A di woto dë u bi lei taa wan gaan soni dë di nama ku hii sëmbë ku dee ëngëli tuu. Di soni dë da di limbo di di në u Jehovah musu ko limbo. Di sabi di sëmbë musu ko sabi taa di fasi fa Jehovah ta tii da di möön bunuwan, nama ku di limbo di di në fëën musu ko limbo. Sö nöö di hoi di wan sëmbë ta hoi hënseei a Gadu nama ku di soni dë tu.

Faandi mbei u ta taki taa di möön gaan soni di musu seeka nama ku di në u Jehovah, ku di limbo di a musu ko limbo? Boo buta pakisei a dii soni.

Di fosu soni da di poi di Saatan poi di në u Jehovah a di jai u Eden. Saatan bi lei Eva ku di soni di a bi hakisi ën taa Jehovah giii, söseei taa Jehovah bi kë u de du soni di a bi sabi taa de an bi o sa du nöiti. Saatan bi bia di soni di Jehovah bi taki ko kumafa a kë. A sö wan fasi a kai Jehovah wan mindisonima. Sö wë a poi Jehovah në, hën a ko toon „Didibi”, nasö wan „hogihati mindisonima” (Joh. 8:44). U di Eva biibi Saatan, mbei a pasa Jehovah buka, söseei a lei taa an bi kë u Jehovah tii ën (Ken. 3:1-6). Te kuma di daka u tide Saatan ta poi di në u Jehovah, ta konda mindimindi soni fëën. Dee sëmbë dee ta biibi dee soni aki an lo’ u piki Jehovah buka. Fëën mbei dee sëmbë u Jehovah, ta si di poi di sëmbë ta poi di santa në u Jehovah kuma di möön gaan hogi soni di pasa a mundu. Di soni aki hën mbei sömëni hogi dë a goonliba.

Di u tu soni, hën da Jehovah o mbei di në fëën ko santa sö taa soni ko ta waka bunu a goonliba. Di soni aki da di möön fanöudu soni da Jehovah. Fëën mbei a taki taa: „Mi o mbei di gaan në u mi ko santa” (Eze. 36:23). Jesosi seei bi lei taa di soni aki musu dë di möön fanöudu soni di hii dee dinima u Jehovah musu ta hakisi te de ta begi. A bi taki taa: „Be di në fii ko santa e” (Mat. 6:9). Sömëni pasi di Bëibel ta lei u fa a dë fanöudu tjika u di në u Jehovah ko santa. Boo buta pakisei a wantu Beibel tëkisi di ta lei u di soni dë: „Konda da sëmbë unfa di në u Jehovah musu kisi gafa tjika” (1 Klon. 16:29; Ps. 96:8). „Un kanda gafa di gaan në fëën” (Ps. 66:2). „Mi o gafa di në fii u teego” (Ps. 86:12). Wan u dee pasi di Jehovah seei bi dë a liba la fan ku sëmbë a goonliba aki, bi dë di daka di Jesosi bi dë a di Wosu u Gadu a Jelusalën. Jesosi bi taki taa: ’Taata o, be di në fii bai e.’ Hën Jehovah piki ën taa: „Mi bi mbei di në u mi kisi gafa kaa, nöö mi o toona du ën baka.”​—Joh. 12:28. a

Di u dii soni, hën da di në u Jehovah nama ku dee soni dee a o du a di ten di ta ko. Pakisei luku un në Jehovah o abi baka di lasi tesi a kaba u di Dusu Jaa Tii u Keesitu.  Unfa dee ëngëli ku libisëmbë o ta si Jehovah a di ten dë? Fuu sa piki di hakisi aki, nöö boo buta pakisei a tu soni. Dee soni aki da di hoi di libisëmbë musu ta hoi deseei a Jehovah ku di leti di a abi u tii hii di mundu. A di ten dë an o dë fanöudu möön u libisëmbë ta du soni u lei taa de ta hoi deseei a Jehovah, u di de an o abi zöndu möön, söseei u di de o pasa hii dee tesi kaa. De o feni di libi u teego kaa. Söseei an o dë fuu lei möön taa di tii u Jehovah da di möön bunuwan. Nöö a di ten dë hii dee ëngëli a liba ala ku hii sëmbë a goonliba aki o ta du soni di wan fasi, söseei de o ta saka deseei a di tii u Jehovah basu. Ma di ten dë, a o dë sö taa di në u Jehovah hën o dë di möön fanöudu soni da dee sëmbë fëën u?

Di në u Jehovah o ko limbo te dou, söseei sëmbë an o dë u taki soni u poi di në fëën möön. Ma hii juu di në fëën o ta dë di möön fanöudu soni da hii dee dinima fëën a liba ala ku goonliba aki tuu. Faandi mbei u taki sö? Wë, u di de o ta si nöömö fa Jehovah o ta du foombofoombo soni. Söseei u di Jesosi o toona da Jehovah di tii baka, mbei Jehovah o „dë di kaba Takima u Mundu” (1 Kol. 15:28). Baka di dë, libisëmbë „o feni di gaan waiti u de, di dee mii u Gadu ta abi” (Lom. 8:21). Nöö Jehovah o du dee soni dee a bi taa a o du u mbei dee ëngëli ku libisëmbë ko dë wan famii.​—Ef. 1:10.

Unfa dee ëngëli ku libisëmbë o fii baka te hii dee soni aki pasa? Wë an dë u taki taa hii juu woo ta kë gafa di waiti në u Jehovah. Dafiti bi taki taa: „Be Jehovah Gadu kisi gafa . . . Be di gaan në fëën kisi gafa u teego” (Ps. 72:18, 19). U teego woo ta suku njunjun fasi fuu ta gafa di në u Jehovah.

Di në u Jehovah nama ku hii di fasi fa Jehovah seei dë. Möön gaanfa di në u Jehovah ta mbei u pakisei di lobi di a abi (1 Joh. 4:8). Hiniwan juu woo ta mëni fa Jehovah lobi u tjika u di a mbei u, u di a paka di lusupaima da u, söseei u di di fasi fa a ta tii, ta lei taa a ta du soni a wan leti fasi. Ma u nöömö woo ta si fa Jehovah lobi u tjika. U teego woo ta kë ko möön zuntu ku di Tata fuu, söseei woo ta kanda gafa di gaan në fëën.​—Ps. 73:28.