1. Faandi mbei a fiti fuu dini Jehovah wanwan tö?

JEHOVAH wanwan tö u musu ta dini, u di hën da di Sëmbë di mbei u (Ako. 4:11). Ma tökuseei a sa ta taanga da u fuu dini Jehovah wanwan. Hii fa u lobi Jehovah, söseei hii fa u ta lesipeki ën, tökuseei woto soni sa mbei wa dini Jehovah kumafa a fiti. U musu ko fusutan unfa di soni aki sa pasa. Ma woo luku fosu andi a kë taki u dini Jehovah wanwan tö.

2. Te u luku di soni di sikifi a Ëkisodesi 34:14, nöö andi wa o du ee a dë sö taa u ta dini Jehovah wanwan tö?

² Te di Bëibel ta taki taa u musu dini Jehovah wanwan tö, nöö a kë taki taa u musu lobi ën ku hii u hati. Te u ta dini Jehovah wanwan tö, nöö wa o dini na wan woto soni, boiti Jehovah. Wa o lobi woto soni möön fa u lobi ën.​—Lesi Ëkisodesi 34:14.

3. Faandi mbei u sa taki taa soni dë di mbei u lobi Jehovah?

³ Soni dë di mbei u ta dini Jehovah wanwan. Faandi mbei u taki sö? Wë, u ta dini Jehovah u di u ko sabi soni fëën. U ko lobi di fasi fa a dë. U ko sabi andi a lobi ku andi an lobi, nöö useei ko ta si soni kumafa a ta si soni. U ta fusutan unfa Jehovah kë taa u musu libi, söseei u ta hoi dee wëti fëën dee ta heepi u fuu libi kumafa a kë. U ta tei ën u bigi seei taa a da u pasi fuu sa dë mati fëën (Ps. 25:14). Hiniwan soni di u ta ko sabi u di Sëmbë di mbei u, ta heepi u fuu ku ën ko dë möön gaan mati.​—Jak. 4:8.

4. (a) Ku un soni Didibi ta wooko u mbei wa ko lobi Jehovah sö möön? (b) Andi woo taki a di woto aki?

 ⁴ Didibi ta tii di goonliba, nöö a ta wooko ku dee soni u di goonliba aki u mbei u si dee soni dee u ta kë kuma dee möön fanöudu soni, söseei a ta tei de u mbei a möön taanga da libisëmbë u duwengi deseei u de an du dee soni di di hati u de ta manda de u de du (Ef. 2:1-3; 1 Joh. 5:19). Didibi an kë fuu lobi Jehovah wanwan nöö. Fëën mbei a ta suku u mbei u ko lobi woto soni tu. Woo taki u tu fasi fa Didibi ta du di soni aki. Di fosu soni di a ta du, hën da a ta suku u mbei u ko lobi möni. Di u tu soni, hën da a ta suku u mbei u du soni di an ta kai ku Gadu te woo piizii.

5. Faandi mbei u musu ta köni fu wa ko lobi möni?

⁵ Hii u tuu ta kë feni soni u njan, u ta kë abi bumbuu soni fuu ta bisi, söseei u ta kë abi wan bumbuu kamian ta dë. Ma hii fa a dë sö, tökuseei u musu ta köni fu wa ko lobi möni. Sömëni sëmbë u di goonliba u Saatan aki „lobi möni”, söseei de lobi gudu (2 Tim. 3:2, NW). Jesosi bi sabi taa a bi o sa pasa taa dee bakama fëën ko lobi möni tu. Jesosi bi taki taa: „Na wan sëmbë sa dini tu masa makandi e. I musu fu lobi wan möön wan, ee nasö joo hëngi a wan möön wan. Nöö söseei tu, ja sa waka a Masa Gadu baka ku dee gudu u goonliba aki baka makandi e, kwetikweti” (Mat. 6:24). Ee wan sëmbë ta dini Jehovah, ma a ta tei te a hia ten ta mbei möiti faa ko gudu, nöö a o ko dë taa sö wan sëmbë ta suku u dini tu masa. Hën da a o dë taa sö wan sëmbë an ta dini Jehovah wanwan.

