1. Andi Jehovah mbei u ko sabi?

 JEHOVAH mbei u sabi taa woo sa libi u teego. So sëmbë ta dë ku di mëni taa de o go libi u teego a liba ala (1 Kol. 15:50, 53). Ma gaansë fuu ta dë ku di mëni taa woo libi u teego a goonliba aki, söseei taa wa o abi zöndu möön, nöö woo ta dë waiwai (Ako. 21:3, 4). Aluwasi ee woo libi a liba ala nasö a goonliba aki, tökuseei u wai ku dee bunu dee woo feni.

2. Faandi mbei u sa taki taa woo feni bunu a di ten di ta ko?

² U sa dë seiki taa woo feni bunu a di ten di ta ko, u di Jehovah seei piki u ën (Lom. 15:13). U sabi andi a paamusi u taa a o du da u, söseei u sabi taa hii juu a ta du andi a taki (Nöb. 23:19). U dë seiki taa Jehovah kë du dee soni dee a ta taki taa a o du, nöö a abi di makiti u du de tu. Fëën mbei u sa taki taa na u di u kë feni dee bunu aki, mbei u ta pakisei de. Ma u ta pakisei de u di u dë seiki taa woo sa feni de.

3. Andi woo luku a di woto aki? (Psalöm 27:14)

³ Di Tata fuu di dë a liba ala lobi u, nöö a kë fuu ta futoou ën. (Lesi Psalöm 71:5.) Te u dë seiki taa Jehovah o mbei u feni bunu a di ten di ta ko, nöö woo sa hoi dou ku wai aluwasi fuka ta miti u. Boo luku unfa di sabi di u sabi taa Jehovah o mbei u feni bunu a di ten di ta ko, ta heepi u. Woo si taa di sabi di u sabi di soni aki dë kuma wan hanka, söseei kuma wan felu kaapusa. Boiti di dë, woo si andi u sa du fuu ko dë seiki taa woo feni dee soni aki.

4. Na un futu di sabi di u sabi taa woo feni bunu a di ten di ta ko, dë kuma wan hanka? (Hebelejën 6:19)

⁴ A di biifi di apösutu Paulosu bi manda da dee Hebelejën baaa ku sisa fëën, a bi taki taa di sabi di u sabi taa woo feni  bunu a di ten di ta ko, dë kuma wan hanka. (Lesi Hebelejën 6:19.) Paulosu bi lo’ u go ku boto a kamian, fëën mbei a bi sabi taa sëmbë bi ta wooko ku hanka u mbei taa wan sipi an diipi go. Wan daka, a bi dë a wan sipi nango a kamian, hën wan gaan ventu böö. Di di ventu böö, hën a si dee botoma tuwë hanka go a wata, sö taa di sipi an diipi go naki a sitonu (Tjab. 27:29, 39-41). Di sabi di u sabi taa Jehovah o mbei u feni bunu a di ten di ta ko, ta heepi u fu wa diipi kumutu a di pasi u Jehovah te fuka miti u, leti kumafa di hanka ta heepi wan sipi fu an diipi go. Di soni dë ta heepi u tu fuu hoi dou, u di u dë seiki taa soni o ko möön bunu bakaten. Hoi a pakisei taa Jesosi bi taki taa sëmbë bi o du ku u (Joh. 15:20). Fëën mbei te u ta kai pakisei a dee soni dee Jehovah paamusi u, nöö a o heepi u fuu dini ën go dou.

5. Unfa di sabi di Jesosi bi sabi taa a bi o feni bunu bakaten bi heepi ën, hii fa a bi sabi taa a bi o dëdë?

⁵ Luku unfa di sabi di Jesosi bi sabi taa a bi o feni bunu bakaten bi heepi ën faa hoi dou, hii fa a bi sabi taa de bi o kii ën a wan hogihati fasi. A di Pensiti Daka u di jaa 33 baka Keesitu, apösutu Petuisi bi taki wan soni di sikifi a di buku Psalöm, di ta lei unfa Jesosi bi dë seiki tjika taa soni bi o waka bunu bakaten. A bi taki taa: „Fa i si mi dë ku mi sösö sinkii aki seei, ma ma ta fëëë dëdë möönsö, biga mi sabi taa joo tja mi. Nöö mi sabi tu taa ja o disa mi a [Geebi]. Di futuboi fii di dë apaiti da i vö, ja o disëën sinkii a [Geebi] faa lulu poi kaba a sösö. . . . joo dë ku mi, hën mbei mi o dë waiwai” (Tjab. 2:25-28; Ps. 16:8-11). Hii fa Jesosi bi sabi taa a bi o dëdë, tökuseei a bi dë seiki taa hën Tata bi o weki ën baka faa bi sa toona go dë ku ën a liba ala.​—Heb. 12:2, 3.

