1. Faandi mbei u ta wai taa u dë Jehovah Kotoigi?

U TA wai gaanfa seei taa u dë Jehovah Kotoigi! U da sëmbë u Jehovah, nöö u ta lei taa u dë Kotoigi fëën tuutuu, u di u ta peleiki da sëmbë, söseei u ta lei sëmbë soni fëën. U ta wai seei te u sa heepi sëmbë di „ta si soni a di soifi fasi u de sa feni di libi u teego” (Tjab. 13:48). Leti kumafa Jesosi bi „wai tee na soni” di soni bi waka bunu a di peleikiwooko, sö nöö useei ta wai tu.​—Luk. 10:1, 17, 21.

2. Unfa u ta lei taa di peleikiwooko dë wan fanöudu soni da u?

² Di peleikiwooko dë wan gaan fanöudu wooko da u. Apösutu Paulosu bi piki Timoteo taa: „I musu ta mbei möiti nöömö be hii libi fii dë a tatai liba. Nöö di lei u Gadu di i ta lei sëmbë dë, hënseei musu dë a tatai liba tu e.” Paulosu bi taki tu taa: „Nöö te i ta libi sö kaa nöö joo puu i seei a hogi basu, i ku dee oto sëmbë dee ta haika i dë tuu” (1 Tim. 4:16). Di peleikiwooko sa mbei sëmbë feni libi. U ta buta pakisei a dee soni dee u ta du, u di u da sëmbë di dë a di Könuköndë u Gadu basu. Hii juu u musu ta du soni a sö wan fasi taa u sa ta tja gafa ko da Jehovah, söseei u musu ta du soni di ta lei taa u ta biibi dee soni dee u ta lei woto sëmbë (Fil. 1:27). U ta lei taa di libi fuu ’dë a tatai liba’ te u ta seeka useei bunu da di peleikiwooko, söseei te u ta hakisi Jehovah faa heepi u te u nango peleiki da sëmbë.

3. A dë sö taa hii sëmbë o kë jei soni u di bunu buka u di Könuköndë u? Konda wan woto.

³ Hii fa u ta mbei hii möiti u peleiki da sëmbë, tökuseei a sa pasa taa sömëni sëmbë a di pisiwata ka u ta peleiki an kë jei  di bunu buka u di Könuköndë. Boo luku di woto u Baaa Georg Lindal. Di baaa aki bi peleiki hën wanwan a peipei pisi u di köndë Ijsland a di jaa 1929 te go miti di jaa 1947. A bi paati dusudusu buku, ma tökuseei na wan sëmbë bi ko toon wan Kotoigi. A bi taki taa: „So u dee sëmbë an bi kë sabi soni u Bëibel seepiseepi, nöö gaansë u de an bi ta booko de hedi ku soni u Bëibel.” Bakaten, baaa ku sisa di bi go a di Giliati-siköö bi go du di sëndëlengiwooko a di köndë dë, ma tökuseei baka nëigi jaa ufö so u dee sëmbë u Ijsland bi buta de libi a Jehovah maun, hën de dopu. *

4. Unfa u sa ta fii te sëmbë an ta kë jei soni u di bunu buka?

⁴ U ta tjali te sëmbë an kë ta lei soni u Bëibel. Leti kumafa apösutu Paulosu bi dë ku ’wan gaan fuka a hati ta kusumi seei nöömö te na soni’ di dee Dju an bi kë tei Jesosi kuma di Mësiasi di Gadu bi manda ko, sö nöö useei sa ta fii tu (Lom. 9:1-3). Unfa a dë ee i mbei hii möiti, söseei ee i begi da di sëmbë di i ta lei soni u Bëibel, ma tökuseei an nango a fesi, nöö i musu tapa ku di lei di i ta lei ën soni u Bëibel? Ee nasö unfa a dë ee nöiti i heepi wan sëmbë faa go a fesi u tefa a dopu? I musu ta si kuma ja mbei möiti tjika, nöö fëën mbei Jehovah an ta mbei soni waka bunu da i a di peleikiwooko u? A di woto aki woo piki tu hakisi: Di fosuwan da, na un ten u sa taki taa soni ta waka bunu da u a di peleikiwooko? Di u tu da, andi u musu hoi a pakisei te u ta peleiki da sëmbë?

5. Faandi mbei na hii juu soni o ta waka kumafa u kë, te u ta du soni da Jehovah?

⁵ Di Bëibel ta taki taa te wan sëmbë ta du di kë u Gadu, nöö ’hii soni di di sëmbë dë o du, o waka bunu’ (Ps. 1:3). Ma di soni aki an kë taki taa hii soni di u ta du da Jehovah o go kumafa u kë. U ta abi „gaan hia bookohedi”, u di hii u tuu ta mbei föutu (Jöpu 14:1). Boiti di dë, sëmbë di ta du ku u sa tapa u fu wa du di peleikiwooko fuu möön kumafa u bi guwenti (1 Kol. 16:9; 1 Tes. 2:18). Ma nöö unfa Jehovah ta si di wooko di u ta wooko dëën? Boo luku wantu mama wëti a Bëibel di sa heepi u fuu piki di hakisi aki.

