1, 2. (a) Andi sa pasa ku u te soni ko tooka a u libi wan pasi vou sö? (Luku di peentje a bigi u di woto.) (b) Andi sa heepi u fuu feni kötöhati te u luku Psalöm 131?

BAKA di Lloyd ku Alexandra bi wooko a Bëtëli pasa 25 jaa, hën de bi toona buta de u de go du di peleikiwooko. Bigibigi de bi ta tjali. Lloyd taki taa: „Mi bi ta fii seei kuma Bëtëli ku di wooko di mi bi ta du ala bi ko dë mi libi kaa. Mi bi ta fusutan faandi mbei de bi da mi wan woto wooko, ma dee wiki ku dee liba baka di di soni aki pasa, mi bi ko ta fii kuma puu de bi kë puu mi.” So juu Lloyd an bi ta booko hën hedi ku di soni aki, ma so juu a bi ta tjali seei.

² Wë so juu soni o ta tooka a u libi a wan ten di wa bi mëni, nöö di soni aki sa mbei u fii bookosaka seei, nöö u sa ta booko u hedi gaanfa tu (Nöngö 12:25). Te soni ko tooka a u libi, hën a ta taanga da u fuu tooka di fasi fa u ta pakisei, nöö andi sa heepi u fu wa ta booko u hedi poi? (Lesi Psalöm 131:1-3.)  Boo luku unfa wanlö dinima u Jehovah bi feni kötöhati hii fa soni bi tooka a de libi wan pasi vou sö. Woo luku woto u dinima u Jehovah fu awooten ku di ten fuu aki tuu.

3. Unfa di libi u Josëfu bi ko tooka wan pasi vou sö?

³ Pakisei di woto u Josëfu. Jakopu bi lobi Josëfu möön hii dee woto womi mii fëën. Di soni aki bi mbei dee baaa fëën bi ko ta haun ku ën seei. Di Josëfu bi abi 17 jaa, hën de sei ën kuma saafu (Kenesesi 37:2-4, 23-28). Söwan 13 jaa longi a bi tja sitaafu a Egepiti. Bigibigi a bi dë wan saafu, hën bakaten, hën de söötö ën a dunguwosu. Josëfu an bi dë nëën tata bandja möön. Wë di soni aki bi sa mbei a fii bookosaka seei, nasö a bi sa mbei hati fëën boonu. Ma andi bi heepi ën?

4. (a) Andi Josëfu bi du di a bi dë a dunguwosu? (b) Unfa Jehovah bi piki di begi u Josëfu?

⁴ Di Josëfu bi dë a dunguwosu, nöö a bi musu u dë sö taa a bi ta buta pakisei a di fasi fa Jehovah bi ta heepi ën (Kenesesi 39:21; Psalöm 105:17-19). Kandë a bi ta mëni dee soni dee Gadu bi mbei a sunjan di a bi möön njönku, nöö a bi ta fii taa Jehovah bi dë ku ën. Kandë a bi begi gaanfa seei, hën a piki Jehovah hii soni di dë nëën hati (Psalöm 145:18). Wë Jehovah bi piki di begi u Josëfu, u di a bi mbei a fii taa a o dë ku ën aluwasi andi ta pasa.​—Tjabukama 7:9, 10. * (Luku di pisi a basu.)

5. Unfa ’di kötöhati di Gadu ta da sëmbë’, ta heepi u fuu ko ta möön dini Jehovah fajafaja?

⁵ Aluwasi unfa soni ta taanga da u tjika, tökuseei u sa feni ’di kötöhati di Gadu ta da sëmbë’, di o sa tjubi u „fusutan” sö taa u sa ta fii bunu. (Lesi Filipi 4:6, 7.) Te u ta booko u hedi gaanfa, nöö ’di kötöhati di Gadu ta da sëmbë’, sa heepi u fuu dini ën go dou. Boo luku wanlö woto u baaa ku sisa u di ten fuu aki di bi si di soni aki sö tu.

6, 7. Unfa di begi di u ta begi ta heepi u fuu feni kötöhati?

