Di woto a Detolonomi 22:25-27 an ta taki taa de musu luku ee di womi hën föutu, u di a dë gbelingbelin u si taa di womi hën föutu. Di Wëti bi ta möön lei taa di mujëë an du na wan hogi, nöö an musu kisi sitaafu. Luku andi dee woto tëkisi a di pisi aki ta taki.

Dee woto tëkisi a fesi ta taki u wan womi di go duumi ku wan mujëë „a wan foto” hii fa di mujëë bi paamusi wan woto womi taa hën ku ën o tööu. Te wan womi du di soni aki, nöö a o kisi sitaafu, u di de bi ta si sö wan mujëë kuma a tööu kaa. Ma nöö unfa a dë ku di mujëë? „An kai wolo a di foto.” Ee a bi kai wolo, woto sëmbë bi musu u jei nöö de bi o go heepi ën. Ma an kai wolo. Hënseei bi kë taa di womi go nëën. Hii de tuu musu kisi sitaafu.​—Deto. 22:23, 24.

A Detolonomi 22:25-27 di wëti ta taki u wan woto soni. A taa: „Ee a ko pasa sö taa wan womi ko miti ku wan mujëë a goon dendu, nöö di mujëë dë abi buka u tööu ku wan woto womi, hën di womi kisi di mujëë u di a taanga möön ën, nöö un musu kii di womi dë, u di hënseei suku ën da hënseei, ma wan musu du na wan soni ku di mujëë. Di mujëë an du na wan hogi, nöö fëën mbei wan musu kii ën. A dë kuma te wan womi bi o naki wan woto womi kii. Hën da a pasa sö taa a miti ën a goon dendu, ma di mujëë kai wolo, ma sëmbë an bi sai dë u heepi ën.”

Te a pasa sö, nöö dee kuutuma ta biibi andi di mujëë taki. Na un futu? De ta tei taa di mujëë „kai wolo, ma sëmbë an bi sai dë u heepi ën”. Nöö na ku ën seei kë di womi go nëën. Di womi o kisi sitaafu u di a kisi di mujëë, söseei u di a tei wan woto sëmbë mujëë. Ma di mujëë an bi sa du na wan soni u di di womi bi „taanga möön ën”.

U di a dë sö mbei di wëti ta taki u di sitaafu di di womi musu kisi, ma di mujëë an o kisi na wan sitaafu. U sa dë seiki taa dee kuutuma bi o „öndösuku di woto finifini”, söseei taa de bi o kuutu soni a wan fasi di ta kai ku di fasi fa Gadu bi kë taa soni musu kuutu, u di Gadu bi ta piki de di soni aki hii juu baka.​—Deto. 13:14; 17:4; Ëki. 20:14.