1. Faandi mbei di tei di wan sëmbë ta tei dopu dë wan gaan fanöudu soni? (Luku di peentje a bigi u di woto.)

HINIWAN jaa, dusudusu sëmbë di ta lei soni u Bëibel, ta tei dopu. Sömëni u dee sëmbë aki, da njönku sëmbë. De kiija so u dee njönkuwan aki a di tuutuu lei. I da wan u dee njönkuwan aki ö? Ee i da wan u de, nöö hën da i du wan gaan bunu soni seei. Wan Keesitu sëmbë musu u tei dopu ufö a sa feni heepi a Gadu, söseei faa sa libi u teego.​—Mateosi 28:19, 20; 1 Petuisi 3:21.

2. Faandi mbei ja musu fëëë u buta i libi a Jehovah maun?

² Di i tei dopu, hën Jehovah bi mbei i feni sömëni gaan bunu di ja bi feni wan daka. Ma i bi ko abi woto faantiwöutu tu. Andi da dee faantiwöutu aki? Di daka di i tei dopu, hën di baaa di bi hoi di dopu taki bi hakisi i taa: „I ta tjali u dee zöndu fii u di  i ta biibi a di lusupaima u Jesosi Keesitu, nöö i buta i libi a Jehovah maun u du di kë fëën u?” Wë i bi piki aai. I bi paamusi Jehovah taa joo ta lobi ën, söseei taa di dini di joo ta dini ën o dë di möön fanöudu soni a di libi fii. A musu hati i taa i bi paamusi Gadu sö wan gaan soni ö? Na seei! Nöiti joo bai sabi sö u di i ta mbei Jehovah tii i. Dee sëmbë dee an sabi Jehovah, da sëmbë di dë a Didibi basu. Didibi an lobi de, söseei an lobi i tu. A bi o wai seei ee i lasi di okasi u libi u teego, u di i bia baka da Jehovah, hën i tei di së fëën.

3. Unfa Jehovah bi mbei i feni gaan bunu u di i buta i libi nëën maun?

³ Pakisei unfa Jehovah bi mbei i feni gaan bunu, u di i bi buta i libi nëën maun, hën i tei dopu. Di soni dë mbei i sa taki ku hii i hati taa: „Jehovah dë ku mi. Ma o fëëë. Andi seei libisëmbë sa du ku mi?” (Psalöm 118:6). Soni an bigi möön di dë di wan sëmbë ta dë a Gadu së, söseei di sabi di a ta sabi taa Gadu ta wai ku ën.

4, 5. (a) Faandi mbei u sa taki taa di buta di u buta u libi a Gadu maun da wan faantiwöutu di useei musu tja? (b) Un tesi ta miti hii Keesitu sëmbë, aluwasi un mëni jaa de abi?

⁴ Ee i da wan sëmbë di tei dopu, nöö iseei musu mbei möiti fii ku Jehovah ko dë gaan mati. Iseei hën musu mbei möiti fii feni tjubi a Jehovah, aluwasi i ta libi ku i mama ku i tata jeti. Faandi mbei a dë fanöudu fuu hoi di soni aki a pakisei? Wë na wan fuu sa sabi un tesi o miti u a di ten di ta ko. Kandë i bi dopu sensi di i bi njönku. Ma nöunöu di i ko möön bigi, nöö i ko abi woto bookohedi. Wan njönku mujëë mii bi taki taa: „An o hati wan mii di dë Jehovah Kotoigi ee de hoi wan fujai a siköö, ma an sa njan wan pisi kuku. Ma baka wantu jaa, te dee manu ku mujëë fii fëën ta ko möön taanga, nöö a musu ta biibi taa te a ta hoi dee wëti u Jehovah, nöö hii juu soni o ta waka bunu dëën.”

⁵ Na njönku sëmbë wanwan nöö dee lö tesi aki ta miti. Gaangaan sëmbë di tei dopu seei tesi ta miti tu. So juu dee tesi aki ta nama ku di tööu libi u de, di gösöntu u de, nasö di wooko di de ta du. Aantoobi un mëni jaa u abi, tökuseei soni o ta miti u ka u musu ta lei taa u ta hoi useei a Jehovah.​—Jakobosi 1:12-14.

6. (a) Andi i musu hoi a pakisei te i buta i libi a Gadu maun? (b) Andi i sa lei u Filipi 4:11-13?