⁶ Di Ryan ku Juliette bi jei taa di pisiten di de bi buta de u de du di apaiti pioniliwooko bi ko kaba, hën de bi fii bookosaka seei. Ryan bi taki taa: „Wantewante u bi begi Jehovah u di soni aki. U bi fusutan taa di soni aki bi ta da u pasi fuu lei taa u ta futoou Jehovah. Sömëni u dee baaa ku dee sisa a di njunjun kemeente ka u go, bi dë sëmbë di an bi dë longi a di tuutuu lei. Fëën mbei u bi begi Jehovah faa heepi u fuu bi sa du soni u de sa djeesi u a di fasi fa u bi ta biibi.”

⁷ Unfa Jehovah bi piki di begi u de? Ryan bi taki taa: „Wantewante dë di u kaba begi, hën u fii taa wa bi ta booko u hedi möön, söseei wa bi ta fii bookosaka möön. Di kötöhati di Gadu ta da sëmbë bi tjubi u hati ku u fusutan. U bi ko fusutan taa u bi o sa ta dini Jehovah fajafaja go dou, solanga u bi ta si soni a wan bunu fasi.”

8-10. (a) Unfa di santa jeje u Gadu sa heepi u te u ta booko u hedi gaanfa? (b) Unfa Jehovah sa heepi u te u ta buta pakisei a di dini di u ta dini ën?

⁸ Di santa jeje u Gadu sa heepi u fu wa ta dë pantapanta, söseei a sa heepi u fuu mëni  Bëibel tëkisi di o heepi u fuu fusutan andi da dee möön fanöudu soni a di libi. (Lesi Johanisi 14:26, 27.) Luku di soni di bi pasa ku Philip ku Mary di bi dë a Bëtëli bëina 25 jaa longi. A fö liba dendu Philip ku Mary mama tuu bi lasi libi, nöö woto sëmbë u dee famii u de bi ko lasi libi tu. Boiti di dë, de bi musu ta luku di tata u Mary, u di a bi abi hedikamian siki.

⁹ Philip taki taa: „Mi bi si kuma mi bi ta du hii soni bunu, ma wan soni bi ta makei. Di mi bi ta lesi wan woto u wan Hei Wakitimawosu, hën mi si di tëkisi u Kolosën 1:11. Mi bi ta hoi dou tuu, ma na kumafa mi bi musu du ën tuutuu. Mi bi musu ta ’tei hii dee soni dee ta miti mi ku pasensi, ku wai a hati seei’. Di tëkisi aki bi mbei mi toona mëni taa na te soni ta waka bunu a mi libi nöö mi o ta dë waiwai, ma te di santa jeje u Gadu ta heepi mi.”

¹⁰ U di Philip ku Mary bi buta hii de pakisei a di dini u Jehovah, mbei Jehovah bi mbei de feni gaan bunu. Kölö sö baka di de kumutu a Bëtëli, hën de tuu feni sëmbë u lei soni u Bëibel, di bi nango a fesi seei, nöö de bi ta kë lei soni möön leki wan pasi a di wiki. Mary taki taa: „De bi ta mbei u ta dë waiwai seei, nöö a sö wan fasi u bi ta si taa Jehovah bi ta piki u taa hii soni o waka bunu.”

11, 12. (a) Andi Josëfu bi du u Jehovah bi sa mbei a feni bunu bakaten? (b) Unfa Jehovah bi paka Josëfu?

¹¹ Te soni ko tooka a di libi fuu, nöö a sa pasa taa dee bookohedi fuu nöö u ta kë pakisei. Di soni aki bi sa pasa ku Josëfu. Ma a bi buta taa a bi o ta du di möön bunu soni di a bi sa du. Leti kumafa Josëfu bi ta wooko taanga da Potifali, sö nöö a bi ta wooko taanga, ta du dee soni di di fesima u di dunguwosu ka de bi butëën, bi ta piki ën faa du.​—Kenesesi 39:21-23.