6. Andi wan baaa bi taki u di sabi di u sabi taa woo feni bunu a di ten di ta ko?

⁶ Di sabi di u sabi taa woo feni bunu a di ten di ta ko, heepi sömëni baaa ku sisa u de hoi dou. Boo buta pakisei a wan baaa de kai Leonard Chinn, di bi ta libi a Ingisiköndë. De bi söötö ën a di pisiten u di Fosu Goonliba Feti, u di an bi kë go a sodati. De bi tapa hën wanwan buta a wan kamian tu liba longi, hën baka di dë, hën de dëën taangataanga wooko faa du. Di baaa aki bi taki taa: „Dee soni dee bi miti mi bi heepi mi u mi ko fusutan taa ee u kë hoi dou, nöö a dë fanöudu fuu sabi taa soni o go möön bunu a di ten di ta ko. Dee soni di di Bëibel ta taki u Jesosi, u dee apösutu, ku dee tjabukama ta heepi u tuutuu fuu hoi dou. Dee soni dee Gadu paamusi u ta heepi u fuu hoi dou tu.” Di sabi di Baaa Leonard bi sabi taa a bi o feni bunu bakaten, bi heepi ën, nöö sö nöö a sa heepi u tu.

7. Unfa dee soni dee ta miti u, ta heepi u fuu ko dë möön seiki taa woo feni dee soni dee Gadu paamusi u? (Loomë 5:3-5; Jakobosi 1:12)

⁷ Te u ta hoi dou te tesi ta miti u, söseei te u si unfa Jehovah ta heepi u, nöö di soni dë ta mbei u ko dë möön seiki taa woo feni bunu bakaten. (Lesi Loomë 5:3-5; Jakobosi 1:12.) Fëën mbei u sa taki taa nöunöu u ko dë möön seiki taa woo feni dee soni dee Gadu paamusi u. Saatan kë u dee bookohedi fuu möön u, ma Jehovah sa heepi u fuu hoi dou aluwasi un pei tesi ta miti u.

8. Unfa di sabi di u sabi taa woo feni bunu a di ten di ta ko, dë kuma wan felu kaapusa? (1 Tesalonika 5:8)

⁸ Di Bëibel ta taki tu taa di sabi di u sabi taa woo feni bunu a di ten di ta ko, dë kuma wan felu kaapusa. (Lesi 1 Tesalonika 5:8.) Wan sodati ta bisi wan felu kaapusa u tjubi hën hedi, sö taa dee felantima fëën an feni ën naki a hedi. U di Saatan ta feti ku u,  mbei u musu tjubi di pakisei fuu tu. A ta pooba u a hii pei fasi, söseei a ta suku u poi di pakisei fuu. Leti kumafa di felu kaapusa ta tjubi wan sodati hedi, sö nöö di sabi di u sabi taa Jehovah o mbei u feni bunu bakaten, ta tjubi di pakisei fuu, sö taa u sa hoi useei nëën.

9. Andi ta pasa ku sëmbë di an ta biibi dee soni dee Gadu paamusi u?

⁹ Di sabi di u sabi taa woo sa libi u teego, o heepi u fuu du soni a wan köni fasi. Ma ee wa köni, nöö u sa ko ta buta mëni a dee soni dee u ta kë nöö a kaba, nöö di soni dë sa mbei u fëëkëtë di libi u teego di Gadu paamusi u. Boo luku andi bi pasa ku so Keesitu sëmbë di bi ta libi a di foto Kolenti. De an bi ko ta biibi möön taa Gadu o weki sëmbë ko a libi baka, hii fa di soni dë da wan u dee gaan soni di Gadu paamusi u (1 Kol. 15:12). Paulosu bi taki taa dee sëmbë dee an ta biibi taa sëmbë o weki ko a libi baka, ta buta mëni a dee soni di de ta kë nöö a kaba (1 Kol. 15:32). A di ten aki, sömëni sëmbë di an ta biibi dee soni dee Gadu paamusi u, ta mbei möiti u de sa abi wan suti libi nöunöu kaa. Ma uu ta biibi dee soni dee Gadu paamusi u. Di sabi di u sabi taa Gadu o mbei u feni bunu a di ten di ta ko, ta tjubi di pakisei fuu, sö taa wa ko ta buta mëni a useei nöö a kaba, u di di soni dë o mbei u ku Gadu poi.​—1 Kol. 15:33, 34.

