1-2. (a) Andi da zöndu, nöö unfa u sa ko ta piki Jehovah buka hii fa u da zöndu libisëmbë? (Luku di pisi „Soni di taki möön fini”.) (b) Fuun soni woo taki a di woto aki, ku dee woto dee ta ko a Di Hei Wakitimawosu aki? (Luku di pisi „Wan soni da dee lesima”)

 I BI o kë sabi unfa Jehovah lobi i tjika u? Wë wan fasi fa i sa ko sabi di soni dë, hën da te i ta mbei möiti u ko sabi dee soni dee a du u puu i a zöndu ku dëdë basu. Zöndu a da wan gaan felantima fuu, na wan fuu sa feti ku ën. U ta du zöndu hiniwan daka, nöö u ta dëdë u di u abi zöndu (Lom. 5:12). Ma hii fa a dë sö, tökuseei wan bunu buka dë. Jehovah sa heepi u fuu wini zöndu. U sa dë seiki u di soni aki!

² Möön leki 6000 jaa kaa Jehovah ta heepi sëmbë u de sa ta piki ën buka, söseei u de sa ta dini ën. Faandi mbei? Wë a ta heepi u fu di a lobi u. A bi lobi libisëmbë sensi di a mbei de, nöö a ta du sömëni soni u heepi u fuu sa ta piki ën buka, söseei fuu sa ta dini ën. Gadu sabi taa zöndu hën ta mbei u ta dëdë, nöö an kë fuu dëdë. Ma a kë fuu libi u teego (Lom. 6:23). Nöö di libi u teego hën a kë da i. A di woto aki woo taki u dii soni. Di fosu soni da: Andi Jehovah paamusi taa a o du da zöndu libisëmbë? Di u tu da: Unfa dee sëmbë dee bi libi a di pisiten di de bi sikifi Bëibel, bi sa ko dë mati ku Jehovah hii fa de bi dë zöndu libisëmbë? Nöö di u dii soni da: Andi Jesosi du u puu libisëmbë a zöndu ku dëdë basu?

 ANDI JEHOVAH PAAMUSI TAA A O DU DA ZÖNDU LIBISËMBË?

3. Unfa a du waka taa Adam ku Eva ko dë zöndu libisëmbë?

³ Jehovah bi kë taa di fosu womi ku di fosu mujëë di a bi mbei abi wan suti libi. A bi da de wan waiti kamian u libi, wan bunu wooko u du, söseei a bi da di tööu libi kuma kado. A bi mbei de sö taa de bi sa pai miii fuu di goonliba, söseei u mbei hii di goonliba ko dë wan paladëisi kuma di djai u Eden. A bi da de wan kodo wëti nöö, nöö di wëti dë an bi taanga seei u hoi. A bi piki de taa ee de pasa di wëti dë, nöö de o dëdë. Wë u sabi andi bi pasa. Wan hogihati ëngëli di an bi lobi Gadu, söseei di an bi lobi libisëmbë bi ko pooba Adam ku Eva u de pasa Gadu buka. Adam ku Eva bi du soni kumafa di hogihati ëngëli bi kë. De an bi lei taa de ta futoou di lobihati Tata u de, fëën mbei de du zöndu. Wë kumafa u sabi, nöö soni bi pasa leti kumafa Jehovah bi taki. Sensi di ten dë, hën de tja sitaafu u di soni dë hedi. De bi ko ta gaandi. Te u kaba fëën, hën de dëdë.​—Ken. 1:28, 29; 2:8, 9, 16-18; 3:1-6, 17-19, 24; 5:5.

4. Faandi mbei Jehovah buuse zöndu, söseei faandi mbei a ta heepi u fuu sa kumutu a zöndu ku dëdë basu? (Loomë 8:20, 21)

⁴ Jehovah mbei de sikifi di tjali woto aki buta a Bëibel da u, sö taa u sa ko fusutan wan fanöudu soni. A ta heepi u fuu ko fusutan faandi mbei a buuse zöndu gaanfa sö. Zöndu hën mbei u ku Gadu poi, nöö di soni dë mbei u ta dëdë (Jes. 59:2). Saatan buuse Jehovah ku libisëmbë tuu. Fëën mbei a du soni u da Adam ku Eva taanga u de du zöndu, nöö a ta du di soni dë go dou ku libisëmbë te kuma tide jeti. Di Adam ku Eva zöndu, nöö kandë a bi mëni taa a poi di soni di Jehovah bi abi a pakisei u du da libisëmbë. Ma an bi pena fusutan seei unfa Jehovah lo’ sëmbë tjika. Nöiti Gadu tooka di soni di a bi abi a pakisei u du da dee bakamii u Adam ku Eva. U di a lobi libisëmbë, mbei a hopo du wan soni wantewante u heepi de, u de dë ku di mëni ta soni o seeka ko bunu baka. (Lesi Loomë 8:20, 21.) Jehovah bi sabi taa so u dee bakamii u Adam bi o lobi ën, söseei taa de bi o ta piki ën buka a soni. Fëën mbei a bi du soni u heepi dee sëmbë dë u de sa ko dë mati ku ën, söseei u de ko fii u zöndu ku dëdë. Andi Jehovah du u heepi de ku hii dee fuka u de?

