1. Andi 2 Kolenti 3:1-3 ta taki, di ta heepi u fuu si taa wan gaandi seei Jehovah da u fuu sa ta lei wan sëmbë soni u Bëibel u te a ko dopu? (Luku di peentje u di kafiti.)

UNFA i ta fii te i si wan sëmbë u di pisiwata ka i ta peleiki, ta dopu? Wë a musu u dë sö taa di soni dë ta mbei i wai seei (Mat. 28:19). Nöö ee a dë taa ju hën bi ta lei di sëmbë soni u Bëibel, nöö joo möön wai te a ta dopu! (1 Tes. 2:19, 20) Dee sëmbë dee ta dopu, dë kuma bumbuu ’pampia di ta lei fa u dë tjabukama tjika’. Dee sëmbë aki ta lei taa di baaa nasö di sisa di bi lei di sëmbë soni u Bëibel, ku dee woto baaa ku sisa tuu, da tjabukama tuutuu.​—Lesi 2 Kolenti 3:1-3.

2. (a) Na un fanöudu hakisi u musu buta pakisei, nöö faandi mbei u musu buta pakisei nëën? (b) Andi da wan Bëibel studie? (Luku di pisi a basu.)

² A dë wan bunu soni seei u si taa a dee fö jaa dee pasa aki, u bi abi söwan 10.000.000 Bëibel studie * hiniwan liba. Söseei a dee fö jaa dee pasa aki, söwan 280.000 sëmbë bi dopu hiniwan jaa. De bi dopu u de sa ko dë Jehovah Kotoigi, söseei u de sa ko dë bakama u Jesosi Keesitu. Unfa u sa heepi dee milionmilion Bëibel studie aki, u de sa dopu? Solanga Jehovah ta da sëmbë pasi jeti u de sa ko dë bakama u Keesitu, nöö u musu mbei hii möiti di u sa, u heepi de u de go a fesi, u de sa dopu. Ten an fika hia möön!​—1 Kol. 7:29a; 1 Pet. 4:7.

3. Andi woo taki a di woto aki, te a nama ku di lei di u ta lei sëmbë soni u Bëibel?

 ³ A dë fanöudu gaanfa seei fuu heepi sëmbë u de ko dë bakama u Keesitu a di ten aki. Fëën mbei di Tii Kulupu hakisi dee bëikantoo andi u sa du, fuu sa möön heepi dee sëmbë dee u ta lei soni u Bëibel, u de go a fesi, u de sa dopu. A di woto aki ku di woto di ta ko baka disi, woo si andi u sa lei a sëmbë di ta du di kowoonu pioniliwooko, sëmbë di ta du di sëndëlengiwooko ku sëmbë di ta du di keling wooko. Dee sëmbë aki abi öndöfeni a di wooko. * (Nöng. 11:14; 15:22) De o taki andi dee peleikima ku dee sëmbë di de ta lei soni u Bëibel sa du, sö taa di sëmbë sa feni möön wini u dee soni dee a ta lei. A di woto aki, woo taki u feifi soni di hiniwan sëmbë di ta lei soni u Bëibel musu du, faa go a fesi, faa sa dopu.

4. Andi u musu ko fusutan te a nama ku di lei di u ta lei sëmbë soni u Bëibel kölö sö a de dööbuka?

⁴ Sömëni u dee baaa ku dee sisa fuu ta lei sëmbë soni u Bëibel leti a di sëmbë dööbuka. Di fasi aki da wan bunu fasi fa u sa du soni bigibigi, u heepi di sëmbë faa kë ko sabi möön soni u Bëibel. Ma te u ta lei sëmbë soni u Bëibel a di lö fasi aki, nöö u ku ën an ta feni pasi fan wan bëtë. Boiti di dë, a kan tu taa soni an o sa ta du a di lö fasi dë hiniwan wiki. So baaa ku sisa ta hakisi di sëmbë so soni kuma di tëlëfön nöbu fëën, u heepi di sëmbë faa sa kë ko sabi soni u Bëibel go dou. A sö wan fasi de sa ta bëli di sëmbë, nasö de sa ta manda bosikopu dëën, u taki soni u Bëibel ku ën kölö sö. So juu de ta du di soni aki sömëni liba longi. Ma ee di möiti dë nöö di sëmbë ta mbei, söseei ee di ten dë nöö a ta tei faa lei soni u Bëibel, nöö a o sa go a fesi faa buta hën libi a Jehovah maun, nöö a dopu ö? Wë aan fu dë sö.

