1-2. (a) Unfa Jehovah ta si dee sëmbë dee an kë disa di gaan zöndu di de ta du? (b) Andi Jehovah kë u dee sëmbë dee du wan gaan zöndu musu du?

 NA HII fasi u libi ta kai ku Jehovah Gadu (Ps. 5:4-6). A kë fuu ta libi ku dee wëti fëën dee a da u a di Bëibel. Ma Jehovah sabi taa u da zöndu libisëmbë, nöö na hii juu u sa ta du soni kumafa a kë (Ps. 130:3, 4). Ma tökuseei an o da sëmbë pasi u de ta du hogi, u di de sabi taa a abi bunuhati (Jud. 4). Di Bëibel ta taki taa Gadu o kii dee hogiduma a di feti u Amagedon.​—2 Pet. 3:7; Ako. 16:16.

² Aluwasi fa a dë sö, tökuseei Jehovah an kë u na wan sëmbë dëdë kaba a sösö. Kumafa u bi si a dee woto dee u bi luku a fesi, nöö di Bëibel ta taki gbelingbelin taa „a kë taa hii sëmbë musu feni di okasi u de sa bia de libi ko nëën” (2 Pet. 3:9). Dee gaanwomi ta djeesi Jehovah. De ta mbei möiti u du soni ku pasensi, te de ta heepi dee sëmbë dee bi du wan gaan zöndu, u de toona ko ta du soni kumafa Jehovah kë baka. Ma tökuseei na hii de tuu ta kë haika (Jes. 6:9). Hii fa dee gaanwomi ta mbei möiti u heepi de, tökuseei so u de an ta kë disa di hogilibi u de. Wë nöö andi musu pasa te soni dë sö?

„UN PUU DI SËMBË DI DU DI HOGI A UNU MINDI”

3. (a) Andi musu pasa ee wan sëmbë di du wan gaan zöndu an ta lei taa a ta tjali u di zöndu di a du? (b) Faandi mbei u sa taki taa di sëmbë di du di zöndu, hën bi kë u de puu ën a di kemeente?

³ Te wan sëmbë di du wan gaan zöndu an ta lei taa a ta tjali u di zöndu di a du, nöö dee gaanwomi musu du di soni di sikifi  a 1 Kolenti 5:13. A ta taki taa: „Un puu di sëmbë di du di hogi a unu mindi e.” Fuu taki ën, nöö di sëmbë di du di zöndu hën kë u de puu ën a di kemeente. Biga a bi sabi a fesi kaa, taa ee an ta du soni u lei taa a ta tjali u di zöndu di a du, nöö de o puu ën a di kemeente. Di soni di a paandi, hën a ta koti (Gal. 6:7). Faandi mbei u sa taki sö? Wë u di an bi kë bia du soni woto fasi, hii fa dee gaanwomi bi mbei möiti sömëni pasi u heepi ën (2 Kön. 17:12-15). Di fasi fa a ta du soni ta lei taa an kë du soni kumafa Jehovah kë.​—Deto. 30:19, 20.

4. Faandi mbei dee baaa ta mbei di kemeente ko sabi te de puu wan sëmbë a di kemeente?

⁴ Te de puu wan sëmbë di du wan gaan zöndu a di kemeente, nöö dee baaa ta mbei di kemeente ko sabi taa sö wan sëmbë an dë wan Jehovah Kotoigi möön. De an ta du di soni dë u mbei di sëmbë fii sen. Ma de ta du ën, sö taa di kemeente sa du di soni di di Bëibel ta taki. A ta taki taa ’wa musu hulu di sëmbë dë’, söseei taa ’wa musu njan ku ën seei’ (1 Kol. 5:9-11). Na u sösö di Bëibel ta taki di soni aki. Apösutu Paulosu bi taki taa: „Wan pikisö sooda nöö ta mbei hii di boon soopu” (1 Kol. 5:6). Ee de an puu dee sëmbë dee an ta tjali u di zöndu u de a di kemeente, nöö di soni dë sa mbei taa dee woto baaa ku sisa an ko ta fii u piki Jehovah buka möön.​—Nöng. 13:20; 1 Kol. 15:33.