10. Unfa di sabi di u sabi taa woo feni bunu a di ten di ta ko, ta heepi u fu wa biibi mindimindi soni?

¹⁰ Di sabi di u sabi taa woo feni bunu a di ten di ta ko, sa heepi u tu fu wa si kuma wa o sa mbei Jehovah wai ku u. So sëmbë sa taki taa: ’Nöiti mi o sa dë wan u dee sëmbë dee o libi u teego. Ma bunu tjika. Nöiti mi o sa libi kumafa Gadu kë.’ Hoi a pakisei taa wan u dee womi di bi ko u ko da Jöpu kötöhati, bi taki sö wan pei soni tu. Di womi dë de kai Elifasi, nöö a bi taki taa: „Na wan libisëmbë sa ko dë limbolimbo.” A bi taki tu taa: „Gadu an ta futoou dee santa wan fëën, nöö liba ala seei an dë limbolimbo nëën wojo” (Jöpu 15:14, 15). Soni seei Elifasi bi mindi dë! Hoi a pakisei taa Saatan hën kë fii ta si soni a sö wan fasi. A sabi taa ee i ta pakisei sö, nöö te u kaba fëën, ja o ko ta biibi dee soni dee Gadu paamusi u möön. Fëën mbei ja musu pena biibi dee mindimindi soni dë. Ma buta pakisei a dee soni dee Gadu paamusi u. Nöiti i musu fëëkëtë taa a kë fii libi u teego, söseei taa a o heepi i fii sa dou di maaka dë.​—1 Tim. 2:3, 4.

11. Faandi mbei u musu wakiti ku pasensi u Gadu du dee soni dee a paamusi u?

¹¹ A sa pasa taa wa ko dë seiki möön taa woo feni bunu a di ten di ta ko. A kan taa wa kë hoi wakiti Gadu möön. U di Jehovah an abi bigi, söseei an abi kaba, mbei u sa ta si kuma wan soni ta tei longi, hii fa hën an ta si ën sö (2 Pet. 3:8, 9). A o du dee soni dee a paamusi u, ma a kan taa an du de a di ten di u ta mëni taa a o du de. Andi sa heepi u fuu wakiti Gadu ku pasensi, söseei fuu sa dë seiki taa a o du dee soni dee a paamusi u?​—Jak. 5:7, 8.

12. Unfa di sabi di u sabi taa woo feni bunu, nama ku di biibi di u ta biibi taa Jehovah dë tuutuu, te u luku Hebelejën 11:1, 6?

¹² Ee u ku Jehovah dë gaan mati, nöö woo dë seiki taa woo feni bunu a di ten di ta ko, u di hën da di Sëmbë di o mbei u feni dee bunu dë. Di Bëibel ta taki taa ee u kë dë ku di mëni taa woo feni bunu a di ten di ta ko, nöö u musu biibi taa Jehovah dë tuutuu, söseei taa „a ta paka dee sëmbë dee ta suku ën ku wan hati”. (Lesi Hebelejën 11:1, 6.) Ee u ta biibi taa Jehovah dë tuutuu, nöö woo möön dë seiki taa a o du dee soni dee a paamusi u. Boo taki u wantu soni di u  sa du fuu ku Jehovah ko dë möön gaan mati, nöö a sö wan fasi woo dë seiki taa a o du dee soni dee a paamusi u.

13. Unfa u ku Gadu sa ko dë mati?

¹³ Begi Jehovah, söseei lesi di Wöutu fëën. Hii fa wa sa si Jehovah, tökuseei u ku ën sa ko dë mati. U sa begi ën, nöö u sa dë seiki taa a o haika u (Jel. 29:11, 12). U sa haika Gadu te u ta lesi di Wöutu fëën, ta kai pakisei nëën. Te u ta si fa Jehovah bi ta booko hën hedi ku dee sëmbë dee bi ta hoi deseei nëën a di ten di pasa, nöö möönmöön woo ta ko dë seiki taa a o du dee soni dee a paamusi u. De sikifi hii dee soni dee dë a Gadu Wöutu tuu „fu de lei u soni. Dee soni aki ta heepi u fuu hoi dou, söseei fuu feni kötöhati a di Wöutu u Gadu, sö taa u sa ta wakiti dee soni dee Gadu paamusi u taa woo feni”.​—Lom. 15:4.