5. Andi Jesosi bi taki a Lukasi 14:27-33, di u sa tei u heepi dee sëmbë dee u ta lei soni u Bëibel?

⁵ Wan daka Jesosi bi konda woto u lei andi wan sëmbë musu du, faa sa ko dë wan bakama fëën. A bi taki soni u wan sëmbë di bi kë mbei wan wosu, ku wan könu di bi kë go a feti. Jesosi bi taki taa ufö di sëmbë bigi mbei di wosu, nöö a musu ’go sindo pakisei te a kaba luku ee di möni fëën tjika u du di wooko’. Söseei a bi taki taa ufö di könu go a di feti, nöö a musu „pakisei bunu” ee dee sodati fëën o sa du di soni di de kë du. (Lesi Lukasi 14:27-33.) Wë sö nöö Jesosi sabi taa ee wan sëmbë kë ko dë wan bakama fëën, nöö a musu wegi luku bumbuu andi a musu du faa sa waka nëën baka. Fëën mbei u musu da dee sëmbë dee u ta lei soni u Bëibel taanga u de ta lei soni u Bëibel ku u hiniwan wiki. Unfa u sa du di soni dë?

6. Andi u sa pooba u du, u heepi dee sëmbë dee u ta lei soni u Bëibel u de sa go a fesi?

 ⁶ Mbei möiti fu ja ta lei di sëmbë soni u Bëibel kölö sö nëën dööbuka nöö, ma mbei möiti fii sa ta lei ën möön longi. Ka fii taki u wan kodo Bëibel tëkisi ku ën, nöö kandë i sa ta taki u tu tëkisi ku ën hiniwan pasi te i go luku ën. Te di sëmbë ko guwenti u lei soni pikisö möön longi kaa, nöö i sa hakisi ën ee wan kamian dë ka un sa sindo fuun taki u di woto go dou. Di fasi fa di sëmbë o piki o heepi i fii si unfa a kë lei soni u Bëibel tjika. U heepi di sëmbë faa sa go a fesi möön hesi, i sa hakisi ën tu ee a bi o kë ta lei soni u Bëibel tu pasi a wan wiki. Ma boiti di lei di a o ta lei soni wan pasi nasö tu pasi a wan wiki, woto soni dë fanöudu jeti.

7. Unfa wan peleikima sa ta seeka hënseei bunu hii juu ufö a go lei wan sëmbë soni?

⁷ U di i ta lei di sëmbë soni, mbei hii juu i musu ta seeka iseei bunu ufö i go lei di sëmbë soni. I sa bigi lesi di pisi di i ku ën o luku, nöö i lesi dee Bëibel tëkisi. Mbei möiti fii ko sabi andi da dee möön fanöudu soni. Pakisei fundu u di në u di woto, dee hedipakisei, dee hakisi, dee Bëibel tëkisi dee ta sikifi „lesi”, dee peentje, söseei pakisei un fëlön sa heepi ën faa fusutan di woto. Baka di dë, hoi di sëmbë a pakisei, nöö i pakisei luku unfa i sa lei ën di soni gbelingbelin, söseei a wan fasi di an taanga u fusutan, sö taa a sa fusutëën faa sa du di soni di a lei.​—Neh. 8:8; Nöng. 15:28a.

8. Te u luku di soni di apösutu Paulosu taki a Kolosën 1:9, 10, nöö andi a ta lei u u di begi di u musu ta begi da dee sëmbë dee u ta lei soni u Bëibel?

⁸ Te joo seeka iseei, nöö begi Jehovah da di sëmbë, söseei begi ën faa heepi ën ku dee soni dee a abi fanöudu. Begi Jehovah faa heepi i fii sa lei di sëmbë soni ku di Bëibel, a wan fasi di o dou di sëmbë hati. (Lesi Kolosën 1:9, 10.) Suku u ko sabi a fesi andi o sa taanga da di sëmbë faa fusutan nasö faa biibi. Hoi a pakisei taa di maaka di i kë dou, hën da fii heepi di sëmbë faa go a fesi faa sa dopu.

9. Konda unfa di peleikima sa heepi di sëmbë faa ta seeka hënseei ufö a lei soni u Bëibel.

⁹ U bi o kë u di lei di u ta lei di sëmbë soni u Bëibel hiniwan wiki heepi ën faa tei hii dee soni dee Jehovah ku Jesosi du da u u bigi, sö taa a sa kë ko sabi möön soni u Bëibel (Mat. 5:3, 6). U di sëmbë sa feni wini te dou u di lei di a ta lei soni u Bëibel, nöö a musu buta hii hën pakisei a di soni di a ta lei. Fii sa heepi ën faa du di soni dë, nöö i sa konda dëën unfa a dë fanöudu tjika faa ta seeka hënseei hii juu  ufö i ko lei ën soni. A musu ta lesi di pisi di i ku ën o luku, ufö i ko nëën, nöö a pakisei luku unfa a sa du di soni di a lei dë. Unfa i sa heepi ën faa ta seeka hënseei? Wë i sa seeka wan woto makandi ku ën faa si unfa a musu du ën. * Lei ën unfa a sa du feni dee piki u dee hakisi. Söseei lei ën unfa di maaka di a o ta maaka wantu wöutu nöö, o heepi ën faa toona mëni di piki u di hakisi. Baka di dë, nöö i hakisi ën faa piki di hakisi kumafa a fusutëën. Te a ta du sö, nöö joo sa sabi unfa a fusutan di soni tjika. Ma wan soni dë jeti di i sa da di sëmbë taanga faa du.