5. Na un pisiten Jehovah du soni u heepi libisëmbë u de dë ku di mëni taa soni o seeka ko bunu baka? Booko ën a piki möni. (Kenesesi 3:15)

⁵ Lesi Kenesesi 3:15. Wantewante dë Jehovah heepi libisëmbë u de ko dë ku di mëni taa soni o seeka ko bunu baka, u di a bi lesi sitaafu da Saatan. Gadu bi taki taa wan „bakamii” u di mujëë hën bi o puu libisëmbë a fuka. Di bakamii dë bi o makisa Saatan booko hedi, nöö a o seeka hii dee soni dee a poi a di djai u Eden (1 Joh. 3:8). Ma di bakamii dë bi o abi u tja sitaafu ufö. Saatan bi o dëën makei, nöö di soni dë bi o tja dëdë kii ën. A bi o hati Jehovah gaanfa seei. Ma tökuseei Jehovah bi dë kabakaba u tja di fuka dë, sö taa libisëmbë sa ko fii u zöndu ku dëdë.

UNFA DEE SËMBË DEE BI LIBI A DI PISITEN DI DE BI SIKIFI BËIBEL, BI SA KO DË MATI KU JEHOVAH HII FA DE BI DË ZÖNDU LIBISËMBË?

6. Andi Abeli ku Noa ku sömëni woto sëmbë di bi lobi Gadu bi du u ko zuntu ku Gadu?

⁶ A hii dee höndöhöndö jaa dee pasa baka di Adam ku Eva zöndu, hën Jehovah ta du soni u heepi libisëmbë u de ko möön fusutan andi de sa du u de ko zuntu ku ën. Abeli, di u tu womi mii u Adam ku Eva, da di fosu libisëmbë di bi ko abi biibi a Jehovah baka di di gaan hogi pasa a di djai u Eden. U di Abeli bi lo’ Jehovah, mbei a bi ta suku u du soni u mbei Jehovah wai ku ën, söseei u ko zuntu ku ën. Fëën mbei a bi da Jehovah wan kado. A bi dë wan sëmbë di bi ta kiija sikapu, nöö a bi kii wantu u dee sikapu mii  fëën tuwë buuu a goon, hën a tja de go tjuma da Jehovah. Unfa Jehovah bi si di soni di Abeli bi du dë? Wë a „bi ta piizii ku Abeli, söseei a bi wai ku dee soni dee a bi tja ko dëën” (Ken. 4:4). Jehovah bi lei taa a bi ta wai ku dee woto sëmbë dee bi ta tja dee lö soni dë go tjuma dëën tu. Dee sëmbë dë bi lobi Jehovah, söseei de bi ta lesipeki ën. Wan u de da Noa (Ken. 8:20, 21). Di tei di Jehovah bi tei dee soni dë ku wai, ta lei taa zöndu libisëmbë sa ta libi a wan fasi di ta kai ku Gadu, söseei taa de sa ko zuntu ku ën. b

7. Andi u ta lei a di dë di Abahamu bi dë kabakaba u kii di womi mii fëën paka paima?

⁷ Jehovah bi hakisi wan womi di bi abi wan taanga biibi de kai Abahamu, faa du wan gaan taanga soni. A bi hakisi ën faa kii di womi fëën Isaki paka paima. A musu u dë taa Abahamu bi ta si di soni dë kuma di möön taanga soni di a bi musu du nëën libi. Ma tökuseei a bi piki Jehovah buka. Di a bi seeka u kii di womi mii fëën, hën Gadu tapëën wantewante. Di woto aki ta lei u wan gaan fanöudu soni di Jehovah bi o du bakaten. A ta lei u taa Jehovah bi o dë kabakaba u mbei di lobi Womi Mii fëën dëdë paka paima da u. Sö Jehovah lobi libisëmbë tjika.​—Ken. 22:1-18.