6. Andi u ta lei a di soni di Jesosi bi piki dee sëmbë u di kemeente u Laodisea?

⁶ Ufö di jaa 100 Baka Keesitu, so sëmbë u di kemeente u Laodisea bi ta taki taa: „Mi gudu, mi abi wanlö gudu kaa, nöö ma abi na wan soni fanöudu.” Ma a Jehovah ku Jesosi wojo, de bi ’dë mofina sëmbë, tjali u de bi ta kisi sëmbë, de bi pooti, de bi dë bookowojoma, söseei de bi  dë söndö soni a sinkii’. Jesosi an bi bai dee sëmbë aki a soni u di de bi gudu, ma a bi du ën u di de bi lobi möni sö tee taa di soni dë bi ta mbei de ku Gadu an bi dë mati möön (Ako. 3:14-17, NW). Ee u ko si taa u ko bigi ta lobi möni, nöö u musu du wan soni wantewante fuu tooka di fasi fa u ta si soni (1 Tim. 6:7, 8). Ee wa du sö, nöö woo bigi ko ta lobi woto soni tu, nöö Jehovah an o si di dini di u ta dini ën u soni möön. Jehovah „kë taa sëmbë musu dini hën wanwan” (Deto. 4:24). Unfa a sa waka taa u sa ko ta si möni u gaan soni poi?

7-9. Andi i ta lei a di woto u wan gaanwomi de kai David?

⁷ Boo luku andi bi pasa ku wan gaanwomi de kai David, di ta libi na Amëëkanköndë. Di gaanwomi aki bi dë wan sëmbë di bi lo’ wooko. Hënseei ta taki taa a bi dë wan sëmbë di bi lo’ wooko. Di masikapei di a bi ta wooko da, bi dëën wan möön bumbuu wooko, söseei de bi ta pakëën möön hia möni. Boiti di dë, sëmbë bi ta si ën kuma wan u dee sëmbë di bi möön sa’ u du di wooko di a bi ta du dë. David bi taki taa: „So juu mi bi ta si kuma Jehovah hën bi ta mbei soni ta waka bunu da mi a di wooko sö.” Ma sö soni bi dë tuutuu ö?

⁸ David bi bigi ko ta si taa di wooko fëën bi ta mbei hën ku Jehovah an dë mati möön. A bi taki taa: „Mi bi ko si taa te mi bi dë a komakandi nasö a di peleikiwooko, nöö mi bi ta pakisei soni u di wooko. Mi bi ta kisi hia möni, ma möönmöön mi bi ta abi bookohedi, söseei soni an bi ko ta waka bunu möön a di tööu libi u mi.”

⁹ David bi ko fusutan taa a bi musu luku ee un soni a bi o tei taa da di möön fanöudu soni. A bi taki taa: „Mi bi buta taa mi o mbei hii möiti u mi du soni woto fasi.” David bi tei wan pampia, hën a sikifi andi a bi o sa du sö taa an bi o dë faa ta wooko sö hia möön. Baka di dë, hën a go piki di basi fëën andi a bi kë du. Unfa  soni bi waka? De bi puu ën a wooko! Nöö andi David bi du? A bi taki taa: „A di debooko fëën seei, hën mi fuu wan pampia taa mi o ta du di heepi pioniliwooko hiniwan liba.” David ku hën mujëë bi bigi ta seeka kamian a dee hei wosu ka hia sëmbë ta dë, u de bi sa sölugu deseei. Baka wan pisiten, hën David bi bigi du di kowoonu pioniliwooko. Bakaten, hën hën mujëë seei bi ko ta du di pioniliwooko makandi ku ën. Di baaa ku di sisa aki bi ko ta du wooko di sömëni sëmbë an bi o kë du. Ma de an luku a di soni dë, u di na di soni dë hën da di möön fanöudu soni da de. Di möni di de ko ta kisi an hia. Heepi nöö di möni dë ta heepi de u de sa pasa di liba. De bi kë buta di u Jehovah soni a di fosu kamian, nöö sö de bi ko si taa Jehovah ta sölugu dee sëmbë dee ta buta di Könuköndë fëën a di fosu kamian.​—Mat. 6:31-33.

10. Unfa u sa köni ku di hati fuu?

¹⁰ Aluwasi u gudu nasö u pooti, tökuseei u musu ta köni ku di hati fuu. Na un futu? I musu ta köni fu ja ko lobi gudu. Söseei ja musu mbei di wooko fii ko dë gaan soni da i möön di dini di i ta dini Jehovah. Unfa i sa sabi ee di wooko fii ta ko dë möön gaan soni da i möön di dini di i ta dini Jehovah? Wë i sa hakisi iseei dee soni aki: ’Mi lo’ u pakisei soni u di wooko u mi te mi dë a komakandi nasö a di peleikiwooko u? Mi lo’ u dë ta booko mi hedi ta hakisi miseei ee mi o abi möni tjika a di ten di ta ko u? Möni nasö gudu ta mbei taa soni an ta waka bunu a di tööu libi u mi ö? Mi o kë du wan wooko di wotowan ta si kuma lagi wooko, ee di soni dë o da mi pasi u mi sa dini Jehovah möön gaanfa u? (1 Tim. 6:9-12) Te u ta hakisi useei dee soni aki, nöö boo hoi a pakisei taa Jehovah ta paamusi dee sëmbë dee ta dini hën wanwan nöö, taa: „Ma o disa i seepi, kwetikweti. Na wan juu mi o disa i wanwan möönsö.” Fëën mbei Paulosu bi taki taa: „Fa un sai dë, dee sëmbë, wan musu lobi möni te a kisi unu buta nëën basu e.”​—Heb. 13:5, 6.

