1, 2. (a) Un pei kötöhati u sa ko abi nöunöu kaa? (b) Faandi mbei wa o sa ta libi bööböö söndö taa fuka ta miti u a di ten aki? (Luku di peentje a bigi u di woto.)

HII u tuu kë wan bööböö libi, nöö u kë koti pasi da hiniwan soni di sa da u bookohedi. Fëën mbei u ta tei ën u bigi taa Jehovah da u di „kötöhati” fëën. Di kötöhati aki ta heepi u te wan soni ta toobi u (Filipi 4:6, 7). U di u buta u libi a Gadu maun, mbei „u ku Gadu ko fii”. Di soni aki kë taki taa u ku Gadu ko dë gaan mati.​—Loomë 5:1.

² Ma di juu an dou jeti ka Gadu o mbei hii sëmbë a goonliba libi bööböö. U ta libi a dee lasiti daka u di goonliba aki. Fëën mbei sömëni soni dë di ta da u bookohedi. Sömëni hogihati sëmbë dë a di goonliba aki (2 Timoteo 3:1-4). Söseei u musu mbei möiti u Saatan an kisi u ganjan, nöö u musu ta köni ku dee poipoi soni dee a ta lei sëmbë (2 Kolenti 10:4, 5). Ma di soni di sa möön da u bookohedi, hën da te dee famii fuu dee  an ta dini Jehovah ta du ku u. Kandë so u de ta mbei u fa, nasö kandë de ta piki u taa u ta paati di bëë. De sa piki u tu taa wa o sa dë sëmbë u de möön ee wa disa di dini di u ta dini Jehovah. Ma unfa u musu si di du di dee famii fuu ta du ku u? Nöö andi u sa ta du fuu ta dë bööböö hii fa dee soni aki ta miti u?

3, 4. (a) Andi dee lei u Jesosi ta du ku sëmbë u wan wosudendu? (b) Na un ten a sa möön taanga da u fuu waka a Jesosi baka?

³ Jesosi bi sabi taa na hii sëmbë bi o tei dee soni dee a bi ta lei sëmbë. A bi sabi tu taa so sëmbë bi o ta du ku dee bakama fëën, nöö dee bakama fëën bi o abi degihati fanöudu. Di soni aki bi o sa mbei de an abi wan bööböö libi a di wosudendu u de. Jesosi bi taki taa: „Dee sëmbë o, fa i si mi ko a di goonliba aki, na wata mi tja ko e, ma faja mi tja. Mi ko u ko paati sëmbë ku sëmbë. Biga fu mi hedi a o pasa leti kumafa i si Gadu Buku taki. A taa: ’Wan womi mii ku ën tata o kisi gaan toobi. Mujëë mii ku ën mama o kisi gaan toobi. Mai ku mai o kisi gaan toobi. Nöö dee möön gaan felanti di wan sëmbë o abi, de o dë dee bëë fëën seei.’”​—Mateosi 10:34-36.

⁴ Andi Jesosi bi kë taki, di a bi taki taa: „Na pakisei taa mi ko u tja bööböö libi ko?” A bi kë u sëmbë sabi taa soni o miti de te de ko toon bakama fëën. Jesosi bi ko lei sëmbë di tuutuu lei u Gadu, ma na paati a bi kë paati sëmbë u wan wosudendu (Johanisi 18:37). Ma dee bakama fëën bi musu sabi taa so juu a bi o ta taanga da de u de waka nëën baka, möönmöön ee dee mati u de, nasö dee famii u de an tei di tuutuu lei.

5. Un soni bi miti dee bakama u Jesosi?

⁵ Jesosi bi taki taa dee bakama fëën musu dë kabakaba u hoi dou te dee famii u de ta du ku de (Mateosi 10:38). U di dee bakama u Jesosi bi kë piki Jesosi buka, mbei de bi hoi dou hii fa dee famii u de bi ta mbei de fa, söseei hii fa de an bi kë de kuma famii u de möön. Ma dee bunu di de bi feni, bi hia möön dee soni di de bi lasi.​—Lesi Maikusi 10:29, 30.

6. Andi u musu hoi a pakisei te dee famii fuu ta du ku u?

⁶ Hii fa dee famii fuu ta du ku u u di u ta dini Jehovah, tökuseei u lobi de. Ma u musu hoi a pakisei taa Gadu ku Keesitu da dee sëmbë dee u musu möön lobi (Mateosi 10:37). U musu hoi a pakisei tu taa Saatan sabi taa u lobi dee famii fuu, nöö a sa wooko ku di soni dë u mbei wa hoi useei a Jehovah möön. Boo luku wantu soni di sa mbei a taanga da u fuu hoi dou, söseei unfa u sa hoi dou te de ta miti u.