14. Faandi mbei u musu ta kai pakisei a dee soni dee Jehovah bi du da wotowan?

¹⁴ Kai pakisei a di fa Jehovah bi du dee soni dee a bi paamusi. Pakisei andi Gadu bi du da Abahamu ku Sala. De an bi sa pai miii möön u di de bi ko gaandi. Ma tökuseei Gadu bi paamusi de taa de bi o pai wan mii (Ken. 18:10). Andi Abahamu bi du di a bi jei di soni aki? Di Bëibel ta taki taa: „Abahamu bi ta biibi . . . taa a o ko di gaan sëmbë u hia föluku” (Lom. 4:18). Hii fa a bi ta djei kuma sö wan soni an bi o sa pasa, tökuseei Abahamu bi dë seiki taa Jehovah bi o du di soni di a bi paamusi ën. Abahamu bi biibi Gadu, nöö an bi bai sabisö fëën (Lom. 4:19-21). Dee lö woto aki ta lei u taa hii juu u sa biibi Gadu taa a o du dee soni dee a paamusi u, aluwasi a sa kë djei kuma di soni di a taki an o sa pasa.

15. Faandi mbei u musu ta pakisei dee soni dee Gadu du da u?

¹⁵ Pakisei dee soni dee Jehovah du da i. Pakisei un wini i feni kaa, u di dee soni  dee Gadu paamusi i a di Wöutu fëën pasa tuutuu. Jesosi bi taki taa hën Tata bi o da i dee soni dee i abi fanöudu fii sa dë a libi (Mat. 6:32, 33). Jesosi bi taki tu taa Jehovah bi o da i di santa jeje fëën te i hakisi ën faa da i ën (Luk. 11:13). Jehovah du andi a bi taki. Wë i sa pakisei fa a bi du woto soni da i jeti, di a bi paamusi i taa a bi o du da i. A bi paamusi i tu taa a bi o ta da i paadon, taa a bi o ta da i kötöhati, söseei taa a bi o ta heepi i fii ku ën sa dë mati go dou (Mat. 6:14; 24:45; 2 Kol. 1:3). Te i ta kai pakisei a dee soni dee Gadu du da i kaa, nöö joo ko möön dë seiki taa a o du dee soni dee a paamusi i taa a o du da i, a di ten di ta ko.

16. Faandi mbei di sabi di u sabi taa woo feni dee soni dee Gadu paamusi u, dë wan gaan gudu?

¹⁶ Di sabi di u sabi taa woo sa libi u teego da wan gaan gudu di Gadu da u. U ta wakiti fuu feni di bunu libi di Gadu o da u a di ten di ta ko, nöö u dë seiki taa woo feni ën. Di soni dë, dë da u kuma wan hanka. A ta heepi u fuu sa hoi dou hii fa tesi ta miti u, hii fa sëmbë ta du ku u, söseei hii fa u sa lasi u libi. A dë da u tu kuma wan felu kaapusa. A ta tjubi di pakisei fuu, fuu sa koti pasi da hogi, nöö u du bunu. Dee soni dee Gadu paamusi u a di Bëibel, ta mbei u ku ën ko dë möön gaan mati, söseei de ta lei u unfa a lobi u tjika. U ta feni wini tuutuu te u ta mbei möiti fuu sa dë seiki taa woo feni dee soni aki.

17. Faandi mbei di sabi di u sabi taa woo feni dee bunu dee Gadu paamusi u, ta mbei u dë waiwai?

¹⁷ A di biifi di apösutu Paulosu bi manda da dee sëmbë u Loomë, a bi taki taa ’u musu ta wai nöömö, fu di u sabi taa woo feni dee bunu u Gadu dee a bi paamusi u’ (Lom. 12:12). Paulosu bi sa wai, u di a bi dë seiki taa ee a hoi hënseei a Gadu go dou, nöö a bi o feni di libi u teego a liba ala. Useei sa wai ku dee soni dee Jehovah paamusi u tu, u di u dë seiki taa a o du dee soni dee a paamusi u. Di psalöm sikifima bi taki taa: ’Di sëmbë di ta futoou Jehovah, di Gadu fëën, dë bunu. Hën da di Sëmbë di ta dë u futoou hii juu.’​—Ps. 146:5, 6.