⁶ Ee i kë hoi iseei a Jehovah, nöö hii juu i musu ta hoi a pakisei taa i bi paamusi Jehovah taa joo dini ën aluwasi andi ta pasa. Di soni aki kë taki taa i paamusi di Möön Hei Gadu taa joo dini ën, aluwasi dee mati fii, nasö i mama nasö i tata an ta dini Jehovah möön (Psalöm 27:10). Aluwasi andi ta miti i, i musu ta hakisi Jehovah faa heepi i fii du di soni di i paamusi ën.​—Lesi Filipi 4:11-13.

7. Andi a kë taki u „biinga nöömö ku gaan lesipeki, ku panta” fuu sa feni heepi a Gadu?

⁷ Jehovah kë fii ku ën dë mati. Ma i musu mbei möiti fii ku ën sa dë mati nöömö, söseei i musu mbei taanga möiti fii sa feni heepi nëën. Filipi 2:12, ta taki taa: ’Un musu ta biinga nöömö ku gaan lesipeki, ku panta u Gadu, be di heepi un feni a Gadu musu dë u sëmbë sa si a unu libi.’ Fëën mbei u musu ta pakisei fundu unfa u sa hoi useei a Jehovah, aluwasi andi ta pasa. U musu u mbei möiti fuu sa du di soni aki. Hoi a pakisei taa sëmbë di bi ta dini Gadu sömëni  jaa longi seei an bi ko ta hoi deseei a Gadu möön te u kaba fëën. Ma andi i sa du fii feni heepi a Gadu?

8. Andi da di lei di u musu ta lei soni u Bëibel? Nöö faandi mbei di soni aki dë fanöudu?

⁸ Ee u kë dë wan mati u Jehovah, nöö u musu ta haikëën, söseei u musu ta fan ku ën tu. Di fasi fa u ta haika Jehovah möön gaanfa, hën da te u ta lei soni u Bëibel. Di soni aki kë taki taa u musu ta lesi di Wöutu u Gadu, ku dee woto buku fuu dee ta taki soni u Bëibel, nöö u musu ta pakisei fundu u de tu. Te i ta lei soni a di Bëibel, nöö na hoi nöö i musu ta hoi dee soni a hedi kumafa i ta du ën te i musu mbei exame a siköö. Ma i musu ta öndösuku soni a di Bëibel fii ko sabi Jehovah möön bunu. Te i ta du sö, nöö joo ko möön zuntu ku Gadu, nöö hënseei o ko zuntu fii tu.​—Jakobosi 4:8.

9. Un soni bi heepi i fii sa ta lei soni u Bëibel?

⁹ Di ölganisaasi u Jehovah ta da u sömëni soni di sa heepi u fuu ta lei soni u Bëibel. Wan pisi dë a jw.org de kai „projecten voor Bijbelstudie” di dë a di pisi „Jongeren” di sa heepi i fii sa ta du dee soni dee i ta lei a di Bëibel. Söseei wan woto pisi dë a jw.org de kai „Wat leert de bijbel echt?”, nöö di pisi dë dë a di pisi „Werkbladen voor Bijbelstudie”. Dee soni aki sa heepi i fii ko abi wan möön taanga biibi, söseei de sa heepi i fii sa konda soni u di biibi fii da wotowan. I sa feni woto soni di sa heepi i fii ta lei soni u Bëibel a di  Waktitoren u jailiba 2017, nr. 1 bladsëidë 3-7. Ee i kë feni heepi a Gadu, nöö i musu ta lei soni u Bëibel, söseei i musu ta pakisei fundu u dee soni dee i ta lei.​—Lesi Psalöm 119:105.

10. Faandi mbei wan Keesitu sëmbë di dopu, musu ta begi?

¹⁰ Te u ta lei soni u Bëibel, nöö u ta haika Jehovah, ma te u ta begi, nöö u ta fan ku ën. Wa musu ta si begi kuma wan soni di u musu u du nöö, nasö kuma wan soni di ta tja bunu ko da u nöö a kaba. Ma u musu hoi a pakisei taa te u ta begi, hën da u ta fan ku di Gadu di mbei u. Pakisei di soni aki: Jehovah kë haika andi i kë taki dëën! (Lesi Filipi 4:6.) Fëën mbei aluwasi un bookohedi i abi, tökuseei di Bëibel ta piki i fii „tuwë di fuka fii da Jehovah” (Psalöm 55:22). Milionmilion baaa ku sisa sa piki i taa di soni aki bi heepi de tuutuu. Wë a sa heepi i tu!