7. Unfa i musu ta si di libi fii, te di sëmbë di i ku ën tööu an ta dini Jehovah?

⁷ Di Bëibel ta piki u taa dee sëmbë dee tööu o „abi sömëni fuka u de tjai” (1 Kolenti 7:28). Ee i tööu ku wan sëmbë di an ta dini Jehovah, nöö di soni aki sa tja sömëni bookohedi ko da i a di tööu libi. Ma tökuseei i musu ta si soni kumafa Jehovah ta si soni. Jehovah ta piki u taa wa sa paati ku di sëmbë di u ku ën tööu, söseei taa wa sa booko di tööu u di di sëmbë dë an ta dini ën (1 Kolenti 7:12-16). Aluwasi ee di manu  fii an ta dini Jehovah, tökuseei i musu ta lesipeki ën u di hën da hedima u di wosudendu. Nöö aluwasi di mujëë fii an ta dini Jehovah, tökuseei i musu lobi ën, söseei i musu ta sölugu ën.​—Efeise 5:22, 23, 28, 29.

8. Andi i sa hakisi iseei ee i manu nasö i mujëë ta tapa i fu ja dini Jehovah kumafa i kë?

⁸ Andi i musu du ee i manu nasö i mujëë ta tapa i fu ja dini Jehovah kumafa i kë? Wan sisa manu bi piki ën taa wantu daka u di wiki nöö a sa go a di peleikiwooko. Ee di soni aki ta miti i tu, nöö hakisi iseei di soni aki: ’Piki a ta piki mi u ma dini Jehovah möön u? Wë ee na sö a dë, nöö faandi mbei ma sa du di soni di a ta hakisi mi?’ Ee i sa’ u wegi soni luku, nöö a o heepi i fu ja abi bookohedi a di tööu libi fii sö möön.​—Filipi 4:5.

9. Unfa wan mama nasö wan tata sa lei dee mii u de, u de ta lesipeki de mama nasö de tata di an ta dini Jehovah?

⁹ A sa taanga seei u lei dee mii fii soni u Jehovah, ee di sëmbë di i ku ën tööu an ta dini Jehovah. I musu lei dee mii fii u de du di soni di di Bëibel ta taki. A ta taki taa: „I musu lesipeki i mama ku i tata” (Efeise 6:1-3). Ma andi i musu du te i manu nasö i mujëë an ta libi ku dee wëti u Bëibel? Wë i musu ta lesipeki ën, nöö dee mii fii seei o sa djeesi i a di soni aki sö tu. Buta pakisei a dee bunu fasi dee a abi, nöö piki ën taa i ta  tei dee bunu soni dee a ta du u bigi. Na taki hogi u di manu nasö di mujëë fii a dee mii fii fesi. Ma konda da de taa hiniwan sëmbë musu luku ee a o dini Jehovah, nasö ee an o dini ën. Ee i lei dee mii fii u de ta lesipeki di sëmbë di i ku ën tööu hii fa an ta dini Jehovah, nöö kandë di fasi fa dee mii o ta tja deseei o mbei a o kë lei soni u Jehovah.

10. Unfa mama nasö tata di dë Keesitu sëmbë sa lei dee mii u de soni u Jehovah?

¹⁰ So womi nasö so mujëë di an ta dini  Jehovah, sa kë u dee mii u de hoi dee gaan piizii daka di Jehovah an ta feni bunu, nasö de sa kë u dee mii u de lei soni di nama ku poipoi biibi. Kandë so womi an o kë u di mujëë u de lei dee mii u de soni u Bëibel. Ma aluwasi a dë sö, tökuseei di mujëë musu du hii soni di a sa du, faa lei dee mii soni u di tuutuu lei (Tjabukama 16:1; 2 Timoteo 3:14, 15). Kandë di womi an kë u di mujëë fëën ta lei dee mii u de soni u Bëibel hiniwan wiki, nasö kandë an ta kë faa tja de go a komakandi. Wë hii fa di mujëë o lesipeki di womi, tökuseei a sa ta konda soni u di biibi fëën da dee mii jeti te a feni di okasi. A di lö fasi dë, dee mii sa ko lei soni u Jehovah, nöö de sa ko sabi dee wëti fëën dee ta lei u andi da bunu ku andi da hogi (Tjabukama 4:19, 20). Te u kaba fëën, dee mii seei musu taki ee de o dini Jehovah, nasö ee de an o dini ën. * (Luku di pisi a basu.)​—Detolonomi 30:19, 20.

11. Andi sa mbei u ku dee famii fuu dee an ta dini Jehovah kisi toobi?

¹¹ Kandë di dee Jehovah Kotoigi bi bigi ta lei u soni u Bëibel, nöö wa bi kë piki dee famii fuu. Ma di di biibi fuu ko möön taanga, hën u ko fusutan taa u musu piki dee famii fuu taa u kë dini Jehovah (Maikusi 8:38). Kandë di hoi di i bi kë hoi iseei a Gadu bi mbei i ku dee famii fii bi kisi toobi. Boo luku wantu soni di sa heepi i fii libi fiifii ku dee famii fii, söseei di sa heepi i fii hoi iseei a Jehovah.