8. Andi hii dee mbeti di dee Isaëli sëmbë bi ta tja go tjuma da Gadu bi ta lei taa Gadu bi o du? (Leifitiki 4:27-29; 17:11)

⁸ Di Jehovah bi da dee Isaëli sëmbë di Wëti, a bi piki de u de tja mbeti ko tjuma dëën sö taa a sa da de paadon u dee zöndu u de. (Lesi Leifitiki 4:27-29; 17:11.) Dee soni di dee Isaëli sëmbë bi ta tja go tjuma da Gadu bi ta lei taa Gadu bi o da de wan möön bunu soni di bi o puu de a zöndu basu tuutuu. Gadu bi mbei dee tjabukama fëën taki soni u di bakamii u di mujëë di bi o heepi libisëmbë. De bi taki taa wan apaiti Womi Mii u Gadu bi o abi u tja pena, söseei de bi o kii ën. A bi o dë kuma wan sikapu di de ta kii tjuma da Gadu u paka paima (Jes. 53:1-12). Jehovah bi paamusi taa a bi o mbei di wan kodo Womi Mii fëën ko dëdë paka paima da libisëmbë, u puu de a zöndu ku dëdë basu. Wan gaan soni seei Jehovah du dë. A du di soni aki da iseei tu!

ANDI JESOSI DU U PUU LIBISËMBË A ZÖNDU BASU?

9. Andi Johanisi di Dopuma bi taki u Jesosi? (Hebelejën 9:22; 10:1-4, 12)

⁹ A di jaa 29 di Johanisi di Dopuma bi si Jesosi u Nazalëti, hën a taa: „Un luku di Sikapu Mii u Gadu dë e. Hën wë Gadu manda faa ko paka fu dee hogi du fu hii libisëmbë” (Joh. 1:29). Dee soni dee Gadu bi mbei Johanisi taki aki, ta lei gbelingbelin ta Jesosi da di bakamii di a bi paamusi taa o heepi libisëmbë. Awaa a bi dou faa ko puu libisëmbë a zöndu basu. A bi o dëdë paka paima da de.​—Lesi Hebelejën 9:22; 10:1-4, 12.

10. Unfa Jesosi bi lei taa a ko a goonliba u ko heepi zöndu libisëmbë?

¹⁰ Jesosi bi ta buta pakisei möön gaanfa a dee sëmbë dee bi ta fii bookosaka, u di de dë zöndu libisëmbë. Nöö a bi ta kai de u de ko dë bakama fëën. A bi sabi taa zöndu hën ta mbei libisëmbë ta tja sitaafu. Fëën mbei a bi ta möön heepi dee womi ku dee mujëë dee bi ta tja sitaafu u di de bi du zöndu. A bi konda wan woto u heepi u fuu fusutan di soni aki. A bi taki taa: „Dee sëmbë dee dë gösöntu an abi data fanöudu, ma dee sëmbë dee dë ku suwaki de abi data fanöudu.” A bi taki tu taa: „Fa mi ko a goonliba aki, nöö ma ko u kai un dee gaan bumbuu sëmbë e. Nönö. Ma mi ko u ko kai dee sëmbë dee sabi taa de an ta libi bunu” (Mat. 9:12, 13). Nöö sö Jesosi bi ta du soni tuu. Di wan mujëë bi wasi Jesosi futu ku dee wojowata fëën, hën Jesosi fan ku ën a wan lesipeki fasi, hën a dëën paadon u dee zöndu  fëën (Luk. 7:37-50). Jesosi bi lei di Samalia mujëë wanlö fanöudu woto u Gadu, hii fa a bi sabi taa di mujëë dë bi ta libi ku wan womi di hën ku ën an bi tööu (Joh. 4:7, 17-19, 25, 26). Boiti di dë, Gadu bi da Jesosi di makiti faa tapa zöndu fu an kii sëmbë möön. Unfa a bi du di soni dë? Wë Jesosi bi weki sömëni sëmbë ko a libi baka. A bi weki womi ku mujëë, ku miii ku gaansëmbë tuu.​—Mat. 11:5.

11. Faandi mbei dee sëmbë dee bi ta du gaan zöndu bi lo’ u ko a Jesosi?

¹¹ An ta bigi da u taa dee sëmbë dee bi du gaan zöndu seei bi ta ko a Jesosi. A bi ta fusutan unfa de bi ta fii, nöö a bi ta libi bunu ku de. De an bi ta fëëë u fan ku ën (Luk. 15:1, 2). Nöö Jesosi bi ta gafa de, söseei a bi paka de u di de bi abi wan taanga biibi (Luk. 19:1-10). A bi abi tjalihati u sëmbë leti kuma hën Tata (Joh. 14:9). Dee soni dee a bi ta taki ku dee soni dee a bi ta du, bi ta lei taa hën Tata abi tjalihati u sëmbë, söseei taa a lobi de, nöö a kë heepi hiniwan u de u de kumutu a zöndu basu. Jesosi bi heepi sëmbë di bi du gaan zöndu u de ko abi di fii u bia du soni woto fasi, nöö de waka nëën baka.​—Luk. 5:27, 28.

