa di soni dë. Jesosi bi taki wan soni di ta lei taa na hii juu Jehovah o piki so u dee begi fuu wantewante. A bi taki taa: „Un musu ta hakisi soni, nöö woon feni. Un musu ta suku soni, nöö woon feni. Un musu ta naki di döö, nöö de o jabi di döö da unu. Biga di sëmbë di ta hakisi, o feni. Di sëmbë di ta suku, o feni. Di sëmbë di ta naki di döö, hën de o jabi di döö da” (Mat. 7:7, 8). Te wa ta wei u begi, nöö u sa dë seiki taa di Tata fuu di dë a liba ala o ta haika u, nöö a o piki dee begi fuu.​—Kol. 4:2.

11. Unfa Hebelejën 4:16 ta heepi u te a ta djei kuma Jehovah ta tei ten faa piki di begi fuu?

¹¹ Hii fa a sa djei kuma a ta tei ten u Jehovah piki di begi fuu, tökuseei Jehovah ta paamusi u taa a o piki di begi fuu a di soifi ten. (Lesi Hebelejën 4:16.) Fëën mbei nöiti u musu tei Jehovah u hogi te an piki di begi fuu a di ten di u bi mëni taa a bi o piki ën. Sömëni sëmbë ta begi sömëni jaa kaa u di Könuköndë u Gadu ko poi di hogi goonliba aki. Jesosi seei bi taki taa u musu ta begi faa ko (Mat. 6:10). Wë an bi o dë wan köni soni ee wa bi o ta biibi Gadu möön, u di di kaba an ko a di ten di u bi mëni taa a bi o ko (Hab. 2:3; Mat. 24:44). A bi o dë wan köni soni ee u bi o dë ta wakiti Jehovah, nöö u ta begi ën ku di biibi taa a o jei di begi fuu. Di kaba u di goonliba aki o ko a di soifi ten, u di Jehovah buta „di daka ku di juu” kaa di di kaba o ko. Nöö a o dë u si a di daka dë taa di kaba dou a di soifi ten.​—Mat. 24:36; 2 Pet. 3:15.

12. Na un ten a sa möön taanga da u fuu lei taa u abi pasensi?

¹² U musu abi pasensi te wotowan an ta libi bunu ku u. Sëmbë u di goonliba aki lo’ u libi hogi ku woto köndë sëmbë, sëmbë u wan woto lö, nasö sëmbë di de ku de an kiija a di wan fasi. De lo’ u libi hogi ku sëmbë di abi wan suwaki a fusutan së, nasö a sinkii së. De bi du ku sömëni u dee sëmbë u Jehovah u di  biibi u de hedi. Te sëmbë ta libi ku u a dee lö fasi aki, nöö u musu hoi di soni di Jesosi bi taki a pakisei. A bi taki taa: „Di sëmbë di o hoi dou te a di kaba, nöö hën o feni tjubi” (Mat. 24:13). Ma unfa a dë te u ko sabi taa wan sëmbë a di kemeente du wan gaan zöndu? Wë baka te u piki dee gaanwomi andi pasa, nöö u musu hoi pasensi, söseei u musu abi di futoou taa de o du soni kumafa Jehovah kë. Wë andi ku andi dee gaanwomi musu du te wan sëmbë du wan gaan zöndu?

13. Andi ku andi Jehovah kë u dee gaanwomi musu du, te wan sëmbë du wan gaan zöndu?

¹³ Te dee gaanwomi ko sabi taa wan sëmbë a di kemeente du wan gaan zöndu, nöö de ta begi Jehovah fajafaja faa da de di köni fëën, sö taa de sa ko sabi unfa a ta pakisei u di soni di pasa (Jak. 3:17). Dee gaanwomi ta du di soni aki u heepi di sëmbë fu hën ku Jehovah ko dë bunu baka ee a tjali u di zöndu fëën (Jak. 5:19, 20). De kë du hii soni di de sa du tu, u tjubi di kemeente, söseei de kë heepi dee sëmbë dee abi kötöhati fanöudu (2 Kol. 1:3, 4). Te dee gaanwomi ko sabi taa wan sëmbë du wan gaan zöndu, nöö de musu öndösuku soni u ko sabi unfa soni dë tuutuu. Di soni aki ta tei ten. Baka di dë, dee gaanwomi ta begi, nöö de ta wooko ku di Bëibel u heepi di sëmbë faa fusutan unfa Jehovah ta si soni, söseei de ta leti ën buta a pasi (Jel. 30:11). Wë hii fa dee gaanwomi an ta biabia u du soni, tökuseei de an ta biinga du soni hesihesi poi. Te soni du a di soifi fasi kumafa a musu du, nöö hii di kemeente o feni wini fëën. Ma aluwasi ee soni du a di soifi fasi, tökuseei a sa pasa taa wan sëmbë sa fii tjali u di soni di di sëmbë du. Wë ee sö wan soni miti i, nöö andi sa heepi i fu ja ta tjali sö möön?