¹² Wan daka, hën de bi hakisi Josëfu faa luku tu sitaafuma di bi ta wooko da Falao. Josëfu bi libi bunu ku de, nöö dee womi aki bi konda dee fuka u de dëën, söseei de bi piki ën andi de bi sunjan di ndeti dë, u di dee soni di de bi sunjan bi ta toobi de seei (Kenesesi 40:5-8). Josëfu an bi saandi bi o pasa bakaten. Ma di fan di a bi fan ku dee womi aki, hën bi o mbei a kumutu a di dunguwosu bakaten. Tu jaa baka di dë, hën de puu ën a di dunguwosu, hën a toon wan tiima u Egepiti di bi abi makiti seei. Falao wanwan tö bi abi makiti  möön Josëfu!​—Kenesesi 41:1, 14-16, 39-41.

13. Unfa u sa du soni a sö wan fasi taa Jehovah mbei u feni bunu, aluwasi fa soni dë a u libi?

¹³ Leti kumafa a bi pasa ku Josëfu, sö nöö a sa pasa taa wan soni ko pasa a u libi di wa sa tooka. Ma ee u abi pasensi, söseei ee u ta du hii soni di u sa du, nöö Jehovah o mbei u feni bunu (Psalöm 37:5). Aluwasi u ta dë pantapanta nasö u ta booko u hedi ku wan soni, tökuseei „wa [o] ta lasi hati” (2 Kolenti 4:8). Jehovah o dë ku u, möönmöön ee u ta buta pakisei a di dini di u ta dini ën.

14-16. Andi Filipi du u soni an puu hën pakisei a di dini di a bi ta dini Gadu, hii fa soni bi ko tooka nëën libi?

¹⁴ Filipi bi dë wan peleikima di u sa djeesi, u di an bi mbei na wan soni puu hën pakisei a di dini di a bi ta dini Gadu, aluwasi soni bi ko tooka nëën libi. Wan pisiten, de bi dëën wan wooko faa du a Jelusalen (Tjabukama 6:1-6). Hën wë soni ko tooka nëën libi gaanfa seei. Baka di de bi kii Sitefani, hën sëmbë bi bigi ta du ku dee Keesitu sëmbë a di ten dë seei. U di soni dë mbei, dee Keesitu sëmbë bi fusi kumutu a Jelusalen. Ma u di Filipi bi kë dini Jehovah fajafaja go dou, mbei a bi go peleiki a di foto Samalia, ka sëmbë bi musu jei soni u di bunu buka tu.​—Mateosi 10:5; Tjabukama 8:1, 5.

¹⁵ Filipi bi dë kabakaba u go ka di santa jeje u Gadu bi mandëën faa go. Fëën mbei Jehovah bi mbei a go peleiki a kamian ka sëmbë an bi jei soni u di bunu buka jeti. Sömëni Dju an bi lobi dee Samalia sëmbë, nöö de an bi ta libi bunu ku de tu. Ma Filipi an bi ta kuutu sëmbë a fesi, nöö ku piizii seei a bi ta konda di bunu buka fajafaja da de. Nöö dee Samalia sëmbë ’tuu bi ta haikëën’!​—Tjabukama 8:6-8.

¹⁶ Baka di dë, hën di santa jeje u Gadu bi tja Filipi go peleiki a di foto de kai Azotusi, söseei a di foto de kai Sesalia ka sömëni woto köndë sëmbë di an bi dë Dju, bi ta libi (Tjabukama 8:39, 40). Bakaten hën soni ko tooka nëën libi möön. Di a ko libi a di foto dë, hën a bi tei mujëë pai miii. Ma hii fa soni bi ko tooka a Filipi libi, tökuseei a bi ta dini Gadu fajafaja go dou, nöö Jehovah bi ta mbei Filipi ku hën wosudendu feni bunu.​—Tjabukama 21:8, 9.

17, 18. Unfa di buta di u ta buta pakisei a di dini u Gadu o heepi u te soni ko tooka a u libi?