12. Andi Jesosi bi taki u di fasi fa a bi o dëdë?

¹² Jesosi bi saandi bi o pasa ku ën. Na wan kodo pasi nöö a bi piki dee bakama fëën taa de bi o sei ën, söseei taa de bi o pekëën kii a wan posu (Mat. 17:22; 20:18, 19). A bi sabi taa di dëdë fëën bi o puu zöndu a goonliba, leti kumafa Johanisi ku dee tjabukama bi taki a fesi. Jesosi bi taki tu taa baka te a dëdë, nöö a „o sa hai hii pei föluku ko” nëën (Joh. 12:32). Sëmbë di  bi du gaan zöndu bi sa mbei Jehovah wai ku de te de bi ta du soni u lei taa de ta biibi Jesosi, söseei te de bi ta mbei möiti u waka nëën baka. Te de bi ta du di soni dë nöö de bi o „ko fii kumutu a hogilibi basu” (Lom. 6:14, 18, 22; Joh. 8:32). Jesosi bi abi degihati, söseei a bi dë kabakaba u dëdë a wan hogihati fasi fuu sa ko fii.​—Joh. 10:17, 18.

13. Unfa Jesosi dëdë, nöö andi di dëdë fëën ta lei u u Jehovah? (Luku di peentje tu.)

¹³ Wan u dee gaan mati u Jesosi bi sei ën, de bi kisi ën tja go söötö, de bi fon mëën, de bi mindi soni dëën u poi hën në, de bi lesi sitaafu dëën taa a du gaan hogi, söseei de bi penëën a wan hogihati fasi. Te u kaba fëën, hën dee sodati pekëën a wan posu kii. Hii fa a bi ta tja hii dee sitaafu aki, tökuseei wan Sëmbë bi dë di bi ta fii pen gaanfa möön ën. Di Sëmbë dë da Jehovah Gadu. Jehovah abi hii makiti, nöö a bi sa tapa sëmbë u de an kii di Womi Mii fëën, ma an du di soni dë. Jehovah lobi di Womi Mii fëën gaanfa seei. Ma faandi mbei a disëën be a tja sitaafu fu te a dëdë? Wë Jehovah du di soni dë u di a lobi u. Jesosi bi taki taa: „Masa Gadu lobi libisëmbë sö tee taa a da de di wan kodo Womi Mii fëën, sö taa di sëmbë di ta biibi a di mii fëën liba, an sa lasi go kaba a sösö, ma a sa feni di libi u teego.”​—Joh. 3:16.

14. Andi di dëdë di Jesosi ko dëdë da u ta lei i?

¹⁴ Di dëdë di Jesosi ko dëdë da u, da di möön gaan soni di ta lei taa Jehovah lobi dee bakamii u Adam ku Eva. Di soni aki ta lei unfa Jehovah lobi i tjika. A da i di möön bunu soni di a bi abi, söseei a fii pen gaanfa seei sö taa a sa puu i a zöndu ku dëdë basu (1 Joh. 4:9, 10). Awa, a kë heepi hiniwan fuu fuu sa ta dini ën, hii fa u da zöndu libisëmbë. Nöö a kë puu u a zöndu ku dëdë basu u teego!

15. Andi u musu du fuu sa feni wini u di dëdë di Jesosi ko dëdë da u?

¹⁵ Di dëdë di Jesosi dëdë paka paima da u aki, da wan kado di Jehovah da u sö taa a sa da u paadon u dee zöndu fuu. Ma ee u kë u Gadu da u paadon u dee zöndu fuu, nöö u musu du wan soni. Andi u musu du? Johanisi di Dopuma ku Jesosi tuu bi piki u andi u musu du. De bi taki taa: „Un disa dee hogilibi fuunu e, un bia ko ta libi bunu. Biga di juu zuntu kaa fu Gadu musu tii unu ku di Tii fëën di dë a liba ala” (Mat. 3:1, 2; 4:17). Ee u kë u Gadu da u paadon u dee zöndu fuu, söseei ee u kë ko dë gaan mati ku ën, nöö u musu bia ko ta libi kumafa a kë. Ma andi a kë taki u bia ko ta libi kumafa Gadu kë, nöö unfa di soni dë sa mbei Jehovah ko ta wai ku u hii fa u da zöndu libisëmbë? Wë di woto di ta ko o booko di soni aki a piki möni da u.