10. Faandi mbei a dë fanöudu u di sëmbë ta lesi di Bëibel hiniwan daka, nöö andi di sëmbë musu du faa sa feni wini te dou u di lesi di a ta lesi di Bëibel?

¹⁰ Boiti di lei di di sëmbë o ta lei soni u Bëibel hiniwan wiki ku di sëmbë di ta lei ën, a o feni wini tu ee a ta du so soni hënseei hiniwan daka. A dë fanöudu faa ta haika Jehovah, söseei faa ta fan ku ën. A sa haika Jehovah te a ta lesi di Bëibel hiniwan daka (Jos. 1:8; Ps. 1:1-3). Lei ën unfa a sa wooko ku di „Schema fu leisi Bijbel”, di dë a jw.org. * Faa sa ta feni wini te dou u di lesi di a ta lesi di Bëibel, nöö i musu dëën taanga tu faa ta pakisei luku andi di Bëibel ta lei ën u Jehovah. Söseei a musu ta pakisei unfa a sa libi ku dee soni dee a lei dë.​—Tjab. 17:11; Jak. 1:25.

11. Andi sa heepi wan sëmbë di ta lei soni u Bëibel faa ko sa’ u begi a wan bunu fasi, nöö faandi mbei a dë fanöudu faa ko abi di guwenti u begi Jehovah?

¹¹ Da di sëmbë di i ta lei soni u Bëibel taanga faa ta fan ku Jehovah. A sa du di soni dë te a ta begi hiniwan daka. I musu ta begi ku hii i hati te joo bigi lei di sëmbë soni u Bëibel ku te i kaba lei ën, nöö i musu ta kai hën në a di begi. Te a o ta jei fa i ta begi, nöö a o ko sabi unfa hënseei sa begi ku hii hën hati tu, söseei a o ko sabi taa a musu ta begi Jehovah a di në u Jesosi Keesitu (Mat. 6:9; Joh. 15:16). Pakisei fa di lesi di di sëmbë o ta lesi di Bëibel hiniwan daka (hën da a ta haika Gadu), ku di begi di a o ta begi (hën da a ta fan ku Gadu), o heepi ën faa ko dë gaan mati u Gadu! (Jak. 4:8) Ee di sëmbë di i ta lei soni u Bëibel ta du dee soni aki hiniwan daka, nöö de o heepi ën faa go a fesi faa sa dopu. Andi sa heepi ën jeti?

12. Unfa wan peleikima sa heepi wan sëmbë di ta lei soni u Bëibel fu hën ku Jehovah ko dë mati?

¹² U kë u di sëmbë di u ta lei soni u Bëibel ko sabi soni u Jehovah. Ma dee soni dee a ta lei  musu dou hën hati tu, sö taa a sa kë du dee soni dee a ta lei. Jesosi bi ta lei sëmbë soni a wan fasi u de fusutëën, söseei sëmbë bi ta lobi dee soni dee a bi ta lei de. Ma sëmbë bi ta waka nëën baka, u di dee soni dee a bi ta lei de bi ta dou de hati tu (Luk. 24:15, 27, 32). A dë fanöudu u di sëmbë di i ta lei soni u Bëibel ko ta si Jehovah kuma wan tuutuu Sëmbë, kuma wan sëmbë di a sa ko dë mati fëën. A musu ko ta si ën kuma hën Tata, kuma hën mati, söseei kuma di Gadu fëën (Ps. 25:4, 5). Te i ta lei di sëmbë soni u Bëibel, nöö i musu ta konda dëën unfa di Gadu fuu abi bunu fasi tjika (Ëki. 34:5, 6; 1 Pet. 5:6, 7). Aan toobi un woto i ku ën ta luku, tökuseei i musu ta heepi ën faa ko si un pei Sëmbë Jehovah dë. Heepi di sëmbë faa ko lobi dee bunu fasi dee Jehovah abi, kuma di lobi di a abi, di tjalihati di a ta abi da sëmbë, ku di fii di a ta fii ku sëmbë. Jesosi bi taki taa „di möön hebi wan u hii dee wëti tuu”, hën da ’i musu lobi [Jehovah] i Gadu’ (Mat. 22:37, 38). Mbei möiti u heepi di sëmbë di i ta lei soni u Bëibel faa ko lobi Jehovah ku hii hën hati.