5. Unfa u musu ta si wan sëmbë di de puu a di kemeente, nöö faandi mbei u musu ta si ën a di lö fasi dë?

⁵ Unfa u musu si wan baaa nasö wan sisa di de puu a di kemeente? Hii fa wa ta hulu ën, tökuseei wa musu ta si kuma an o sa toona ko a di kemeente nöiti möön. Ma u musu ta si ën kuma wan sikapu di lasi. Wan sikapu di lasi sa toona ko baka. Hoi a pakisei taa di sëmbë dë buta hën libi a Jehovah maun. A tjali taa nöunöu dë an ta hoi hënseei a di buka di a mbei ku Jehovah, nöö di soni dë sa mbei gaan hogi miti ën (Eze. 18:31). Ma solanga di daka u Jehovah an dou jeti, sö wan sëmbë sa toona ko a di kemeente baka. Unfa dee gaanwomi sa heepi wan sëmbë di de puu a di kemeente?

UNFA DEE GAANWOMI TA HEEPI DEE SËMBË DI DE PUU A DI KEMEENTE?

6. Andi dee gaanwomi o du u heepi wan sëmbë di de puu a di kemeente?

⁶ A dë sö taa te de puu wan sëmbë a di kemeente, nöö dee gaanwomi an ta suku u heepi ën möön faa toona ko dini Jehovah u? Wë nönö, na seei! Te dee gaanwomi ta piki wan sëmbë di an ta tjali u di zöndu fëën taa de o puu ën a di kemeente, nöö de ta piki ën tu andi a musu du, sö taa de sa toona tei ën a di kemeente baka. Ma na di soni dë nöö dee gaanwomi o du. Gaansë pasi de o ta piki di sëmbë taa de bi o kë u de ku ën toona miti baka wantu liba, u si ee di sëmbë tooka pakisei. Ee baka wantu liba di sëmbë kë fëën ku dee gaanwomi miti, nöö de o dëën taanga faa lei taa a ta tjali u di zöndu di a du, sö taa a sa toona ko baka. Ma aluwasi ee an tooka pakisei seei o, tökuseei dee gaanwomi o mbei möiti go dou u de ku ën sa toona miti bakaten.

7. Unfa dee gaanwomi ta djeesi Jehovah a di fii di a ta fii da sëmbë, te de ta suku u heepi wan sëmbë di de bi puu a di kemeente? (Jelemia 3:12)

⁷ Dee gaanwomi ta mbei möiti u djeesi Jehovah a di fii di a ta fii da sëmbë, te de ta suku u heepi wan sëmbë di de puu a di kemeente. Jehovah an bi wakiti u dee Isaëli sëmbë seei toona ko nëën di de bi go disëën. Ma hën bi hopo du wan soni u heepi de, hii fa de an bi pena du soni jeti u lei taa de ta tjali u dee zöndu u de. Kumafa u bi si a di u tu woto u Di Hei Wakitimawosu aki, nöö Jehovah bi lei unfa a ta fii da de tjika, di a bi piki di tjabukama  fëën de kai Hosea faa toona mindi ku di mujëë fëën baka, hii fa di mujëë an bi disa di hogilibi fëën möönsö (Hos. 3:1; Mal. 3:7). Dee gaanwomi ta djeesi Jehovah. De kë heepi di sëmbë di bi du wan gaan zöndu faa toona ko baka, nöö de an ta mbei a taanga dëën faa toona ko baka.​—Lesi Jelemia 3:12.

8. Unfa di woto di Jesosi bi konda u di womi mii di bi lasi, ta heepi u fuu ko möön fusutan unfa Jehovah ta fii da sëmbë tjika? (Lukasi 15:7)

⁸ Buta pakisei a di woto di Jesosi bi konda u di womi mii di bi lasi. U bi taki soni fëën a di u tu woto u Di Hei Wakitimawosu aki. Di di tata bi si di womi mii fëën ta toona ko a wosu, hën di tata ’hopo vu kule go kisi ën baasa, hën a bosi ën wai ku ën te a bigi’ (Luk. 15:20). Hoi a pakisei taa di tata an bi wakiti u di womi mii fëën hakisi ën faa dëën paadon, ma a bi kule go nëën u di a lobi ën. Dee gaanwomi ta mbei möiti u libi a di seei fasi ku dee sëmbë dee an dë a di kemeente möön. De kë heepi dee sëmbë aki u de „toona ko a wosu baka” (Luk. 15:22-24, 32). Piizii ta dë a liba ala te wan sëmbë di bi ta du zöndu toona ko baka, nöö piizii ta dë a goonliba aki tu!​—Lesi Lukasi 15:7.