11. Andi dee soni di wan sëmbë ta tei u mbei piizii sa du ku ën?

¹¹ Jehovah kë fuu musu ta piizii u di libi. Nöö dee soni dee u ta tei u mbei piizii sa heepi u fuu du di soni dë. Fëën mbei di Wöutu u Gadu ta taki taa „di möön bunu soni di wan libisëmbë sa du, hën da faa njan, bebe fëën, söseei faa piizii ku di taanga wooko fëën” (Peleik. 2:24). Ma gaansë u dee soni u di goonliba aki dee u sa tei u mbei piizii sa tja hogi ko da u. De sa mbei sëmbë ko ta si dee soni di di Wöutu Gadu ta bai u a de, taa de dë bumbuu soni, nasö de sa mbei sëmbë ko lobi de.

12. Faandi mbei u musu ta köni ku dee soni dee u ta tei u mbei piizii, te u luku 1 Kolenti 10:21, 22?

 ¹² U kë dini Jehovah wanwan nöö. Fëën mbei wa ’sa go sindo njan a [Jehovah] tafa taa u nama ku ën te u kaba, nöö u toona go sindo njan a dee [taku jeje] tafa taa u ku de nama’. (Lesi 1 Kolenti 10:21, 22.) A lo’ u pasa taa te tu sëmbë ta njan makandi, nöö de ta dë mati. Ee u ta luku fëlön, ta haika poku, nasö ee u ta du woto soni ka de ta lei feti soni, bonu soni, fanafiti soni a di së u manu ku mujëë nasö ka de ta lei woto soni di an bunu, nöö a o dë kuma u ta sindo ku dee felantima u Gadu ta njan di njanjan di de boi. Di soni dë, sa tja hogi ko da u, söseei a sa mbei u ku Jehovah an ko dë mati sö möön.

13-14. Faandi mbei u musu ta köni ku dee soni dee u ta tei u mbei piizii, te u luku Jakobosi 1:14, 15? Konda wan woto.

¹³ Na un fasi u sa tei dee soni dee u ta tei u mbei piizii, maaka ku njanjan? Te u ta njan, nöö u sa taki da useei andi woo buta go a u buka. Ma te u guli di njanjan kaa, nöö wa sa taki möön unfa di njanjan musu du ku u a u sinkii dendu. Te u ta njan bumbuu soni, nöö di soni dë sa mbei u ko dë möön gösöntu. Ma te u ta njan soni di an bunu, nöö di soni dë o mbei u ko suwaki. Kandë wa o si di soni dë wantewante, ma baka wan pisiten, nöö woo si ën.

¹⁴ Wë sö nöö a dë taa te woo mbei piizii, nöö u sa luku andi woo buta go a u hati. Ma te di soni go a u hati kaa, nöö di soni di u bi tei u mbei piizii o wooko a di fasi fa u ta pakisei ku di fasi fa u ta fii. Te dee soni dee u ta tei u mbei piizii dë bumbuu soni, nöö de o puu u bunu. Ma te dee soni dee u ta tei u mbei piizii an bunu, nöö de o tja hogi ko da u. (Lesi Jakobosi 1:14, 15.) Ee di soni di u ta tei u mbei piizii an bunu, nöö kandë wa o si wantewante dë taa di soni dë ta tja hogi ko da u. Ma baka wan pisiten, nöö woo ko si ën. Fëën mbei di Bëibel ta taki taa: „Nöö wan ganjan unu seepi e, dee sëmbë. Wë biga wan sa hoi Gadu a sipootu. Di soni di i paandi, hën nöö joo koti. Di sëmbë di butëën seei ta du dee hogi soni dee hën hati ta mandëën, nöö a o poi kaba a sösö u teego” (Gal. 6:7, 8). A dë fanöudu seei fu wa ta piizii ku soni di Jehovah ta buuse!​—Ps. 97:10.