14. Un woto u Bëibel sa da i kötöhati ee wan baaa nasö wan sisa du wan soni ku i di hati i gaanfa seei?

¹⁴ Wan baaa nasö wan sisa du wan soni di hati i gaanfa wan daka u? Wë u sa feni woto a Bëibel di sa lei u unfa u sa dë ta wakiti Jehovah faa seeka soni. Wë hii fa a bi pasa taa dee baaa u Josëfu bi libi hogi ku ën, tökuseei an bi mbei di soni di de bi du dë mbei a ko dë wan sëmbë di an ta dë waiwai möön. Ma a bi ta buta pakisei fëën a di dini di a bi musu ta dini Jehovah. Nöö Jehovah bi mbei a feni gaan bunu, u di a bi ta hoi pasensi ta wakiti Jehovah (Ken. 39:21). Te u kaba fëën, Josëfu bi da dee baaa fëën paadon, nöö a bi si tu unfa Jehovah bi mbei a feni gaan bunu  (Ken. 45:5). Kuma Josëfu, useei ta feni kötöhati te u ku Jehovah ko dë möön gaan mati, söseei te u ta wakiti ën faa kuutu soni a wan leti fasi, söseei a di soifi ten.​—Ps. 7:17; 73:28.

15. Andi bi heepi wan sisa faa hoi dou ku pasensi hii fa de an bi libi bunu ku ën?

¹⁵ A dë sö tuu taa na hii soni di sëmbë ta du ku u, hogi kuma di de bi du ku Josëfu. Ma tökuseei soni di wotowan ta du, nasö soni di de ta taki, sa hati u. Woo feni wini te u ta du soni kumafa dee mama wëti u Bëibel ta taki, te u ku wan baaa nasö wan sisa abi soni, nasö te u ku wan sëmbë di an ta dini Jehovah abi soni (Fil. 2:3, 4). Wë boo luku wan woto. Di wan sisa bi ko sabi taa wan sëmbë di hën ku ën ta wooko a di wan kamian bi ta taki hogi fëën, söseei taa a bi ta taki soni fëën di an bi dë sö tuutuu, nöö di soni dë bi hati ën seei. Ma ka faa biinga go taki wan soni baka, hën di sisa aki bi tei ten u pakisei soni u Jesosi. Di sëmbë bi ta kosi Jesosi, an bi toona kosi de baka (1 Pet. 2:21, 23). Wë u di di sisa bi hoi di soni aki a pakisei, mbei a bi disa di soni. Bakaten, a bi ko jei taa di sëmbë di hën ku ën bi ta wooko dë, bi dë ku wan gaan suwaki, söseei taa a bi abi sömëni bookohedi. Di sisa bi hoi nöö taa kandë di soni dë hën bi mbei di sëmbë di hën ku ën bi ta wooko, bi du soni a di lö fasi dë. Di sisa bi wai taa a bi hoi dou ku pasensi hii fa soni bi ta taanga dëën. Di soni aki bi mbei a fii bunu seei.

16. Andi sa da i kötöhati te wotowan an ta libi bunu ku i? (1 Petuisi 3:12)

¹⁶ Wë ee a dë taa sëmbë an ta libi bunu ku i, nasö kandë de du wan woto soni ku i di hati i, nöö hoi a pakisei taa Jehovah dë zuntu u dee sëmbë dee „lasi hati” (Ps. 34:18). Jehovah lobi i u di i abi pasensi, söseei u di i ta tuwë hii dee fuka fii dëën (Ps. 55:22). Hën da di Kuutuma u hii goonliba. A ta si hii soni di ta pasa a goonliba aki. (Lesi 1 Petuisi 3:12.) I ta dë kabakaba u wakiti Jehovah te fuka ta miti i di iseei an sa seeka u?

17. Andi Jehovah paamusi u te u luku Jesaaja 30:18?

¹⁷ Abiti möön di Tata fuu di dë a liba ala o mbei u feni gaan bunu te di Könuköndë fëën o tii. Jesaaja 30:18 ta taki taa: „Ma Jehovah o ta wakiti unu, u di a kë du wan bunu da unu.  A o hopo du wan soni u lei taa a abi tjalihati fuunu. Biga Jehovah da wan Gadu di ta kuutu soni a wan leti fasi. Dee sëmbë dee ta wakiti ën o feni gaan bunu.” Dee sëmbë dee ta hoi pasensi ta wakiti Jehovah o feni sömëni gaan bunu nöunöu kaa, söseei a di njunjun goonliba.

18. Un gaan bunu u ta wakiti fuu feni?

¹⁸ Te dee sëmbë u Gadu o dë a di njunjun goonliba, nöö dee fuka dee ta miti de a di ten aki an o ta miti de a di ten dë möön. Sëmbë an o ta libi hogi ku wotowan möön, söseei pen an o dë möön (Ako. 21:4). An o dë fuu ta booko u hedi möön taa wa o abi dee soni dee u abi fanöudu, u di soni o hia tjika da hii sëmbë (Ps. 72:16; Jes. 54:13). Di ten dë o suti seei!

19. Unfa Jehovah ta seeka u nöunöu kaa?

¹⁹ Jehovah ta seeka u nöunöu kaa fuu sa dë a di tii fëën basu, u di a ta heepi u fuu wini dee suwakifasi fuu, söseei fuu ko abi fasi di ta kai ku ën. Be wa lasi hati, söseei be wa disa di dini di u ta dini Jehovah. Wan möön bunu libi dë ta ko. Ee u ta buta pakisei a dee bunu soni dee woo feni a di ten di ta ko, nöö di soni dë o heepi u fuu ta dë waiwai, hii fa u ta wakiti Jehovah faa du dee soni dee a taki taa a o du.