6. Unfa Jehovah ta si di wooko di u ta wooko dëën?

⁶ Jehovah ta luku di möiti di u ta mbei ku di hoi di u ta hoi dou. Te u ta du di wooko fuu fajafaja, söseei te u ta du ën ku lobi, nöö Jehovah ta wai ku u, aluwasi sëmbë ta haika u nasö ee de an ta haika u. Paulosu bi taki taa: „Fa Gadu sai dë, an ta kuutu könku e, ma a ta kuutu leti a pasi. Nöö an o fëëkëtë dee bunu libi fuunu dee un ta libi naandë. A ta si fa un ta lobi ën ta heepi dee oto sëmbë fëën” (Heb. 6:10). Jehovah an ta fëëkëtë dee möiti dee u ta mbei ku di lobi di u abi, aluwasi ee wa heepi wan sëmbë faa go a fesi u tefa a  dopu. Di soni di Paulosu bi piki dee sëmbë u Kolenti, dë da i tu. A bi taki taa: „Sabi taa di wooko i ta wooko da Masa dë an dë u sösö.” Di soni aki dë sö, aluwasi soni an go kumafa u bi kë.​—1 Kol. 15:58.

7. Andi u sa lei a dee soni di apösutu Paulosu bi taki u di diniwooko fëën?

⁷ Apösutu Paulosu bi ta du di sëndëlengiwooko a wan bunu fasi, nöö a bi heepi seti sömëni kemeente a peipei foto. Ma tökuseei di so sëmbë bi taki taa Paulosu an bi dë wan bunu leima, nöö an bi taki u dee sömëni sëmbë dee a bi heepi u toon Keesitu sëmbë. Ka faa du di soni dë, Paulosu bi taki taa: „Mi wooko gaanfa möön de” (2 Kol. 11:23). Leti kuma Paulosu, u musu hoi a pakisei taa di möiti di u ta mbei ku di hoi di u ta hoi dou, da di möön fanöudu soni da Jehovah.

8. Andi u musu ta hoi a pakisei te u ta du di diniwooko fuu?

⁸ Jehovah ta wai ku di diniwooko di u ta du. Jesosi bi manda 70 u dee bakama fëën u de go paaja di Könuköndë bosikopu, nöö di de bi kaba peleiki, de bi „toona ko nëën waiwai”. Faandi mbei de bi ta wai sö? De bi taki taa: „Masa o, fa u go dë, nöö dee gadu bi saka a u basu seei, di u tei di në fii bai de.” Ma Jesosi bi heepi de u de si soni woto fasi di a bi piki de taa: „Na fu di dee gadu ta saka a unu basu mbei un musu ta wai. Ma un musu ta wai seei fu di un sabi taa në fuunu dë sikifisikifi a Masa Gadu Köndë ala” (Luk. 10:17-20). Jesosi bi sabi taa na hii juu soni bi o ta waka bunu da de a di peleikiwooko. Wa sabi un mëni u dee sëmbë dee bi haika dee bakama u Jesosi di fosu pasi, bi toon bakama u Jesosi bakaten. Dee bakama u Jesosi bi musu fusutan taa na te sëmbë bi ta haika de ufö de bi sa ta dë waiwai. Ma de musu dë waiwai u di Jehovah bi wai ku di taanga möiti di de bi mbei.

9. Unfa soni o waka da u te u hoi dou a di peleikiwooko, te u luku Galasia 6:7-9?

⁹ Ee u hoi dou a di diniwooko fuu, nöö woo feni di libi u teego. Te u ta du hii soni di u sa du u paaja di bunu buka u di Könuköndë, nöö u ta da di santa jeje pasi faa tii u. Jehovah ta paamusi u taa te wa ta wei möönsö, söseei te wa ta lasi hati, nöö woo feni di libi u teego, aluwasi wa heepi na wan sëmbë faa go a fesi u te a dopu.​—Lesi Galasia 6:7-9.

