1-2. Andi hiniwan fuu musu du, te u luku di woto u Angelito?

JU MAMA ku ju tata da Jehovah Kotoigi ö? Ee sö a dë, nöö hoi a pakisei taa na di dë di de ku Jehovah dë mati, hën ta mbei ju ku Jehovah seei dë mati tu. Aluwasi u mama ku u tata ta dini Gadu, nasö ee de an ta dini ën, tökuseei hiniwan fuu musu mbei möiti fuu ku Jehovah ko dë gaan mati.

² Luku di woto u wan baaa de kai Angelito. Hii dee sëmbë fëën wosudendu bi dë Jehovah Kotoigi. Ma tökuseei di a bi möön njönku, an bi ta fii taa hën ku Jehovah bi dë gaan mati. Di baaa aki ta taki taa: „Mi bi ta dini Jehovah u di mi bi kë ta du andi dee sëmbë u mi wosudendu bi ta du.” Ma bakaten, Angelito bi ko ta möön tei ten u lesi di Wöutu u Gadu, söseei a bi ta pakisei fundu fëën, nöö a bi ko ta begi Jehovah möön gaanfa. Andi Angelito bi ko si? Wë a ta taki taa: „Mi bi ko si taa di wan kodo fasi fa mi ku mi Tata Jehovah bi sa ko dë möön gaan mati, hën da te miseei ta mbei möiti u mi ko sabi ën möön bunu.” Ma kandë di woto u Angelito ta mbei u hakisi useei dee soni aki: Na un ten u sa taki taa wan sëmbë sabi Jehovah bumbuu? Andi u musu du fuu sa ko sabi Jehovah bumbuu?

3. Unfa di sabi di wan sëmbë sabi soni u Jehovah tooka ku di sabi di wan sëmbë sabi Jehovah bumbuu?

³ Wë u sa pakisei taa u sabi Jehovah, u di u sabi di në fëën, nasö u di u sabi so u dee soni dee a taki ku so u dee soni dee a du. Ma di soni dë an kë taki taa u sabi ën bumbuu. U musu tei  ten fuu ko sabi Jehovah ku dee bunu fasi dee a abi. Di soni dë nöö sa mbei u ko fusutan faandi mbei a ta taki so soni, söseei faandi mbei a ta du so soni. Te u ko fusutan dee soni aki kaa, nöö de o mbei u ko sabi ee Jehovah lobi dee soni dee u ta pakisei, nasö ee a lobi dee soni dee u ta du. Te u ko sabi kaa andi Jehovah bi o kë fuu du, nöö u musu du di soni dë.

4. Unfa di luku di woo luku woto u sëmbë di di Bëibel ta taki soni u de, o heepi u?

⁴ Kandë so sëmbë o ta mbei u fa, u di u kë dini Jehovah, söseei kandë de o ta kë du ku u seei te de si taa u bigi go a dee komakandi. Ma ee u ta futoou Jehovah, nöö nöiti a o go disa u. Di futoou di u ta futoou Jehovah hën o heepi u fuu ku Jehovah sa ko dë mati u teego. Ma u sa ko sabi Jehovah bumbuu ö? Wë aai! Dee woto u wanlö womi di bi dë zöndu libisëmbë, ta lei u taa u sa ko sabi Jehovah bumbuu. Tu u dee womi aki da Mosesi ku Könu Dafiti. Te woo luku andi dee womi aki bi du, nöö woo piki dee tu hakisi aki: Unfa dee womi aki bi du ko sabi Jehovah bumbuu? Nöö andi u sa lei a de?

