Soni di dee lesima hakisi
Di Saatan bi piki Eva taa an o dëdë ee a njan di fuuta u di pau de kai „sabi bunu ku hogi”, nöö piki a bi kë piki ën taa wan soni dë nëën dendu di bi o ta libi go dou, kumafa sëmbë ta taki a di ten aki ö?
Wë nönö. Didibi an bi piki Eva taa ee a njan di pau njanjan di Gadu bi piki ën fu an njan, nöö a bi o djei kuma a dëdë, hii fa wan soni bi o dë nëën dendu, di ta libi go dou a wan woto kamian (Di soni aki so sëmbë ta kai akaa a di ten aki). Saatan bi tei di sindeki u piki Eva taa ee a njan di pau njanjan, nöö ’an o dëdë seei’. Saatan bi kë mbei a biibi taa a o bi o ta libi go dou, a bi o abi wan möön bunu libi a goonliba aki, nöö an bi o abi Gadu fanöudu.—Ken. 2:17; 3:3-5.
Wë ee di poipoi lei di sëmbë ta lei sëmbë taa wan soni dë a sëmbë dendu di ta libi go dou te wan sëmbë dëdë, an kumutu a di djai u Eden, nöö naasë de kumutu ku ën? Wa sa taki tuutuu naasë de kumutu ku ën. Ma u sabi taa hii dee poipoi biibi tuu bi poi kaba a sösö a di ten u di Gaan Wata u Noa. Na wan poipoi biibi bi dë möön baka di Gaan Wata, biga Noa ku dee sëmbë fëën wosudendu bi dë a di tuutuu biibi.
U dee soni aki mbei u sa taki taa di lei di sëmbë ta lei wotowan taa libisëmbë abi wan akaa di ta libi go dou baka te de dëdë, da wan lei di bi ko, baka di Gaan Wata. Di Gadu bi mbei sëmbë ko ta fan peipei töngö a di foto Babel, u de bi sa ’paaja go a hii së u goonliba’, nöö a musu u dë sö taa de bi go libi a woto kamian ku di mëni taa libisëmbë abi wan akaa di ta libi go dou (Ken. 11:8, 9). Ma aluwasi ka de kumutu ku di lei aki, u sa dë seiki taa Saatan, di sëmbë ka ’mindi soni ku lëgëdë kumutu’, bi buta maun a dendu, nöö a bi ta wai taa di lei aki bi ta paaja a hii di goonliba.—Joh. 8:44.