15. Un bumbuu kado Jehovah da u?

¹⁵ Sömëni u dee dinima u Jehovah lo’ u luku soni a Internet a di website fuu de kai JW Broadcasting^®. Wan sisa de kai Marilyn bi taki taa: „JW Broadcasting bi heepi mi u mi ko ta möön dë waiwai. An ta dë u mi ta djombo so pisi u dee soni dee mi ta luku nëën. Te mi ta fii kuma mi dë mi wanwan nasö te mi ta fii bookosaka, nöö mi ta suku wan taki di dë a JW Broadcasting di sa da mi taanga, nasö mi ta suku wan u dee fëlön ka de ta lei fa wan baaa ta taki u di daka wöutu. Di soni dë ta mbei mi fii taa mi ku Jehovah ta ko dë möön gaan mati. Di ko di u ko abi JW Broadcasting mbei di libi u mi ko tooka gaanfa seei.” Iseei ta feni wini u di kado di Jehovah da u aki tu ö? Hiniwan liba njunjun soni ta ko a JW Broadcasting. Boiti di dë, i ta feni poku ku woto soni di i sa haika, söseei i sa feni fëlön ku woto soni di i sa luku solanga i kë.

16-17. Faandi mbei u musu ta duwengi useei u di piizii di u ta piizii an ta tei hia ten fuu poi, nöö unfa u sa du di soni dë?

¹⁶ U musu ta köni ku dee soni dee u ta tei u mbei piizii, ma u musu ta köni tu ku di un mëni ten di u ta tei u mbei piizii. Ee wa ta köni, nöö a sa pasa taa woo ta tei möön ten ta piizii, möön fa u ta tei ten ta dini Jehovah. Sömëni sëmbë feni taa a ta dë wan taanga soni da de u de duwengi deseei u de an piizii longi poi. Wan sisa di abi 18 jaa de kai Abigail, bi taki taa: „Te mi wooko taanga wan hii daka longi, nöö mi ta luku teefei u mi sa puu pakisei a di wooko pikisö.  Ma ee ma köni, nöö a sa pasa taa mi fika ta luku teefei sömëni juu longi.” Wan njönku baaa de kai Samuel bi taki taa: „So juu mi ta puu sömëni juu longi ta luku wanlö satisati fëlön a Internet. Mi ta bigi luku wan fëlön, nöö te u mi mëni nöö mi ta ko si taa mi puu dii juu nasö fö juu longi ta luku fëlön.”

¹⁷ Unfa i sa duwengi iseei u di piizii di i ta piizii an ta tei hia ten fii poi? Di fosu soni di i musu du, hën da i musu mbei möiti fii ko sabi un mëni ten i ta tei te i ta piizii. Luku unfa i ta wooko ku di ten fii a wan wiki dendu. Tei wan kalëndë, nöö i sikifi dee soni aki nëën: sikifi un mëni juu i ta tei ta luku teefei, un mëni juu i ta tei ta luku soni a Internet, ku un mëni juu i ta tei ta pëë game a di tëlëfön fii. Ee i ko si taa i ta tei hia ten ta du dee soni aki poi, nöö pooba u mbei wan skeima. Seti soni fii sa ta du dee möön fanöudu soni fosu, nöö baka di dë, nöö i buta di mëni ten di joo ta tei fii luku teefei, fii du soni a Internet, nasö fii pëë game. Te i kaba du dee soni aki, nöö hakisi Jehovah faa heepi i fii sa du soni kumafa i buta taa joo du ën. Te i du soni a di lö fasi aki, nöö joo ta feni di ten ku di kaakiti di i abi fanöudu, fii sa ta lei soni u Bëibel, fii sa ta du di wosudendu dini, fii sa nango a dee komakandi, söseei fii sa ta dini Jehovah, ta peleiki ta lei sëmbë soni u Bëibel. Boiti di dë, joo sa ta möön dë waiwai te i ta piizii, u di i sabi taa i ta buta Jehovah a di fosu kamian.

18-19. Unfa u sa lei taa Jehovah wanwan tö u ta dini?

¹⁸ Baka di apösutu Petuisi bi taki soni u di kaba di di goonliba u Saatan bi o kaba, söseei baka di a bi taki soni u di njunjun goonliba di bi o ko, hën a bi taki taa: ’Wë di un ta luku sö wan soni ku wai sö kaa, dee sëmbë, nöö un musu biinga seei fuun dë limbolimbo söndö föutu ku kötöhati a Gadu fesi’ (2 Pet. 3:14). Te u ta du di soni di sikifi a di tëkisi aki, söseei te u ta mbei hii möiti fuu ta dini Jehovah, ta libi a wan fasi di ta kai ku ën, nöö woo lei taa Jehovah wanwan tö nöö u ta dini.

¹⁹ Saatan ku di goonliba fëën o ta mbei möiti go dou u de ganjan u fuu ko ta buta woto soni a di fosu kamian, ka fuu buta Jehovah a di fosu kamian (Luk. 4:13). Ma aluwasi andi ta pasa, wa musu disa na wan sëmbë nasö na wan woto soni tei Jehovah kamian. Jehovah wanwan tö u musu dini, biga hën sëmbë musu dini!