12. Andi bi o sa mbei dee famii fuu an kë fuu dini Jehovah, ma unfa u sa lei taa u ta booko u hedi ku di fasi fa de ta fii?

¹² Mbei möiti fii ko sabi unfa dee famii fii dee an ta dini Jehovah ta fii. U ta wai seei taa u ko sabi dee tuutuu lei u Bëibel, hii fa dee famii fuu sa ta si kuma sëmbë ganjan u fuu go a wan pei keiki. De sa ta pakisei taa wa lobi de möön, u di wa ta hoi dee gaan piizii daka ku de möön. Kandë de ta fëëë tu taa hogi o miti u baka te u dëdë. U musu mbei möiti fuu ko sabi unfa de ta fii, nöö u musu ta haika bumbuu andi de ta taki, sö taa u sa ko sabi faandi mbei de ta booko de hedi ku u (Nöngö 20:5). Apösutu Paulosu bi ta pooba u fusutan „hii sootu pei sëmbë”, sö taa a bi sa konda di bunu buka da de. Te u ta mbei möiti fuu ko sabi unfa dee famii fuu ta fii, nöö di soni aki sa heepi u fuu ko sabi unfa u sa lei de soni u di tuutuu lei.​—1 Kolenti 9:19-23.

13. Unfa u musu ta fan ku dee famii fuu dee an ta dini Jehovah?

¹³ Fan a wan saapi fasi. Di Bëibel ta taki taa: „Te woon fan ku sëmbë, nöö un musu fan a wan bunuhati fasi” (Kolosën 4:6). Kandë  di soni aki sa ta taanga da u so juu. U sa begi Jehovah faa da u di santa jeje fëën faa heepi u fuu fan a wan saapi fasi, söseei a wan suti fasi ku dee famii fuu. Wa musu ta fia ku de a hii pikipiki soni di de ta biibi, di an ta kai ku Gadu. Ee de taki wan soni nasö ee de du wan soni di hati u, nöö u sa djeesi dee apösutu. Paulosu bi taki taa: „Te sëmbë ta kosi u, wa ta kosi de baka, u ta toona ta begi da de. Te de ta sitaafu u ta du hogihogi ku u, nöö u ta tjëën. Söseei te de ta lëgëdë da u ta mindi soni ta poi u në, töku u ta fan ku de suti.”​—1 Kolenti 4:12, 13.

14. Un wini a ta tja ko te u ta tja useei a wan bunu fasi?

¹⁴ I musu ta tja iseei a wan bunu fasi hii juu. Faandi mbei di soni aki dë fanöudu? Wë di fan di u ta fan a wan saapi fasi sa heepi u fuu libi fiifii ku dee famii fuu, ma di fasi fa u ta tja useei sa möön heepi u. (Lesi 1 Petuisi 3:1, 2, 16.) Du soni u dee famii fii si taa dee Jehovah Kotoigi ta abi wan bunu tööu libi, taa de ta sölugu dee mii u de bunu, taa de ta hoi dee wëti dee sikifi a Bëibel, söseei taa de abi wan bunu libi. Aluwasi dee famii fuu an ko tei di tuutuu lei möönsö, tökuseei u sa ta dë waiwai u di u sabi taa u ta tja useei a wan fasi di ta kai ku Jehovah.

15. Unfa u sa seeka soni a fesi sö taa u ku dee famii fuu an kisi toobi?

¹⁵ Seeka soni a fesi. Pakisei un soni sa mbei i ku dee famii fii kisi toobi, nöö luku andi i sa du fii ku de sa ta libi fiifii (Nöngö 12:16, 23). Di soni aki wan sisa di ta libi a Ösutualia bi du. Hën pai an bi lobi di tuutuu lei, nöö so juu hati fëën bi ta boonu ku de. Fëën mbei te hën ku hën manu bi o bëli hën pai, nöö de bi ta begi Jehovah faa heepi de u de an fan ku ën ku hati boonu. De bi ta pakisei suti woto di de bi sa taki fëën. Nöö de an bi ta fan longi tu, u di a bi o sa mbei de ko ta fia u keiki soni hedi.