11. Faandi mbei u musu ta da Jehovah tangi hii juu?

¹¹ Na te u kë u Jehovah heepi u ufö u musu ta begi. Di Bëibel ta piki u taa: „Un musu ta da Gadu tangi nöömö e” (Kolosën 3:15). So juu u ta booko u hedi ku dee fuka fuu tee taa wa ta si dee bunu soni dee u abi möön. Pooba di soni aki luku: Hiniwan daka, i sa kai dii soni di i ta tei u bigi, nöö i da Jehovah tangi u dee soni dë. Wan njönku mujëë mii de kai Abigail, bi tei dopu di a bi abi 12 jaa. A bi taki taa: „Mi ta si taa Jehovah fiti fuu da tangi möön hiniwan woto sëmbë. U musu ta dëën tangi hii juu u dee soni dee a ta da u.” So juu Abigail ta hakisi hënseei di soni aki: „Ee di da di mi ta da Jehovah tangi hën bi ta mbei mi feni gudu, nöö un mëni gudu mi bi o abi?” * (Luku di pisi a basu.)

12, 13. Na un fasi iseei ko si fa Jehovah bunu, nöö faandi mbei a dë fanöudu fii ta pakisei unfa Jehovah bi heepi i?

¹² Jehovah bi heepi Könu Dafiti faa hoi dou hii fa sömëni soni bi miti ën. Fëën mbei Dafiti seei bi sa taki taa: „Tesi, nöö joo si taa Jehovah bunu. Di sëmbë di go tjubi nëën o feni heepi” (Psalöm 34:8). Di tëkisi aki ta lei u taa useei musu ko si unfa Jehovah bunu tjika. Te i ta lesi di Bëibel ku dee buku fuu, söseei te i nango a dee komakandi, nöö i ta ko sabi unfa Jehovah bi heepi wotowan u de bi sa hoi deseei nëën. Ma te i ku Jehovah ta ko dë möön gaan mati, nöö iseei o si unfa Jehovah ta heepi i tu. Unfa iseei bi si taa Jehovah bunu?

¹³ Hiniwan Keesitu sëmbë sa taki taa a ko si a wan apaiti fasi, unfa Jehovah bunu tjika. A ta kai hiniwan fuu u ko nama ku ën ku di Womi Mii fëën. Jesosi bi taki taa: „Na wan sëmbë sa ko a mi ee na mi Tata di manda  mi ko aki hën hai ën ko” (Johanisi 6:44). I ta fii taa Jehovah hai i ko nëën u? Naa i ta si kuma Jehovah hai i mama ku i tata ko nëën, nöö i ta waka a de baka? Na fëëkëtë taa sensi di i buta i libi a Jehovah maun tei dopu, nöö i ku Jehovah seei bi ko dë gaan mati. Di Bëibel ta piki u taa: „Ee wan sëmbë i lobi Gadu, nöö di sëmbë dë Gadu ta sabi taa i dëën sëmbë” (1 Kolenti 8:3). Hii juu i musu ta si di gaandi di i abi u dë a di ölganisaasi u Jehovah, kuma wan gaan soni.

14, 15. Unfa di peleikiwooko sa heepi i fii ko abi wan möön taanga biibi?

¹⁴ I ta si unfa Jehovah bunu tu, te a ta da i degihati u taki soni u di biibi fii da wotowan, te i dë a di peleikiwooko nasö te i dë a siköö. A sa dë wan taanga soni da i seei u peleiki da dee mii dee i ku de nango a di wan siköö. Kandë i sa ta booko i hedi ku di fasi fa de o piki i. Kandë i ta fëëë u konda soni u Gadu a hia sëmbë dendu. Ma andi sa heepi i?

¹⁵ Pakisei faandi mbei i ta biibi dee lei u Gadu. Ee di pisi „Jongeren” dë a jw.org a di töngö fii, nöö wooko ku ën. A sa heepi i fii go pakisei dee soni dee i ta biibi, faandi mbei i ta biibi de, söseei unfa i sa konda soni u di biibi fii da wotowan. Te i ko dë seiki u dee soni dee i ta biibi, söseei te i seeka iseei bunu, nöö joo kë konda soni u Jehovah da wotowan.​—Jelemia 20:8, 9.