9. Andi Jehovah ta da dee sëmbë dee bi du wan zöndu taanga u de du?

⁹ Hii dee soni dee u luku te dou nöunöu, ta heepi u fuu si taa Jehovah an ta da pasi u sëmbë fika a di kemeente ee de an ta tjali u dee zöndu di de du. Ma an ta bia baka da de tu. A kë u de toona ko nëën baka. Hosea 14:4 ta taki unfa Jehovah ta si dee sëmbë dee ta tjali u dee zöndu u de. A ta taki taa: „Mi o mbei dee sëmbë aki ko bëtë, nöö de o toona ta piki mi buka. Mi o lobi de, u di miseei hën këën sö. Hati u mi an o boonu . . . möön.” Di soni aki ta da dee gaanwomi taanga, u de ta luku ee de ta si soni di ta lei taa wan sëmbë bigi ta tjali u di zöndu di a du. Di soni aki musu da dee sëmbë di de puu a di kemeente taanga tu, u de toona ko a Jehovah baka.

10-11. Unfa dee gaanwomi o du soni u heepi dee sëmbë dee de bi puu a di kemeente sömëni jaa pasa?

¹⁰ Unfa a dë ku dee sëmbë dee de bi puu a di kemeente sömëni jaa pasa? A kan taa dee sëmbë dë an ta du di zöndu di de bi du möön, di bi mbei taa de bi puu de a di kemeente. So juu a ta pasa taa de an ta pena mëni möön seei faandi mbei de bi puu de a di kemeente. Aluwasi fa soni dë, tökuseei dee gaanwomi o suku u ko sabi naasë dee sëmbë dë ta dë, sö taa de sa go luku de. Te de go luku wan sëmbë, nöö de o hakisi ën ee de sa begi makandi ku ën, söseei de o da di sëmbë taanga faa toona ko a di kemeente baka. Wë an dë u taki taa di sëmbë an o abi wan taanga biibi ee de bi puu ën a di kemeente sömëni jaa longi kaa. Fëën mbei ee a lei taa a kë toona ko a di kemeente baka, nöö dee gaanwomi sa seeka soni u wan sëmbë sa lei ën soni u Bëibel, aluwasi ee de an toona tei ën a di kemeente jeti. Ma hii juu dee gaanwomi de musu ta seeka soni u sëmbë sa lei dee sëmbë aki soni u Bëibel.

¹¹ Dee gaanwomi ta mbei möiti u djeesi Jehovah a di fii di a ta fii da sëmbë. Fëën mbei de o suku hii dee sëmbë dee an ta dini Jehovah möön, u da de taanga u de toona ko baka. Te wan sëmbë di bi du wan gaan zöndu lei taa a tjali u di zöndu fëën, söseei te a disa di hogi di a bi ta du, nöö de sa toona tei ën a di kemeente baka.​—2 Kol. 2:6-8.

12. (a) Na un ten a ta dë fanöudu u dee gaanwomi wegi soni luku bunu? (b) Faandi mbei wa musu si kuma nöiti Jehovah o sa abi tjalihati u so kulupu u sëmbë, u di zöndu di de du hedi? (Luku di pisi di ta taki u woto fanöudu soni tu.)

¹² So juu a o dë u dee gaanwomi wegi soni luku bunu, ufö de toona tei wan sëmbë a di kemeente baka. Ee wan sëmbë bi du hogihogi  ku piki mii, ee a bi bia baka da di tuutuu lei, nasö ee a bi du soni a wan fasi faa bi sa booko di tööu fëën, nöö a o dë fanöudu u dee gaanwomi ko sabi ee a ta tjali u di zöndu fëën tuutuu (Mal. 2:14; 2 Tim. 3:6). Biga de musu du soni ku köni u hogi an miti dee baaa ku dee sisa u di kemeente. Ma a dë fanöudu fuu hoi a pakisei tu, taa Jehovah dë kabakaba u toona tei hiniwan sëmbë a di kemeente baka, ee de ta tjali tuutuu u di zöndu di de du, söseei ee de an ta du ën möön. Fëën mbei hii fa dee gaanwomi ta wegi soni luku bunu te de o heepi sëmbë di bi libi a wan ganjanganjan fasi, nasö a wan bödjëë fasi ku wotowan,  tökuseei de an musu si kuma nöiti Jehovah o sa abi tjalihati u so kulupu u sëmbë, u di zöndu di de du hedi. a​—1 Pet. 2:10.

ANDI DI KEMEENTE SA DU?

13. Andi tooka a di fasi fa u ta libi ku wan sëmbë di dee gaanwomi bë wojo da, ku wan sëmbë di de puu a di kemeente?

¹³ Kumafa u bi si a di woto di pasa, nöö so juu dee baaa ta taki a kemeente taa de bë wojo da wan sëmbë. Te soni pasa sö, nöö u sa ta nama ku di sëmbë jeti, u di a tjali u di zöndu di a du, söseei an ta du ën möön (1 Tim. 5:20). Sö wan sëmbë dë a di kemeente jeti, nöö a abi dee baaa ku dee sisa fëën fanöudu u de ta dëën taanga (Heb. 10:24, 25). Ma soni ta dë woto fasi te a nama ku wan sëmbë di de puu a di kemeente. ’Wa ta hulu’ sö wan sëmbë möön, söseei ’wa ta njan ku ën möön seei’.​—1 Kol. 5:11.