16. Andi i sa du sö taa an ta hati i gaanfa poi, te ja ta du soni di ta kai ku dee famii fii?

¹⁶ Ma tökuseei soni sa mbei i ku dee famii fii kisi toobi so juu. Fëën mbei te a pasa sö, nöö a sa hati i u di i lobi dee famii fii, söseei u di i kë du soni di ta kai ku de. Ma hoi a pakisei taa i musu ta möön hoi iseei a Jehovah, möön fa i ta hoi iseei a dee famii fii. Te dee famii fii ko si di soni aki, nöö kandë de sa ko fusutan unfa di dini di i ta dini Jehovah dë wan fanöudu soni tjika. Ja sa duwengi na wan sëmbë u de tei di tuutuu lei. Ma i sa mbei wotowan si unfa di du di i ta du andi Jehovah ta taki ta heepi i. I sa biibi taa Jehovah ta da de di okasi u de sa ko dini ën tu, leti kumafa a bi da i ën.​—Jesaaja 48:17, 18.

17, 18. Andi sa heepi i ee wan sëmbë fii wosudendu an ta dini Jehovah möön?

¹⁷ Te de puu wan famii fii a di kemeente, nasö te hënseei taki taa an kë dë wan  Kotoigi möön, nöö di soni aki sa hati i seei. A sa hati i tee taa i ta fii kuma wan sëmbë ta tjökö i ku wan feti ufangi. Andi i sa du fii sa tja di pen aki?

¹⁸ I musu ta buta pakisei nöömö a di dini di i ta dini Jehovah. Ee i ta fii di lö pen aki, nöö i musu du soni u di biibi fii ko möön taanga. I musu ta lesi di Bëibel hiniwan daka, i musu ta seeka iseei da dee komakandi, nöö i musu nango a de tu, i musu ta peleiki tu, söseei i musu ta begi Jehovah faa da i kaakiti fii sa hoi dou (Judasi 20, 21). Ma ee i ta du hii dee soni aki ma an ta heepi wë? Nöö i musu hoi dou! I musu ta buta pakisei nöömö a di dini di i ta dini Jehovah. Di soni dë hën o heepi i.Di soni aki hën bi pasa ku di sëmbë di sikifi Psalöm 73. Wan pisiten, a bi taanga dëën faa si soni a wan bunu fasi. Ma di dini di a bi ta dini Jehovah bi heepi ën faa ko ta si soni a wan bunu fasi baka (Psalöm 73:16, 17). Di soni aki sa heepi i tu.

19. Unfa i sa lei taa i ta lesipeki di fasi fa Jehovah ta sitaafu dee sëmbë fëën?

¹⁹ I musu ta lesipeki di sitaafu di Jehovah ta da sëmbë. Gadu sabi taa di sitaafu di a ta sitaafu wan sëmbë ta tja wini ko da hii sëmbë, te kisi di sëmbë di de puu a di kemeente. Hii fa a ta taanga te de ta sitaafu wan sëmbë di u lobi, tökuseei a sa heepi ën faa ko ta dini Jehovah baka. (Lesi Hebelejën 12:11.) Ma solanga di ten dë an dou jeti, nöö u musu lesipeki di soni di Jehovah bi taki, di a bi taki taa ’wa musu hulu’ sëmbë di de puu a di kemeente (1 Kolenti 5:11-13). Di soni aki sa dë wan taanga soni da u. Ma aluwasi a ta taanga da u fu wa hulu sö wan sëmbë, tökuseei wa musu ta bëli ën, ta manda sms dëën, nasö ta manda biifi dëën. Söseei wa musu ta manda e-mail, nasö app, nasö woto soni a Internet dëën tu.

20. Ku un soni u sa ta dë ku ën mëni?

²⁰ Na lasi biibi! Ee i lobi wan sëmbë, nöö „joo a’ di mëni taa na sö nöö a o dë, te wan ten seei a o ko bunu nöömö”. Fëën mbei woo ta dë ku di mëni jeti taa di sëmbë fuu o toona ko ta dini Jehovah baka (1 Kolenti 13:7). Ee i ta si wan famii fii ta mbei möiti faa tooka di fasi fa a ta libi, nöö i sa begi dëën faa feni kaakiti a dee soni dee a ta lei a Bëibel, söseei faa toona ko a Jehovah baka, u di Jehovah ta piki ën taa: „Gaantangi, toona ko a mi baka.”​—Jesaaja 44:22.

21. Andi i musu du ee dee famii fii ta du ku i u di i dë wan bakama u Jesosi?

²¹ Jesosi bi taki taa u musu lobi ën möön fa u lobi woto sëmbë. Jesosi bi dë seiki taa dee bakama fëën bi o sa hoi deseei nëën, aluwasi dee famii u de bi o ta du ku de. Fëën mbei ee dee famii fii ta du ku i u di i dë wan bakama u Jesosi, nöö futoou Jehovah. Hakisi ën faa heepi i fii sa hoi dou (Jesaaja 41:10, 13). I musu ta piizii u di i sabi taa Jehovah ku Jesosi tuu ta feni i bunu, söseei taa de o paka i u di i ta hoi iseei a de.