DIANA da wan sisa di pasa 80 jaa kaa. Gaan hia fuka bi miti ën a dee jaa dee pasa. Hën manu bi abi wan siki de kai Alzheimer, nöö a bi ko lasi libi a wan kamian ka de ta sölugu gaansëmbë. Dee tu womi mii fëën seei bi ko lasi libi, nöö hënseei bi kisi kankël nëën bobi. Ma te dee baaa ku dee sisa si Diana a dee komakandi nasö a di peleikiwooko, nöö hii juu de ta si taa a ta dë waiwai.

Wan baaa de kai John, bi dë wan keling-gaanwomi möön leki 43 jaa longi. A bi lobi di wooko fëën sö tee taa an bi o kë disëën u go du wan woto wooko. Ma tökuseei a bi musu disa di wooko fëën aki u go heepi wan famii fëën di bi siki. Te hën ku dee baaa ku dee sisa dee bi sabi ën kaa ko miti a wan keling-komakandi nasö a wan könklësi, nöö de ta si taa an tooka, ma de ta si taa a ta dë waiwai jeti.

Unfa John ku Diana du ta dë waiwai jeti? Unfa wan sëmbë di ta tja sömëni fuka sa ta dë waiwai? Unfa wan sëmbë sa ta dë waiwai nöömö aluwasi a bi musu disa di wooko fëën di a bi lobi? Di Bëibel ta piki u di soni dë. A taa: „Dee sëmbë dee ta libi a wan leti fasi o wai ku dee soni dee Jehovah du da de” (Psalöm 64:10). Woo ko fusutan di soni aki möön bunu te u ko sabi andi sa mbei u ta piizii u wan sati pisiten ku andi sa mbei u piizii u teego.

So soni sa mbei sëmbë ta piizii. Kuma te tu sëmbë di lobi deseei ko tööu ku deseei. Nasö te wan sëmbë pai wan mii, nasö te wan sëmbë sa du wan woto wooko da Jehovah. Dee soni aki ta mbei sëmbë ta piizii u di Jehovah hën ta da sëmbë dee kado aki. Jehovah seeka di tööu libi, hën seeka soni sö taa u sa pai miii, söseei fuu sa du wooko a di ölganisaasi fëën.​—Kenesesi 2:18, 22; Psalöm 127:3; 1 Timoteo 3:1.

Ma tökuseei, so soni di sa mbei wan sëmbë ta piizii sa dë u wan pisiten nöö. So juu a sa pasa taa di tööu libi an ta suti möön, u di di womi nasö di mujëë waka da di wotowan fëën. Nasö a sa pasa taa di womi nasö di mujëë ko lasi libi (Ezekiëli 24:18; Hosea 3:1). A sa pasa tu taa dee mii an ta haika dee gaan sëmbë u de möön, söseei taa de ta pasa Gadu buka. Te u kaba fëën a sa pasa taa de puu de a di kemeente. Te u luku di woto u Samuëli, nöö u ta si taa dee womi mii fëën  an bi ta dini Jehovah ku hii de hati. Söseei Dafiti bi abi gaan hia bookohedi a di wosudendu libi fëën, u di a bi duumi ku Batiseiba (1 Samuëli 8:1-3; 2 Samuëli 12:11). Te dee lö soni aki ta miti u, nöö wa ta dë waiwai möön, ma u ta tjali, u di a ta hati u.

Sö nöö a sa dë taa wa sa du wan wooko da Jehovah möön, kandë u di u ko dë ku wan siki, nasö u di u musu sölugu wan sëmbë fuu, nasö u di wan soni ko tooka a di ölganisaasi. Sömëni baaa ku sisa di bi musu disa wan apaiti wooko di de bi ta du da Jehovah, ta taki taa de ta hangi di ten di de bi ta du di wooko dë, u di a bi ta mbei de fii bunu.

U ta si gbelingbelin taa de lö soni aki an ta mbei u dë waiwai u nöömö. Ma wan piizii ta dë jeti hii fa di libi ta taanga da u ö? Wë a musu u dë sö, u di Samuëli, Dafiti ku sömëni woto sëmbë bi ta dë waiwai jeti, hii fa fuka bi ta miti de.

Jesosi bi sabi andi da tuutuu piizii. Di Bëibel ta piki u taa bifö a bi ko a goonliba, ’nöö hii juu a bi ta dë waiwai, u di a bi dë makandi ku Jehovah’ (Nöngö 8:30). Di Jesosi bi ko a goonliba, nöö so juu gaan fuka bi ta miti ën. Ma tökuseei a bi ta dë waiwai, u di a bi ta du di kë fëën Tata (Johanisi 4:34). Unfa soni bi dë dëën a dee lasiti juu di a bi dë a goonliba aki? U ta lesi a di Bëibel taa: „Di Masa Jesosi bi dë a goonliba aki, hënseei bi abi wan maaka nëën fesi tu di a bi ta biinga u dou nëën. Hën da di wai di a o wai a bakaten. Nöö fëën mbei aluwasi fa di sitaafu u di lakpa pau [posu, NW] bi hebi dëën u tjai, ma tökuseei a tjëën” (Hebelejën 12:2) U sa lei sömëni soni a tu soni di Jesosi bi taki u tuutuu piizii.

Wan daka, hën 70 bakama u Jesosi bi go du di peleikiwooko. De bi ta wai seei, u di de bi du sömëni soni. De bi puu taku jeje a sëmbë liba tu. Ma Jesosi bi piki de taa: „Na fu di dee gadu ta saka a unu basu mbei un musu ta wai tu. Ma un musu ta wai seei fu di un sabi taa në fuunu dë sikifisikifi a Masa Gadu Köndë ala” (Lukasi 10:1-9, 17, 20). Di wai di Jehovah ta wai ku u ta da u möön gaan piizii möön di du di u sa du wan apaiti wooko dëën.

