1. Andi Jehovah kë taa hii sëmbë musu du?

 JEHOVAH mbei u a sö wan fasi taa u sa taki da useei andi u kë du. Hii daka u ta du soni kumafa u kë. Ma di möön fanöudu soni di wan sëmbë sa buta taa a o du, da di buta di a sa buta hën libi a Jehovah maun, nöö a ko toon wan u dee sëmbë u di wosudendu fëën. Jehovah kë taa hii sëmbë du di soni dë. Faandi mbei? Wë u di a lobi sëmbë, söseei u di a kë u de abi wan möön bunu libi. A kë u de ku ën dë mati, söseei a kë u de libi u teego.​—Deto. 30:19, 20; Gal. 6:7, 8.

2. Unfa Jehovah ta si dee sëmbë dee an ta lei taa de ta tjali u dee zöndu u de? (1 Johanisi 2:1)

² Jehovah an ta musu sëmbë u dini ën. A ta disa hiniwan sëmbë be deseei taki andi de o du. Ma unfa a dë ee wan Keesitu sëmbë du wan gaan zöndu? Wë ee an ta hati di sëmbë taa a du wan zöndu, nöö de musu puu ën a di kemeente (1 Kol. 5:13). Ma aluwasi ee de puu di sëmbë a di kemeente, tökuseei Jehovah ta dë ku ën mëni jeti. A ta dë kabakaba ta wakiti u di sëmbë lei taa a ta tjali u di zöndu di a du, söseei fëën ku ën sa ko dë gaan mati baka. Fuu taki ën, nöö u di soni dë hedi mbei Jehovah manda Jesosi ko dëdë paka paima da u. A sö wan fasi a sa da u paadon ee a hati u taa u mbei wan föutu. (Lesi 1 Johanisi  2:1.) Jehovah da wan Gadu di lo’ sëmbë, nöö a ta da dee sëmbë fëën taanga, u de bia ko ta libi kumafa a kë ee a ko pasa taa de du wan gaan zöndu.​—Sak. 1:3; Lom. 2:4; Jak. 4:8.

3. Andi woo lei a di woto aki?

³ Jehovah kë fuu ko ta si zöndu kumafa a ta si ën, söseei a kë fuu ko ta si dee sëmbë dee du wan gaan zöndu kumafa a ta si de. Di woto aki o lei u unfa u sa du di soni dë. Te i ta lesi ën, nöö luku andi Paulosu bi piki dee baaa ku dee sisa u Kolenti u de du, di wan baaa u di kemeente bi du wan gaan zöndu. Luku andi a bi piki de u de du tu, di di hogiduma bi bia ko ta du soni kumafa Jehovah kë. Boiti di dë, di woto aki o lei i unfa Jehovah ta si wan Keesitu sëmbë di du wan gaan zöndu.

ANDI BI PASA DI WAN BAAA BI DU WAN GAAN ZÖNDU A DI TEN U DEE FESITEN KEESITU SËMBË?

4. Andi bi pasa a di kemeente u Kolenti? (1 Kolenti 5:1, 2)

⁴ Lesi 1 Kolenti 5:1, 2. A di u dii sëndëlengi waka u Paulosu, a bi jei wan soni u di njunjun kemeente di bi hopo a Kolenti di bi ta toobi ën. A bi jei taa wan baaa u di kemeente bi ta duumi ku di mujëë fëën tata. Wan gaan hogi soni seei a bi ta du dë, nöö „dee sëmbë dee an ta biibi seei ta si ën u gaan hogi soni te de an ta libi sö”! Di kemeente bi ta pakisei taa aan toobi ee di baaa dë bi fika a di kemeente. Kandë so u de bi ta si kuma de bi ta lei taa de abi tjalihati u zöndu libisëmbë kuma Jehovah. Ma Jehovah hën an ta da pasi u dee sëmbë fëën ta libi a wan fanafiti fasi. A kan taa di soni dë bi ta toobi so sëmbë di an bi ta dini Jehovah, söseei a kan taa de bi ko ta taki hogi u di kemeente u di baaa dë hedi. Nöö ee a bi fika a di kemeente, nöö woto baaa ku sisa bi sa bigi ko ta du soni kuma hën. Wë nöö andi Paulosu bi piki di kemeente u de du?