14. Unfa dee Keesitu sëmbë sa mbei háti u de tii de, te a nama ku di fasi fa de musu libi ku wan sëmbë di de puu a di kemeente? (Luku di peentje tu.)

¹⁴ Dee soni dee u taki aki kë taki taa wa o pena dë a soni u wan sëmbë di de puu a di kemeente möön u? Wë aan fu dë sö. A dë sö tuu taa wa o ta hulu sö wan sëmbë möön. Ma so Keesitu sëmbë sa luku ee háti u de ta da de pasi u kai wan sëmbë di de puu a di kemeente faa ko a komakandi. A sa kan taa di sëmbë dë dë wan famii u de, nasö wan gaan mati u de. Nöö ee a ko a di komakandi wë? Wë fosufosu, nöö wa bi o da sö wan sëmbë odi. Ma hiniwan Keesitu sëmbë musu mbei dee mama wëti u Bëibel ku di háti fëën tii ën faa sabi unfa a o du soni. So sëmbë sa fii u da di sëmbë odi, nasö de sa fii u wai ku di sëmbë te a ko a di komakandi. Ma wa o dë ta da woto ku di sëmbë, söseei wa o ta hulu ën.

15. Fuun pei sëmbë 2 Johanisi 9-11 ta taki? (Luku di pisi „ Johanisi ku Paulosu bi ta taki soni u di wan pei zöndu ö?”)

¹⁵ Kandë so sëmbë sa ta hakisi deseei taa: ’Ma di Bëibel an ta taki taa ee wan Keesitu sëmbë ta da sö wan sëmbë odi, nöö a o dë taa  hën ku ën tuu ta du di hogi makandi ö?’ (Lesi 2 Johanisi 9-11.) Wë te u lesi dee pisi dee nama ku di tëkisi aki, nöö u ta si taa sëmbë di bia baka da di biibi de ta taki, ku hiniwan woto sëmbë di ta pooba u da wotowan taanga u de du soni di an bunu (Ako. 2:20). Fëën mbei ee wan sëmbë dë seei fajafaja ta taki soni di ta lei taa a bia baka da di biibi, nasö ee a ta da wotowan taanga u du soni di an bunu, nöö dee gaanwomi an o seeka soni u go luku ën. Hii fa soni dë sö, tökuseei sö wan sëmbë sa ko kisi hënseei. Ma ee di sëmbë an ko kisi hënseei jeti, nöö wa o dëën odi, söseei wa o kai ën faa ko a komakandi tu.

DJEESI JEHOVAH A DI TJALIHATI FËËN, SÖSEEI A DI FII DI A TA FII DA SËMBË

16-17. (a) Andi Jehovah kë u zöndu libisëmbë musu du? (Ezekiëli 18:32) (b) Unfa dee gaanwomi sa lei taa de ta wooko makandi ku Jehovah, te de ta pooba u heepi dee sëmbë dee bi du wan gaan zöndu?

¹⁶ Andi u lei a hii dee woto u Di Hei Wakitimawosu aki? U lei taa Jehovah an kë u na wan kodo sëmbë lasi kaba a sösö! (Lesi Ezekiëli 18:32.) A kë fu hën ku zöndu libisëmbë musu ko bunu baka (2 Kol. 5:20). Fëën mbei sensi na awooten, a bi ta da dee sëmbë dee an bi ta dini ën möön taanga, u de toona ko nëën. Dee gaanwomi u kemeente abi di gaandi u wooko makandi ku Jehovah, u heepi dee sëmbë dee du wan gaan zöndu, u de lei taa de ta tjali u di zöndu di de du.​—Lom. 2:4; 1 Kol. 3:9.

¹⁷ Pakisei fa piizii ta dë a liba ala tjika, te wan zöndu libisëmbë bia libi! Jehovah, di Tata fuu di dë a liba ala, ta wai gaanfa seei te wan sëmbë di an bi ta dini ën möön toona ko a di kemeente baka. Möönmöön u ta ko lobi Jehovah te u ta kai pakisei a di bunuhati fëën, a di tjalihati di a abi, söseei a di fii di a ta fii da sëmbë.​—Luk. 1:78.