„Lei taa i ta tei soni u bigi”
I TA si iseei kuma wan sëmbë di lo’ u da wotowan tangi ö? Hii u tuu musu pakisei u di hakisi aki. Di Bëibel bi taki a fesi taa sömëni sëmbë „an o ta da sëmbë tangi” a di ten fuu aki (2 Tim. 3:2). A sa dë taa i miti sëmbë kaa di ta si kuma wotowan musu u du soni da de, nasö taa de musu u da de soni. Kandë dee sëmbë aki ta fii kuma i bi musu u da de wan soni, nöö an dë u de da i tangi fëën. U dë seiki taa ja ta kë dë a dee lö sëmbë dë dendu.
Dee dinima u Jehovah ta kisi di taanga u „dë ku tangi a hati”. U musu ta „da Gadu tangi da hii soni” (Kol. 3:15, NW; 1 Tes. 5:18, NW). U ta feni wini te u ta lei taa u ta tei soni u bigi. Sömëni soni dë di ta lei taa sö di soni aki dë tuu.
U TA FII BUNU TE U TA LEI TAA U TA TEI SONI U BIGI
Wan fanöudu soni dë di mbei hii juu u musu ta lei taa u ta tei soni u bigi. Hën da woo ta fii bunu. Wan sëmbë di da wan wotowan tangi u wan soni di a du dëën ta fii bunu, söseei di sëmbë di a da tangi seei ta fii bunu tu. Faandi mbei wan sëmbë di da wan wotowan tangi ku di sëmbë di a da tangi tuu ta fii bunu? Wë ee wotowan dë kabakaba u tei de ten u du soni da i, nöö de ta du ën u di de si taa a fiti u de du ën da i. De ta du ën u di de ta booko de hedi ku i. Te i ko si taa wotowan ta booko de hedi ku i, nöö di soni dë ta mbei i fii bunu. U ta fusutan unfa a bi dë da Luti. Boasi bi dë kabakaba u da Luti soni. A bi musu u dë sö taa di Luti si taa Boasi bi ta booko hën hedi ku ën, nöö a bi ta fii bunu seei.—Luti 2:10-13.
A fiti taa u ta tei dee soni Gadu ta du da u u bigi. U dë seiki taa so juu i ta pakisei dee sömëni soni dee a bi du da i, söseei dee soni dee a ta du da i jeti (Deto. 8:17, 18; Tjab. 14:17). A bi o möön bunu fii pakisei fundu u hii dee gaan bunu Gadu mbei i ku dee sëmbë fii feni. Te i ta pakisei fundu u dee gaan bunu Gadu ta da i, nöö joo ta möön tei dee soni a ta du da i u bigi. Di soni dë o heepi i fii si unfa a lobi i tjika ku unfa a ta kai i gaan soni tjika.—1 Joh. 4:9.
Ma wa musu ta pakisei fundu u dee soni Jehovah ta da u nöö a kaba, ma u musu ta dëën tangi tu (Ps. 100:4, 5). Wan buku taki taa: „Sëmbë ta möön dë waiwai te de ta lei taa de ta tei dee soni di wotowan ta du da de u bigi.”
TE U TA DË KU TANGI A HATI U DEE SONI DI WOTOWAN TA DU DA U, NÖÖ U KU DE O KO DË MÖÖN GAAN MATI
Wan woto soni di mbei a bunu u ta tei soni u bigi, hën da u di a ta mbei sëmbë ku sëmbë ko dë möön gaan mati. Hii u tuu ta kë taa wotowan kai u gaan soni. Te i ta da wan wotowan tangi ku hii i hati u wan soni di a du da i, nöö i ku ën ta ko dë möön gaan mati (Lom. 16:3, 4). Boiti di dë, sëmbë di ta tei soni u bigi lo’ u heepi wotowan a soni. U di de ta si fa wotowan ta du bunu soni da de, nöö di soni dë ta da de taanga u deseei du bunu soni da wotowan tu. U sa taki taa te u ta heepi wotowan, nöö di soni dë o ta mbei u ta dë waiwai. A dë leti kumafa Jesosi bi taki: „Dee sëmbë ta da sëmbë soni, de dë waiwai möön leki dee sëmbë ta feni.”—Tjab. 20:35.