 ¹⁷ Sömëni baaa ku sisa di ta du di hii-ten diniwooko taki taa te de an mbei soni puu de pakisei a di dini di de ta dini Gadu, nöö a ta heepi de u de dë waiwai, aluwasi soni ko tooka a de libi. Wan baaa de kai Osborne ku hën mujëë Polite ta libi a Zuid-Afiikan. Di de kumutu a Bëtëli, hën de bi mëni taa an bi o taanga da de u de feni wan wooko ka de bi o sa wooko wantu daka a di wiki nöö. Söseei de bi mëni taa an bi o taanga da de u de feni wan kamian u de libi. Ma Osborne taa: „Wa bi feni wooko hesi kumafa u bi mëni.” Polite taa: „Dii liba longi u puu suku wooko, nöö wa bi buta möni a wan së. A bi taanga da u gaanfa seei.”

¹⁸ Andi bi heepi Osborne ku Polite a di taanga ten dë? Osborne taki taa: „Di peleiki di u bi ta peleiki fajafaja ku di kemeente bi heepi u gaanfa seei. A sö wan fasi u bi ta buta pakisei a di dini u Gadu, nöö u bi ta biibi taa soni bi o ko bunu wan ten nömö.” De an bi sindo a de pisi ta booko de hedi ku dee fuka u de, ma de bi ta peleiki fajafaja. Di soni aki bi heepi de u de ta dë waiwai seei! Osborne bi taki möön taa: „U suku wooko a hii kamian u tefa u ko feni.”

19-21. (a) Andi o heepi u fu wa ta dë pantapanta? (b) Un wini u sa feni te u tooka soni a u libi, hii fa wa bi dë ku di mëni taa sö soni bi o ko dë da u?

¹⁹ U si a di woto aki taa ee u ta mbei hii möiti u dini Jehovah fajafaja, ta futoou ën ku hii u hati, nöö wa o ta dë pantapanta, aluwasi andi ta pasa a di libi fuu. (Lesi Mika 7:7.) Bakaten u sa ko si taa di fasi fa u tooka soni a u libi, mbei u ku Jehovah ko dë möön gaan mati. Polite taki taa di puu di de puu de a Bëtëli u de sa peleiki möön gaanfa, bi heepi ën faa ko fusutan andi a kë taki te wan sëmbë ta buta futoou a Jehovah, hii fa a sa djei kuma di libi taanga poi. A taki taa: „Mi ku Jehovah ko dë möön gaan mati.”

 ²⁰ Mary, di u bi taki soni fëën kaa, ta sölugu hën tata jeti, söseei a ta du di pioniliwooko. A bi taki taa: „Mi bi ko si taa te wan soni ta da mi bookohedi, nöö mi musu mbei möiti u na booko mi hedi möön, söseei mi musu begi. Di möön gaan soni di mi bi lei, hën da mi musu disa hii soni a Jehovah maun, nöö di soni dë mi musu ta du hii juu te mi dë ku wan bookohedi.”

²¹ Lloyd ku Alexandra taki taa di tooka di soni ko tooka a de libi, bi mbei tesi miti de di de an bi mëni, ka de bi musu lei taa de abi biibi. Ma de si fa dee tesi dë bi heepi de. Nöunöu de sabi taa di biibi u de taanga tjika faa sa heepi de te de abi bookohedi, söseei de si taa de ko ta libi möön bunu ku wotowan.

22. Fuun soni u sa dë seiki, ee u ta mbei möiti, aluwasi fa soni dë a u libi?

²² Soni sa tooka vou sö a di libi fuu. Kandë de hakisi u fuu du wan woto wooko a di dini di u ta dini Jehovah, kandë u ko dë ku wan siki, nasö kandë u musu ta luku wan sëmbë fuu wosudendu di abi heepi fanöudu. Ma aluwasi andi ko pasa seei, i sa dë seiki taa Jehovah ta booko hën hedi ku i, nöö a o heepi i a di ten di fiti (Hebelejën 4:16; 1 Petuisi 5:6, 7). Mbei hii möiti di i sa mbei a di dini di i ta dini Gadu, aluwasi fa soni dë a i libi nöunöu. Begi i Tata Jehovah, nöö lei u futoou ën ku hii i hati. A sö wan fasi, Jehovah o ta heepi i fu ja ta dë pantapanta, aluwasi fa soni dë da i.