16. Andi sa heepi i fii ko abi degihati u konda soni u Gadu da wotowan?

¹⁶ A sa pasa taa i ta fëëë pikisö jeti, hii fa i bi seeka iseei bunu u konda soni u Gadu da wotowan. Wan sisa di abi 18 jaa, di bi tei dopu di a bi abi 13 jaa, bi taki taa: „Mi saandi mi ta biibi, ma so juu ma ta saanfa mi musu kondëën da wotowan.” Fëën mbei di sisa aki bi mbei möiti u konda soni u di tuutuu lei da wotowan kuma wan woto a ta da, söseei an ta biinga ku di fan. A bi taki tu taa: „Dee mii dee mi ku de dë a wan kalasi, an ta fëëë u konda dee soni di de ta du, da wotowan. Nöö miseei ma musu ta fëëë u konda soni da de tu. So juu te mi ta bigi fan ku sëmbë, nöö mi ta taki taa: ’Woto daka dë, mi bi ta lei wan sëmbë soni u Bëibel, hën . . . ’ Baka di dë, nöö mi ta konda di woto go dou. Hii fa di soni di mi ta bigi taki an nama ku Bëibel, tökuseei dee sëmbë ta kë sabi unfa mi ta lei sëmbë soni u Bëibel. Nöö so juu de ta hakisi mi soni fëën. An ta taanga da mi sö möön te mi bigi fan ku sëmbë a di lö fasi aki. Nöö bakaten mi ta fii bunu seei!”

17. Un woto soni sa heepi i fii konda soni u Bëibel da wotowan?

¹⁷ Te wotowan ta si taa i ta booko i hedi ku de, söseei taa i ta lesipeki de, nöö an ta taanga da de u de lesipeki i tu, söseei u de lesipeki dee soni dee i ta biibi. Wan sisa de kai Olivia, abi 17 jaa nöunöu, ma a bi tei dopu di a bi möön njönku seei. A bi taki taa: „Hii juu mi bi ta fëëë taa ee mi go taki soni u Bëibel da wotowan, nöö de o si mi kuma wan  sëmbë di lo’ keiki soni poi.” Ma bakaten a bi bigi ko ta si soni woto fasi. Ka faa bi go dë ta pakisei dee soni dee bi ta mbei a bi ta fëëë, nöö a bi ta pakisei taa: „Sömëni njönkuwan an sabi soni u Jehovah Kotoigi. U nöö da dee Kotoigi di de sabi. Fëën mbei di fasi fa woo tja useei sa mbei de haika u, nasö a sa mbei de an haika u tu. Ma ee u ta sen, nasö ee u ta fëëë u konda soni u Gadu da wotowan, nasö ee a ta taanga da u fuu fan ku wotowan, nöö sëmbë sa si kuma wa ta wai taa u dë Kotoigi u Jehovah. Kandë de an o fan bunu ku u u di wa dë seiki u di soni di u ta taki. Ma ee wa ta biinga ku di fan, ee u ta dë seiki u dee soni dee u ta taki, söseei ee u ta fan kuma wan woto u ta da, nöö kandë de o ta lesipeki u.”

18. Andi i musu du ee i kë feni heepi a Gadu?

¹⁸ U ko si taa di biinga di u musu ta biinga fuu feni heepi a Gadu, da wan gaan faantiwöutu di u abi. Ma ee i kë du di soni aki, nöö i musu ta lesi di Wöutu u Gadu, söseei i musu ta pakisei fundu fëën. I musu ta begi Jehovah, nöö i musu ta pakisei fundu u hii dee fasi fa a bi heepi i. Te i ta du dee soni aki, nöö joo ko dë möön seiki taa i ku Jehovah dë mati. Di soni aki o mbei joo kë konda soni fëën da wotowan.​—Lesi Psalöm 73:28.

19. Faandi mbei i musu du hii soni di i sa du fii feni heepi a Gadu?

¹⁹ Jesosi bi taki taa: „Ee i kë waka a mi baka tuutuu, nöö i musu disa di soni di i seei ta kë, nöö i tei di sitaafu dë tja” (Mateosi 16:24). Ee wan Keesitu sëmbë kë waka a Jesosi baka, nöö a musu buta hën libi a Jehovah maun, nöö a tei dopu. Di soni aki o mbei a ko abi wan bunu libi nöunöu kaa, nöö a o mbei a feni di libi u teego, a di njunjun goonliba di Gadu o seti da u. Fëën mbei i musu du hii soni di i sa du fii feni heepi a Gadu!