5. Andi Mosesi bi du?

⁵ Mosesi bi dini Gadu. Di Mosesi bi abi 40 jaa, hën a bi go nama ku dee sëmbë u Gadu, nöö an bi kë „tja di në taa a dë miii u di mujëë mii u könu Falao möön” (Heb. 11:24). Mosesi bi disa di nëbai libi di a bi abi, hën a bigi nama ku dee Isaëli sëmbë dee bi dë saafu a Egepiti. Mosesi bi sabi taa Falao hati bi o boonu gaanfa seei te a bi du di soni aki. A bi sabi taa Falao bi dë wan könu di bi abi makiti gaanfa, nöö dee Egepiti sëmbë bi ta si ën kuma wan gadu. Di soni aki ta lei taa Mosesi bi abi wan taanga biibi! Mosesi bi ta futoou Jehovah. Di fasi fa Mosesi bi ta lei taa a ta futoou Jehovah aki, ta lei u unfa a du ko taa hën ku Jehovah bi sa dë mati hii hën libi longi.​—Nöng. 3:5.

6. Andi u sa lei a di woto u Mosesi?

⁶ Andi di soni aki ta lei u? Wë kuma Mosesi, useei musu taki andi woo du a di libi fuu tu. U musu taki ee woo dini Gadu, söseei ee woo nama ku dee sëmbë fëën. Wë kandë useei musu disa soni fuu sa dini Gadu, nasö kandë sëmbë di an sabi Jehovah sa kë du ku u. Ma ee u ta futoou di Tata fuu di dë a liba ala, nöö u sa dë seiki taa a o heepi u!

7-8. Andi Mosesi bi ta ko fusutan hiniwan juu baka?

⁷ Mosesi bi ta lei soni u dee fasi di Jehovah abi go dou, söseei a bi ta du andi Jehovah taki. Di Jehovah bi hakisi Mosesi faa tja dee Isaëli sëmbë kumutu a Egepiti, nöö di biibi fëën an bi taanga tjika. Sömëni pasi a bi ta toona piki Jehovah taa an bunu tjika faa sa du di soni di a mandëën. Di fasi fa Jehovah bi piki Mosesi, bi ta lei taa Jehovah abi tjalihati u sëmbë, söseei a bi ta lei taa a ta fusutan unfa Mosesi ta fii, nöö a bi heepi ën (Ëki. 4:10-16). Te u kaba fëën, Mosesi bi si di gaan kaakiti u Jehovah, di Jehovah bi tjubi dee Isaëli sëmbë, söseei di Jehovah bi kii Falao ku dee sodati fëën a di Bë Ze.​—Ëki. 14:26-31; Ps. 136:15.

⁸ Baka di Mosesi tja dee Isaëli sëmbë kumutu a Egepiti, nöö de bi ta kaagi u sömëni soni hedi. Ma tökuseei Mosesi bi si unfa Jehovah bi lei taa a abi pasensi ku dee sëmbë dee a bi puu a katibo (Ps. 78:40-43). Di Mosesi hakisi Jehovah fu an kii dee Isaëli sëmbë, hën a ko si taa Jehovah abi sakafasi tuutuu, u di an bi kii de möön.​—Ëki. 32:9-14.

9. Unfa Jehovah ku Mosesi bi dë mati tjika, te u luku di soni di sikifi a Hebelejën 11:27?

⁹ Baka di dee Isaëli sëmbë bi kumutu a Egepiti, hën Mosesi bi ko dë möön gaan mati u  Jehovah tee taa a bi dë kuma Mosesi bi ta si di Tata fëën di dë a liba ala ku wojo. (Lesi Hebelejën 11:27.) Di Bëibel ta lei u unfa Jehovah ku Mosesi bi dë gaan mati tjika, te a ta taki taa: „Jehovah bi ta fan ku Mosesi fesi ku fesi kumafa wan sëmbë ta fan ku wan mati fëën.”​—Ëki. 33:11.

10. Andi u musu ta du fuu sa ko sabi Jehovah bumbuu?

¹⁰ Andi di soni aki ta lei u? Wë u ta lei taa ee u kë ko sabi Jehovah bumbuu, nöö na sabi nöö u musu sabi dee fasi dee a abi, ma u musu ta du andi a taki. A di ten aki Jehovah kë taa „hii sëmbë u goonliba tuu musu feni libi u teego nëën. A kë fu hii sëmbë musu ko sabi dee soni fëën, biga de nöö da tuutuu soni a mundu” (1 Tim. 2:3, 4). Wan fasi fa u sa ta du andi Jehovah kë, hën da te u ta lei wotowan soni fëën.