13. Taki unfa u sa heepi wan sëmbë di ta lei soni u Bëibel faa ko sabi unfa Jehovah dë.

¹³ Te i ta fan ku di sëmbë di i ta lei soni u Bëibel, nöö i musu ta konda dëën faandi mbei i lobi Jehovah. Di soni dë sa heepi ën faa si taa a dë fanöudu fu hënseei ko dë mati ku Jehovah tu (Ps. 73:28). Wë kandë i lobi wan soni di sikifi a wan Bëibel tëkisi nasö kandë i lobi wan soni di sikifi a di buku di i ta tei u lei di sëmbë soni u Bëibel. Kandë di soni dë ta taki u di lobi di Jehovah abi, u di köni di a abi, u di kaakiti di a abi, nasö u di kuutu di a ta kuutu soni a wan leti fasi. Wë kandë i sa taki soni fëën da di sëmbë, nöö i mbei a sabi taa di soni dë da wan u dee soni di mbei i lobi di Tata fuu di dë a liba ala. Wan woto soni dë jeti di hiniwan sëmbë di ta lei soni u Bëibel musu du faa sa go a fesi faa dopu.

14. Andi Hebelejën 10:24, 25 ta piki u u dee komakandi, di sa heepi wan sëmbë di ta lei soni u Bëibel faa go a fesi?

¹⁴ Hii u tuu kë u dee sëmbë dee u ta lei soni u Bëibel go a fesi u de sa dopu. Wan bunu fasi fa u sa heepi de, da te u ta da de taanga u de ta ko a dee komakandi. Dee peleikima dee abi öndöfeni ta taki taa dee sëmbë dee ta bigi ko a dee komakandi wantewante te de bigi lei soni u Bëibel, nango a fesi möön hesi (Ps. 111:1). So peleikima ta lei dee sëmbë di de ta lei soni u Bëibel taa sömëni soni u Bëibel dë di de o lei a dee komakandi, di de an o lei te de ko lei de soni u Bëibel a de pisi. Lesi Hebelejën 10:24, 25 ku di sëmbë di i ta lei soni u  Bëibel, nöö i konda dëën un bunu a o feni te a ta ko a dee komakandi. Pëë di fëlön Andi de ta du a wan Könuköndë zali? * dëën. Da di sëmbë taanga faa mbei hii möiti faa ta ko a dee komakandi hiniwan wiki.

15. Andi u sa du u da wan sëmbë di ta lei soni u Bëibel taanga faa ta ko a dee komakandi hii juu?

¹⁵ Andi i sa du ee di sëmbë di i ta lei soni u Bëibel an ko a komakandi wan pasi jeti nasö ee an ta ko hii juu? Wë i sa konda dëën ku piizii andi i bi lei a wan u dee lasiti komakandi di pasa. Di soni dë o möön da di sëmbë taanga, möön te i kai ën faa ko a komakandi. Dëën di Hei Wakitimawosu nasö Di Libi ku di diniwooko fuu kuma Keesitu sëmbë komakandi-buku, di u ta lei soni nëën a komakandi a di pisiten dë. Lei ën andi woo lei a di komakandi di ta ko, nöö i hakisi ën ee undi u dee soni dë ta möön hai hën pakisei. Dee soni di di sëmbë di i ta lei soni u Bëibel o jei, ku dee soni dee a o si di fosu pasi te a ko a komakandi, o tooka ku hii dee woto soni dee a bi si ku dee a bi jei a dee keiki ka a bi go (1 Kol. 14:24, 25). A o miti woto sëmbë di a sa djeesi, söseei di o heepi ën faa go a fesi faa sa dopu.

16. Unfa u sa heepi dee sëmbë dee u ta lei soni u Bëibel u de go a fesi u de sa dopu, nöö andi woo luku a di woto di ta ko?

¹⁶ Unfa u sa heepi dee sëmbë dee u ta lei soni u Bëibel u de go a fesi, u de sa dopu? U sa heepi hiniwan u dee sëmbë dee u ta lei soni u Bëibel u de si unfa di lei di de ta lei soni u Bëibel dë fanöudu tjika, te u ta da de taanga u de ta lei soni u Bëibel hiniwan wiki, söseei te u ta da de taanga u de ta seeka deseei hii juu ufö u ko lei de soni u Bëibel. U musu da di sëmbë taanga tu faa ta fan ku Jehovah hiniwan daka, söseei faa mbei möiti fu hën ku Jehovah ko dë mati. U musu da di sëmbë taanga faa ta ko a dee komakandi. (Luku di pisi „ Andi dee sëmbë dee ta lei soni u Bëibel musu du u de go a fesi u de sa dopu?”) Ma kumafa woo luku a di woto di ta ko, feifi soni dë jeti di dee peleikima sa du u heepi dee sëmbë di de ta lei soni u Bëibel u de go a fesi, u de sa dopu.