5. Andi Paulosu bi piki di kemeente u de du, nöö andi a bi kë taki ku di soni dë? (1 Kolenti 5:13) (Luku di peentje tu.)

⁵ Lesi 1 Kolenti 5:13. Jehovah bi mbei Paulosu sikifi wan biifi, u piki di kemeente taa de musu puu di sëmbë a di kemeente ee an kë bia ko ta du soni kumafa Jehovah kë. Unfa dee baaa ku dee sisa bi musu ko ta libi ku ën? Wë Paulosu bi piki de taa de an bi „musu hulu” ën möön. Andi a bi kë taki ku di soni dë? Wë a bi booko ën a piki möni da de. A bi taki taa: „Sö wan sëmbë wan musu njan ku ën seei” (1 Kol. 5:11). Te i ta njan makandi ku wan sëmbë, nöö hesihesi seei i sa bigi ta da woto ku ën. Nöö di soni dë sa mbei i bigi ta dë makandi ku ën möön gaanfa. A dë gbelingbelin u fusutan taa dee baaa ku dee sisa an bi musu ta dë makandi ku di womi dë ee an dë fanöudu.  Di soni dë bi o tjubi di kemeente da di fanafiti fasi fa a bi ta libi (1 Kol. 5:5-7). Boiti di dë, di hulu di de an bi o ta hulu ën möön, bi sa heepi ën faa ko fusutan taa a du wan gaan hogi. Söseei a bi sa mbei a ko ta hati ën, nöö a bia ko ta du soni kumafa Jehovah kë.

6. Unfa di kemeente bi du soni baka di de bi kisi di biifi u Paulosu, nöö andi di soni dë bi mbei di womi du?

⁶ Baka di Paulosu manda di biifi da di kemeente, hën a bigi ta hakisi hënseei unfa dee baaa ku dee sisa bi o du soni. Titusi bi tja wan bunu buka ko da Paulosu di bi mbei Paulosu wai seei. Dee baaa ku dee sisa u Kolenti bi du soni kumafa Paulosu bi piki de (2 Kol. 7:6, 7). Wantu liba baka di de bi du soni kumafa Paulosu bi piki de, hën di womi di bi du di gaan zöndu bi bia ko ta lei taa a ta tjali u di soni di a bi du! A bi tooka di fasi fa a bi ta si soni, ku di fasi fa a bi ta du soni. Nöö a bi bigi ko ta du soni kumafa Jehovah kë (2 Kol. 7:8-11). Wë nöö andi Paulosu bi piki di kemeente u de du baka di dë?

 UNFA DI KEMEENTE BI LIBI KU DI WOMI BAKA DI A LEI TAA A TA TJALI U DI SONI DI A BI DU?

7. Andi bi pasa baka di de bi puu di hogiduma a di kemeente? (2 Kolenti 2:5-8)

⁷ Lesi 2 Kolenti 2:5-8. Paulosu bi taki taa: ’Biga di sitaafu di gaan së fuunu bi sitaafu ën naandë kaa, nöö a tjika.’ Di soni di Paulosu bi taki dë, kë taki taa baka di de puu di hogiduma a di kemeente, hën a ko fusutan taa a musu tooka. Nöö u di a bi bia ko ta du soni kumafa Gadu kë baka, mbei an bi dë fanöudu u de sitaafu ën go dou.​—Heb. 12:11.

8. Un woto soni Paulosu bi piki di kemeente faa du?

⁸ U di di womi bi lei taa a ta tjali u di soni di a bi du, mbei Paulosu bi piki dee gaanwomi u de tei ën a di kemeente baka. A bi piki de u de ’puu [di baaa di bi du di hogi] a bëë, nöö de fan ku ën be hati fëën kötö’. Söseei a bi piki de be de ’lei ën taa de lobi ën jeti’. Paulosu bi kë u dee baaa ku dee sisa u di kemeente lei di baaa taa de dëën paadon tuutuu, söseei taa de lobi ën. Di soni aki bi musu dë u si a di fasi fa de ta libi ku ën, a dee soni di de bi ta taki, söseei a dee soni di de bi ta du. A sö wan fasi de bi o lei gbelingbelin taa de ta wai taa a toona ko a di kemeente.