11. Na un fasi u ta ko sabi Jehovah möön bunu te u ta lei wotowan soni fëën?

¹¹ A lo’ u pasa möön gaanfa taa te u ta lei wotowan soni u Jehovah, nöö nëën useei ta ko sabi Jehovah möön bunu tu. U ta ko si unfa Jehovah abi tjalihati u sëmbë te a ta heepi u fuu feni dee sëmbë dee kë ko dë mati fëën (Joh. 6:44; Tjab. 13:48). U ta si unfa di Wöutu u Gadu abi kaakiti, te u ta si unfa a ta heepi dee sëmbë dee u ta lei soni u Bëibel. Di Wöutu u Gadu ta heepi de u de bia libi ko dë wan hii woto sëmbë kumafa Gadu kë (Kol. 3:9, 10). U ta si tu unfa Gadu abi pasensi ku dee sëmbë u di pisiwata ka u ta peleiki, u di a ta manda u go a de sömëni pasi fuu sa heepi de u de ko sabi soni fëën, söseei u de sa feni libi.​—Lom. 10:13-15.

12. Andi Mosesi bi hakisi Jehovah kumafa u ta si a Ëkisodesi 33:13, nöö faandi mbei a bi hakisi ën di soni dë?

¹² Mosesi bi ta tei di dë di hën ku Jehovah bi dë mati u bigi. Jehovah bi tei Mosesi faa du sömëni foombo wooko, nöö a sö wan fasi Mosesi bi ko sabi Jehovah möön bunu. Ma tökuseei Mosesi bi hakisi Jehovah faa heepi ën faa ko sabi ën möön bunu. (Lesi Ëkisodesi 33:13.) Mosesi bi abi 80 ku miii jaa di a bi hakisi Jehovah di soni dë, ma tökuseei a bi sabi taa a bi sa lei sömëni soni u di Tata fëën di dë a liba ala jeti.

13. Andi da wan fasi fa u sa lei taa u ta tei di dë di u ku Jehovah dë mati u bigi?

¹³ Andi di soni aki ta lei u? Wë a ta lei u taa aluwasi u ta dini Jehovah sömëni jaa kaa, tökuseei u musu ta tei di dë di u ku Jehovah dë mati u bigi. Wan fasi fa u sa lei taa u ta tei di dë di u ku Jehovah dë mati u bigi, da te u ta begi ën.

14. Faandi mbei a dë fanöudu fuu ta begi, ee u kë ko sabi Jehovah möön bunu?

¹⁴ Ee i kë fii ku wan sëmbë ko dë gaan mati, nöö hii juu i musu ta fan ku ën. Fëën mbei ee i kë fii ku Gadu ko dë gaan mati, nöö i musu ta begi ën hii juu, söseei ja musu ta fëëë u konda dëën unfa i ta pakisei ku unfa i ta fii (Ef. 6:18). Wan sisa de kai Krista, di ta libi a Tolukuköndë bi taki taa: „Te mi ta konda da Jehovah unfa mi ta pakisei, söseei te mi ta si unfa a ta heepi mi, nöö mi ta ko möön lobi ën, söseei mi ta ko ta futoou ën möön gaanfa. Di si di mi ta si unfa Jehovah ta piki dee begi u mi, heepi mi u mi ko ta si Jehovah kuma mi Tata, söseei kuma mi mati.”