Wan woto daka di Jesosi bi ta fan ku wanlö sëmbë, hën di soni di Jesosi bi taki bi bigi da wan  Dju mujëë sö tee taa a taki taa Jesosi mama bi musu u ta wai taa a bi pai sö wan womi mii. Ma Jesosi piki ën taa: „Fa i si u dë aki, nöö dee sëmbë dee ta jei di Wöutu u Masa Gadu ta piki ën buka, nöö de ta feni di möön gaan bunu möön leki di sëmbë di pai mi e” (Lukasi 11:27, 28). U ta wai te dee mii fuu ta libi bunu. Ma di piki di u ta piki Gadu buka, ku di dë di u ku ën dë mati ta mbei u piizii u nöömö.

U ta wai seei te u fii taa Jehovah ta wai ku u. Nöö hii fa an ta suti da u te fuka ta miti u, tökuseei u ta wai. Ee fuu taki ën seei, te u ta hoi dou hii fa fuka ta miti u, nöö woo ta möön dë ku wai (Loomë 5:3-5). Jehovah ta da dee sëmbë dee ta futoou ën di santa jeje fëën, nöö piizii da wan u dee fasi di di jeje u Gadu ta mbei sëmbë ko abi (Galasia 5:22). Di soni aki ta heepi u fuu fusutan di soni di sikifi a Psalöm 64:10. A taki taa: „Dee sëmbë dee ta libi a wan leti fasi o wai ku dee soni dee Jehovah du da de.”

Di soni aki ta mbei u fusutan tu faandi mbei Diana ku John bi sa ta dë waiwai hii fa de bi abi sömëni fuka. Diana taki taa: „Mi bi go suku heepi a Jehovah kumafa wan mii bi o go suku heepi nëën mama nasö nëën tata”. A ta taki tu taa: „Mi ta fii taa a heepi mi u mi du di peleikiwooko waiwai go dou.” Andi bi heepi John faa ta dë waiwai, söseei faa du di peleikiwooko go dou baka di a bi musu disa di wooko di a bi ta du da Jehovah? A taki taa: „Sensi di jaa 1998 di de hakisi mi u mi da lësi a di Dinai-siköö, hën mi bi lei soni u Bëibel seei. Ma bi lei soni u Bëibel sö, wan daka jeti.” Baaa John bi taki tu taa an bi taanga da hën ku di mujëë fëën u de tooka soni a de libi, u di hii juu de bi dë kabakaba u du di wooko di Jehovah bi hakisi de u de du dëën. A taa: „U ta du hii soni di Jehovah ta hakisi u fuu du, nöö an ta hati u seei.”

Sömëni sëmbë ta taki taa di soni di sikifi a Psalöm 64:10 da tuutuu soni. Boo luku wan woto u wan baaa ku hën mujëë di bi wooko a di Bëtëli fu Amëëkanköndë möön leki 30 jaa. Dee baaa bi hakisi de u de go du di apaiti pioniliwooko. Di baaa ku hën mujëë taki taa: „An ta dë wan foombo soni te i ta tjali u di i lasi wan soni di i bi lobi.” Ma de ta taki tu taa: „Ma ja sa ta tjali nöömö.” Fa de da de di njunjun wooko u du, hën wantewante de bigi peleiki makandi ku dee baaa ku dee sisa u di kemeente. De bi taki tu taa: „U bi begi Jehovah faa heepi u ku wantu soni. U bi ta feni taanga te u bi ta si unfa a bi ta piki dee begi fuu, nöö a bi ta mbei u dë ku piizii. Fa u dou a di kemeente, hën woto baaa ku sisa bi bigi du di pioniliwooko tu, söseei tu sëmbë di u bi ta lei soni u Bëibel bi nango a fesi a di biibi.”

An dë u taki taa a ta taanga fuu ta dë waiwai hii juu. So juu woo ta tjali. Ma Jehovah ta da u taanga ku dee soni dee sikifi a Psalöm 64:10. Aluwasi u lasi hati seei, tökuseei u sa dë seiki taa ee u hoi useei a Jehovah hii fa fuka ta miti u, nöö woo ta „wai ku dee soni dee Jehovah du”. U sa dë ta wakiti di ten ka Jehovah o „mbei wan njunjun mundu ku wan njunjun goonliba”. A di ten dë, nöö na wan sëmbë o abi zöndu möön, nöö de o ta „wai ta piizii seei u teego” u di Jehovah o du soni da de.​—Jesaaja 65:17, 18.

Pakisei unfa soni o dë. Woo dë gösöntu, nöö hiniwan daka te u weki, woo ta abi kaakiti tjika. Wa o ta pakisei dee soni dee bi miti u, dee ta mbei u tjali. Jehovah ta paamusi u taa: „Sëmbë an o mëni dee fesiten soni möön, nöö dee soni dë an o ta toobi de möön.” Woo wai seei te woo si dee sëmbë fuu dee bi dëdë, weki ko a libi baka. Woo fii kumafa di mama ku di tata u di mujëë mii di bi abi 12 jaa, di bi dëdë bi fii. Di Bëibel ta taki taa: „A [bi] bigi da dee sëmbë” (Maikusi 5:42). Te u kaba fëën, hii sëmbë a goonliba aki o dë sëmbë di ta libi a wan leti fasi, nöö u teego de o ta „wai ku dee soni dee Jehovah du”.