Wan womi di dë wan hedima u wan hei siköö a California, di de ta kai Robert Emmons, bi öndösuku soni di nama ku di da di sëmbë ta da wotowan tangi. A bi taki taa: „Ee u kë ta tei soni u bigi, nöö u musu fusutan taa u abi woto sëmbë fanöudu a di 1 Kol. 12:21) Wan sëmbë di dë ku tangi, ta lei gbelingbelin taa a ta tei dee soni dee wotowan ta du dëën u bigi. I lo’ u da wotowan tangi te de du soni da i ö?
libi. So juu u ta da wotowan soni, so juu wotowan ta da u soni.” Ee u kë fika a libi, söseei ee u kë dë waiwai, nöö u abi wotowan fanöudu. Kandë de ta da u soni u njan, nasö de ta heepi u te u dë ku suwaki. (DI TEI DI I TA TEI SONI U BIGI, KU DI FASI FA I TA SI DI LIBI
Wan woto soni mbei u musu ta lei taa u ta tei soni u bigi, hën da u di a ta heepi u fuu ta buta pakisei a bunu soni, ka fuu ta buta pakisei a soni di an bunu. A dë kuma u ta maani di pakisei fuu. Hën da te i ta buta pakisei a bunu soni, nöö i ta puu dee hogi soni a i pakisei. I ta si dee bunu soni, nöö ja ta buta pakisei a dee hogi soni. Möön i ta tei soni u bigi, möön joo ta si dee bunu soni wotowan ta du, nöö joo ta möön tei de u bigi. Ee i ta buta pakisei a soni di i sa ta dë ku tangi u de, nöö a o heepi i fii du andi apösutu Paulosu bi da u taanga fuu du. A bi taa: „Fa un ta biibi a Masa Jesosi liba dë, nöö sösö wai nöö fuun ta wai e.”—Fil. 4:4.
Te i ta tei soni u bigi, nöö ja o ta pakisei soni di na bunu. Ja o sa dë ku tangi a hati, nöö a di wan seei ten i ta haun ku wotowan, i ta tjali, nasö hati fii ta boonu. Sëmbë di ta tei soni u bigi an ta suku u ko gudu. De ta dë tifeedi ku dee soni di de abi, nöö de an ta biinga u feni möön hia soni.—Fil. 4:12.
PAKISEI HII DEE BUNU SONI DEE I FENI!
Kuma bakama u Keesitu, i sabi taa Saatan kë u dee fuka dee ta miti u a dee lasiti daka aki, mbei i fii tjali nasö u de mbei i fii bookosaka. A bi o wai seei ee ja ta pakisei bunu soni möön, söseei ee i ta guunjan u hii soni. Ee i ko dë sö wan sëmbë, nöö a o möön taanga da wotowan u de haika i te i ta paaja di bunu buka. Te u ta tei soni u bigi, nöö u ta lei taa u abi dee fasi di di jeje u Gadu ta mbei sëmbë ko abi. Joo ta dë waiwai u di joo ta si hii dee bunu soni dee Gadu da i, söseei joo ta biibi taa hii dee soni dee a paamusi u, o pasa tuu a di ten di ta ko.—Gal. 5:22, 23.
Ee i da wan dinima u Jehovah, nöö kandë dee soni dee sikifi a di woto aki kai ku i. Ma tökuseei a ta taanga u lei taa u ta tei soni u bigi hii juu, söseei a ta taanga u si soni a wan bunu fasi hii ten. Na mbei di soni dë mbei i fii bookosaka. I sa mbei möiti u ta tei soni u bigi nöömö. Na un fasi? Hiniwan daka i musu ta tei ten u pakisei u so soni a di libi fii dee i ta tei u bigi. Te i ta du di soni aki, nöö an o ta taanga da i möön u ta tei soni u bigi. A o mbei i ta dë waiwai möön dee sëmbë dee ta buta pakisei a dee fuka u di libi. Pakisei dee bunu soni di Gadu ku woto sëmbë du dee ta da i taanga ku dee ta mbei i piizii. Kandë i sa bigi sikifi dee soni aki. Hiniwan daka i sa sikifi wan nasö tu soni di i bi tei u bigi.
Dee sëmbë dee ta öndösuku soni bi ko si taa „te i ta da wotowan tangi hiniwan juu, nöö a sa tooka di fasi fa i ta pakisei, nöö a ta mbei taa i ta fii bunu”. Wan sëmbë di ta tei soni u bigi ta möön dë waiwai. Fëën mbei pakisei u hii dee bunu soni dee i feni, piizii ku dee bunu soni dee ta miti i, söseei ta dë ku tangi hii juu! Ka fuu ta si kuma u bi musu u feni wan soni, nöö u musu ’ta da Gadu tangi nöömö u di a dë wan bunuhati Gadu’. Aai! I musu „lei taa i ta tei soni u bigi”.—1 Klon. 16:34; 1 Tes. 5:18.