15. Andi Jehovah bi taki u Könu Dafiti?

¹⁵ Di de bi pai Könu Dafiti, nöö hën mama ku hën tata ku hii dee woto sëmbë u di lö ka a kumutu tuu, bi ta dini Jehovah. Ma na u di dee sëmbë fëën bi ta dini Jehovah mbei a bi ta dini Jehovah. Hënseei bi du soni sö taa hën ku Jehovah bi sa ko dë gaan mati, nöö Jehovah bi lobi ën gaanfa. Jehovah seei bi taki taa libi u Dafiti bi ta „kai” ku ën (Tja 13:22). Unfa  a du ko taa Dafiti ku Jehovah bi ko dë gaan mati sö?

16. Andi Dafiti bi lei u Jehovah di a bi ta luku dee soni dee Jehovah mbei?

¹⁶ Dee soni dee Jehovah mbei, bi heepi Dafiti faa ko sabi ën bumbuu. Di Dafiti bi möön njönku, nöö a bi ta dë sömëni juu longi a döö, u di a bi musu ta luku dee sikapu fëën tata. A sa dë taa a di ten dë a bigi pakisei fundu u dee soni dee Jehovah mbei. Te Dafiti bi ta luku go a liba ala a ndeti, nöö a bi ta si dusudusu teeja, ma na dee teeja dë nöö a bi ta si. Dafiti bi ta si dee fasi u di Sëmbë di mbei de. Di soni dë bi mbei Dafiti bi taki taa: „Liba ala ta lei fa Gadu waiti tjika. Liba ala ta lei dee soni dee a mbei ku ën maun” (Ps. 19:1, 2). Di Dafiti bi pakisei u di foombo fasi fa libisëmbë mbei, hën a ko si taa Jehovah köni tuutuu (Ps. 139:14). Di Dafiti bi ta pakisei fundu u dee soni dee Jehovah mbei, hën a bi ko si unfa Jehovah bigi tjika. A bi ko si taa hën Dafiti an dë wan hojo soni.​—Ps. 139:6.

17. Andi u sa lei ee u ta pakisei fundu u dee soni dee Gadu mbei?

¹⁷ Andi di soni aki ta lei u? Wë di soni aki ta lei u taa u musu ta buta pakisei a dee soni dee Gadu mbei. Tei ten u luku dee hanse soni dee Gadu mbei buta a Goonliba aki. Tei ten hiniwan daka u pakisei fundu u dee hanse soni dee i ta si taa Gadu mbei, soni kuma dee uwii, dee mbeti, ku libisëmbë, nöö luku andi dee soni dë ta lei i u Jehovah. Te i ta du sö, nöö hiniwan daka joo sa lei soni u di Tata fii di dë a liba ala (Lom. 1:20). Di soni dë o mbei taa hiniwan daka joo ta möön lobi Jehovah.

18. Andi Dafiti bi sabi, te u luku Psalöm 18?

¹⁸ Dafiti bi sabi taa Jehovah bi ta heepi ën. Di Dafiti bi tjubi dee sikapu fëën tata u wan lëun an kii de, söseei di a bi tjubi de u wan beer an kii de, a bi sabi taa Jehovah hën bi dëën di kaakiti faa bi sa kii dee hogi mbeti dë. Di Dafiti bi feti ku Goliati, a bi si gbelingbelin taa Jehovah hën bi heepi ën (1 Sam. 17:37). Söseei di a bi feni pasi fusi go u Könu Saulosu an kii ën, nöö a bi sabi tu taa Jehovah hën bi tjubi ën (Ps. 18, bigi pisi). Ee Dafiti bi abi gaanfasi, a bi sa si kuma hën wë bi du dee soni aki ku hënseei kaakiti. Ma Dafiti bi abi sakafasi. Fëën mbei a bi sa si unfa Jehovah bi ta heepi ën.​—Ps. 138:6.