9. Faandi mbei a bi sa taanga da so sëmbë u de tei di baaa ku wai a di kemeente baka?

⁹ Kandë a bi taanga da so baaa ku sisa u de tei di womi ku wai. Faandi mbei u taki sö? Di fasi fa a bi ta libi bi mbei soni an bi ta waka bunu a di kemeente, nöö kandë di soni dë bi ta hati so u de gaanfa jeti, u di a bi poi de në. So u dee baaa ku dee sisa bi ta mbei taanga möiti u hoi deseei a dee wëti u Jehovah. Nöö kandë de bi sa ta si kuma soni an paati ku leti, u di de bi tei di sëmbë di bi du di gaan hogi dë ku wai a di kemeente baka. (Luku Lukasi 15:28-30.) Ma faandi mbei a bi dë fanöudu u de lei di baaa taa de lobi ën tuutuu?

10-11. Andi bi sa pasa ee dee gaanwomi bi buta taa de an bi o da di wotowan u de paadon?

¹⁰ Pakisei luku andi bi sa pasa, ee dee gaanwomi an bi kë toona tei di sëmbë a di kemeente baka, hii fa a bi lei taa a ta tjali u di zöndu di a bi du. Nasö pakisei luku andi bi sa pasa ee dee gaanwomi bi tei ën a di kemeente baka, ma dee baaa ku dee sisa an bi kë du soni u lei taa de lobi ën. Wë a bi sa ko ta „tjali poi”. A bi sa ko ta si kuma nöiti a o sa dini Jehovah möön. Boiti di dë, a bi sa mbei a ko lasi hati sö tee taa a tapa u mbei möiti fëën ku Jehovah ko dë bunu baka.

¹¹ Andi bi sa pasa möön, ee dee baaa ku dee sisa an bi kë da di wotowan u de paadon? Wë di soni dë bi sa mbei de ku Jehovah poi. Biga a bi o ta lei taa de an abi tjalihati u sëmbë kuma Jehovah. A bi o ta lei taa de ta si soni kumafa Saatan ta si soni, u di an ta lei taa a abi tjalihati u sëmbë. Dee baaa ku dee sisa dë bi o ko dë sëmbë di Saatan ta wooko ku de u mbei di baaa an dini Jehovah möön.​—2 Kol. 2:10, 11; Ef. 4:27.

12. Unfa di kemeente bi sa lei taa de ta djeesi Jehovah?

¹² Unfa dee baaa ku dee sisa u Kolenti bi sa lei taa de ta djeesi Jehovah, ma de an ta djeesi Saatan? De bi musu ta da dee baaa ku dee sisa dee lei taa de ta tjali u dee zöndu u de paadon, kumafa Jehovah da de paadon. Luku andi so u dee sëmbë dee bi sikifi Bëibel bi taki u Jehovah. Dafiti bi taki taa: „I da wan bunu Gadu, nöö i dë kabakaba u da sëmbë paadon„ (Ps. 86:5). Mika bi taki taa: „Un Gadu seei dë kuma i? I ta da sëmbë paadon u dee föutu u de, nöö ja ta buta pakisei a dee soni dë möön” (Mik. 7:18). Nöö Jesaaja bi taki taa: „Be dee hogihati sëmbë disa dee hogilibi u de, söseei be dee sëmbë dee ta du hogi, puu dee taku pakisei u de a de hati. Be de bia toona ko a Jehovah, di o lei taa a abi tjalihati u de. Be de bia  toona ko a di Gadu fuu, biga a o da de paadon ku hii hën hati.”​—Jes. 55:7.

13. Faandi mbei a bi dë wan bunu soni u de toona tei di womi di bi ta tjali u di zöndu di a bi du a di kemeente baka? (Luku di pisi “ Un longi a bi tei ufö de toona tei di womi a di kemeente u Kolenti baka?”)

¹³ Ee dee baaa ku dee sisa u Kolenti bi kë lei taa de ta djeesi Jehovah, nöö de bi musu da di womi paadon, u di a bi du soni u lei taa a ta tjali u di zöndu di a bi du, söseei de bi musu du soni u lei ën taa de lobi ën. Paulosu bi taki taa di tei di de bi o tei di wotowan u de ku wai a di kemeente baka, bi o lei taa de ’ta piki Gadu buka a hii soni’ (2 Kol. 2:9). Wantu liba nöö bi pasa di de bi puu di baaa a di kemeente, nöö di fasi fa dee baaa ku dee sisa bi du soni, bi heepi ën faa bia ko ta du soni u lei taa a ta tjali u di zöndu di a bi du. An bi dë u dee gaanwomi wakiti möön ufö de toona tei ën a di kemeente baka.