10. Faandi mbei so sëmbë ta haika te u ta peleiki da de, ma wotowan an ta haika?

¹⁰ Di fasi fa sëmbë o piki di bunu buka nama a di fasi fa de hati dë. Jesosi bi konda wan woto u wan sëmbë di bi ta jaa sii a peipei goon, ma a wan u dee goon aki nöö dee sii bi göö (Luk. 8:5-8). Jesosi bi taki taa di goon da di sëmbë hati, nöö dee peipei goon da dee tookatooka fasi fa sëmbë ta piki „di Wöutu u Gadu” (Luk. 8:11-15). Leti kumafa di sëmbë di ta jaa dee sii an sabi undi u dee sii o nasi, nasö un hia de o pai, sö nöö useei an sa sabi a fesi ambë o piki di bunu buka. Di soni aki dë sö, u di a nama a di fasi fa sëmbë hati dë. Di soni di u musu du, hën da u musu jaa di sii u di Könuköndë go dou. Apösutu Paulosu bi taki taa: „Hiniwan sëmbë o kisi hën paima kumafa a bi wooko”, ma na a di fasi fa di wooko go.​—1 Kol. 3:8.

11. Faandi mbei Jehovah bi wai ku di fasi fa Noa bi du di peleikiwooko, hii fa na wan sëmbë bi haikëën? (Luku di peentje u di kafiti.)

¹¹ Di dee dinima u Jehovah fu awooten bi ta peleiki, nöö so sëmbë an bi ta kë haika de. Sömëni jaa longi „Noa bi ta konda da sëmbë fa de bi musu libi bunu a Gadu wojo” (2 Pet. 2:5). Wë u sa dë seiki taa Noa bi kë u dee sëmbë haikëën, ma Jehovah an bi taki taa di  soni dë bi o pasa sö. Di Gadu bi piki Noa faa mbei di ark, hën a piki ën taa: „I musu go a di ark dendu, ju ku dee womi mii fii, ju mujëë ku dee mujëë u dee womi mii fii” (Ken. 6:18). Söseei di Jehovah bi piki ën unfa di ark bi musu bigi tjika, nöö kandë Noa bi ko fusutan taa hia sëmbë an bi o haikëën, u di kamian an bi o dë a di boto da de (Ken. 6:15). Wë kumafa u sabi, nöö na wan sëmbë bi haika Noa (Ken. 7:7). Jehovah bi si kuma Noa an bi du di peleikiwooko bunu tjika u? Na seei! Jehovah bi ta wai ku Noa, u di Noa bi du di soni di a bi piki ën faa du.​—Ken. 6:22.

12. Unfa di tjabukama Jelemia bi sa du di diniwooko fëën waiwai go dou, hii fa sëmbë an bi ta haikëën, söseei hii fa de bi ta du ku ën?

¹² Di tjabukama Jelemia seei bi peleiki möön leki 40 jaa longi, hii fa sëmbë an bi ta haika, söseei hii fa de bi ta du ku ën. A bi lasi hati sö tee taa a bi kë tapa u peleiki, u di de bi ta „kosi ën”, söseei u di de bi ta „mbei ën fa” (Jel. 20:8, 9). Ma Jelemia bi hoi dou! Andi bi heepi Jelemia faa bi sa hoi dou, söseei faa bi sa du di diniwooko fëën waiwai go dou? A bi ta hoi tu fanöudu soni a pakisei. Wë di fosu soni, hën da di buka u Gadu di a bi musu tja go da dee sëmbë, bi o mbei de si taa „soni o waka bunu a di ten di ta ko” (Jel. 29:11). Di u tu soni da, Jehovah bi tei ën u tja di buka fëën go da dee sëmbë (Jel. 15:16). Wë useei ta tja wan buka go da sëmbë taa soni o waka bunu a di ten di ta ko, nöö Jehovah tei u tu fuu tja di buka fëën go da sëmbë. Te u ta buta pakisei a dee tu soni aki, nöö aantoobi fa sëmbë o piki di buka fuu, tökuseei woo ta dë waiwai.

13. Andi u sa lei a di woto di Jesosi bi konda a Maikusi 4:26-29?

¹³ A ta tei ten ufö wan sëmbë ko ta biibi dee soni dee a ta lei. Jesosi bi lei u taa di soni aki dë sö tuu, di a bi konda di woto u wan sëmbë di bi jaa sii, nöö baka di dë a bi go duumi. (Lesi Maikusi 4:26-29.) Di di goonma jaa dee sii fëën, hën de bigi ta nasi, nöö dee soni bi bigi ta göö pikipiki. An bi sa du na wan soni u mbei de göö möön hesi. A sa dë sö taa iseei musu wakiti wan longi pisiten ufö di sëmbë di i ta lei soni u Bëibel bigi ta du dee soni dee a ta lei. Wan goonma an sa mbei dee soni dee a paandi göö kumafa a kë, so nöö wa sa mbei di sëmbë di u ta lei soni u Bëibel biibi dee soni dee a ta lei a di juu di u kë. Fëën mbei wa musu lasi hati te u si kuma di sëmbë di u ta lei soni u Bëibel an nango a fesi hesi tjika. Leti kumafa wan goonma musu abi pasensi, sö nöö useei musu abi pasensi te u ta lei sëmbë soni u Bëibel.​—Jak. 5:7, 8.