19. Andi u sa lei a di woto u Dafiti?

¹⁹ Andi di soni aki ta lei u? Wë u ta lei taa na hakisi nöö u musu ta hakisi Jehovah faa heepi u, ma u musu ta pooba u si na un ten a ta heepi u ku unfa a ta heepi u tu. Ee u abi sakafasi, nöö woo fusutan taa na hii soni u sa du useei, söseei woo fusutan taa Jehovah hën ta heepi u fuu du dee soni dee wa sa du. Te u ta si unfa Jehovah ta heepi u, nöö u ku ën ta ko dë möön gaan mati. Wan baaa de kai Isaac bi ko si taa sö di soni aki dë tuu. Di baaa aki ta libi a di köndë Fiji, nöö a ta dini Jehovah sömëni jaa kaa. A bi taki taa: „Te mi ta toona luku unfa soni bi waka a di libi u mi, nöö mi ta si unfa Jehovah bi heepi mi sensi di mi bigi lei soni u Bëibel te kisi di daka u tide. Di soni aki mbei mi ta si Jehovah kuma wan tuutuu sëmbë.”

20. Andi u sa lei a di fasi fa Dafiti ku Gadu bi dë mati tjika?

²⁰ Dafiti bi ta djeesi Jehovah a dee fasi dee a abi. Jehovah mbei u a sö wan fasi taa u sa djeesi ën a dee fasi dee a abi (Ken. 1:26). Möön u ta ko sabi dee fasi dee Jehovah abi, möönmöön woo sa djeesi ën a dee fasi dë. Dafiti bi ko sabi di Tata fëën di dë a liba ala bumbuu. Fëën mbei a bi sa ta djeesi ën a di fasi fa a bi ta libi ku wotowan. Buta pakisei a di soni aki. Dafiti bi du zöndu a Jehovah wojo,  di a bi duumi ku Batiseiba, söseei di a bi mbei de kii di manu fëën (2 Sam. 11:1-4, 15). Ma Jehovah bi lei taa a abi tjalihati u Dafiti, u di Dafiti seei bi dë wan womi di bi ta lei taa a abi tjalihati u wotowan. U di Dafiti ku Jehovah bi dë gaan mati sö, mbei a bi ko dë wan u dee könu u Isaëli di Jehovah bi möön lobi. Dee Isaëli sëmbë bi lobi ën gaanfa seei, nöö Jehovah bi tei ën kuma wan sëmbë di dee woto könu u Isaëli bi sa ta djeesi.​—1 Kön. 15:11; 2 Kön. 14:1-3.

21. Un wini u ta feni te u ta „djeesi Gadu”, kumafa Efeise 4:24; ku 5:1 ta taki?

²¹ Andi di soni aki ta lei u? Wë di soni aki ta lei u taa u musu ta „djeesi Gadu”. Te u ta du di soni aki, nöö na wini wanwan a ta tja ko da u, ma a ta heepi u fuu ko sabi Gadu möön bunu tu. Te u ta djeesi Gadu a dee fasi dee a abi, nöö u ta lei tu taa u da mii fëën.​—Lesi Efeise 4:24; 5:1.

22-23. Andi o pasa ee u ta du dee soni dee u ta lei u Jehovah?

²² U bi si kaa taa Jehovah ta mbei u ko sabi soni fëën a dee soni dee a mbei, söseei ku di Wöutu fëën, di Bëibel. Di Bëibel ta taki soni u sömëni dinima u Gadu di bi ta djeesi ën. Tu u dee sëmbë aki da Mosesi ku Dafiti. Jehovah hën a seeka soni da u kaa fuu ko sabi ën. A fika da u fuu mbei hii möiti fuu ko sabi möön soni fëën.

²³ Hii juu woo ta lei njunjun soni u Jehovah (Peleik. 3:11). Di sabi di u ta ko sabi te a hia soni u Jehovah an dë di möön fanöudu soni, ma di möön fanöudu soni da andi u ta du ku dee soni dee u ko sabi fëën. Ee u ta du dee soni dee u ta lei, söseei ee u ta mbei möiti fuu ta djeesi di lobi hati Tata fuu, nöö u ku ën o ko dë möön gaan mati (Jak. 4:8). Jehovah ta piki u a di Wöutu fëën taa nöiti a o go disa dee sëmbë dee ta mbei möiti u de ko sabi ën bumbuu.