UNFA U SA LEI TAA U TA DU SONI A WAN LETI FASI KUMA JEHOVAH, SÖSEEI TAA U ABI TJALIHATI KUMA ËN?

14-15. Andi u ta lei a di fasi fa de bi seeka di soni di bi pasa a di kemeente u Kolenti? (2 Petuisi 3:9) (Luku di peentje tu.)

¹⁴ Jehovah bi mbei de sikifi di soni di bi pasa a di kemeente u Kolenti buta a di Wöutu fëën, sö taa u sa lei wan soni nëën (Lom. 15:4). Di woto dë ta lei u taa Jehovah an ta disa dee sëmbë dee du wan gaan zöndu be de fika a di kemeente, ee de an ta tjali u di hogi di de du. So sëmbë sa ta pakisei taa u di Jehovah abi tjalihati u sëmbë, mbei a o disa wan sëmbë di an ta tjali u di zöndu di a du faa fika a di kemeente.  Ma na sö Jehovah ta lei taa a abi tjalihati u sëmbë. Hii fa Jehovah abi tjalihati u sëmbë, tökuseei na hii fasi u libi ta kai ku ën, söseei an ta tooka dee wëti fëën (Jud. 4). Ee Jehovah da pasi taa wan sëmbë fika a di kemeente hii fa an ta tjali u di zöndu di a du, nöö di soni dë bi o lei taa an abi tjalihati u dee wotowan dee dë a di kemeente, u di di soni dë bi o mbei hogi miti de.​—Nöng. 13:20; 1 Kol. 15:33.

¹⁵ U lei taa Jehovah an kë u na wan sëmbë kaba a sösö. A kë heepi hii sëmbë u de feni teego libi. A ta lei taa a abi tjalihati u dee sëmbë dee tooka di fasi fa de ta si soni, ku di fasi fa de ta du soni, u de sa ko dë mati fëën baka. (Eze. 33:11; Lesi 2 Petuisi 3:9.) Fëën mbei di di womi u Kolenti bi lei taa a ta tjali u di hogi di a du, söseei di a toona bia ko ta du soni kumafa Jehovah kë, hën Jehovah wooko ku Paulosu u piki di kemeente be de da di womi paadon, nöö de tei ën ku wai a di kemeente baka.

16. Unfa i ta si Jehovah nöunöu, baka di i lei soni u di fasi fa a bi heepi di baaa di bi du wan gaan hogi a di kemeente u Kolenti?

¹⁶ Di woto u di kemeente u Kolenti aki, ta lei u taa Jehovah lobi sëmbë gaanfa seei, söseei taa a ta du soni a wan leti fasi (Ps. 33:5). Di soni aki an ta mbei i kë gafa Jehovah möön gaanfa u? Fuu taki ën kumafa a dë, nöö hii u tuu da zöndu libisëmbë. Hii u tuu kë u Gadu abi tjalihati fuu, söseei faa ta da u paadon. U ta tei ën u bigi seei taa Jehovah mbei di Womi Mii fëën ko dëdë paka paima da u, sö taa a sa da u paadon u dee hogilibi fuu. A ta da u kötöhati seei, u di u ko sabi taa Jehovah lobi dee sëmbë fëën gaanfa, söseei taa a kë u de abi di möön bunu libi di de sa abi!

17. Fuun soni woo taki a di woto di ta ko?

¹⁷ Unfa u musu du soni te wan sëmbë du wan gaan zöndu a di ten fuu aki? Unfa dee gaanwomi u kemeente sa lei taa de ta djeesi Jehovah a di fasi fa a ta du soni, u heepi wan sëmbë di du wan gaan zöndu, faa ko ta tjali u di hogi di a du? Unfa dee baaa ku dee sisa musu du soni te dee gaanwomi puu wan sëmbë a di kemeente, nasö te de toona tei wan sëmbë a di kemeente baka? Woo taki u dee soni aki a di woto di ta ko.