14. Konda wan woto di ta lei taa a sa tei longi ufö sëmbë bigi ta haika u.

¹⁴ A so kamian, a ta tei longi ufö wan sëmbë dopu. Boo luku unfa soni bi waka da tu sisa. Wan u de de ta kai Gladys Allen, nöö di wotowan de ta kai Ruby Allen. Dee tu sisa aki bi ta du di kowoonu pioniliwooko a di jaa 1959, a wan foto u Kibëk *, di dë a di köndë Kanada. U di dee sëmbë bi ta fëëë andi dee keiki fesima ku dee sëmbë u di pisiwata u de bi o taki, mbei de an bi ta fan ku dee Kotoigi. Gladys bi taki taa: „Hiniwan daka, aiti juu longi, u bi nango a sëmbë pisi u peleiki da de. Nöö u bi du di soni aki söwan tu jaa longi. Ma na wan sëmbë bi jabi döö ko fan ku u. Te de bi ko a di döö, nöö de bi si taa u, nöö de bi ta bia toona. Ma u hoi dou.” Pikipiki dee sëmbë aki bi ko dë woto fasi, nöö so u de bi bigi ta haika u. Nöunöu dii kemeente dë a di foto dë.​—Jes. 60:22.

15. Andi u sa lei a 1 Kolenti 3:6, 7, te u ta heepi wan sëmbë faa ko dë bakama u Jesosi?

 ¹⁵ Na wan kodo sëmbë nöö ta heepi wan sëmbë faa toon wan bakama u Jesosi. Hii sëmbë a di kemeente sa heepi wan sëmbë faa dou di maaka faa dopu. (Lesi 1 Kolenti 3:6, 7.) Boo taa wan baaa disa wan buku da wan sëmbë di kë sabi möön soni u Bëibel, ma di baaa aki an sa toona go luku di sëmbë baka. Fëën mbei a ta hakisi wan woto baaa u toona go a di sëmbë. Di baaa di toona go a di sëmbë, bigi ta lei di sëmbë soni u Bëibel. Bakaten di baaa aki ta kai sömëni woto baaa ku sisa u ko makandi ku ën te a nango lei di sëmbë soni u Bëibel. Nöö hii dee baaa ku dee sisa aki ta da di sëmbë taanga a peipei fasi. Hiniwan u dee baaa ku dee sisa aki, ta heepi di sëmbë faa ko sabi möön soni u Jehovah. A di fasi aki hii dee baaa ku dee sisa aki o wai makandi te di sëmbë dopu.​—Joh. 4:35-38.

16. Faandi mbei u sa taki taa i sa du di diniwooko fii waiwai go dou, hii fa di gösöntu fii nango ku baka, nasö hii fa ja abi sö hia kaakiti möön?

¹⁶ Kandë ja sa peleiki möön kuma fosu, u di di gösöntu fii nango ku baka, nasö u di ja abi so hia kaakiti möön. Ma tökuseei i sa dë waiwai ku dee soni dee i sa du jeti. Luku andi bi pasa di Könu Dafiti ku dee sodati fëën bi musu go puu dee sëmbë u de ku dee soni u de, a dee Amalëki sëmbë maun. U di tu höndö u dee sodati u Dafiti bi wei poi u de go a di feti, mbei de bi fika a baka u luku dee lai u de. Baka di de bi wini di feti, hën Dafiti bi mbei de paati dee soni di de bi tei a dee felantima u de, da hii dee sodati fëën, te kisi dee sodati dee bi fika a baka (1 Sam. 30:21-25). Di woto aki ta lei u wan soni u di wooko di u ta du u heepi sëmbë u de ko dë bakama u Jesosi. Kandë ja sa du hii soni di i kë du a di peleikiwooko. Ma ee i du hii soni di i sa du, nöö tökuseei i sa ta dë waiwai te wan sëmbë ko sabi Jehovah, nöö a dopu.

17. Fuun soni u sa ta da Jehovah tangi?

¹⁷ U ta da Jehovah tangi taa a ta tei di wooko di u ta du dëën u bigi. A sabi taa wa sa duwengi sëmbë u de haika u, nasö u de dini ën. Ma a ta si fa u ta du di wooko fajafaja, söseei a ta si unfa u lobi ën tjika, nöö a ta paka u u dee soni dë. Söseei a ta lei u taa u musu ta wai ku hiniwan soni di u sa du a di peleikiwooko (Joh. 14:12). U sa dë seiki taa Jehovah ta wai ku u te u ta hoi dou!